केन्द्रीय गृह अउ सहकारिता मंत्री अमित शाह ह किहीन हे कि केन्द्र के मोदी सरकार के पाछु नौ बछर भारत के उत्कर्ष अउ गरीब कल्याण के साल रिहीस हे। छत्तीसगढ़ के दुर्ग सहर म आज एक आमसभा ल संबोधित करत ओमन किहीन कि प्रधानमंत्री नरेन्द्र मोदी के अगुवई म केन्द्र के एनडीए सरकार ह पाछु नौ बछर म गरीब मन के कल्याण बर आने-आने काम करे हे। एमा हर गरीब के घर नल ले जल पहुंचाय के संग सौचालय निर्माण, गैस सिलेंडर, पांच किलो मुफ्त अनाज, स्वास्थ्य सुविधा अउ बिजली आपूर्ति जइसन आने-आने कल्याणकारी काम सामिल हे। केन्द्रीय मंत्री ह किहीन कि पाछु नौ साल म मोदी सरकार म भ्रष्टाचार के एको ठन आरोप नइ लगे हे।
छत्तीसगढ़ के कांग्रेस सरकार उपर आरोप लगावत श्री शाह ह किहीन कि ए सरकार के कार्यकाल म सराब घोटाला, कोयला घोटाला, पीएससी घोटाला, जइसन हजारों करोड़ों रूपिया के घोटाला होय हे। ओमन किहीन कि राज्य के कांग्रेस सरकार ह लोगन मनके संग वादाखिलाफी करे हे। विधानसभा चुनाव के दउरान सराबबंदी अ रोजगार समेत जउन वादा करे रिहीन, ओमन ल पूरा नइ करे हे। धान खरीदी के संदर्भ म श्री शाह ह किहीन कि छत्तीसगढ़ म समर्थन मूल्य म खरीदइया नब्बे प्रतिसत धान केन्द्र सरकार डहार ले दे गे चौहत्तर हजार करोड़ रूपिया के रासि ले खरीदे गेहे। केन्द्रीय गृह मंत्री ह आरोप लगईन कि छत्तीसगढ़ म कांग्रेस सरकार के भ्रष्टाचार के सेती लोगन मन ल केन्द्र सरकार के कल्याणकारी योजना मनके घलो समुचित फायदा नइ मिल पावत हे।
अपन दुरूग प्रवास के दउरान केन्द्रीय गृह मंत्री अमित शाह ह पंडवानी गायिका पद्मश्री उषा बारले ले उंखर घर जाके भेंट घलो करीन।
केंद्रीय राज्यमंत्री-बैठक
राष्ट्रीय ग्रामीण आजीविका मिशन के तहत महिला मनके आमदनी बढ़ाए बर राज्य के हर जिला म एक आदर्स पंचायत बनाए जाही। केंद्रीय पंचायत अउ ग्रामीण विकास राज्यमंत्री गिरिराज सिंह ह रइपुर म ग्रामीण विकास अउ पंचायती राज विभाग के अधिकारी मनके संग समीक्षा बइठका म ए जानकारी दीन। ओमन कहीन हे कि माइलोगन मनके आमदनी दस ले पन्द्रह हजार रूपिया तक बढ़ाए बर राष्ट्रीय ग्रामीण आजीविका मिशन के अंतर्गत पंचायत स्तर म रोजगारमुलक काम ल बढ़ावा दे जाही। ए मॉडल के तहत मुर्गीपालन अउ बकरीपालन जइसन गतिविधि बर माइलोगिन मन ल प्रोत्साहित करे जाही। ओमन कहीन हे कि रोजगार के अवसर बढ़ाए बर सुअर पालन व्यवसाय जादा लाभदाई हो सकत हे।
केंद्रीय राज्यमंत्री ह महात्मा गांधी राष्ट्रीय ग्रामीण रोजगार गारंटी योजना के अंतर्गत स्वीकृत काम मन ल घलो आजीविका मिशन के तहत करे के निरदेस दिन हे। ओमन ह बताइन हे कि प्रधानमंत्री आवास योजना के तहत राज्य म ग्यारह लाख छिहत्तर हजार घर बनाय के मंजूरी दे गेहे। एमा ले करीबन आठ लाख बैंसठ हजार घर बन गेहे। उंहे, करीबन सवा तीन लाख घर बनाय के काम चलत हे।
इस्पात मंत्री-दल्ली खदान
केन्द्रीय इस्पात मंत्री ज्योतिरादित्य सिंधिया काली तेईस जून के वीडियो कॉन्फ्रेंसिंग के माध्यम ले दल्लीराजहरा खदान म सिलिका रिडक्शन प्लांट के उद्घाटन करही। भिलाई इस्पात संयंत्र म लौह अयस्क के आपूर्ति बनाय राखे बर दल्ली म मौजूदा संयंत्र के संग ए नवा संयंत्र करीबन डेढ़ सौ करोड़ रूपिया के लागत ले स्थापित करे गेहे। ए संयंत्र के माध्यम ले भिलाई इस्पात संयंत्र ल कम आकार अउ घनत्व वाला लौह अयस्क के आपूर्ति करे जा सकही, जेखर ले ब्लास्ट फर्नेंस के वार्षिक उत्पादन म बढ़ोतरी होही। संगेसंग कोयला के खपत अउ कार्बन उत्सर्जन म कमी घलो आही।
मौसम
प्रदेस म मानसून के हलचल तेज होगे हे। मौसम विभाग के मुताबिक दक्षिण पश्चिम मानसून के अवइया एक दू दिन म पश्चिम बंगाल, ओड़िसा, झारखंड अउ बिहार म पहुंचे के संभावना हे। ए बेरा आंध्र प्रदेस ओड़िसा अउ बंगाल के खाड़ी के उपर एक चक्रीय चक्रवाती घेरा घलो सक्रिय बने हे। ऐखर असर ले अवइया चौबीस घंटा के दउरान प्रदेस म कुछ एक जघा म हल्का ले मध्यम बरसा होय के संभावना हे। उंहे, दंतेवाड़ा अउ बीजापुर जिला मन म एक दू जघा म गरज-चमक के संग भारी बरसा अउ गाज गीरे के चेतावनी दे गेहे हे।
मौसम विभाग के मुताबिक काली रतिहा राजधानी रइपुर समेत कुछ एक जघा मन म तेज बौछार पड़े के सेती आज दिन के तापमान म कमी आए हे। अवइया एक-दू दिन म दिन के तापमान अउ कम होय के संभावना हे।
दुर्घटना
प्रदेस के बालोद, जांजगीर अउ जसपुर जिला म पाछू चोबीस घंटे के दउरान होय आने-आने दुर्घटना म चार झिन मनखे के मउत होगे। उंहे, चार झिन आने मनखे घायल होगे। बालोद जिला के राष्ट्रीय राजमार्ग म मुजालगोंदी गांव के तीर एक कार सड़क के तीर खड़े एक ट्रक ले टकरागे। ए दुर्घटना म कार म बइठे माइलोगिन अउ लइका के मउकच म मउत होगे। उंहे, चार झिन मनखे घायल होगे हे। जेला रइपुर के अस्पताल म भरती कराय गेहे। ए जम्मों रइपुर के एक सिक्ख परिवार के सदस्य आए जउन कांकेर ले रइपुर लहूटत रिहीस।
उंहे, जांजगीर-चांपा जिला झूलन पकरिया गांव म एक युवक के मालवाहक गाड़ी के चपेट म आए ले घटना स्थल म मउत होगे।
ओति, जसपुर जिला के रेडे गांव म ट्रक ह फटफटी सवार युवक ल टक्कर मार दीस, जेखर मउकच म मउत होगे।
राजस्व प्रकरण-शिविर
राजस्व संबंधी मामला के निराकरण बर रईपुर जिला के जम्मों तहसील म बिसेस सिविर लगाय जाही। पहिली सिविर चौबीस जून के धरसीवां म होही। उहें, तीस जून के मंदिर हसौद म अउ छह जुलाई के आरंग म सिविर आयोजित करे जाही। एखर बाद अभनपुर, खरोरा अउ गोबरा-नवापारा म घलो राजस्व सिविर लगाय जाही। ए सिविर म नामांकन, खाता विभाजन, सीमांकन, किसान-किताब अउ जाति प्रमाण पत्र के संगेसंग आय प्रमाण पत्र अउ आने-आने प्रकरण के निराकरण करे जाही।
देखो बस्तर अभियान
प्रदेस म पर्यटन ल बढ़ावा देके उद्देस्य ले ‘‘देखो बस्तर अभियान‘‘ के दूसर चरण अठ्ठारा अउ उन्नीस जून के सिराइस। एखर तहत छत्तीसगढ़ अउ आने आने पड़ोसी राज्य मनके साठ सैलानियों मन ह फटफटी के माध्यम ले बस्तर के आने आने पर्यटन केन्द्र मन के भ्रमण करीन। ए अभियान के माध्यम ले प्रदेस के प्राकृतिक सौन्दर्य अउ ऐतिहासिक धरोहर मन ल विस्व स्तर तक पहुंचाय के कोसिस करे जावत हे। ए आयोजन कांगेर घाटी राष्ट्रीय उद्यान डहार ले छत्तीसगढ़ पर्यटन मंडल अउ बस्तर जिला के प्रसासन के मदद ले करे गीस। ए अभियान के समापन मउका म बस्तर के सांसद दीपक बैज ह किहीन कि बस्तर के प्राकृतिक सुंदरता अउ सांस्कृतिक विरासत बेजोड़ हे। ऐला पर्यटन के विस्व पटल म स्थापित करे के दिसा म देखो बस्तर अभियान एक बिसेस कदम आए।
अउ अब थोरकुन समाचार सार म-
– रेल यात्री मनके सुविधा ल देखत पटना-सिकंदराबाद के बीच समर स्पेशल ट्रेन के अवई-जवई अवइया एक सितंबर तक बढ़ा दे गेहे।
– दंतेवाड़ा जिला के कारली गांव म तरिया म बुड़े ले दू झिन लइका के मउत होगे। उहें, गांव वाले मनके मदद ले एक झिन लइका ल बचा ले गेहे।
– दंतेवाड़ा जिला म समलूर गांव के मुख्य रद्दा म अचानके एक पेड़ के गिरे ले फटफटी म जावत मनखे के मउकाच म मउत होगे। उहें, दू झिन आने लोगन घायल होगे हे।
– जांजगीर-चांपा जिला के वरष्ठि पत्रकार स्वर्गीय कुंजबिहारी साहू के जयंती म छब्बीस जून के बहेराडीह म ‘छत्तीसगढ़ी कवि सम्मेलन के आयोजन करे जाही। ए दउरान स्थानीय महिला समूह के संग गोठबात बर पद्मश्री फूलबासन बाई यादव ल घलो बिसेस रूप ले बलाय गेहे।
अउ
– कोंडागांव पुलिस ह चोरी के आने-आने घटना म सामिल अंतर्राज्यीय गिरोह के आठ सदस्य मन ल गिरफ्तार कर लेहे। पुलिस ह इंखर तीर ले पन्द्रह फटफटी अउ चालीस हजार रूपिया नगद समेत आने-आने सामान जब्त करे हे।