घर बइठे प्रमाण पत्र अउ जरूरी दस्तावेज बनवाय बर चलाए जात ‘‘मुख्यमंत्री मितान योजना‘‘ प्रदेस के जम्मों चवालीस नगर पालिका मन म लागू करे जाही। अभी चौदह नगर निगम म ए योजना चलत हे। अभी तक छियानबे हजार ले जादा झन ए योजना के फायदा उठाय हे। ए योजना के लागू होय ले लोगन ल जरूरी प्रमाण पत्र सरकारी दस्तावेज बनवाय खातिर नगर निगम, तहसील अउ आने सरकारी कार्यालय के चक्कर लगाय के जरूरत नइ पड़य।
भाजपा मुख्यमंत्री निवास घेराव
छत्तीसगढ़ लोकसेवा आयोग-पीएससी भरती म कथित गड़बड़ी ल लेके आज भारतीय जनता युवा मोर्चा कोति ले राजधानी रइपुर म मुख्यमंत्री निवास के घेराव करे के प्रयास करीन। प्रदर्सन करइया मन ल रोके खातिर जघा-जघा बैरिकेट्स लगाय गेहे। ए प्रदर्सन म पार्टी के प्रदेस अध्यक्ष अरूण साव, राष्टी्रय उपाध्यक्ष अउ पूर्व मुख्यमंत्री डॉक्टर रमन सिंह, भाजयुमों के राष्ट्रीय अध्यक्ष तेजस्वी सूर्या, प्रदेस अध्यक्ष रवि भगत के संगेसंग बड़ संख्या म पार्टी कार्यकर्ता सामिल होइन। मुख्यमंत्री निवास घेराव के पहिली एक जनसभा होइस। सभा म बोलत प्रदेस अध्यक्ष अरूण साव ह आरोप लगईन कि पीएससी भर्ती म घोटाला करके राज्य के कांग्रेस सरकार ह प्रदेस के लाखों बेरोजगार युवा मन संग छह करे हे।
उहें, तेजस्वी सूर्या ह किहीन कि भाजपा के सरकार बने म पीएससी जइसन परीक्षा म वीडियोग्राफी कराय के व्यवस्था करे जाही। ओमन आरोप लगईन कि कांग्रेस सरकार ह जवान लइका मनके सपना ल बर्बाद करे के काम करे हे। राज्य म पीएससी पइसा इकट्ठा करइया कंपनी बन चुके हे।
भाजयुमो ह राज्य सेवा परीक्षा परिणाम के उच्च स्तरीय जांच कराय आयोग के अध्यक्ष के संगेसंग सचिव अउ परीक्षा नियंत्रक ल तुरते निलंबित करे अउ उच्च न्यायालय के जज ले जांच कराय जाय के मांग करीन।
प्राथमिक कृषि सहकारी संस्था- हड़ताल समाप्त
प्राथमिक कृषि सहकारी संस्था के करमचारी मनके एक जून ले चलत हड़ताल सिरा गेहे। सहकारिता मंत्री डॉक्टर प्रेमसाय सिंह टेकाम ले काली रइपुर म छत्तीसगढ़ प्रदेस सहकारी करमचारी संघ के प्रतिनिधि मंडल ह अपन मांग के संबंध म गोठबात करीन। डॉक्टर टेकाम ह प्रतिनिधि मंडल ले किसान मनके भलई बर करजा, खातू अउ बीजा बांटे बर तुरते हड़ताल वापिस ले बर समझाइस दीन। जेखर ले प्रतिनिधि मंडल ह हड़ताल वापिस लेके फैसला लीन। डॉक्टर टेकाम ह करमचारी मन ल वेतन नियमित रूप ले मिले के व्यवस्था खातिर अधिकारी मन ल जरूरी कार्यवाही करे के निरदेस दीन। मंत्री ह बताइन कि वेतन म बढ़वार के संबंध म करमचारी मन के सेवा नियम म फेर बदल खातिर अपेक्स बैंक के प्रबंध संचालक के अगुवई म समिति बनाय गेहे। समिति कोति ले रिपोर्ट देके बादे विभाग कोति ले आगू के कार्यवाही करे जाही।
खाद्य और औषधि प्रशासन विभाग -स्पष्टीकरण
खाद्य अउ औषधि प्रसासन विभाग ह केहे हे कि रकम लेके फुड सेफ्टी मित्र बनाए अउ हरेक महिना वेतन दे संबंधी सोशल मीडिया म प्रसारित विज्ञापन गलत हे विभागीय अधिकारी मन ल सूचना मिले रिहीस कि कुछेक निजी कंपनी युवा मन ल फुड सेफ्टी मित्र बनाय के बात कहिके बीस हजार रूपिया ले एक लाख रूपिया तक रकम के मांग करत हे। संगेसंग ओमन ल हर महिना वेतन देके लालच दे जावत हे। अधिकारी मन किहीन कि खाद्य अउ औषधि विभाग प्रशासन ए किसम के कोनो भी विज्ञापन के खंडन करत हे। विभाग ह लोगन ले अपील करीन हे कि ए किसम के कोनो भी लालच वाले विज्ञापन म भरोसा झन करय अउ एखर सिकइत कार्यालय नियंत्रक, खाद्य और औषधि प्रशासन के टेलीफोन नंबर शून्य सात सात एक दू-दू तीन पांच दू-दू छै म या फेर पुलिस म कर सकत हे।
मुख्यमंत्री-लोकार्पण
मुख्यमंत्री भूपेश बघेल ह आज अपन गौरेला- पेण्ड्रा-मरवाही जिला के दउरा के बेरा करीबन पैंतालीस करोड़ रूपिया के आने आने विकास काम के लोकार्पण अउ भूमिपूजन करीन। एमा साढ़े पांच करोड़ रूपिया के लागत ले बनाय गे सोन नदिया म पूल, पहुंचमार्ग, एनीकट अउ स्वामी आत्मानंद अंग्रेजी माध्यम स्कूल सामिल हवय। मुख्यमंत्री ह गौरेला-पेण्ड्रा-मरवाही के प्रेस क्लब भवन के उद्घाटन अउ स्वर्गीय पंडित माधवराव सप्रे प्रतिमा के अनावरण घलो करीन।
आगजनी मौत
कोरबा म आज ट्रांसपोर्ट नगर के निगम काम्प्लेक्स म आगी लगे ले एक माइलोगिन समेत तीन झन के दम घुटे ले मउत होगे उहें, कतकोन झन घायल होगे हे जउन मन ल ईलाज बर अस्पताल म भर्ती कराय गेहे।
खबर के मुताबिक काम्प्लेक्स के उपरी हिस्सा म आज मंझनिया आगी लगे ले अफरा-तफरी मचगे। घटना के सूचना मिलतेच कलेक्टर पुलिस अधीक्षक दमकल के टीम अउ होमगार्ड के जवान मउका म पहुंच के बचाव के काम सुरू करीन। आगी लगे ले काम्प्लेक्स के दस ले जादा दुकान जल गेहे।
सिकलसेल दिवस
आज विस्व सिकलसेल दिवस हरय ए मउका म अंबिकापुर मेडिकल अस्पताल म एक कारीकरम राखे गीस जेमा स्वास्थ्य मंत्री टी.एस. िंसंहदेव सामिल होईन। स्वास्थ्य मंत्री ह लोगन ले बिहाव के पहिली सिकलसेल के जांच कराय बर किहीन कि जेखर ले होवइया लइका के समय रहत बने ईलाज कराय जा सकय। ओमन बताइन कि जिला म चार हजार ले जादा सिकलसेल के मरीज हवय। स्वास्थ्य मंत्री ह किहीन कि अवइया दिन म सिकलसेल मरीज मन बर कारड जारी करे जाही।
माधव राव सप्रे जयंती स्कूल
छत्तीसगढ़ म पत्रकारिता के जनक अउ साहित्यकार पंडित माधव राव सप्रे के आज एक सौ बियानबे जयंती हरय ए मउका म पेण्ड्रा म जिला प्रशासन के मदद ले श्रीकांत वर्मा पीठ बिलासपुर कोति ले व्याख्यान अउ विचारगोष्ठी राखे गीस। ए कारीकरम म मुख्यमंत्री भूपेश बघेल सामिल होइन। ओमन पेण्ड्रा म पंडित माधव राव सप्रे प्रवेस द्वार बनाय के घोषणा करीन। संगेसंग पत्रकार मनबर कालोनी बनाय खातिर कलेक्टर ल जरूरी कार्यवाही के निरदेस दीन। ए संगोष्ठी म देस अउ प्रदेस के साहित्यकार सामिल होइन। एखर पहिली मुख्यमंत्री ह आज अपन निवास कार्यालय म पंडित माधवराव सप्रे के फोटू म फूल माला चढ़ाके ओमन ल सुरता करीन।
अउ अब पेस हे मौसम के हाल..
प्रदेस म अभी भीषण गर्मी पड़त हे। मौसम विभाग ह अवइया चौबीस घंटा म प्रदेस के मध्य अउ उत्तरी भाग के कुछेक जिला म लू चले के संभावना जताय हे।
इही बीच, दक्षिण-पश्चिम मानसून के आगू बढ़े बर अनुकूल परिस्थिति बने हे। जेखर ले अवइया दू दिन दिन म मानसून के दक्षिण भारत के ओड़िसा, झारखंड, बिहार अउ पूर्वी उत्तरप्रदेश म पहुंचे के संभावना हरय, जेखर परभाव ले प्रदेस म काली एक-दू जघा म गरज-चमक संग छींटा बौछार हो सकत हे।
मुख्यमंत्री-गर्मी निर्देश
मुख्यमंत्री भूपेश बघेल ह राज्य म पड़त भीषण गर्मी अउ बरसा म होवत अबेर ल देखत अधिकारी मन ल जरूरी निरदेस दिन हे। ओमन किहीन कि लू अउ गर्मी ले बचाव के व्यवस्था करे के संगेसंग अस्पताल अउ नगरीय निकाय म घलो जरूरी व्यवस्था करे जाय। ओमन यहू किहीन कि अइसन काम करे जाय जेखर ले किसान मन ल बरसा म होवत अबेर ले नकसान झन उठाय बर परय।
अउ अब थोरकुन समाचार सार म-
– लइका मन म रोग प्रतिरोधक क्षमता बढ़ाय बर काली बीस जून के रईपुर के आयुर्वेद महाविद्यालय चिकित्सालय म सोलह बछर तक के लइका मन बर स्वर्ण प्राशन कराय जाही।
अउ
– रायगढ़ जिला के घरघोड़ा दर्री डिपा म आज एक यात्री बस के रेलवे पुल ले टकराय ले बीस ले जादा यात्री घायल होगे, जेमा दू के हालत गंभीर बने हे।