छत्तीसगढ़ म सहायक शिक्षक, शिक्षक अउ व्याख्याता के भर्ती म अतिथि शिक्षक मन ल बोनस अंक दे जाही। लोक शिक्षण संचालनालय ह कहीन कि अतिथि शिक्षक मन बीस जून तक कार्यालयीन समय म बोनव अंक बर अपन प्रमाण पत्र दे सकत हे। निर्धारित तिथि अउ दे गे बेरा के बाद प्रस्तुत प्रमाण पत्र उपर कोनों प्रकार ले विचार नइ करे जाही अउ बोनस अंक दे जाना संभव नइ हो सकही।
खबर के मुताबिक राज्य सरकार के आदेस अनुसार प्रदेस म सिक्षक मनके करीबन साढ़े बारह हजार पद म भर्ती करे जावत हे। सिक्षा विभाग के स्कूल म कार्य करइया अतिथि सिक्षक मन ल हरेक बछर बर दू बोनस अंक अउ जादा ले जादा दस अंक संचालक लोक शिक्षण संचालनालय डहार ले प्रमाण पत्र जारी करे जाय म दे जाही। लोक शिक्षण संचालनालय डहार ले ए संबंध म अतिथि सिक्षक मन ल प्रमाण पत्र जारी करे के प्रक्रिया निर्धारित करत जिला सिक्षा अधिकारी मन ल जरूरी कार्रवाई करे बर केहे गे हवय।
लॉ विश्वद्यिलय-दीक्षांत समारोह
हिदायतुल्लाह नेशनल लॉ यूनिवर्सिटी के छटवा दीक्षांत समारोह काली अट्ठारा जून के होही। नवा रायपुर के ट्रिपल आईटी के सभागार म होवईया दीक्षांत समारोह म कुल एक सौ बावन विद्यार्थी मन ल बी.ए., एल.एल.बी. के डिग्री दे जाही। उहें, पचपन छात्र मन ल एल.एल.एम. की उपाधि घलो दे जाही। एखर अलावा विश्वविद्यालय के दू अध्यापक मन ल पीएचडी घलो दे जाही। दीक्षांत समारोह के मुख्य अतिथि सर्वोच्च न्यायालय के पूर्व न्यायाधीश जस्टिस एम.आर. शाह होहीं। जस्टिस शाह ए मउका म दीक्षांत उद्बोधन घलो दिही। उहें, सर्वोच्च न्यायालय के न्यायधीश और विश्वविद्यालय के कुलाध्यक्ष न्यायमूर्ति अनिरूध्द बोस दीक्षांत समारोह के अध्यक्षता करही। समारोह के दउरान विश्वविद्यालय के कुलाधिपति अउ छत्तीसगढ़ उच्च न्यायालय के मुख्य न्यायाधीश रमेश सिन्हा विद्यार्थी मन ल डिग्री दीहि। ए मउका म मुख्यमंत्री भूपेश बघेल बिसेस अतिथि के रूप म मौजूद रइही।
दीक्षांत समारोह के मउका म तेरह झन स्नातक अउ तीन स्नातकोत्तर विद्यार्थी मन ल उंखर उपलब्धि बर छत्तीस ठन स्वर्ण पदक घलो दे जाही। दीक्षांत समारोह के सीधा प्रसारण एच.एन.एल. यू. के यूट्यूब चैनल म करे जाही।
मन की बात
प्रधानमंत्री काली बिहनिया ग्यारह बजे आकाशवाणी म ‘‘मन की बात‘‘ कारीकरम म देस-विदेस के लोगन संग अपन विचार साझा करही। मासिक रेडियो कारीकरम के ए ह एक सौ दो वां कड़ी होही। ए कारीकरम आकाशवाणी, दूरदर्शन अउ नरेन्द्र मोदी मोबाइल ऐप जम्मों नेटवर्क ऐप म प्रसारित करे जाही। आकाशवाणी, दूरदर्शन समाचार अउ सूचना अउ प्रसारण मंत्रालय के यू-ट्यूब चैनल म घलो ए कारीकरम के सीधा प्रसारण करे जाही। मन की बात कारीकरम के हिन्दी प्रसारण के तुरते बाद क्षेत्रीय भाखा मन म घलो एला प्रसारित करे जाही।
अंतर्राष्ट्रीय योग दिवस
अवइया इक्कीस जून के अंतर्राष्ट्रीय योग दिवस के मउका म प्रदेस के सहर अउ गांव म आने-आने कारीकरम कराय जाही। ए बखत ‘‘एक विश्व-एक स्वास्थ्य‘‘ बिसय उपर केन्द्रित कार्यक्रम होही। एखर माध्यम ले ‘हर घर आंगन योग‘ के संदेस दे जाही।
ऐति, राजनांदगांव जिला म घलो योगाभ्यास के मुख्य आयोजन बसंतपुर के कृषि उपज मंडी परिसर म करे जाही। तैयारी के संबंध म नगर निगम ल जरूरी निरदेस दे गे हवय। उहें, ग्रामीण क्षेत्र म जनपद पंचायत के माध्यम ले एखर तैयारी करे जावत हे। गांव के प्रमुख जगह के अलावा आंगनबाड़ी केन्द्र मन म घलो योगाभ्यास करे जाही।
उहें, केन्द्रीय सूचना अउ प्रसारण मंत्रालय के केन्द्रीय संचार ब्यूरो प्रादेशिक कार्यालय रईपुर डहार ले उन्नीस ले इक्कीस जून तक नगर पालिक निगम मंगलभवन बीरगांव म अंतर्राष्ट्रीय योग दिवस अउ आजादी के अमृत महोत्सव उपर तीन दिन के चित्र प्रदर्शनी लगाय जाही। आम लोगन ए चित्र प्रदर्सनी ल बिहनिया साढ़े दस बजे ले संझा साढ़े छह बजे तक दे सकत हे। तीन दिन के ए प्रदर्सन के दउरान जागरूकता रैली, चित्रकला, रंगोली, भाषण, देशभक्ति गीत, नृत्य प्रतियोगिता अउ योगाभ्यास कराय जाही।
भाजपा महाजनसंपर्क/कांग्रेस प्रशिक्षण सम्मेलन
प्रधानमंत्री नरेन्द्र मोदी के अगुवई वाले केन्द्र के एनडीए सरकार के नौ बछर पूरा होय म सक्ती जिला भाजपा कार्यालय म वरिष्ठ कार्यकर्ता सम्मेलन अउ सम्मान समारोह के आयोजन करे गीस।
ए मउका म कार्यकर्ता मन ल गमछा अउ कमल के फूल भेंट करे गीस।
उहें, मालखरौदा के सद्भावना भवन म घलो लाभार्थी सम्मेलन के आयोजन करे गीस। कारीकरम म साढ़े तीन सौ ले जादा लोगन के सम्मान करे गीस।
दूसर कोति, कांग्रेस डहार ले दुरूग जिला के पाटन म आज विधानसभा कार्यकर्ता प्रशिक्षण कार्यक्रम के आयोजन करे गीस, जेमा मुख्यमंत्री भूपेश बघेल घलो सामिल होइन।
महिला आरोपी गिरफ्तार
सोसल मीडिया म वायरल वनरक्षक भर्ती बर पइसा के मांग करे के मामला म तेलीबांधा थाना पुलिस ह अमलीडीह के एक झिन माईलोगिन ल गिरफ्तार करे हे। राज्य सरकार डहार ले आने-आने विभाग के खाली पद म भर्ती बर आरोपी महिला ह लोगन ल नौकरी के साझा देवत अपन सिकार बनावत रिहीस।
वन परिक्षेत्र रईपुर म काम करइया अधिकारी ह तेलीबांधा थाना म ए बारे म रिपोर्ट दर्ज कराय रिहीन, जेखर बाद ओला गिरफ्तार करे गीस। आरोपी तीर ले लैपटॉप, कम्प्यूटर, आवेदन पत्र, मोबाइल फोन अउ रजिस्टर संघरा दूसर दस्तावेज जब्त करे गेहे।
कांगेर घाटी-कार्यशाला
बस्तर के कांगेर घाटी राष्ट्रीय उद्यान म वैश्विक धरोहर के रूप म बढ़ाए जाए के संभावना उपर कार्यसाला कराय गीस। राष्ट्रीय उद्यान के डायरेक्टर धम्मशील गणवीर ह बताइन कि कार्यसाला म कांगेर घाटी राष्ट्रीय उद्यान के वैश्विक विरासत के नामांकन बर कतकोन बिंदु उपर चर्चा करे गीस। संगेसंग कांगेर घाटी राष्ट्रीय उद्यान के गुफाओं मनके विविधता अउ ओखर संरचना ले पृथ्वी के इतिहास के अध्ययन उपर बिचार राखे गीस। उहें, राष्ट्रीय उद्यान के अनोखा जैव विविधता उपर जूलॉजिकल सर्वे ऑफ इंडिया के विशेषज्ञ मन ह ह जानकारी साझा करीन।
व्याख्यानमाला
राष्ट्रीय स्वयंसेवक संघ के पांचवा सरसंघचालक कुप्पाहाली सीतारमैया सुदर्शन के पुण्य स्मृति म काली अट्ठारह जून के श्री सुदर्शन प्रेरणा मंच डहार ले रईपुर म व्याख्यानमाला के आयोजन करे जाही। एमा सुप्रीम कोर्ट के वकील अश्विनी उपाध्याय अपन विचार राखही। कारीकरम क राजराज्य के कल्पना उपर आधारित विचार के बारे म चर्चा करे जाही।
आयुष्मान कार्ड पंजीयन
रायपुर जिला के ग्रामीण क्षेत्र म अवइया उन्नीस ले इक्कीस जून तक आयुष्मान कार्ड पंजीयन बर तीन दिन के महाअभियान चलाय जाही। ए दउरान छूटे हुए पात्र रासनकार्ड हितग्राही मनके आयुष्मान कार्ड के पंजीयन करे जाही। जिला पंचायत के मुख्य कार्यपालन अधिकारी अविनाश मिश्रा ह बतईन कि सबो जनपद म ग्राम अउ पंचायतवार सिविर लगाके अउ घर-घर जाके छूटे हुए पात्र रासनकार्डधारी हितग्राही मनके आयुष्मान कार्ड के पंजीयन करे जाही।
जिले की चिट्ठी
प्रादेशिक समाचार एकांश, आकाशवाणी रायपुर डहार ले प्रस्तुत कार्यक्रम ‘‘जिले की चिट्ठी‘‘ के प्रसारण काली संझा छै बजकर पांच मिनट ले छै बजकर दस मिनट तक करे जाही। ए कार्यक्रम ल छत्तीसगढ़ के आकाशवाणी के सबों केन्द्र मन ह रिले करही। ए बखत के अंक म ‘‘सरगुजा‘‘ जिला के गतिविधि के बारे म जानकारी दे जाही।
हल्बी/गोण्डी-समाचार बुलेटिन
सुनईया मन ल बतादन कि ‘हल्बी‘ अउ ‘गोण्डी‘ बोली म समाचार बुलेटिन प्रसारित करे जाही। ए दूनों बुलेटिन ल आकाशवाणी केन्द्र जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे प्रसारित करे जाही।