गेहूं स्टॉक लिमिट
केंद्र सरकार डहार ले राज्य मन ल देगे आदेश के परिपालन म छत्तीसगढ़ सरकार ह गेहूं के स्टॉक लिमिट के निर्धारण कर देहे। खाद्य नागरिक आपूर्ति अउ उपभोक्ता संरक्षण विभाग कोति ले ए आशय के पत्र प्रदेश के जम्मों कलेक्टर मन ल जारी कर दे गेहे।
एखर अनुसार थोक विक्रेता बर तीन हजार टन के स्टॉक लिमिट तय करे गेहे। अइसने रिटेलर बर दस टन अउ ओखर जम्मों डिपो म तीन हजार टन स्टॉक लिमिट के निर्धारण करे गेहे। पत्र म कहे गेहे कि स्टॉक सीमा बर संबंधित विधिक इकाई केंद्र सरकार के पोर्टल म स्टॉक के स्थिति के घोषणा करही। संबंधित व्यापारिक संस्थान मन ल हरएक शुक्रवार के स्टॉक के जानकरी देबर कहे गेहे।
प्रधानमंत्री नरेंद्र मोदी ए महीना के अठारा तारीख के आकाशवाणी ले ‘‘मन की बात‘‘ कारीकरम म देस-विदेस के लोगन मन संग अपर विचार साझा करही। श्री मोदी ए कार्यक्रम बर देशवासी मनले सुझाव मांगीन हे। एक ट्वीट म ओमन कीहिन कि देशवासी मनके सुझाव हमेशा अच्छा होथे। नमो ऐप अउ माई जीओवी म सुझाव भेजे के आज आखरी दिन हे।
प्रदेश म उप निर्वाचन के तहत नगरीय निकाय मन म खाली आठ वार्ड पार्षद पद बर अवइया सत्ताईस जून के मतदान होही। मतदान के समय मतदाता पहचान पत्र के रूप म मतदाता परिचय पत्र बैंक या डाकघर के फोटोयुक्त पासबुक, पासपोर्ट, पैन कार्ड, आधार कार्ड, फोटोयुक्त राशन कार्ड, फोटोयुक्त पेंशन दस्तावेज, मनरेगा जॉब कार्ड, फोटोयुक्त स्वास्थ्य बीमा योजना कार्ड अउ ड्राइविंग लाइसेंस समेत अठारा प्रकार के दस्तावेज के उपयोग कर सकत हे। एमा ले कोनो एक दस्तावेज ल मतदान केंद्र के पीठासीन अधिकारी के आगू प्रस्तुत कर अपन मताधिकार के प्रयोग कर सकत हे।
उंहे त्रिस्तरीय पंचायत चुनाव मनके जिला पंचायत, जनपद पंचायत सदस्य, सरपंच, पंच के एक सौ अंठानवे सीट म उपनिर्वाचन बर घलो अवइया सत्ताईस जून के मतदान होही। एला देखत संबंधित निर्वाचन क्षेत्र म मतदान समाप्ति के अड़तालिस घंटा पहिली ले लेके सत्ताईस जून मतगणना समाप्ति तक शुष्क दिवस घोषित करे गेहे।
प्रदेश म पाछू पंद्रह मई ले चालू पटवारी मनके हड़ताल समाप्त होगे। जनहित म काम प्रभावित होय के हवाला देवत पटवारी मन अपन हड़ताल काली लहुटा लीन। हड़ताल सिराय के बाद पटवारी संघ के पदाधिकारी मन मुख्यमंत्री भूपेश बघेल ले ओखर निवास कार्यालय म मुलाकात करीन।
इही बीच, मुख्यमंत्री ह पटवारी मन ल ओमन के हड़ताल के सेती रूके काम मन ल तुरते निपटाय के निर्देश देहे। मुख्यमंत्री ह कीहिन कि छात्र अउ युवा वर्ग के काम ल तत्परता ले करंय। एखरे संग मुख्यमंत्री ह मुख्य सचिव ल घलो पटवारी मनके हड़ताल के सेती बाधित काम मन ल जल्दी पूरा करे के निर्देश दीन।
नई दिल्ली म काली जनजातीय कार्य मंत्रालय डहार ले विशेष रूप ले कमजोर जनजातीय समुदाय के लोगन मन बर सम्मेलन के आयोजन करे गीस। सम्मेलन म छत्तीसगढ़ के आने आने जिला म रहइया पांच विशेष पिछड़ी जनजाति बैगा, पहाड़ी कोरवा, बिरहोर, कमार अउ अबूझमाड़िया के अस्सी सदस्यीय प्रतिनिधि मंडल घलो सामिल होइस। ए दउरान प्रतिनिधि मंडल ह राष्ट्रपति द्रौपदी मुर्मू ले राष्ट्रपति भवन म भेंट-मुलाकात करीन। राष्ट्रपति ह ए मउका म छत्तीसगढ़ के जम्मों जनजातीय समुदाय के लोगन मनले सीधा संवाद करीन अउ ओखर संस्कृति रीति-रिवाज मन ल जानीन ।
ए मउका म छत्तीसगढ़ ले गे जम्मों जनजाति के लोगन मन राष्ट्रपति के बैगा जनजाति मनके विशेष श्रृंगार बिरनमाला ले स्वागत करीन। ओखर बाद संसद भवन के विचरण करीन अउ संघरा लोकसभा अध्यक्ष ओम बिड़ला ले घलो मुलाकात करीन।
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत अंतर्राष्ट्रीय योग दिवस म केंद्रित रीही । ए संबंध म छत्तासगढ़ योग आयोग के अध्यक्ष ज्ञानेश शर्मा ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली सत्रह जून के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
प्रदेश के हरएक विकासखंड मुख्यालय म मॉडल जैतखाम के स्थापना करे जाही। मुख्यमंत्री भूपेश बघेल ह सतनामी समाज के नव निर्वाचित पदाधिकारी मनके शपथ ग्रहण समारोह म ए घोषणा करीन। ए मउका म मुख्यमंत्री ह कीहिन कि छत्तीसगढ़ सरकार संत-महात्मा मनके बताय रद्दा म चलके जनता के हित म सरलग काम करत इंहा के सांस्कृतिक परंपरा ल पुर्नजीवित करे के प्रयास करत हे।
मुख्यमंत्री ह कहिन कि बाबा गुरू घासीदास जी के संदेस हमेशा प्रासंगिक रइहीं। ओमन राज्य सरकार के योजना के जानकारी देवत ओखर लाभ लेके आगू बढ़े के अपील करीन।
मुख्यमंत्री भूपेश बघेल ह खरीफ सीजन ल देखत किसान ल ओमन के मांग के अनुरूप मानक स्तर के खाद-बीज के उपलब्धता सुनिश्चित करे के निर्देश दीन हे। मुख्यमंत्री ह कहिन कि खरीफ सीजन के शुरूआत होगे हे। किसान मन ल अच्छा गुणवत्ता के खाद अउ अच्छा किसम के बीज समय म मिले के जिम्मेदारी हमर हे। एमा कोनो भी तरह के कमी या लापरवाही नइ होना चाही।
ओति मुख्यमंत्री के निर्देश के बाद कृषि विभाग ह विक्रेता संस्थान मनले सैंपल लेना शुरू कर देहे। विभागीय अधिकारी विक्रेता मनले बीज-खाद अउ कीटनाशक औषधि मनके सैंपल लेवत हे, जेखर जांच गुणवत्ता नियंत्रण प्रयोगशाला म करे जात हे।
उंहे, कृषि विभाग ले मिले जानकारी के अनुसार गुणवत्ता नियंत्रण प्रयोगशाला म मिले रिपोर्ट म बीज के सोला, उर्वरक के चौदा अउ पौध संरक्षण औषधि के तीन सैंपल अमानक पाय गेहे। अमानक पाये गे सैंपल के लाट के बिक्री म तत्काल प्रभाव ले प्रतिबंध लगा दे गेहे। एखरे संग संबंधित फर्म के संचालक मन ल नोटिस जारी करके जवाब मांगे गेहे।
नगरीय प्रशासन अउ विकास विभाग, यूनिसेफ अउ केंद्र सरकार के आवास अउ शहरी कार्य मंत्रालय के संयुक्त तत्वावधान म नवा रायपुर म यूस्ड वॉटर फीकल स्लज प्रबध्ांन विसय म दू दिन के राष्ट्रीय कार्यशाला के आयोजन करे गीस। नगरीय प्रशासन मंत्री डॅाक्टर शिवकुमार डहरिया ह ए कार्यशाला के शुभारंभ करीन।
कार्यशाला म हरियाणा, महाराष्ट्र अउ ओडिशा राज्य के प्रतिनिधि मन ओमन के राज्य के नगरीय निकाय म फीकल स्लज अउ यूस्ड वॉटर मैनेजमेंट के क्षेत्र म होवत काम ल विस्तार ले समझाईन संघरा सेंट्रल पब्लिक हेल्थ एंड इंजीनियरिंग संस्था ह घलो प्रस्तुती दीस। मध्यप्रदेश, तेलंगाना, उत्तरप्रदेश, असम सिक्किम अउ यूनिसेफ के प्रतिनिधि मन संग पैनल डिस्कशन घलो करे गीस। कार्यशाला के दूसरा दिन आज रायपुर के निमोरा स्थित सीवरेज ट्रीटमेंट प्लांट अउ कुम्हारी नगर पालिका के एफ.एस.टी.पी. के साइट विजिट करे गीस।
जांजगीर-चांपा जिला के ग्राम सिवनी म होय दू मालवाहक के बीच जोरदार टक्कर के बाद ओमा आगी लग गीस। ए दुर्घटना म एक वाहन के चालक अउ परिचालक के जिंदा जले ले मउत हेगे, उंहे दूसर वाहन के चालक अउ परिचालक मन कूदके अपन जान बचाइन। सूचना म पहुंचे फायर ब्रिगेड के दू गाड़ी के मदद ले आगी उपर काबू पाय गीस। ए दउरान लगभग दू घंटा अवई जवई बाधित रीहिस।