जी-ट्वेंटी कृषि मंत्री मनके बइठका आज हैदराबाद म शुरू होगे । केंद्रीय कृषि अउ किसान कल्याण राज्यमंत्री कैलाश चौधरी ह ए मउका म भारत के कृषि तकनीक प्रदर्शनी के औपचारिक उद्घाटन करीन। श्री चौधरी ह कहिन हे कि आधुनिक प्रौद्योगिकी किसान मन बर बहुते सहायक साबित होही। ए तीन दिवसीय बइठका म कृषि, विश्व खाद्य अउ पोषण सुरक्षा जइसे आने आने मुद्दा मन उपर गोठबात होही।
अवइया इकतीस जून के अंतर्राष्ट्रीय योग दिवस के मउका म प्रदेश के शहर अउ गांव मन म आने आने कार्यक्रम आयोजित करे जाही। ए बखत एक विश्व- एक स्वास्थ्य के विषय उपर योग ले जुड़े कार्यक्रम करे जाही। ए कार्यक्रम के माध्यम ले हर घर-आंगन योग के संदेस दे जाही।
छत्तीसगढ़ योग आयोग के अध्यक्ष ज्ञानेश शर्मा ह बताइन कि अंतर्राष्ट्रीय योग दिवस के मउका म प्रमुख सार्वजनिक अउ ऐतिहासिक महत्व के जगा मन म लोगन मनके जादा ले जादा भागीदारी के संग सामूहिक योग अभ्यास के आयोजन करे जाही। संगेसंग आंगनबाड़ी, बाल आश्रम, वृद्धाश्रम अउ सार्वजनिक उपक्रम के संग सरकार के जम्मों विभाग मन म घलो योग के कार्यक्रम होही। एमा स्थानीय जनप्रतिनिधि मनके संग सामाजिक संस्था के कार्यकर्ता मन ल घलो सामिल करे जाही। ओमन बताइन कि जिला स्तर म होवइया ए कार्यक्रम बर कलेक्टर ल नोडल अधिकारी बनाय गेहे।
एक भारत-श्रेष्ठ भारत योजना के तहत छत्तीसगढ़ अउ नागालैंड के बीच युवा संगम कार्यक्रम के आयोजन करे जात हे । ए कार्यक्रम के दूसर चरण आज एनआईटी रायपुर म शुरू होइस। कार्यक्रम म सामिल होय बर नागालैंड के दल आज रायपुर पहुंचीन। ए दल म बंयालिस छात्र अउ चार प्राध्यापक मन सामिल हे। ए मउका म माइपहुना के रूप म मौजूद रायपुर के संभाग आयुक्त डॅाक्टर संजय अलंग ह आमंत्रित विद्यार्थी मनल छत्तत्तीसगढ़ के इतिहास के जानकारी दीन।
प्रदेश के आदिम जाति अउ अनुसूचित जाति विकास मंत्री डॅाक्टर प्रेमसाय िंसंह टेकाम ह वन अधिकार पत्र वितरण के प्रकरण म तेजी लाये के निर्देश दीन हे। राजधानी रायपुर म आदिम जाति अनुसंधान अउ प्रशिक्षण संस्थान म सहायक आयुक्त अउ परियोजना प्रशासक मन ल संबोधित करत डॅाक्टर टेकाम ह कहिन कि विशेष पिछड़ी जनजाति समूह के वन अधिकार पट्टाधारी मन ल जम्मों विभागीय योजना मनके फायदा देवाय जाय।
ओमन सामुदायिक वन अधिकारी अउ वन संसाधन अधिकार पत्र के संग वन अधिकार पट्टा मिलइया हितग्राही मन ल मनरेगा अउ आने आने योजना के तहत निर्धारित काम म प्राथमिकता दे जाय के घलो बात कीहिन । संगेसंग जउन गांव मन म वन अधिकार के जादा पट्टा दे गेहे, ओला आदर्श गांव घोषित करके विशेष पिछड़ी जनजाति समूह बर विकास काम कराए जाये।
छत्तीसगढ़ संस्कृत विद्यामंडलम के अध्यक्ष डॅाक्टर सुरेश कुमार शर्मा ह कक्षा ग्यारहवीं म प्रवेश लेवइया विद्यार्थी मनले आग्रह करीन कि ओमन छत्तीसगढ़ माध्यमिक शिक्षा मंडलम के पाठ्यक्रम के मुताबिक भाषा समूह म हिंदी के अलावा अंग्रेजी अउ संस्कृत म ले कोनो दू भाषा के विकल्प म संस्कृत के चयन करय। ओमन कीहिन कि कला संकाय म प्रवेश लेवइया विद्यार्थी संस्कृत ल एक विषय के रूप म चुनके एखर पढ़ई कर सकत हे। काबर कि पाठ्यक्रम के प्रावधान के तहत अंग्रेजी के संग संस्कृत के पढ़ाई घलो करे जा सकत हे।
प्रदेश म नशामुक्ति बर जन जागरण अभियान शुरू करे जाही। ए अभियान ल सफल बनाये बर नशामुक्ति के क्षेत्र म काम करइया मनखे अउ संस्था मनले सुझाव ले जाही। संगेसंग गैर सरकारी संस्था सामाजिक, धार्मिक अउ सांस्कृतिक संगठन मनले घलो मदद ले जाही। ए संबंध म मुख्यमंत्री भूपेश बघेल ह मुख्य सचिव ल जरूरी निर्देश दीन हे।
मुख्यमंत्री ह समाज कल्याण विभाग ल एक महीना म नशामुक्ति जन-जागरण अभियान के विस्तृत कार्ययोजना पेस करे बर कीहिन हे। ओमन कीहिन कि नशा एक अइसन गंभीर सामाजिक बुराई हे, जेखर ले मनखे मन ह गंभीर बीमारी के चपेट म आ जाथे। ओमन कहिन कि नशा बर लोगन डहार ले आने आने प्रकार के मादक पदार्थ के सेवन करे जाथे, जेखर ले अकाल मउत के खतरा बाढ़ जाथे।
मुख्यमंत्री ह कीहिन कि राज्य सरकार ह घलो एला रोके के कोसिस करत हे। फेर ए अभियान ल सफल बनाये बर आम लोगन मन ल एखर ले जोड़ना जरूरी हे। बताय गेहे कि नशा के खिलाफ विद्यार्थी मन ल जागरूक बनाये बर शैक्षणिक संस्था मन म संगोष्ठी समेत आने आने कार्यक्रम घलो राखे जाही।
प्रदेश म आदिम जाति अउ अनुसूचित जाति विकास विभाग के अंतर्गत संचालित प्रयास आवासीय विद्यालय के विद्यार्थी मन ह चिकित्सा संबंधी राष्ट्रीय प्रवेश परीक्षा- नीट म सुघ्घर प्रदर्शन करे हे। ए बछर नीट परीक्षा म सामिल प्रयास आवासीय विद्यालय के पांच सौ बहत्तर मन ले दू सौ दस विद्यार्थी मन ह क्वालीफाई करे हे। एमा ले बारा झिन विद्यार्थी मन ल स्नातक पाठ्यक्रम एमबीबीएस म प्रवेश मिले के संभावना हे। अइसने प्री-मेडिकल अउ प्री-इंजीनियरिंग परीक्षा बर ड्रॅापर बैच के पच्यासी मन ले सत्ताईस छात्र मन ल घलो एमबीबीएस म प्रवेश मिले के संभावना हे।
मुख्यमंत्री भूपेश बघेल अउ आदिम जाति विकास मंत्री डॅाक्टर प्रेमसाय सिंह टेकाम ह विद्यार्थी मन ल ए उपलब्धि बर बधाई दीन हे।
प्रदेस म आज ले मलेरिया मुक्त अभियान के संग सघन कुष्ठ खोज अभियान अउ राष्ट्रीय नेत्र ज्योति अभियान सुरू होगे हे। मलेरिया मुक्त अभियान के आठवां चरण म प्रदेस के तेईस ठिन जिला म एखर जांच करे जाही। ए दउरान स्वास्थ्य विभाग के टीम कोति ले करीबन बाइस लाख लोगन मन के जांच के लक्ष्य राखे गेहे । उंहे प्रदेस के जम्मों तैंतीस ठिन जिला म सघन कुष्ठ खोज अभियान अउ राष्ट्रीय नेत्र ज्योति अभियान ल संघरा चलाय जाही। ए बेरा म कुष्ठ रोगी मनके चिन्हारी करके हुए जांच अउ ओखर ईलाज करे जाही।
रेलवे समपार फाटक मन ल सुरक्षित पार करे अउ एखर ले जुड़े सावधानी के प्रचार-प्रसार बर पाछू एक हप्ता ले जागरूकता अभियान चलाये जावत हे। एखर तहत आज रायपुर रेलमंडल कार्यालय परिसर म वाकेथॉन अउ नुक्कड़ नाटक के आयोजन करे गीस।
– प्रधानमंत्री नरेंद्र मोदी ए महीना के अठारा तारीख के मन की बात कार्यक्रम के अंतर्गत देशवासी मनले अपन विचार साझा करही। एक ट्वीट के जरिया प्रधानमंत्री ह अपन ए कार्यक्रम बर देशवासी मनले सुझाव मांगे हे।
– छत्तीसगढ़ व्यावसायिक परीक्षा मंडल डहार ले प्री-बी.एड अउ प्री डीएलएड प्रवेश परीक्षा सतरा जून के दू पाली म ले जाही। इही दिन सहायक पशु चिकित्सा क्षेत्र के अधिकारी के पद मन भर्ती परीक्षा घलो होही। एखर बर प्रवेश पत्र व्यावसायिक परीक्षा मंडल के वेबसाईट ले डाउनलोड करे जा सकत हे।
– मनेन्द्रगढ़-चिरमिरी-भरतपुर जिला म सिद्धबाबा घाट उपर बस के टक्कर ले दुपहिया सवार मनखे के मउकाच म मउत होगे। पुलिस ह बस ल जब्त करके मामला के जांच शुरू कर देहे।