प्रधानमंत्री नरेंद्र मोदी ह रोजगार मेला म आज विडियो कॉन्फ्रेसिंग करत हुए सत्तर हजार नवा नियुक्त करमचारी मन ल नियुक्ति पत्र बाटिन। ओमन ह ए बेरा म करमचारी मन ल संबोधित घलो करीन। प्रधानमंत्री ह कहिन कि भारत ह आज एक दसक पहिली के मुकाबला म अउ जादा मजबूत, सुरक्षित अउ सक्तिसाली देस हरय। ओमन ह कहिन कि भारत ह अपन राजनीतिक स्थिरता, दृढ़संकल्प सरकार अउ प्रगति से सुधार बर जाने जाथे। प्रधानमंत्री ह कहिन कि आज पूरा दुनिया ह भारत देस के विकास यात्रा के भागीदार बने बर उत्सुक हवय। ओमन ह ए घलो कहिन कि भारत के अर्थव्यवस्था नवा बुलंदी म हवय। देस म विदेसी निवेस के बाद उत्पादन विस्तार अउ नवा उद्योग के स्थापना म तेजी आए हे। संगेसंग निर्यात ल घलो बढ़ावा मिले हे। इंही कड़ी म आज राजधानी रायपुर म घलो रोजगार मेला के आयोजन करे गीस। ए बेरा म एक सौ चौरासी अभ्यर्थी मन ल नियुक्ति पत्र बांटे गीस।
ए कार्यक्रम ल संबोधित करत हुए केंद्रीय जनजातीय कार्य राज्यमंत्री रेणुका सिंह जवान लइका मन ल आह्वान करीन कि ओमन ह लोगन मन के समस्या के समाधान करय। बेकारी अउ बीमारी ले मुक्त भारत बनाय म अपन योगदान देवय। ए कार्यक्रम ल रायपुर सांसद सुनील सोनी अउ विधायक बृजमोहन अग्रवाल ह घलो संबोधित करीन।
जानबा के अनुसार ए रोजगार मेला के आयोजन भारतीय स्टेट बैंक डहार ले अखिल भारतीय आयुर्विज्ञान संस्थान एम्स रायपुर के सभागृह म करे गे रिहीस। जेमा भारतीय स्टेट बैंक अउ केंद्र सरकार के कतकोन विभाग म नव नियुक्त अभ्यर्थी मन ल नियुक्ति पत्र सौंपे गीस।
मुख्यमंत्री-समारोह
मुख्यमंत्री भूपेश बघेल ह आज अंबिकापुर म चलत विशेष पिछड़ी जनजाती अउ वन अधिकार पत्र वितरण कार्यक्रम म सामिल होइन। अंबिकापुर के पीजी कॉलेज म होवत ए कार्यक्रम म मुख्यमंत्री ह लगभग छै सौ पचास झिन हितग्राही मन ल लाभान्वित करे हे। एमा एक सौ तीन झिन लोगन ल शिक्षक नियुक्ति पत्र एक सौ तिरानबे झिन हितग्राही मन ल वन अधिकार पट्टा अउ सौ लोगन मन ल आयुष्मान कार्ड बांटे गीस। एखर संगेसंग उनचालिस झन लोगन मन ल स्वामी आत्मानंद विद्यालय के शिक्षक मन बर नियुक्ति पत्र सौंपे गेहे। उंहे मुख्यमंत्री ह सौ झिन किसान मन ल एटीएम कार्ड, पचास झिन किसान ल मिलेट के बीज, अउ दस झिन किसान ल स्प्रेयर बांटीन।
ए बेरा म कार्यक्रम ल संबोधित करत मुख्यमंत्री ह कहिन कि हमर सरकार ह गांव, किसान, आदिवासी, मजदूर, अउ माइलोगिन मनके सशक्त्किरण बर काम करत हे। ओमन ह कीहिन हे कि राज्य सरकार ह हर वंचित लोगन मन तक उंखर सामाजिक अउ आर्थिक अधिकार पहुंचाय के काम करे हे।
विस मानसून सत्र
छत्तीसगढ़ विधानसभा के मानसून सत्र ह अठारा जुलाई ले शुरू होवइया हे, जउन कि इक्कीस जुलाई तक सरलग चलही। ए सत्र म कुल चार ठिन बइठका होही। जेमा वित्तीय काम के संगेसंग आने-आने शासकीय काम करे जाही।
मलेरिया मुक्त अभियान
छत्तीसगढ़ म पंद्रा जून ले मलेरिया मुक्त अभियान के संगेसंग सघन कुष्ठ खोज अभियान अउ राष्ट्रीय नेत्र ज्योति अभियान सुरू होहीं। मलेरिया मुक्त अभियान के आठवा चरण म प्रदेस के तेईस ठिन जिला म एखर जांच करे जाही। ए बेरा म स्वास्थ्य विभाग के टीम कोति ले करीबन बाइस लाख लोगन मन के जांच होना हे। उंहे प्रदेस के सबों तैंतीस ठिन जिला म सघन कुष्ठ खोज अभियान अउ राष्ट्रीय नेत्र ज्योति अभियान ल संघरा चलाय जाही। ए बेरा म कुष्ठ रोगी मनके पहिचान करत हुए जांच अउ ओखर ईलाज करे जाही।
महामारी नियंत्रण के संचालक डॉक्टर सुभाष मिश्रा ह बताइन कि दस जुलाई तक चलइया मलेरिया मुक्त अभियान बर प्रदेस भर म दू हजार आठ सौ चउवन ठिन टीम के गठन करे गेहे। ओमन ह बताइन कि बस्तर संभाग के सबों सात जिला के संगेसंग प्रदेस के तेईस ठिन जिला म पच्चीस दिन तक ए अभियान चलाय जाही।
शाला प्रवेश उत्सव
प्रदेसभर के स्कूल म सोला जून ले पन्द्रा जुलाई तक साला प्रवेश उत्सव मनाय जाही। ए बेरा म लइका मनके प्रवेश के संगेसंग कतकोन गतिविधि के आयोजन होही। एक महीना तक चलइया ए साला प्रवेस उत्सव के सुरूवाती दस दिन बर जनभागीदारी सुनिश्चित करत हुए। विसेस कार्यक्रम होही। पहिली दिन सबों स्कूल म मुख्यमंत्री भूपेश बघेल अउ स्कूल शिक्षामंत्री डॉक्टर प्रेमसाय सिंह टेकाम के संदेस के वाचन करे जाही। उंहे जनप्रतिनिधि डहार ले नवा लइका मनके स्वागत करे के संगेसंग कतकोन पठन सामग्री बांटे जाही । त उंहे ए बेरा म लइका मन कोति ले सांस्कृतिक कार्यक्रम करे के संगेसंग स्कूल म अच्छा प्रदर्सन करइया लइका मन ल सम्मानित घलो करे जाही।
ऐसो राज्य शासन कोति ले जादा ले जादा सरकारी स्कूल ल ‘‘सुघ्घर पढ़वइया योजना‘‘ के चलत तय करे गे मानदण्ड म लाए जाही। स्कूल ल आकर्षक अउ सीखे खातिर प्रभावी केंद्र के रूप म विकसित करे जाही। सरकार के कोसिस होही कि जादा ले जादा गांव ल ‘‘सून्य ड्राप आउट‘‘ गांव बनाय जाय। स्कूल शिक्षा विभाग के सचिव आलोक शुक्ला ह एकर बारे म सबों कलेक्टर अउ जिला पंचायत के मुख्य कार्यपालन अधिकारी मन ल दिसा-निरदेस जारी करीन। जेकर अनुसार स्कूल ले बाहिर रहइया लइका अउ अनियमित उपस्थिति वाले लइका मनके पहिचान करके उंखर सूची बनवाना अउ संख्या ले अवगत कराना होही।
त्रिस्तरीय पंचायत चुनाव
छत्तीसगढ़ राज्य निर्वाचन आयोग डहार ले नगर पालिका अउ त्रिस्तरीय पंचायत म खाली पद बर जारी निर्वाचन प्रक्रिया के चलत बारा जून के नाम वापसी के बाद कुल पांच सौ पचपन झिन अभ्यर्थी मन चुनई मैदान म हवय। नगर पालिका म पार्षद के खाली आठ पद बर अठारा झिन अभ्यर्थी अउ त्रिस्तरीय पंचायत के कुल एक सौ अंठानबे सीट बर पांच सौ सैंतीस अभ्यर्थी के बीच म चुनाव होही।
मनेन्द्रगढ़-चिरमिरी-भरतपुर जिला के नगर पंचायत खोंगापानी के खाली वार्ड नंबर छै के पार्षद पद बर कुल तीन नामांकन दाखिल करे गे रीहिस। एमा ले दू झिन अभ्यर्थी के नाम निर्देशन पत्र निरस्त होय के सेती इंहा निर्विरोध निर्वाचन के स्थिति बने हुए हे।
राज्य के कुल नौ ठिन नगर पालिका मन म खाली आठ सीट बर चुनई होवइया हे। पार्षद के ए आठ सीट मनले छै सीट म दू-दू अभ्यर्थी चुनई मैदान म हवय, जेखर बीच सीधा मुकाबला होही। पार्षद के दू सीट म त्रिकोणीय चुनाव होही। नगर पालिका परिषद चांपा, नगर पंचायत खरोरा, तुमगांव, नगर पालिक निगम दुर्ग, नगर पालिका परिषद अहिवारा अउ बेमेतरा, नगर पंचायत अंबागढ़ चौकी अउ नगर पालिका परिषद कोंडागांव के पार्षद के खाली एक-एक पद बर मतदान सत्ताईस जून के बीहनिया आठ बजे ले संझा पांच बजे तक होही। मतगणना अउ निर्वाचन परिणाम के घोषणा तीस जून के होही।
भाजपा बैठक
जांजगीर के भाजपा कार्यालय म जांजगीर चांपा विधानसभा क्षेत्र के संयुक्त मोर्चा के आज बइठका होइस। ए बेरा म नेता प्रतिपक्ष नारायण चंदेल बेलतरा विधायक, रजनीश सिंह अउ भाजपा जिला अध्यक्ष गुलाब सिंह चंदेल ह मौजूद रीहिन। बइठक म अवइया विधानसभा चुनई के रणनीति के संगेसंग केंद्र के मोदी सरकार के नौ बछर पूरा होय म भाजपा डहार ले शुरू करे गे महा जनसंपर्क अभियान के चलत होवइया कार्यक्रम ल लेके गोठबात होइस।
दुर्घटना
कोरबा जिला के पाली थाना क्षेत्र म पाछू रतिहा एक ठिन रद्दा दुर्घटना होगे जेमा चार झिन जवान लइका मनके मउत होगे।
जानबा के अनुसार ए चारो झिन जिला के चैतमा गांव के रहइया रीहिन। पाछू रतिहा ए सबो मन एक ठिन मोटर सायकिल म सवार होके अपन गांव कोति जात रीहिन। इही बेरा म एक ठिन ट्रक के चपेट म आय ले चारो के मउका म ही मउत होगे।