रोजगार मेला
प्रधानमंत्री नरेंद्र मोदी काली बीहनिया रोजगार मेला म नवा नियुक्त सत्तर हजार कर्मचारी मन ल वीडियो कॉन्फ्रेसिंग ले नियुक्ति पत्र दीहीं। रोजगार मेला देशभर म तैंतालिस जगा म आयोजित करे जाही। प्रधानमंत्री ये मउका म सरकारी विभाग म युवा मन ल संबोधित करहीं। एमा छत्तीसगढ़ म घलो भारतीय स्टेट बैंक कोति ले रायपुर म टाटीबंध के एम्स के ऑडिटोरियम म बीहनिया दस बजे ले रोजगार मेला लगाय जाही। ये कार्यक्रम के माईपहुना केंद्रीय जनजातीय कार्य राज्यमंत्री रेणुका सिंह सरूता होही।
एमा केंद्र सरकार के आने आने विभाग के बहत्तर अउ भारतीय स्टेट बैंक के सत्तर झिन चुने गे उम्मीदवार मन ल नियुक्ति पत्र दे जाही।
संघ लोक सेवा आयोग ह लोक सेवा परीक्षा दू हजार तेईस प्रारंभिक के नतीजा घोषित कर देहे। आयोग ह चौदा हजार छै सौ चौबीस उम्मीदवार के अनुशंसा करे हे। प्रारंभिक परीक्षा के नतीजा आधिकारिक वेबसाईट यूपीएससी डॅाट जीओव्ही डॅाट आई एन म देखे जा सकत हे। ये परीक्षा अठाईस मई के होय रीहिस। मुख्य परीक्षा पंद्रह सितंबर के होवइया हे।
मुख्यमंत्री भूपेश बघेल ह आज रायपुर के अपन निवास कार्यालय म जल जीवन मिशन अउ यूनिसेफ के संग म राखे गे कार्यक्रम म जल मितान-युवा उद्यमी उद्यमिता कौशल विकास कार्यक्रम के शुभारंभ करीन। ये मउका म नब्बे जल मितान अउ युवा उद्यमी मन ल टूलकिट दे गीस।
कार्यक्रम म बोलत मुख्यमंत्री ह कहिन कि छत्तीसगढ़ देश के पहिली राज्य हे, जिहां जलजीवन मिशन म पीये के पानी के योजना ल चलाय अउ रखरखाव बर बड़ संख्या म युवा मन ल प्रशिक्षण दे जावत हे। ओमन कीहिन कि जलजीवन मिशन म छत्तीसगढ़ के गांव गंवई के पचास लाख घर म नल जल कनेक्शन देके लक्ष्य तय करे गेहे। अभी तक चौबीस लाख घर म नल कनेक्शन दे गेहे।
प्रधानमंत्री नरेंद्र मोदी के अगवई वाले एनडीए सरकार के कार्यकाल के नौ बछर पूरा होय म भारतीय जनता पार्टी कोति ले चलाय जात महासंपर्क अभियान म आज धमतरी म लाभार्थी सम्मेलन राखे गीस। ये सम्मेलन म पार्टी के प्रदेश प्रभारी ओम माथुर सामिल होइन। ए मउका म श्री माथुर ह कहिन कि प्रधानमंत्री ह देश दुनिया म भारत के नाव रोशन करे हे। भारत विश्वगुरू बने बर अग्रसर हवय ।
ओमन कहिन कि आज देश के हरएक मनखे ल केंद्र सरकार के योजना के फायदा मिलत हे। उंहे पार्टी के प्रदेश अध्यक्ष अरूण साव ह केंद्र सरकार के कार्यकाल के नौ बछर के उपलब्धि बताइन । एखर पहिली श्री माथुर राजिम म बड़का कार्यकर्ता मन संग गोठबात म संघरीन अउ महासमुंद म महासंपर्क अभियान म भाग लीन।
उंहे प्रदेश प्रभारी श्री माथुर काली भाटापारा म राखे गे जनसभा म सामिल होइन। ये बेरा म ओमन राज्य सरकार उपर आरोप लगाइन कि पाछू चार बछर म राज्य के विकास रूक गेहे। ओमन कीहिन कि गांव, गरीब अउ किसान कांग्रेस के प्राथमिकता म कभू नइ रीहिस। ओमन यहू कीहिन कि मोदी सरकार के नौ बछर के कार्यकाल म देश के जम्मों वर्ग के उत्थान होय हे। सभा ल पार्टी के प्रदेश अध्यक्ष अरूण साव, सांसद सुनील सोनी अउ पूर्व मंत्री बृजमोहन अग्रवाल घलो संबोधित करीन।
प्रवर्तन निदेशालय ईडी के टीम आज करीबन दू हजार करोड़ रूपिया के कथित शराब घोटाला मामला म फरार चलत ट्रांसपोर्टर अरविंद सिंह ल भिलाई के रामनगर मुक्तिधाम ले हिरासत म ले गेहे। संग म ओखर भतीजा अमित सिंह ल घलो हिरासत म ले गेहे। अरविंद के आरोप हरय कि कथित तौर म वो शराब के अवैध परिवहन अउ बिक्री के काम देखत रीहिस। शराब घोटाला के जांच करत ईडी के टीम ल गजब दीन ले अरविंद के तलाश रीहिस।
कांकेर जिला म आज सुरक्षा बल अउ माओवादी मनके बीच होय मुठभेड़ म एक महिला माओवादी मारे गेहे, जेखर शव बरामद कर ले गेहे। घटना के जगा ले एक नग थ्री नॉट थ्री रायफल बरामद कर ले गेहे।
बस्तर रेंज के पुलिस महानिरीक्षक सुंदरराज पी. ह बताइन कि जिला के छोटेबेठिया थाना क्षेत्र के जंगल म माओवादी मनके रहे के सूचना म डीआरजी अउ बीएसएफ के टीम काली आमातोला बीनागुंडा अउ कालपर कोति तलाशी अभियान म निकले रीहिन। लहुटे के बेरा आज बीनागुंडा तीर माओवादी मन ह सुरक्षा बल उपर फायरिंग शुरू कर दीन। जवान मन कोति ले करे गे जवाबी कार्रवाई म एक महिला माओवादी मारे गीस।
आज विश्व बालश्रम निषेध दिवस हरय। एखर उद्देश्य बालश्रम के खिलाफ दुनियाभर म बाढ़त आंदोलन ल अउ तेज करना हे। एसो के विसय हरय – सभी के लिये सामाजिक न्याय बालश्रम का अंत- छत्तीसगढ़ म घलो बालश्रम निषेध दिवस म कतकोन कार्यक्रम होवत हे। ये मउका म महिला अउ बाल विकास मंत्री अनिला भेडिया ह लोगन ले अपील करत कीहिन कि बालश्रम अपराध के श्रेणी म आथे, एखर सेती अपन थोरकुन स्वार्थ खातिर लईका मनके जिनगी दांव म झन लगावंय । लईका समाज अउ देस के भविष्य होथे।
भाजपा के पूर्व मंत्री महेश गागड़ा ह कीहिन हे कि बीजापुर जिला म एसो तेंदूपत्ता संग्रहण म चार लाख मानक बोरा के कमी आय हे। जेखर ले हितग्राही मन ल करीबन बत्तीस करोड़ रूपिया के नकसान होय हे । ओमन कीहिन कि प्रदेस म पाछू तीन बछर म तेंदूपत्ता सकलइया मन ल सात सौ करोड़ रूपिया ले जादा के नकसान होय हे।
श्री गागड़ा ह आज बीजापुर म राखे गे एक पत्रकार वार्ता म आरोप लगाइन कि राज्य सरकार के नीति के चलत बस्तर अउ सरगुजा के आदिवासी मनके सोषण होवत हे । ओमन कीहिन कि एसो चौदा लाख तेंदूपत्ता सकलइया मन म दस लाख साठ हजार झन ले तेंदूपत्ता बिसाय गेहे। ओमन यहू कीहिन कि हितग्राही मन ल स्वर्गीय महेंद्र कर्मा बीमा अउ छात्रवृत्ति जइसन योजना के फायदा घलो नइ मिल पात हे।
ओडिशा के भुवनेश्वर म राखे गे प्रथम खेलो इंडिया जनजातीय खेल राष्ट्रीय प्रतियोगिता म छत्तीसगढ़ के महिला फुटबॉल टीम ह स्वर्ण पदक जीतके इतिहास रच देहे।
आज खेले गे फाइनल मुकाबला म छत्तीसगढ़ के टीम ह झारखंड ल टाईब्रेकर ले शून्य के मुकाबला दू गोल ले हरा दीस। दूनो टीम तय बेरा म कोनो किसम के गोल नइ कर सकीस अउ मैच के नतीजा टाईब्रेकर ले निकलिस। मैच म बालिका फुटबॉल अकादमी रायपुर के खिलाड़ी किरण पिस्दा ह टाईब्रेकर म गोलकीपर के जिम्मेवारी निभात विरोधी टीम ल गोल करे के एको मउका नइ दीन।
उंहे टाईब्रेकर म किरण पिस्दा अउ बस्तर के मुस्कान ह एक-एक गोल करके छत्तीसगढ़ के जीत तय कर दीन। एखर पहिली सेमी फाइनल मुकाबला म छत्तीसगढ़ ह त्रिपुरा ल चार-शून्य ले हराके फाइनल म प्रवेश करे रीहिस। ये जीत म मुख्यमंत्री भूपेश बघेल अउ खेलमंत्री उमेश पटेल ह खिलाड़ी मन ल बधाई दीन हे।
प्रदेस म अभी गजब गर्मी जनावत हे। मौसम विभाग ह अवइया चौबीस घंटा म बस्तर जिला के एक दू जगा म लू चले के चेतावनी देहे। उंहे अवइया अड़तालिस घंटा म प्रदेस के जांजगीर-चांपा, रायगढ़, मुंगेली, बलौदाबाजार, अउ रायपुर जिला के एक दू जगा म लू चले के आशंका हरय।
मौसम विभाग के मुताबिक अरब सागर म उठे बिपरजॉय तूफान भीषण चक्रवात म बदल गेहे। फेर छत्तीसगढ़ म ओखर कोनो किसम के प्रभाव नइ पड़य। तूफान के चौदा अउ पंद्रह जून के गुजरात के तट म टकराय के आशंका हरय।