भारतीय जनता पार्टी डहार ले चलाय जावत महासंपर्क अभियान के तहत पार्टी प्रदेस प्रभारी ओम माथुर ह काली ग्यारा जून ले चउदा जून तक आने-आने लोकसभा क्षेत्र के दउरा करही। श्री माथुर ह काली रइपुर लोकसभा क्षेत्र के अंतर्गत रइपुर ग्रामीण विधानसभा म महासंपर्क अभियान म सामिल होही ऐखर बाद धरसींवा विधानसभा के सियान कार्यकर्ता मन के टिफिन बइठका, भाटापारा म आमसभा अउ बलौदाबाजार म फेर सियान कार्यकर्ता मन के बइठका म हिस्सा लिही।
अइसने तेरह जून के श्री माथुर ह राजनांदगांव लोकसभा क्षेत्र के प्रवास म रही। अउ चउदह जून के राजधानी के कुशाभाऊ ठाकरे परिसर स्थित प्रदेस कार्यालय म प्रमुख पदाधिकारी मनके बइठका घलो लिही।
अंतर्राज्यीय समन्वय बैठक
नवा रइपुर स्थित पुलिस मुख्यालय म आज छत्तीसगढ़, अउ राज्य सीमा ले लगे राज्य आंध्रप्रदेस अउ तेलंगाना के संग अंतर्राज्यीय समन्वय बइठका राखे गीस। ए बइठका म छत्तीसगढ़ पुलिस, केंद्रीय गृह मंत्रालय, आंध्रप्रदेस अउ तेलंगाना राज्य के बड़का पुलिस अधिकारी मन सामिल होइन। बइठका म बेहतर अंतर्राज्यीय समन्वय, खुफिया सूचना के लेनदेन, फोकस एरिया म संघरा अभियान, सुरक्षाविहीन क्षेत्र म रणनीतिक बढ़त, अउ माओवादी मन के सप्लाई नेटवर्क उपर कार्यवाही समेत आने-आने मुद्दा म समन्वित कार्ययोजना के बारे म बिस्तार ले गोठबात करे गीस।
छत्तीसगढ़ राज्य वित्त आयोग ह आने-आने प्रदेस के वित्त आयोग के काम-काज के अध्ययन करत हे अउ ओ अध्ययन ले मिले जानकारी ले प्रदेस के अनुसार क्रियान्वयन के पहल घलो करत हे। छत्तीसगढ़ राज्य वित्त आयोग के अध्यक्ष सरजियस मिंज के अगुवाई म आयोग के प्रतिनिधि मंडल ह मध्यप्रदेस राज्य वित्त आयोग के काम-काज के तुलनात्मक अध्ययन करे बर तीन दिन के मध्यप्रदेस राज्य के दउरा करीन। आयोग के सदस्य मन ह मध्यप्रदेस वित्त आयोग के पदाधिकारी अउ मध्यप्रदेस शासन के अधिकारी मन संग बइठका करीन।
श्री मिंज ह बताइन कि ए अध्ययन दउरा ले कइ ठिन महत्वपूर्ण जानकारी मिले हें, जेन ह छत्तीसगढ़ वित्त आयोग ल प्रदेस के अनुकूल अनुशंसा म सहायक सिध्द होही। आयोग के प्रतिनिधि मंडल ह इंदौर नगर पालिका निगम के अधिकारी मन संग बइठका करके निगम के आय के स्त्रोत, कर के प्रकार, इकट्ठा करे के प्रणाली अउ निगम के आय अउ व्यय के बारे म जानिस। संगेसंग इंदौर के स्वच्छता मॉडल के संबंध म जानकारी घलो प्राप्त करीन।
आय/जाति-अस्थायी निर्देश
प्रदेस म पटवारी मन के हड़ताल ले आम आदमी ल होवत परेसानी ल देखत हुए राज्य शासन ह आय अउ जाति प्रमाण पत्र बनाय के संबंध म अस्थायी दिसा-निरदेस जारी करे हे। सामान्य प्रसासन विभाग के आदेसानुसार एस्मा लागू होय के बाद भी पटवारी मन ह हड़ताल ले वापिस नइ आए हे, जेखर ले जन सामान्य ल आय अउ जाति प्रमाण पत्र बनवाय म अब्बड़ परेसानी होवत हे। जेला देखत हुए अस्थाई निरदेसानुसार जाति प्रमाण पत्र बर जरूरी भू-अभिलेख, मिसल, जनगणना अभिलेख, दाखिल खारिज रजिस्टर, जमाबंदी अउ खसरा के नकल जइसन कागजात जिला कार्यालय के अभिलेखागार अउ विभागीय ऑनलाइन पोर्टल म घलो उपलब्ध हवय। अइसन दस्तावेज पटवारी ले लेहे बर बाध्य नइ करत हुए एला ऑनलाइन या जिला रिकॉर्ड रूम ले प्राप्त दस्तावेज के आधार म अग्रिम कार्रवाही करे जाही।
उहें, जरूरी होय म वंसावली ल ग्राम पंचायत के सचिव या ग्राम पंचायत के प्रस्ताव के आधार पर स्वीकार करत हुए जाति प्रमाण पत्र जारी करे जाही। ए आदेस म साफ निरदेस हे कि कोनो भी स्थिति म जाति अउ आय प्रमाण पत्र बनाय बर आवेदक मनसे अइसना कोनो दस्तावेज के मांग नइ करे जाय जेखर पूर्ति बर ओमन ल पटवारी के प्रतिवेदन बर निर्भर होना पड़े।
अउ अब सुनव मउसम के हाल
प्रदेस म अभी जोरदरहा गर्मी के प्रकोप जारी हे। ए बीच राजधानी रइपुर समेत प्रदेस के मउसम म बदलाव के संकेत घलो मिलत हे। मउसम विभाग अनुसार अवइया चउबीस घंटा म प्रदेस म एक-दू जघह म हल्का वर्षा होय अउ गरज-चमक के संग छिटा पढ़े के संभावना हे। उहें, कोनो-कोनो जघह म अंधड़ अउ गाज गिरे के चेतावनी जारी करे गेहे।
मलेरिया मुक्त छत्तीसगढ़ अभियान
राष्ट्रीय वेक्टर जनित रोग कारीकरम के अंतर्गत नारायणपुर जिला म मलेरिया मुक्त छत्तीसगढ़ अभियान के आठवा चरण अवइया पन्द्रा जून ले सुरू होके दस जुलाई तक चलही। एखर ले पहिली प्रदेस के नारायणपुर जिला ह मलेरिया ले सबले जादा प्रभावित रहे हे। अभियान के दउरान सात चरण म लक्ष्य राखे गए जनसंख्या के आर.डी.कीट ले मलेरिया जांच कराय गीस। जेमा पॉजिटिव केस आए म तुरंते एंटी मलेरिया दवाई के पहिली डोज स्वास्थ्य कार्यकर्ता ह अपन आगु म खिलाथे अउ दूसरइया अउ तीसरइया डोज मितानिन के निगरानी म दे जाथे, ताकि मरीज के पूरा ईलाज हो सके।
जिला के मुख्य चिकित्सा अउ स्वास्थ्य अधिकारी डॉक्टर टीआर कुंवर ह बताइन कि ए अभियान के तहत मलेरिया ले प्रभावित मरीज के पूरा ईलाज बर स्थानीय खाद्य पदार्थ अउ चिक्की दे जाही संगेसंग मलेरियारोधी दवा लेपित मच्छरदानी के उपयोग बर लोगन मन ल प्रेरित घलो करे जाही।
जिले की चिट्ठी
प्रादेसिक समाचार एकांस, आकाशवाणी रइपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बज के पांच मिनट ले छै बज के दस मिनट तक करे जाही। ए कारीकरम ल छत्तीसगढ़ स्थित आकाशवाणी के सब्बों केन्द्र ऐके संग रिले करही। ए दारी के अंक म ‘‘रायगढ़‘‘ जिला के गतिविधि मन के बारे म जानकारी दे जाही।
हल्बी/गोण्डी-साप्ताहिक समाचार बुलेटिन
काली ईतवार के हल्बी अउ गोण्डी बोली म साप्ताहिक समाचार बुलेटिन ह आकाशवाणी केन्द्र जगदलपुर ले प्रसारित करे जाही। एला बस्तर संभाग म सुने जा सकही। हल्बी म साप्ताहिक समाचार बुलेटिन बिहनिया सात बजे ले अउ गोण्डी म साप्ताहिक समाचार बुलेटिन संझा छै बजे ले प्रसारित करे जाही।
ट्रेन परिचालन
ईस्ट कोस्ट रेलवे के संबलपुर मंडल म ट्रैफिक ब्लॉक के कारण दक्षिण पूर्व मध्य रेलवे ले चलइया कोनो कोना यात्री ट्रेन के परिचालन ह प्रभावित रइही। रेलवे प्रसासनअनुसार बारा,चउदा अउ सत्रा जून के टिटलागढ़-बिलासपुर-टिटलागढ़ पैसेंजर स्पेसल ह संबलपुर-ब्रजराजनगर-संबलपुर के बीच रद्द रइही। उहें, तेरह जून के इंदौर-पुरी एक्सप्रेस ह डेढ़ घंटा देर ले सुरू होही। एखर अलावा दस, ग्यारा अउ बारा जून के पुरी-ऋषिकेस-पुरी उत्कल एक्सप्रेस ह आने रद्दा ईब झारसुगड़ा रोड-संबलपुर सिटी मार्ग ले होके चलही।
हाईकोर्ट-नया रोस्टर
छत्तीसगढ़ उच्च न्यायालय म प्रकरण मनके सुनवाई बर नवा रोस्टर बनाय गेहे। जेमा, तीन डिवीजन बेंच अउ पन्द्रा सिंगल बेंच म जज मन ह मामला के सुनवाई करही। पांच स्पेसल बेंच घलो बनाय गेहे। ए बेंच ह दिन बिसेस म बइठके प्रकरण के सुनवाई करही। ए नवा रोस्टर ह गर्मी के छुट्टी के बाद पन्द्रा जून ले लागू होही।
हेलीकॉप्टर जॉयराईड
छत्तीसगढ़ माध्यमिक शिक्षा मंडल के ए बछर के कक्षा दसवी अउ बारवी के वार्षिक बोर्ड परीक्षा म मेरिट सूची म आए लइका मन ह आज रइपुर के पुलिस परेड ग्राउण्ड ले हेलीकॉप्टर जॉयराईड करीन। स्कूल शिक्षा मंत्री डॉक्टर प्रेमसाय सिंह टेकाम ह झंडी दिखाके हेलीकॉप्टर ल रवाना करीन। पढ़इया लइका मनबर ए उड़ान ह बने मजेदार रहीस जेकर अनुभव ओमन साझा करीन। विद्यार्थि मन ह बताइन कि मुख्यमंत्री के पहल ले सब्बों पढ़इया लइका मन ल प्रावीण्य सूची म आय के प्रोत्साहन मिलही।
सुनइया मन ल बतादन के माध्यमिक शिक्षा मंडल के बछर दू हजार तेईस के वार्षिक परीक्षा म कक्षा दसवी म उनचास अउ कक्षा बारवी म तीस झन बाबू-नोनी मन ह मेरिट सूची म स्थान प्राप्त करीन हे।
फग्गन सिंह कुलस्ते
केंद्रीय मंत्री फग्गन सिंह कुलस्ते काली ग्यारह जून के जांजगीर-चांपा लोकसभा क्षेत्र के दउरा म रहही। ए दउरान ओमन सक्ती म विधानसभा क्षेत्र स्तरीय भाजपा के संयुक्त मोर्चा कायकर्ता सम्मेलन ल संबोधित करही। उहें, जांजगीर म सोशल मीडिया इंफ्लूएंसर के संग परिचर्चा करही अउ शिवरीनारायण में आमसभा ल घला संबोधित करही।