भारत निर्वाचन आयोग के दल ह पाछु दू दिन के दउरान छत्तीसगढ़ म अवइया विधानसभा चुनाव के तैयारी के समीक्षा करीस। आठ अउ नौ जून के रायपुर म होय ए बइठका म छत्तीसगढ़ के आने-आने जिला के निर्वाचन अधिकारी अउ पुलिस अधीक्षक मन ह भाग लीन। भारत निर्वाचन आयोग के टीम म आयोग के वरिष्ठ उप निर्वाचन आयुक्त धर्मेन्द्र शर्मा, नीतेष कुमार व्यास, उप निर्वाचन आयुक्त आर0के0 गुप्ता अउ एम0के0 साहू संघरा दूसर बड़े अधिकारी मन सामिल रिहीन। ए टीम ह काली प्रदेस के अट्ठारह ठन जिला म निर्वाचन तैयारी के समीक्षा करीस। उहें, आज बाकी जिला के समीक्षा करे गीस। निर्वाचन आयोग के अधिकारी मन ह स्वतंत्र अउ निष्पक्ष चुनाव कराय बर आयोग के दिसा-निरदेस के कड़ाई ले पालन करे बर किहीन।
आयोग के अधिकारी मन ह मतदाता सूची के पुनरीक्षण कार्यक्रम के संगेच निर्वाचन काम म लगे अधिकारी-कर्मचारी मनके प्रसिक्षण के बारे म घलो जानकारी लीन। एखरे संग छत्तीसगढ़ के सबो जिला म इलेक्ट्रॉनिक वोटिंग मसीन के पहिली चरण के जांच सुरू करे के निरदेस घलो दीन।
केन्द्रीय मंत्री-दंतेवाड़ा
केन्द्रीय पंचायत अउ ग्रामीण विकास राज्यमंत्री गिरिराज सिंह अपन चार दिन के दउरा म आज दंतेवाड़ा पहुंचीन। ए दउरान ओमन ह केन्द्रीय योजना के बेहतर क्रियान्वयन बर जिला प्रषासन के अधिकारी मनके समीक्षा बइठका लीन। बइठका म ओमन ह अधिकारी मन ले किहीन कि जन कल्याणकारी योजना के फायदा जादा ले जादा हितग्राही मन तक पहुंच। उहें, केन्द्रीय मंत्री ह ग्रामीण विकास, भूमि संसाधन अउ पंचायत राज अधिकारी मनके घलो समीक्षा बइठका लीन। एखर अलावा केन्द्रीय राज्यमंत्री ह जावंगा म प्रधानमंत्री किसान सम्मान निधि अउ फसल बीमा योजना के लाभार्थी मन ले भेंट करीन अउ स्थिति के जानकारी लीन। एखर पहिली, केन्द्रीय राज्यमंत्री ह दंतेवाड़ा म मां दंतेष्वरी मंदिर के दर्सन करके उंखर आषीर्वाद लीन।
खबर के मुताबिक केन्द्रीय राज्यमंत्री गिरिराज सिंह मोदी सरकार के नौ बछर पूरा होय के मउका म महासंपर्क अभियान म छत्तीसगढ़ दउरा म हवय।
रोजगार-मेला
प्रधानमंत्री नरेन्द्र मोदी अवइया तेरह जून के वीडियो कान्फ्रेंंसिंग के माध्यम ले युवा मन ल नियुक्ति पत्र प्रदान करही। प्रधानमंत्री ए मउका म सरकारी विभाग म नव नियुक्त युवा मन ल संबोधित करही। ए मउका म देसभर म पैंतालीस जघा म रोजगार मेला के आयोजन करे जाही। जेमा नव नियुक्त कर्मी मन ल नियुक्ति पत्र सौंपे जाही। एमा छत्तीसगढ़ म घलो भारतीय स्टेट बैंक डहार ले रईपुर म टाटीबंध के अखिल भारतीय आयुर्विज्ञान संस्थान-एम्स के ऑडिटोरियम म बिहनिया दस बजे ले रोजगार मेला के आयोजन करे जाही। ए कार्यक्रम के मुख्य अतिथि केन्द्रीय जनजातीय कार्य राज्यमंत्री रेणुका सिंह सरूता होही। ए मउका म केन्द्र सरकार के आने-आने विभाग म चुने गे उम्मीदवार मन ल नियुक्ति पत्र दे जाही।
मुख्यमंत्री-कवर्धा/बालोद
मुख्यमंत्री भूपेष बघेल ह आज कवर्धा म अंतर्राज्यीय हाईटेक बस स्टैंड के उद्घाटन करीन। ओमन किहीनकि ए बस स्टैंड के सुरू होय ले कबीरधाम जिला ले चलइया अंतर्राज्यीय बस सेवा के विस्तार होही।
एखर पहिली, मुख्यमंत्री ह आज बालोद जिला के दल्लीराजहरा म अखिल भारतीय हल्बा-हल्बी आदिवासी समाज के तिरासीवां स्थापना दिवस अउ प्रतिभा सम्मान समारोह म सामिल होइन। ए मउका म ओमन ह जिला के डौंडी अउ डौंडीलोहारा विकासखंड म देवगुड़ी बनाय बर अउ जीर्णोद्धार करे बर एक करोड़ रूपिया दे जाय के घोसना करीन। उहें, सासकीय महाविद्यालय मनचुवा के नाव सहीद गेंदसिंह के नाव म करे के घोसना करीन।
राज्यपाल बीरेंद्र सिंह मुलाकात
राज्यपाल विष्वभूषण हरिचंदन ह आज राजभवन म जल अउ पर्यावरण संरक्षण बर काम करइया ग्रीन कमांडों बालोद जिला के बीरेन्द्र सिंह ह सौजन्य भेंट करीन। श्री सिंह डहार ले करे जावत काम के उल्लेख प्रधानमंत्री नरेन्द्र मोदी ह पाछु अट्ठाईस मई के मन की बात कारीकरम के एक सौ एक एपिसोड म करे रिहीन। राज्यपाल ह जल अउ पर्यावरण संरक्षण बर वृक्षारोपण, वन्यजीव संरक्षण अउ जंगल ल आग ले बचाय खातिर उंखर डहार ले करे जावत काम के सराहना करीन।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत प्रदेश म जल संरक्षण बर जागरूकता पैदा करे म उल्लेखनीय भूमिका निभावत बालोद जिला के ग्रीन कमांडो बिरेंद्र सिंह से लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली दस जून के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
आदिवासी पुरखौती
भारतीय जनता पार्टी अनुसूचित जनजाति मोर्चा आज ले प्रदेश म आदिवासी पुरखौती सम्मान यात्रा निकाले जावत हे। मोर्चा के प्रदेश अध्यक्ष विकास मरकाम ह बताइन कि ये सम्मान यात्रा छत्तीसगढ़ के महापुरूष मनके आदर्श ल गांव गांव म प्रचारित करे अउ लोगन के हदय म सम्मान जगाय बर निकाले जाही। मोर्चा ले प्रदेश म चार पुरखौती सम्मान यात्रा निकाले जाही।
पहिली सम्मान यात्रा आज शहीद वीर नारायण सिंह के जन्मस्थली सोनाखान ले सुरू होके रायपुर म सिराही । दूसर यात्रा शहीद गुण्डाधुर जन्मस्थली नेतानार ले सुरू होके जगदलपुर म सिराही। तीसरी यात्रा शहीद गेंदसिंह के कर्मस्थली अंतागढ़ ले सुरू होके कांकेर म सिराही, उंहे चौथा यात्रा संत गहिरागुरू के कर्मस्थली कैलाश गुफा ले निकलके अंबिकापुर म सिराही।
रमन सिंह-बयान
भारतीय जनता पार्टी के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह किहीन हे कि प्रधानमंत्री नरेन्द्र मोदी के अगुवई म केन्द्र के एनडीए सरकार के नौ बछर के कार्यकाल ल सेवा, सुसासन अउ गरीब कल्याण बर हमेसा सुरता राखे जाही। महाजनसंपर्क अभियान म राजनांदगांव म राखे गे संयुक्त मोर्चा सम्मेलन म ओमन किहीन कि कोविड संकट के दउरान एक सौ चालीस करोड़ देसवासी मनके मुफ्त टीकाकरण करे जाना एखर सबले बड़े उदाहरण हे। ओमन आरोप लगईन कि छत्तीसगढ़ म राज्य के कांग्रेस सरकार के संरक्षण म मतांतरण के काम होवत हे। सम्मेलन के दउरान डॉक्टर सिंह ह भाजपा के युवा मोर्चा, महिला मोर्चा, अनुसूजित जाति, जनजाति संघरा आने-आने मोर्चा अउ मंडल स्तर के कार्यकर्ता मन ल अवइया विधानसभा चुनाव बर तैयार रेहे बर किहीन।
पूरक परीक्षा -समय सारिणी
छत्तीसगढ़ माध्यमिक षिक्षा मंडल ह कक्षा दसवीं अउ बारहवीं के पूरक परीक्षा बर समय-सारिणी जारी कर देहे।
मध्यमिक सिक्षा मंडल डहार ले जारी समय सारिणी के अनुसार हाईस्कूल सर्टिफिकेट पूरक परीक्षा छह ले चौदह जुलाई तक अउ हायर सेकेंडरी स्कूल पूरक परीक्षा छह ले बीस जुलाई तक होही। ए दूनों परीक्षा के बेरा बिहनिया नौ बजे ले मंझनिया सवा बारह बजे तक तय करे गेहे। विस्तृत समय-सारिणी मंडल के वेबसाइट म देखे जा सकत हे।