जनऔषधि केंद्र
केंद्र सरकार ह देशभर म दू हजार प्राथमिक कृषि ऋण समिति ल प्रधानमंत्री भारतीय जनऔषधि केंद्र खोले के मंजूरी दे देहे। ये फैसला नई दिल्ली म केंद्रीय रसायन अउ उर्वरक मंत्री मनसुख मांडविया अउ सहकारिता मंत्री अमित शाह के बइठका म ले गीस। एसो अगस्त तक एक हजार अउ दिसंबर तक एक हजार अउ जनऔषधि केंद्र खोले जाही। अब तक देशभर म नौ हजार चार सौ ले जादा जनऔषधि केंद्र खोले जा चुके हे।
केबिनेट एमएसपी
आर्थिक मामला के मंत्रिमंडलीय समिति ह आज विपणन सत्र दू हजार तेईस चोबीस बर जम्मों खरीफ फसल मनके न्यूनतम समर्थन मूल्य ल बढ़ोत्तरी के मंजूरी दे दीस । मंत्रिमंडल ह किसान मन ल ओखर उपज के बने पइसा मिल सकय अउ आने आने फसल लगाय बर ओमन ल प्रोत्साहित करे के फैसला लेहे। आज नई दिल्ली म जानबा देवत केंद्रीय मंत्री पीयूष गोयल ह कहिन कि एसो के बाढ़े न्यूनतम समर्थन मूल्य पाछू साल ले जादा हे।
किसान मनके उत्पादन लागत म सबले जादा ब्यासी प्रतिशत बाजरा फसल म होय के अनुमान हे। एखर बाद अरहर म अंठावन प्रतिशत, सोयाबीन म बावन प्रतिशत, अउ उरीद म इंक्यावन प्रतिशत हवय।
मुख्यमंत्री निर्देश
मुख्यमंत्री ह पाछू तेईस दिन ले चलत पटवारी मनके हड़ताल ल लेके मुख्य सचिव ल निर्देश दे हवय कि पटवारी मनके हड़ताल के सेती लोगन मन ल वेतन भत्ता के संगेसंग कोनो प्रकार के परेसानी नइ आना चाही।
जानबा के मुताबिक पटवारी संघ ह तनखा म बढ़ोत्तरी, प्रमोशन जइसन नौ सूत्रीय मांग ल लेके तेईस दिन ले धरना म बइठे हे।
अंबिकापुर-बनारस मार्ग
प्रदेश के अनुसूचित जाति अउ जनजाति विकास मंत्री डॅाक्टर प्रेमसाय सिंह टेकाम ह केंद्रीय मंत्री नीतिन गडकरी ले अंबिकापुर ले बनारस रद्दा ल राष्ट्रीय राजमार्ग के दर्जा देके बिनती करे हे।
श्री टेकाम ह आज नई दिल्ली म केंद्रीय मंत्री ले मिलके ए रद्दा के सर्वे रिपोर्ट सौंपीन। ओमन पत्र के माध्यम ले बताइन कि व्यापार जइसन कामकाज म ये रद्दा ह एकदम व्यस्त रहिथे। छत्तीसगढ़ ले उत्तरप्रदेश तक सब्जी, खनिज अउ रोजे के आने जीनिस के अवई जवई बड़ मात्रा म होथे। ओमन कीहिन कि ए रद्दा के बने ले प्रदेस के संगेसंग आने पड़ोसी राज्य मन ल घलो फायदा मिलही।
हाथी-मॉनिटरिंग
छत्तीसगढ़ के जंगल मन म हाथी मनके अवई जवई के हाईटेक मॉनिटरिंग शुरू कर दे गेहे। एखर बर एआई आधारित छत्तीसगढ़ एलिफेंट ट्रैकिंग एंड अलर्ट ऐप बनाय गेहे। पाछू तीन महीना ले उदंती सीतानदी टाईगर रिजर्व म ये ऐप के प्रयोग करे जात हे।
दस किलोमीटर के इलाका म हाथी मनके अवई जवई के जानबा ल तीर तखार के गांव गंवई मन म मोबाइल के माध्यम ले भेजे जात हे। ये ऐप म गांव के लोगन मनके मोबाइल नंबर अउ जीपीएस लोकेशन के पंजीयन करे जात हे। पाछू तीन महीना ले उदंती सीतानदी टाईगर रिजर्व के करीबन चार सौ गांव के लोगन मनके पंजीयन करे गेहे।
मुख्यमंत्री मितान योजना
राज्य सरकार के मुख्यमंत्री मितान योजना ह लोगन मन बर सुघ्घर योजना के रूप म आगू आवत हे। ए योजना ले लोगन मन ल घर बइठे जरूरी प्रमाण पत्र अउ दस्तावेज पूरा बनके मिलत हे।
इही कड़ी म आज रायगढ़ नगर निगम क्षेत्र म कबीर चौक निवासी ओम प्रकाश अग्रवाल ह राशन कार्ड बनवाय बर – एक चार पांच चार पांच म फोन करके पांच जून के अपन कागजात दीन अउ आज उंखर कार्ड तैयार होगे हे। जानबा के मुताबिक रायगढ़ निगम क्षेत्र म मितान योजना के तहत निराकृत करे गे ये ह पांच हजार पांच सौ प्रकरण रीहिस।
प्रदेश सह प्रभारी बयान
भारतीय जनता पार्टी के प्रदेश सह प्रभारी नितिन नवीन ह जांजगीर-चांपा जिला के प्रवास के दउरान आज अकलतरा पहुंचीन। ए दउरान ओमन संयुक्त मोर्चा के बइठका लीन। बइठका म सौ ले जादा लेगन मन ल भाजपा के सदस्यता देवाइन।
ए दउरान विधानसभा के पूर्व अध्यक्ष गौरीशंकर अग्रवाल, सांसद गुहाराम अजगले, अउ अकतरा विधायक सौरभ सिंह आय रीहिन। बाद म पत्रकार मनले गोठबात करत ओमन कीहिन कि केंद्र सरकार ह गरीब मन बर कतकोन योजना बनाय हे। जेखर ले उंखर मनके जिनगी ह खुशहाल होगे हे। प्रदेश के सहप्रभारी ह कांग्रेस उपर परिवारवाद के आरोप लगाइन । ओमन कीहिन कि कांग्रेस के तीर सिरिफ सोनिया गांधी, राहुल गांधी अउ प्रियंका गांधी हवय। एति भाजपा के अगवई बर कतकोन नेता मन हे।
ओमन राज्य के कांग्रेस सरकार उपर आरोप लगावत कीहिन कि चार साल म सरकार ह विकास के कोनो काम नइ करे हे।
एति भाजपा के प्रदेश अध्यक्ष अरूण साव ह कांग्रेस के संभागीय सम्मेलन ल चुनावी रणनीति बताइन।
कांग्रेस संभागीय सम्मेलन
कांग्रेस के प्रदेस इकाई डहार ले आज बिलासपुर म संभागीय सम्मेलन राखे गीस। उंहे काली दुर्ग म संभागीय सम्मेलन होही। ए सम्मेलन म अखिल भारतीय कांगेस कमेटी के सचिव अउ प्रदेश प्रभारी डॅाक्टर चंदन यादव सामिल होही।
अंतर्राष्ट्रीय योग दिवस
इक्कीस जून के अंतर्राष्ट्रीय योग दिवस हरय। ए मउका म प्रदेश के शहर अउ गांव मन म आने-आने कार्यक्रम होही। एखर माध्यम ले हर घर आंगन योग के संदेस ल आगू लाय जाही।
छत्तीसगढ़ योग आयोग के अध्यक्ष ज्ञानेश शर्मा ह बताइन कि शहर अउ गांव के प्रमुख जगा मन म जनप्रतिनिधि अउ लोगन मन ह जादा ले जादा एके संघरा मिलके योग सत्र के आयोजन करही। संगेसंग आंगनबाड़ी अउ वृद्धाश्रम शासन के जम्मों विभाग मनके प्रमुख जगा मन म घलो योग के कार्यक्रम राखे जाही। अंतर्राष्ट्रीय योग दिवस के आयोजन बर प्रशिक्षण कार्यक्रम राखे जाही अउ योग के बारे म जन जागरूकता बर प्रचार प्रसार करे जाही।
एति अंतर्राष्ट्रीय योग दिवस के आयोजन बर जरूरी तियारी प्रशिक्षण कार्यक्रम के संगेसंग राज्य शासन के आने-आने विभाग, संस्था, निकाय अउ केंद्र सरकार के आयुष मंत्रालय ले जरूरी समन्वय बर समाज कल्याण संचालनालय के अपर संचालक पंकज वर्मा ल नोडल अधिकारी बनाय गेहे। अउ जादा जानबा बर फोन नंबर- नौ आठ नौ तीन पांच तीन तीन शून्य शून्य शून्य – म संपर्क करे जा सकथे।
शोध-संगोष्ठी
रायपुर के पंडित रविशंकर शुक्ल विश्वविद्यालय म काली ले जनजातीय पारंपरिक सांस्कृतिक जीवनशैली उपर शोध-संगोष्ठी के आयोजन करे जाही। जेमा देश के जनजातीय संस्कृति ले जुड़े अनुसंधानकर्ता मन भाग लीहीं। संगोष्ठी म जनजातीय पारंपरिक सांस्कृतिक जीवन शैली, समकालिन परिदृश्य के संगेसंग एला बचाय के प्रयास अउ संभावना विसय उपर गोठबात होही। तीन दिन तक चलइया ए संगोष्ठी के समापन दस जून के होही।
मौसम
मौसम विभाग ह प्रदेस के जांजगीर-चांपा, रायगढ़, महासमुंद, बलौदाबजार कांकेर, राजनांदगांव, रायपुर, दुर्ग अउ बेमेतरा जिला के एक दू जगा म लू चले के चेतावनी देहे। एति केरल म अवइया चौबीस घंटा के दउरान मानसून पहुंचे के संभावना दिखत हे। जेखर बाद देश के आने आने राज्य म मानसून पहुंचना शुरू हो जाही।
अउ अब थोरकुन समाचार सार म-
– आज विश्व खाद्य दिवस हरय। भोजन ले जुड़े मानव स्वास्थ्य उपर हानि, आर्थिक समृद्धि, खेती अउ विकास जइसन मुद्दा के पता लगाय अउ ओखर प्रबंधन उपर ध्यान देबर ये दिन ल मनाये जाथे। एसो के विश्व खाद्य दिवस के विसय हे- खाद्य मानव जीवन सुरक्षित बनाते हैं।
– छत्तीसगढ़ महिला आयोग के अध्यक्ष डॅाक्टर किरणमयी नायक अउ सदस्य बालो बघेल ह कोंडागांव म महिला उत्पीड़न ले जुड़े चौदा ठिन प्रकरण मनके जन सुनवाई करीन।
अउ
– भूसा के बोरी के नीचे लुकाके ले जावत करीबन सवा करोड़ रूपिया के पांच कुंटल गांजा ल महासमुंद जिला के सिंघोड़ा थाना पुलिस ह रेहटीखोल के तीर घेराबंदी करके बरामद करीन। ए मामला म दिल्ली अउ उत्तरप्रदेश के दू झिन अंतर्राज्यीय तस्कर मन ल गिरप्तार करे हे।