बीजापुर जिला म आज माओवादी मन डहार ले करे गे। आईईडी विस्फोट म दू जवान घायल होगे हे। पुलिस अधीक्षक आंजनेय वार्ष्णेय ह बताइन कि केन्द्रीय रिजर्व पुलिस बल सीआरपीएफ के टीम गंगालूर क्षेत्र के पुसनार कैम्प ले हिरोली कोति सर्चिंग बर निकले रहीस। ए दउरान टेकामेटा पहाड़ी के तीर माओवादी मन डहार ले लगाय गे। आईईडी के चपेट के आए ले दू झिन जवान ायल होगे। जिला चिकित्सालय म प्राथमिक उपचार के बाद एयर लिफ्ट करके रइपुर रवाना करे गीस।
ओती सुकमा जिला म सुरक्षाबल ह एक लाख के ईनामी माओवादी ल गिरफ्तार करे हे। पुलिस अधीक्षक किरण चौहान ह बताइन कि जिला पुलिस बल अउ कोबरा दू सौ एक बटालियन के जवान सर्चिंग बर निकले रहीस। ए दउरान ओमन ह ए माओवादी ल गिरफ्तार करीन। गिरफ्तार माओवादी सोड़ी देवा उपर जगरगुंडा हमला संग बारह घटना म सामिल रहे के आरोप हे।
भाजपा -सदस्यता
विधानसभा चुनाव तिर आए के सेती राजनीतिक दल मन ह अपन काम काज ल तेज कर देहे। आज रइपुर स्थित भाजपा कार्यालय कुशाभाऊ ठाकरे परिसर म आयोजित कारीकरम जनजातीय समाज ले जुड़े प्रतिष्ठित समाजसेवी, संस्था के पदाधिकारी संग तीन सौ ले जादा लोगन ह भारतीय जनता पार्टी म प्रवेस करीन। प्रदेस अध्यक्ष अरूण साव ह, ए सबो झन ल भाजपा के सदस्यता दिलाइन।
एमा प्रमुख रूप ले सामिल हें- गोंडवाना गोड़ महासभा के प्रदेस संगठन मंत्री विकेश कुमार हिचामी, गोंडवाना समाज के बस्तर प्रभारी भूपेन्द्र दर्रो, सर्व आदिवासी समाज के कांकेर जिला के ब्लॉक उपाध्यक्ष चंद्रशेखर मंडावी, गोंडवाना समाज के रमेश मंडावी, जितेन्द्र मरकाम, विष्णु कावरे अउ आने लोगन ह सामिल हे।
केन्द्रीय गृहमंत्री -दौरा
केन्द्रीय गृहमंत्री अमित शाह अवइया 22 जून के दुरूग जिला के प्रवास म रही। ओमन दुरूग के रविशंकर स्टेडियम म आयोजित एक ठिन आमसभा ल संबोधित करही। श्री शाह के आगमन ल लेके भारतीय जनता पार्टी के दुरूग संभाग के पदाधिकारी मनके बइठका होइस। जेमा तइयारी ल लेके विचार विमर्श करे गीस। ए बइठका म सासंद विजय बघेल, सरोज पाण्डेय दुरूग लोकसभा प्रभारी प्रेमप्रकाश पाण्डेय संग आने-आने मोर्चा मंडल के पदाधिकारी सामिल होइन।
कांकेर-वीडियो वायरल-कार्रवाई
कांकेर जिला के दत्तक ग्रहण केन्द्र म एक झन लइका संग मारपीट के वीडियो वायरल होय के बाद जिला कलेक्टर डॉक्टर प्रियंका शुक्ला ह दत्तक एजेंसी के संगेसंग तत्कालिन जिला कारीकरम अधिकारी चंद्रशेखर मिश्रा ल निलंबित कर देगे हे। दत्तक एजेंसी के समन्वयक सीमा द्विवेदी अउ मारपीट करइया आरोपी माइलोगिन ल घलो पुलिस ह गिरफ्तार कर लेहे।
खबर के मुताबिक विशेषीकृत दत्तक एजेंसी कांकेर के खिलाफ शिकायत मिले के बाद ए कार्रवाई करे गीस।
गोधन न्याय योजना
मुख्यमंत्री भूपेश बघेल ह आज रइपुर स्थित अपन निवास कार्यलय म आयोजित कारीकरम म ‘‘गोधन न्याय योजना‘‘ के हितग्राही मन ल 21 करोड़ 31 लाख रूपिया के रासि ऑनलाइन अंतरित करीन। एखर संगेसंग गौठान समिति के अध्यक्ष अउ सदस्य मन ल मानदेय के रूप म एक करोड़ तेरह लाख रूपिया के रासि जारी करे गीस। सोलह मई ले इकतीस मई तक गौठान मन म खरीदे गे गोबर के बदला म, ए रासि गांव वाला मन ल भुगतान करे गेहे।
ए मउका म मुख्यमंत्री ह किसान मन ले कहिन कि अवइया खरीफ सीजन म जैविक खाद अउ जैविक कीटनाशक के जादा ले जादा उपयोग करय। जेखर ले खेति म अवइया लागत ल कम करे जा सकय।
विश्व पर्यावरण दिवस-01
आज दुनियाभर म विश्व पर्यावरण दिवस मनाय जात हें। प्रकृति अउ पृथ्वी संरक्षण बर अनुकूल कदम के प्रति विश्व स्तर म लोगन ल जागरूक करे के उद्देस्य ले ए दिन ल मनाय जाथे। संयुक्त राष्ट्र पर्यावरण कारीकरम के तहत पृथ्वी उपर जीवन संरक्षण बर उन्नीस सौ तिहत्तर ले हर बछर पांच जून के विश्व पर्यावरण दिवस मनाय जाथे। ए बछर के थीम हरय, ‘‘प्लास्टिक प्रदूषण हटाओं‘‘।
प्रधानमंत्री नरेन्द्र मोदी ह कहिन कि भारत अपन विकास बर दूसर क्षेत्र जइसन हे बड़का पैमाना म पर्यावरण संरक्षण बर ध्यान देवत हे। ओमन ह नई दिल्ली म विश्व पर्यावरण दिवस कारीकरम म एक ठिन वीडियो संदेस म कहिन कि इक्कीसवीं सदी म भारत जलवायु परिवर्तन अउ पर्यावरण संरक्षण के स्पष्ट रोड मैप के संग आगु बढ़ात हे। एति छत्तीसगढ़ म घलो विश्व पर्यावरण दिवस के मउका म राजधानी रइपुर संग आने-आने जिला मन म जन जागरूकता कारीकरम करे जात हे। मुख्यमंत्री भूपेश बघेल ह आज रइपुर स्थित अपन निवास म आंवला के पेड़ लगाइन। मुख्यमंत्री ह लोगन ले अपील करीन कि आमेन अपन घर म अउ तिर-तखार म पेड़ लगावय अउ ओला बड़का करे के जिम्मेदारी लेवय। उहें, जगदलपुर स्थित स्वामी आत्मानंद उत्कृष्ट विद्यालय म वृक्षारोपण कारीकरम म उद्योगमंत्री कवासी लखमा ह जामुल के पौधा लगाइन। ओमन कहिन कि हर मनखे ल कम से कम एक पोधा जरूर लगाना चाहिए। अउ ओखर देखभाल करना चाहिए। ऐति विश्व पर्यावरण दिवस के मउका म छत्तीसगढ़ पर्यावरण संरक्षण मंडल डहार ले रइपुर म राज्य स्तरीय भाषण अउ पोष्टर प्रतियोगिता के आयोजन करे गीस। जेखर विषय-‘‘व्यक्तिगत आदतों और व्यवहारों में परिवर्तन लाकर सिंगल यूज प्लास्टिक के उपयोग में कमी करना‘‘ रहीस।
सुनील सोनी-पत्रकारवार्ता
केन्द्र के एनडीए सरकार के नौ बछर के कार्यकाल पूरा होय के सेती। रइपुर लोकसभा क्षेत्र के कतकोन युवा अउ माइलोगिन नया भारत उत्सव मनाही। एखर तहत केन्द्र सरकार के सबो विभाग अउ सार्वजनिक उपक्रम के उपलब्धि दिखाए बर प्रदर्शनी लगाय जाही। ए जानकारी आज एक ठिन पत्रकार वार्ता म रइपुर लोकसभा के सासंद सुनील सोनी ह दीन। ओमन बताइन कि नया भारत उत्सव के सुरूआत रइपुर के सिविल लाइन स्थित एक ठन निजी स्कूल म 11 जून के होही। ए मउका म दू श्रेणी म स्कूल अउ कॉलेज के पढ़इया लइका बर थ्रीडी रंगोली अउ चित्रकला प्रतियोगिता के आयोजन करे जाही। उहें, 24 जून के समापन के मउका म केन्द्रीय विद्यालय डब्ल्यूआरएस कॉलोनी म केन्द्र सरकार के योजना मन उपर आधारित नृत्य नाटिका के प्रस्तुत करे जाही। श्री सोनी ह कहिन कि आत्मनिर्भर भारत ‘‘एक भारत-श्रेष्ठ भारत‘‘ डिजिटल इंडिया मिशन, मैक इन इंडिया, स्वच्छ भारत अभियान जइसन फ्लैगशिप योजना मन उपर
आधारित चित्रकला, रंगोली, नुक्कड़ अउ नृत्य नाटिका 11 ले 24 जून के बीच आने -आने स्कूल मन म आयोजित करे जाही।
व्यापम-परीक्षा
छत्तीसगढ़ व्यावसायिक परीक्षा मंडल-व्यापम के परीक्षा मन म उम्मीद्वार मन ले प्रवेश परीक्षा शुल्क नइ ले जात हे। ए बछर होवइया प्रतियोगी परीक्षा मन देखत व्यापम के वेबसाइट म परीक्षार्थी मन के प्रोफाइल बनाय के व्यवस्था करे गेहे। अब तक ए वेबसाइट म सात लाख अस्सी हजार ले जादा प्रोफाइल बनाय जा चुके हें। एखर माध्यम ले अब तक बारह लाख छब्बीस हजार ले जादा आवेदन पत्र भरे जा चुके हे। वेबसाइट म बनाय गेहे। प्रोफाइल म गलती ल सुधारे बर लगभग बीस दिन के समय देगे हे। बीस दिन के समय के बाद घलो प्रोफाइल म ऑनलाइन सुधार नइ करे के सेती जुर्माना के रूप म दू सौ रूपिया ले जात हे।
हज यात्रा
छत्तीसगढ़ राज्य हज कमेटी डहार ले हज यात्री मन बर टीकाकरण अउ स्वास्थ्य परीक्षण कारीकरम के आयोजन रइपुर म करे गीस। ए मउका म स्कूल शिक्षा मंत्री डॉक्टर प्रेमसाय सिंह टेकाम ह हज यात्री मन ले प्रदेस के तरक्की अउ खुशहाली बर दुआ करे के अपील करीन। अउ ओमन ल हज कीट बांटिन। श्री टेकाम ह कहिन कि देश म सबले पहिली हज गाइड मोबाइल एप्लीकेशन के सुरूआत निःशुल्क ऑनलाइन हल आवेदन करे के सुविधा हाजी मन ल हज कीट संग फर्स्ट एड कीट छत्तीसगढ़ हज कमेटी ह उपलब्ध कराइन हे। ए मउका म हज कमेटी के अध्यक्ष असलम खान संग आने लोगन उपस्थित रहीन।