प्रदेस म त्रिस्तरीय पंचायत उपचुनाव के तहत अधिसूचना जारी होय के संग आज ले नामांकन पत्र दाखिल करे के प्रकिया सुरू होगे हे, जेन नौ जून के मंझनियां तीन बजे तक जारी रीही। दस जून के बिहनिया साढ़े दस बजे ले नामांकन पत्र के जांच करे जाही। उहें, बारह जून तक अभ्यर्थी अपन नाम वापस ले सकही एखर बाद पात्र अभ्यर्थी मन के सूची जारी करे के संग ओमन ल चुनाव चिन्ह आवंटित करे जाही।
जरूरी होय म सत्ताइस जून के मतदान होही मतदान पूरा होय के बाद मतदान केन्द्र मन म घलो वोट के गिनती करे जाही। निर्वाचन कार्यालय डाहर ले बताए गेहे की यदि जरूरी होइस त तहसील या विकासखंड मुख्यालय म अठ्ाइस जून के मतगणना होही। तीस जून के चुनाव के परिणाम घोषित करे जाही।
निर्वाचक नामावली-प्रकाशन
छत्तीसगढ़ म अवइया विधानसभा चुनाव के पहिली एक अक्टूबर दू हजार तेइस के अर्हता तिथि म फोटोयुक्त निर्वाचक नामावली के दूसरइया विशेष संक्षिप्त पुनरीक्षण बर कार्यक्रम जारी कर देहे। अइसन भारतीय नागरिक जेन एक अक्टूबर दू हजार तेईस के अठारा बछर के उम्र पूरा कर चुके हे अउ जेखर नाम अभी तक कोनो कारणवश मतदाता सूची म दर्ज नइ हे। ओमन अपन नाम जुड़वाय बर प्रारूप-छै म आवेदन कर सकत हे।
मुख्य निर्वाचन पदाधिकारी रीना बाबा साहब कंगाले ह प्रदेश के सबो मान्यता प्राप्त राजनीतिक दल के प्रतिनिधि मन संग बइठका करके उंखर मनले हर बूथ म बूथ लेवल एजेंट नियुक्त करे के आग्रह करीन। श्रीमती कंगाले ह बताइन कि प्रदेश के सबो जिला म इवीएम-वीवीपैट मशीन के पहिली स्तरीय जाचं अवइया दस ले सत्ताईस जून के बीच करे जाही। ओमन ह बताइन कि प्रदेश म पच्चीस मई ले मतदान केंद्र के बूथ लेवल अधिकारी मन डहार ले घर-घर जाके सर्वे करे जात हे। श्रीमती कंगाले ह बताइन कि मतदाता सूची के प्रारंभिक प्रकाशन दू अगस्त के अउ आखरी प्रकाशन चार अक्टूबर के करे जाही।
राष्ट्रीय रामायण महोत्सव
छत्तीसगढ़ के रायगढ़ नगर म तीन दिवसीय राष्ट्रीय रामायण महोत्सव के दूसरइया दिन आज घलो रामायण के आने आने प्रस्तुती दे गीस। कार्यक्रम के शुरूआत झारखंड ले आये कलाकार मनके प्रस्तुती के संग होइस। झारखंड के कलाकार मन ह अरण्यकांड उपर मनमोहक प्रस्तुती दीन। ए बेरा सीता हरण अउ भगवान श्रीराम डहार ले शबरी के जूठा बेर खाय के प्रसंग के घलो प्रस्तुती दे गीस। महोत्सव म आज राष्ट्रीय कलाकार बाबा हंसराज रघुवंशी अउ लखबीर सिंह लक्खा अपन भजन के प्रस्तुती दीही।
उंहे राष्ट्रीय रामायण महोत्सव के पहिली दिन काली कंबोडिया ले आये विदेशी कलाकार मन ह कंबोडियाई भाषा म मर्यादा पुरूषोत्तम श्रीराम के सुंदर चरित के मंचन करीन।
केंद्रीय समीक्षा बैठक
केंद्रीय पर्यावरण, वन अउ उपभोक्ता मामला के राज्यमंत्री अश्विनी कुमार चौबे ह काली बिलासपुर म आने आने विभाग मनके समीक्षा बइठका लीन। ए दउरान ओमन ह प्रधानमंत्री के मिशन लाईफ अउ मुफ्त राशन योजना के क्रियान्वयन उपर जोर देबर कहिस।
बइठका के दउरान श्री चौबे ह राखड़ डंपिंग करइया सबो गाड़ी मन उपर शत-प्रतिशत जीपीएस लगाये के निर्देश दीन। ओमन ह कहिन कि अइसन मॉनिटरिंग ले गड़बड़ी ल रोके जा सकत हे। एखरे संग राखड़ के सुरक्षित निपटारण बर योजना चरणबद्ध तरीका ले अपनाय के निर्देश घलो दीन। ओमन ह एखर बर जनजागरण अउ जन भागीदारी घलो सुनिश्चित करे बर कहिन। एखरे संग ओमन ह ऐश बांध के सुरक्षा बर एक स्थानीय समिति गठित करे बर कीहिन ।
युवा महोत्सव
नेहरू युवा केंद्र अंबिकापुर डहार ले भारत दू हजार सैंतालिस कार्यक्रम के अंतर्गत जिला स्तरीय युवा महोत्सव के आयोजन करे गीस। एखर तहत भाषण युवा चित्रकार, युवा कविता लेखन, मोबाईल फोटोग्राफी अउ सांस्कृतिक कार्यक्रम आयोजित करे गीस। कार्यक्रम म जिला के पांच सौ ले जादा युवा मन भाग लीन। एमा विजेता मन ल राज्य अउ राष्ट्रीय स्तर म सामिल होय के मउका मिलही। समापन समारोह म केंद्रीय राज्यमंत्री अउ सरगुजा सांसद रेणुका सिंह मुख्य अतिथि के रूप म सामिल होइन।
एनसीसी निरीक्षण
एनसीसी हेडक्वार्टर रायपुर के ग्रुप कमांडर ब्रिगेडियर विक्रम सिंह चौहान ह आज दुर्ग के अंजोरा म पहिली घुड़सवार बटालियन के निरीक्षण करीन। ए मउका म ओमन ह कहिन कि हमर उद्देश्य कैडेट्स ल अच्छा नागरिक बनाना हे। ओमन ह कहिन कि छत्तीसगढ़ म केंद्र अउ राज्य सरकार डहार ले एनसीसी ल पर्याप्त सुविधा दे जावत हे। जेखर कारण लगातार एनसीसी के अधोसंरचना बाढ़त हे। वर्तमान म अठाईस हजार कैडेट्स हे। ओमन ह कहिन कि नवा-नवा शैक्षणिक संस्था ल एनसीसी ले जोड़के कैडेट्स के संख्या बढ़ाय के प्रयास करे जात हे। ओमन ह कहिन कि हमर लक्ष्य हे कि जादा ले जादा कैडेट्स अग्निवीर अउ एसएसबी ट्रेनिंग बर चयनित हो सके।
पर्यावरण संरक्षण-शपथ
छत्तीसगढ़ म काली एक जून के दिन बारा लाख अड़तीस हजार ले जादा लोगन मन ह पर्यावरण संरक्षण के संकल्प लेके एक नवा विश्व कीर्तिमान स्थापित करीन। छत्तीसगढ़ पर्यावरण संरक्षण मंडल डहार ले मिशन लाईफ कार्यक्रम के तहत काली बीहनिया आठ बजे ले मंझनियां पांच बजे तक शपथ के कार्यक्रम रखे गे रीहिस।
ए दउरान रायपुर जिला म एक दिन म सबले जादा शपथ लेके विश्व रिकॉर्ड टूटीस अउ एक लाख पचहत्तर हजार दू सौ नौ शपथ के संग मंडल ह लिम्का बुक ऑफ रिकॉर्ड म अपन नाम दर्ज कराइस। उंहे पूरा राज्य म बारा लाख अड़तीस हजार ले जादा लोगन मन ह शपथ लेके इंडिया स्टार बुक ऑफ रिकॉर्ड अउ वर्ल्ड रिकॉर्ड बुक म मंडल ह अपन नाम दर्ज कराइन।
माओवादी समर्पण
सुकमा जिला म एक लाख रूपिया के इनामी के संग दू माओवादी मन ह पुलिस अउ केंद्रीय रिजर्व पुलिस बल के दूसरा बटालियन के अधिकारी मनके आगू आत्मसमर्पण करीन। पुलिस के अनुसार जिला पुलिस के पुनर्वास अभियान – पूना नार्कोम – ले प्रभावित होके आत्मसमर्पण करीन। उंहे छत्तीसगढ़ सरकार के आत्मसमर्पण अउ पुर्नवास नीति के अनुसार सुविधा दे जाही।
बातों-बातों-में
रेलवे-ऑटोमेटिक टिकट वेंडिंग मशीन
दक्षिण पूर्व मध्य रेलवे डहार ले यात्री मनके सुविधा ल धियान म राखत रेलवे स्टेशन मन म नवा ऑटोमेटिक टिकट वेंडिंग मशीन लगाय गेहे। ए मशीन ले यात्री मन ल टिकट आसानी ले अउ जल्दी मिले के संग स्टेशन मन म लगने वाला लाइन ले घलो छुटकारा मिलही।
जानबा के मुताबिक दक्षिण पूर्व मध्य रेलवे के पचपन प्रमुख स्टेशन मन म अठ्यासी कार्ड आधारित ए.टी.वी.एम. स्थापित करे गेहे। एमा बिलासपुर मंडल के उन्नीस स्टेशन मन म अडतीस, रायपुर मंडल के तेरा स्टेशन मन म उन्नीस अउ नागपुर मंडल के तेईस स्टेशन मन म तीस ऑटोमेटिक टिकट वेंडिंग मशीन के व्यवस्था करे गेहे। ए मशीन ले यूपीआई के संगेसंग कैश अउ स्मार्ट कार्ड के माध्यम ले घलो टिकट खरीदे जा सकत हे। ये कार्ड मैट्रो कार्ड के जइसे रिचार्ज करे जाथे। ए.टी.वी.एम. ले टिकट खरीदे के बाद उंखर किराया ए.टी.वी.एम. कार्ड ले ही कटही।
करंट-मौत
जांजगीर-चांपा जिला के बम्हनीडीह के कपिस्दा गांव म करंट लगे ले दू लोगन के मउत होगे। जानबा के मुताबिक ये लोगन मन खेत म मूंगफली के फसल उखाड़े के दउरान उंहा अस्थायी कनेक्शन बर लगाये गे तार म प्रवाहित करंट के चपेट म आ गीस।
उंहे बेमेतरा जिला के नवागढ़ थाना क्षेत्र के ग्राम पड़कीडीह म घलो एक महिला के करंट लगे ले मउत होगे। बताय जात हे कि महिला खेत म काम करे के दउरान उंहा नीचे ले जात मेनलाइन के चपेट म आ गीस।