केन्द्र के एनडीए सरकार के नौ बछर पूरा होय म आज रायपुर म पत्रकार मन ले चर्चा करत केन्द्रीय जनजातीय मामले मंत्री अर्जुन मुंडा ह किहीन कि प्रधानमंत्री नरेन्द्र मोदी के अगुवई म देस के करोड़ों लोगन के विश्वास के संग विकास के नवा कहानी लिखत हे भारत।
श्री मुंडा ह किहीन कि दू हजार चौदह ले दू हजार तेईस के ए नौ बछर के कालखंड म श्री मोदी के अगुवई म केन्द्र सरकार ह देस ल सांति, समृद्धि अउ विकास के गति अउ गुणवत्ता दूनों देखईस। ओमन ह किहीन कि स्वतंत्र भारत के इतिहास म गरीब मनके आवास निर्माण के अइसन क्रांति देस म पहिली कभू नइ दिखीस। केन्द्रीय मंत्री ह बतईन कि केन्द्र सरकार ह गरीब मनके परेसानी ल समझ के उंखर चिकित्सा के समूचित इंतजाम करे हे। संगेसंग किसान मनके भलाई बर कतकोन क्रांतिकारी कदम उठाय हे।
श्री मुंडा ह किहीन कि नौ बछर के ए कार्यकाल उपलब्धि ले भरे अउ बेमिसाल रेहे हे।
इसरो -एनवीएस -वन
भारतीय अंतरिक्ष अनुसंधान संगठन-इसरो ह आज बिहनिया आंध्र प्रदेस के श्रीहरि कोटा स्थित सतीश धवन अंतरिक्ष केन्द्र ले नवा पीढ़ी के पहली नेविगेशन उपग्रह एनवीएस- वन के सफल प्रक्षेपण करीन। जीएसएलवी- एफ-12 ह नेविगेशन उपग्रह एनवीएस- वन ल सफलता पूर्वक कक्षा म स्थापित करदे हे । ए प्रक्षेपण ले भारत तीन आने राष्ट्र मन म न केवल एक तारामण्डल श्रृंखला के रूप म सामिल होही बल्कि स्वदेसी रूप ले रूबिडियम घड़ी के संचालन घलो करही।
आधार-शिविर
आधार कार्ड ल लेके लोगन मन ल होवत परेसानी ल दूर करे बर राजधानी रायपुर के सहीद स्मारक म आधार समस्या निवारण सिविर के आयोजन एक अउ दू जून के करे जाही। सिविर म भारतीय विशिष्ट पहिचान प्राधिकरण-यू.आई.डी.ए.आई. के क्षेत्रीय कार्यालय हैदराबाद के अधिकारी मौजूद रइही। सिविर म बिहनिया दस बजे ले संझा पांच बजे तक लोगन के आधार ले जुड़े समस्या के निवारण करे जाही। संगेसंग ए घलो देखे जाही कि आधार म अपडेशन या जाने जानकारी मन ल बदले म का दिक्कत आवत हे, जेला सुधारे के कोसिस घलो करे जाही।
गौठान – भाजपा/कांग्रेस
भारतीय जनता पार्टी डाहर ले चलाए जात ‘‘चलबो गौठान-खोलबो पोल‘‘ अभियान के तहत पूर्व मुख्यमंत्री डॉक्टर रमन सिंह ह कार्यकर्ता मन के संग राजनांदगांव जिला के मुढ़ीपार, नवागांव अउ ईरा गांव म गौठान के निरीक्षण करीन। डॉक्टर सिंह बताइन की ग्रामीण मन ले जानकारी मिले रिहिस की गौठान म न तो गोबर के खरीदी होवत हे अउ न ही खाद बनाए जात हे।
इही बीच युवा कांग्रेस ह मेरा गौठान – मेरा अभिमान कार्यक्रम के सुरूवात राजनांदगांव विधानसभा क्षेत्र के ग्राम अंजोरा ले करीन। युवा कांग्रेस अध्यक्ष गुरभेज सिंह माखिजा के नेतृत्व म कार्यकर्ता मन ह गोबर खरीदी के संबंध म गौठान समिति के सदस्य मन ले जानकारी लिन। सदस्य मन ह बताइन की गौठान म गोबर ले वर्मी कम्पोस्ट खाद बनाए के काम चलत हे। ऐखर ले महिला मन ल रोजगार घलो मिलत हे।
भाजपा-पोस्टर यात्रा
प्रदेस म कथित रूप ले दू हजार करोड़ रूपया के सराब घोटाला ल लेके भारतीय जनता युवा मोर्चा अउ महिला मोर्चा डाहर ले मुंगेली जिला म सराब दुकान के विरोध म पोस्टर यात्रा निकाले गिस। कार्यकर्ता मन ह जरहागांव अउ लोरमी विधानसभा के देवरहट म नारेबाजी करत हुए सराब दुकान के विरोध म पोस्टर घलो चिपकाइन। ए संबंध म जिला महामंत्री अमितेश आर्य ह बताइन कि जिला स्तर म ए आंदोलन जारी रही। सराब दुकान म जाके कार्यकर्ता मन उग्र प्रदर्शन करही।
बीएसएनएल जीएम-फांसी
दुर्ग म भारत ब्राडबैंड नेटवर्क के महाप्रबंधक सतीश साहू ह आज अपन दफ्तर म कथित रूप ले फांसी लगा लिस। घटना के खबर मिलत ही मोहन नगर थाना के पुलिस मउका म पहुंचिन अउ मामला के जांच शुरू कर दिन।
जानबा के मुताबिक ओमन रायपुर बीएसएनएल म पदस्थ रिहीन। ओ ह रविवार के संझा ले घर नइ गे रिहीस जेखर बाद ओखर परिजन मन ह आज बिहनिया ओखर गुमशुदा होय के रिपोर्ट नेवई थाना म दर्ज कराय रिहीन।
उहें, कोंडागांव जिला के परिवार न्यायालय म सुरक्षा गार्ड के रूप म पदस्थ पुलिस आरक्षक जितेन्द्र पटेल ह अपन रायफल ले खुद ल गोली मार लीस। एसडीओपी निमितेश सिंह परिहार ह बतईन कि घटना के जांच करे जात हे।
राष्ट्रीय रामायण महोत्सव
रायगढ़ म एक जून ले शुरू होवइया तीन दिवसीय राष्ट्रीय रामायण महोत्सव के तइयारी जोरसोर चलत हे। ए महोत्सव म कंबोडिया अउ इंडोनेशिया के संग देस के बारह राज्य के रामायण मण्डली रामायण के आने -आने प्रसंग म आधारित प्रस्तुति देहि। महोत्सव म रामायण के अरण्यकांड उपर नृत्य नाटिका के विसेस प्रस्तुति होही। एखर अलावा रोज हनुमान चालिसा, रामायण मंडली के प्रस्तुति अउ केलो नदी के आरती के आयोजन होही। पहली दिन प्रतिभागी दल मन के मार्च पास्ट होही। मंझनिया गायिका शन्मुख प्रिया अउ शरद शर्मा अपन कार्यक्रम प्रस्तुत करही। दूसर दिन प्रसिध्द गायक बाबा रघुवंशी अउ भजन गायक लखबीर सिंह लक्खा के कार्यक्रम होही। आखरी दिन मंझनिया छः बजे केलो नदी तट म महाआरती अउ दीपदान के कार्यक्रम होही। एखर बाद कवि कुमार विश्वास रामकथा कहि अउ प्रसिध्द गायिका मैथिली ठाकुर के भजन के प्रस्तुति होही।
सॉफ्टबॉल- किक बॉक्सिंग
जापान म होवइया अंतर्राष्ट्रीय अंडर -18 एशिया कप म सिरकत करइया भारतीय सॉफ्टबॉल टीम म छत्तीसगढ़ के चार खिलाड़ी घलो सामिल करे गेहे। एमा बीजापुर के तीन खिलाड़ी- राकेश, कड़ती, सुशील कुड़ियम अउ त्रिलेश उद्दे घलो अपन दम-खम दिखाही। ए तीनों खिलाड़ी जिला के आवापल्ली, भैरमगढ़ अउ मंगापेटा कुटरू के अंदरूनी इलाका के अंतर्राष्ट्रीय सॉफ्टबॉल एशिया का कप 23 ले 26 जून तक जापान के कोची सहर म खेले जाही। ए खिलाड़ी मनके भारतीय टीम म चयन होय म मुख्यमंत्री भूपेश बघेल अउ खेल मंत्री उमेश पटेल ह बधाई देहे।
उंहे, रायपुर म खेले गेहे दसवा राज्य स्तरीय सिनियर कीक बॉक्सिंग प्रतियोगिता म कबीरधाम जिला के खिलाड़ी मन के दबदबा रिहिस। महिला अउ पुरूष वर्ग म खेले गेहे ऐ स्पर्धा म जिला के खिलाड़ी मन ह आठ पदक हासिल करे हे। एमा नितेश चंदेल अउ छेदीलाल निषाद ह अपन-अपन वर्ग म स्वर्ण पदक जीते हे। ए प्रतियोगिता म राज्य के चौदह जिला के खिलाड़ी मन ह भाग लीन। प्रतियोगिता के आयोजन कीक बॉक्सिंग एसोसिएसन ऑफ छत्तीसगढ़ डाहर ले करे गिस।
कार्यशाला
रायपुर के पंडित जवाहर लाल नेहरू स्मृति चिकित्सा महाविद्यालय अउ डॉक्टर भीमराव अंबेडकर स्मृति चिकित्सालय डाहर ले प्रसूति बर बुनियादी क्रिटिकल केयर सपोर्ट विषय उपर दू दिन के कार्यसाला के आयोजन करे गिस। पहली दिन काली विशेषज्ञ मन ह गर्भावस्था म उच्च रक्तचाप संबंधी विकार, गर्भावस्था म गंभीर संक्रमण, मातृ मृत्युदर ल कम करे जइसन विषय म व्याख्यान दिन। आयुष विश्वविद्यालय के कुलपति डॉक्टर ए. के. चन्द्राकर ह कार्यसाला के सुभारंभ करीन।
वरिष्ठ स्त्रीरोग विसेषज्ञ डॉक्टर तृप्ती नागरिया ह अपन व्याख्यान म कहिन की प्रसूति के दउरान होवइया रक्तस्त्राव मातृ मृत्युदर के सबले जरूरी कारण हे।
अउ अब थोरकुन समाचार सार म-
– कबीरधाम जिला म राजस्व पटवारी संघ के अनिश्चितकालीन हड़ताल आज घलो जारी हे। पटवारी संघ ह अपन आठ सूत्रीय मांग ल लेके कवर्धा म बाइक रैली निकाल के विधायक कार्यालय के आगू प्रदर्सन करीन।
अउ
– सुकमा जिला के कोंटा थाना क्षेत्र म माओवादी गतिविधि म सामिल रेहे फरार तीन आरोपी मन ल पुलिस ह गिरफ्तार कर लेहे।