प्रधानमंत्री नरेन्द्र मोदी ह आज नवा संसद भवन ल राष्ट्र ल समर्पित करिन । ओमन संसद भवन म पुजारी मन के संग हवन -पूजन करिन। श्री मोदी ह लोकसभा अध्यक्ष ओम बिरला के संग मिलके सेंगोल स्थापना करिन अउ पट्टिका के अनावरन के संग संसद भवन के उद्घाटन करिन। एकर बाद श्री मोदी ह नवा संसद भवन के निर्माण म सामिल लोगन मनके सम्मान करिन। प्रधानमंत्री अउ लोकसभा अध्यक्ष ह सर्वधर्म प्रार्थना सभा म घलो हिस्सा लिन।
नवा संसद भवन ले अपन पहली संबोधन म प्रधानमंत्री नरेन्द्र मोदी ह नवा संसद ल नवा नियति के संग एक नवा उदिम बताइन हें। ओमन किहिन कि जब भारत ह आगु बाढ़थे, त दुनिया ह आगु बाढ़थे। नवा संसद भवन भारत के विकास के संगेसंग बिश्व विकास के आह्वान करही। श्री मोदी ह जोर देवत किहिन कि एहा सिरिफ एक ठन इमारत नोहय, भलुक आत्मनिर्भर भारत अउ एक सौ चालीस करोड़ भारतीय मनके सपना के प्रतिबिंब हे।
प्रधानमंत्री ह किहिस कि, हमर लोकतंत्र ह हमर प्रेरणा हे, अउ हमर
संविधान हमर संकल्प हे। इही प्रेरणा अउ संकल्प के सबले बढ़िया प्रतिनिधि हमर संसद हे। ऐतिहासिक मउका म प्रधानमंत्री ह पचहत्तर रूपिया के सिक्का अउ डाक टिकट घलो जारी करिस।
सुनइया मन ल बतादन कि प्रधानमंत्री ह नवा संसद भवन के आधारशिला, दस दिसम्बर बछर दू हजार बीस के राखे रिहिस। नवा संसद भवन पैंसठ हजार वर्ग मीटर म बने हे। लोकसभा कक्ष म आठ सौ अठ्यासी सीट हें अउ विषय – वस्तु राष्ट्रीय पक्षी मोर उपर आधारित हे। उहें राज्यसभा कक्ष म तीन सौ चौरासी सीट हें, अउ ए ह राष्ट्रीय पुष्प कमल के थीम बने हे।
मन की बात -01
प्रधानमंत्री नरेन्द्र मोदी ह आज आकाशवानी ले प्रसारित ‘‘मन की बात‘‘ के एक सौ एक कड़ी म किहिन कि स्वाधीनता संग्राम म आदिवासी भाई-बहनी मन के योगदान ल समर्पित दस ठन नवा संग्रहालय देश म बनाय जावत हें। ओमन किहिन की आने-आने कतकोन संग्रहालय हें, जउन हमर अतीत ले जुड़े पहलू मन के चिन्हा ल दरसाथें।
प्रधानमंत्री ह जल संरक्षण के महत्ता ल सुरता देवात किहिन कि बिन पानी के जिनगी उपर संकट तो बने रहिथे, उहें लोगन अउ देश के विकास घलो माढ़े रहि जाथे। भविष्य के इही चुनौती ल देखत आज देश के हर जिला म पचहत्तर ठन अमृत सरोवर के निर्माण कराय जावत हें। अब तक पचास हजार ले जादा अमृत सरोवर के निर्माण हो चुके हे। ओमन किहिन कि ए ह जल संरक्षण के दिशा म बहुते बड़का कदम हे।
श्री मोदी ह जल संरक्षण ले जुड़े स्टार्टअप्स के चर्चा करत छत्तीसगढ़ के बालोद जिला के युवामन के घलो गोठ करिन। ओमन किहिन कि बालोद जिला के युवा मन पानी ल बचाय बर अभियान शुरू करे हें।
प्रधानमंत्री ह युवा मन म एक भारत -श्रेष्ठ भारत ल ताकत देय बर युवा मन के उदिम ल सहराइन हें। ओमन किहिन कि देश के एकता अउ विविधता ल चेत म राखत शिक्षा मंत्रालय ह एकर पहल करे हे। ओमन किहिन कि युवा संगम के उद्देश्य लोगन के बीच संपर्क ल बढ़ावा देना अउ देस के युवा मन ल एक -दूसर के संग घुले-मिले के मउका देना हे।
मन की बात -02
एति, भारतीय जनता पार्टी के प्रदेश प्रभारी ओम माथुर ह सुकमा म ‘‘मन की बात‘‘ कार्यक्रम ल सुनिस। उहें, जांजगीर- चांपा जिला म नेता प्रतिपक्ष नारायण चंदेल के अगुवई म भाजपा नेता अउ वार्डवासी मन प्रधानमंत्री के ‘‘मन की बात‘‘ ल सुनिन। ए बेरा कार्यकर्ता मन म भारी उछाह दिखिस।
ओति, भारतीय जनता पार्टी के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह घलो राजनांदगांव जिला के ग्राम पंचायत तोरनकट्टा म ‘‘मन की बात‘‘ सुनिस।
टैटू प्रशिक्षण
कौशल उन्नयन कार्यक्रम के तहत राजधानी रायपुर म ए बेरा टैटू प्रशिक्षण के आयोजन करे जात हे। ए बेरा रायपुर नगर निगम के आयुक्त मयंक चतुर्वेदी ह प्रशिक्षु टैटू कलाकार मनले भेंट करीन अउ प्रशिक्षण के उपयोगिता के बारे म गोठबात करीन। श्री चतुर्वेदी ह परंपरागत टैटू व्यवसाय ले जुड़े ये कलाकार मनके प्रतिभा ल लोगन मन तक पहुंचाय बर कला कौशल केंद्र के रूपरेखा तैयार करे के संगे टैटू कार्निवॉल जइसन बड़का आयोजन रायपुर म करे के निर्देश दीन हे।
बतान कि बीते पच्चीस मई ले सुरू होय टैटू प्रशिक्षण सत्र के समापन आठ जून के होही।
कार्यशाला
गर्भवस्था ले जुड़े कठिनाई अउ इलाज के सेती आज ले राजधानी रायपुर के मेडिकल कॉलेज म दू दिवसीय कार्यशाला के शुभारंभ करे गिस। ए कार्यशाला म दिल्ली, बनारस विश्वविद्यालय अउ रायपुर के विशेषज्ञ मन गंभीर रूप ले बीमार महिला मन ल बड़का केन्द्र म रेफर करे बारे म जानकारी दिहीं अउ एखर ले जुड़े व्यावहारिक सुझाव घलो दिहीं।
जनजातीय – वाचिकोत्सव
नवा रायपुर म आयोजित तीन दिवसीय जनजातीय वाचिकोत्सव -2023 के काली समापन हो गिस। महोत्सव म राजनांदगांव के विषय विशेषज्ञ शेरसिंह आचला ह कहिन कि जनजाति वाचिक परंपरा के जीव-जंतु अउ प्रकृति ले गहरा नाता हे। काबर कि आदिवासी समाज शुरू ले ही घना जंगल म रहत आवत हे। एखरे सेती गोत्र के नामकरण म एखर प्रभाव विशेष रूप ले झलकथे।
उंहे रायपुर के प्रोफेसर अशोक प्रधान ह कीहिन कि आदिवासी समाज के अपन समृद्ध सांस्कृतिक विरासत हे जेला संजोके राखना बहुते जरूरी हे। एखर संगे ओमन कुछ जनजाति म प्रचलित कठोर प्रथा म सुधार करे के गोठ उपर घलो जोर दीन।
माओवादी हत्या
सुकमा जिला म माओवादी मन डहार ले एक झिन ग्रामीण के हत्या करे के मामला आगू आय हे। मिले जानकारी के अनुसार चिंतागुफा थाना क्षेत्र म बीते रतिहा माओवादी मनके दल ह गांव पहुंचीस अउ ग्रामीण उपर मुखबिरी के आरोप लगावत उंखर हत्या कर दीन।
ट्रेन परिचालन
दक्षिण पूर्व मध्य रेलवे बिलासपुर मंडल के निगौड़ा-जैतहरी स्टेशन म ओवरब्रिज निर्माण के सेती ये मार्ग म चलइया कुछएक रेलगाड़ी मनल रद्द करे गेहे। उंहे कुछ रेलगाड़ी ल देरी ले चलाये जाही।
जानकारी के अनुसार बिलासपुर-कटनी बिलासपुर अउ बिलासपुर-शहडोल बिलासपुर पैंसेंजर स्पेशल आज रद्द रीही। एखरे संग पुरी-बलसाड़ एक्सप्रेस अउ बिलासपुर-इंदौर नर्मदा एक्सप्रेस ल आज देरी ले रवाना होही।
दुर्घटना
बीते चौबीस घंटा के दउरान प्रदेस म आने – आने सड़क हादसा म चार झन लोगन के मौत होगिस। उंहे, चौदह झन आने लोगन घायल होगें।
मिले जानकारी ले बिलासपुर-रायपुर राष्ट्रीय राजमार्ग म नांदघाट के तिर यात्री बस ह ट्रेलर ले टकरा गे। ए घटना म एक झन यात्री के मौत होगिस। बारह झन आने लोगन घायल होगें।
उहें, जगदलपुर म राष्ट्रीय राजमार्ग बालेगा के तिर दू ठन गाड़ी के आपस म टकराय ले दूनों गाड़ी म आगी लग गिस। ए हादसा म एक चालक के मउका म ही मौत होगे।
ऐति, रायगढ़ जिला के खरसिया इलाका म बीते रतिहा रानीसागर गांव म होय सड़क दुर्घटना म फटफटी सवार पति – पत्नी के मौत होगिस। उहें, दू झन आने लोगन घायल होगिन।
अउ अब थोरकुन समाचार सार म-
– मनेन्द्रगढ़-चिरमिरी-भरतपुर जिला म मनेन्द्रगढ़ पुलिस ह नौकरी लगाय के नाव म धोखाधड़ी करइया दू झिन मनखे ल गिरप्तार करे हे।
अउ
– कोरबा जिला के खरमोरा स्थित वेस्टर्न इलेक्ट्रोड्स के बॉइलर म ब्लास्ट होय के खबर मिले हे। फेर ए घटना म कोनो प्रकार के जनहानि होय के सूचना नइ हे।