आज दिनभर के खबर ल अपन गुरतुर छत्तीसगढ़ी भाखा म पढ़व

कोरोना मरीज
प्रदेश म आज घलो आने आने जिला ले कोरोना संक्रमित नवा मरीज मिले के पुष्टि होय हे। दुर्ग जिला म आज मंझनियंा तक कोरोना पाॅजीटिव चैदा झिन मरीज के पहिचान होय हे। कोविड केयर सेंटर के प्रभारी डॅाक्टर अनिल शुक्ला  ह बताइन कि पाछू अठाइस जुलाई के चरौदा म एक झिन कोरोना मरीज के मउत होय रीहिस अउ आज जउन मरीज मिले ह ओमा ले सात झिन मरीज अइसे हे जउन के मृतक युवक के संपर्क म आय रीहिन।
उंहे राजनांदगंाव जिला म आईटीबीपी के पांच झिन जवान सहित ग्यारा नवा कोरोना संक्रमित मरीज मिले हे। ओति बस्तर जिला म कोरोना संक्रमित दस झिन नवा मरीज मनके पुष्टि होय हे। जेमा जगदलपुर मेडिकल काॅलेज के स्वास्थ्यकर्मी सामिल हे।
एति महासमुंद जिला म पाछू देर रात तक कोरोना संक्रमित तीन झिन मरीज मिले हे। ए मरीज मनके संपर्क म आये लोगन मनके जानकारी जुटाय जात हे। बतादन कि इही जिला के तुमगांव थाना क्षेत्र म दू दिन पहिली जउन अज्ञात मनखे के लाश मिले रीहिस, ओखर घलो कोरोना रिपोर्ट पाॅजीटिव आय हे।
इही बीच कोरिया जिला के बैंकुठपुर नगर पालिका परिषद क्षेत्र म कोरोना पाॅजीटिव मरीज मिले के बाद जिला प्रशासन ह पूरा इलाका ल कंटेनमेंट जोन घोषित कर देहे। स्थानीय विधायक अंबिका सिंहदेव ह जिला कलेक्टर ले आग्रह करीन हे कि स्थिति के जानकारी लेके पूर्ण लाॅकडाउन के संबंध म उचित निर्णय लेवय।
राम-पर्यटन स्थल
प्रधानमंत्री नरेंद्र मोदी ह अयोध्या म बनइया राम मंदिर निर्माण काम के काली भूमि पूजन करही। ए बेरा म बालोद म भाजपा ग्रामीण मंडल के पदाधिकारी मन आज ध्वज यात्रा निकालीन अउ लोगन मनले काली संझा दीया बारे के अपील करीन हे। ए ध्वज यात्रा आज बीहनिया बघमरा गांव ले शुरू होके बालोद मंडल के आने आने गांव ले होत निकलीस।
उंहे छत्तीसगढ़ म घलो भगवान राम के वनवास काल ले संबंधित जगा मन ल पर्यटन तीर्थ के रूप म विकसित करे के तियारी शुरू कर दे गेहे। एमा कोरिया जिला के सीतामढ़ी-हरचैका अउ सरगुजा जिला के रामगढ़ घलो सामिल हे । अइसे माने जाथे कि वनवास के बेरा भगवान राम ह कोरिया जिला ले ही छत्तीसगढ़ म प्रवेश करे रीहिन। इंहा मवाई नदी के तीर स्थित एक गुफा म सतरा ठिन कमरा हे, एला सीता के रसोई के नाम ले घलो जाने जाथे।
राज्यपाल दुर्ग
राज्यपाल अनुसूइया उइके ह युवा मन बर डिग्री के संगेसंग व्यावहारिक ज्ञान अउ संस्कार ल घलो जरूरी बताइन । ए बात राज्यपाल ह दुर्ग के हेमचंद विश्वविद्यालय म राष्ट्रीय सेवा योजना- एनएसएस डहार ले आयोजित एक वेबिनार ल संबोधित करत ए गोठबात कीहिन। एक दिवसीय संगोष्ठी- उच्च शिक्षा का सामाजिक सरोकार – विसय म आयोजित करे गे रीहिस।
अपन संबोधन म राज्यपाल ह कीहिन कि उच्च शिक्षा ही युवा मन ल नवा दिशा प्रदान कर सकत हे। लेकिन विद्यार्थी मन ल सामाजिक गतिविधि म सामिल करना घलो जरूरी हे। ओमन ह कीहिन कि एनएसएस, एनसीसी, अउ यूथ रेडक्रास जइसे जम्मों संस्थान विद्यार्थी मन म राष्ट्र भावना जगाथे। ओमन ह कोरोना के संकटकाल म एनएसएस इकाई के वालिंटियर के डहार ले जन-जागृति बर करे जात काम के सराहना करीन हे।
यूपीएससी परिणाम
संघ लोक सेवा आयोग-यूपीएससी ह आज सिविल सेवा परीक्षा बछर दू हजार उन्नीस के परिणाम के घोषणा कर दीन हे। जेमा छत्तीसगढ़ के छै झिन उम्मीदवार मन ह सफलता हासिल करीन हे।
भिलाई के सिमीकरण ह देशभर म इक्तीसवंा स्थान हासिल करीन हे, उंहें  उमेश प्रसाद गुप्ता ल एक सौ बांसठवा, सुथान ल दू सौ नौवंा, आयुष खरे ल दू सौ सड़सठवंा, जितेन्द्र कुमार यादव ल तीन सौ इकतीसवंा अउ योगेश कुमार पटेल ल तीन सौ चैतीसवंा स्थान मिले हे।
देशभर म इकतीसवंा स्थान म आये सिमीकरण ह बताइन कि उंखर करा तियारी बर बहुत कम बेरा रीहिस ओखर बाद घलो ओमन ह हर दिन दस ले बारा घंटा तक पढ़ाई करके सफलता पाइन हे।
उंहें यूपीएससी के परिणाम म पहिली ले ही आईपीएस अधिकारी रेहे योगेश कुमार पटेल घलो कामयाब होय हे। बछर दू हजार सतरा के यूपीएससी परीक्षा परिणाम म श्री पटेल ल पांच सौ इकहत्तरवंा स्थान मिले रीहिस।
मुख्यमंत्री भूपेश बघेल ह अपन ट्वीट संदेश म यूपीएससी परीक्षा म कामयाब उम्मीदवार मन ल अपन शुभकामना दीन हे। ओमन ह कीहिन हे कि आप जम्मों मन अपन परिवार के संगेसंग देश अउ प्रदेश के नाम घलो रौशन कर हो।
बतादन कि यूपीएससी डहार ले आज जारी करे गे परिणाम म आने आने सिविल सेवा बर देशभर ले कुल आठ सौ उनतीस उम्मीदवार मनके चयन करे गेहे।
माओवादी कैंप ध्वस्त
दंतेवाड़ा जिला म सुरक्षा बल मन ह माओवादी के एक ठिन कैम्प ल ध्वस्त करे म सफलता पाइन हे। संगेसंग घटना स्थ्ल म लगाए गे दू ठन क्लेमोर माइंस ल घलो सुरक्षित तरीका ले निष्क्रिय कर दीन।
जिला के अरनपुर थाना क्षेत्र के पोटली-मिर्चीपारा म माओवादी मनके मौजूद होय के सूचना मिले रीहिस। जेमा डीआरजी अउ एसटीएफ के टीम ह इलाका म सर्चिंग करीन। ए बेरा म दरभा डिवीजन के माओवादी कैडर के संग सुरक्षा बल मनके मुठभेड़ होगे रीहिस।
ए बेरा म जवान मनके जवाबी कार्रवाई के बाद माओवादी मन ह कैम्प छोड़के भाग गीन। इलाका के सर्चिंग म सुरक्षा बल मन ह दैनिक उपयोग के जीनिस बिजली के तार अउ माओवादी साहित्य बरामद करीन हे। फिलहाल सुरक्षा बल मनके गश्त बढ़ा देहे अउ माओवादी के तलाश करे जात हे।
गंाजा शराब जब्त
महासमुंद म करीबन नब्बे लाख रूपिया के नौ कुंटल गंाजा बरामद करे गेहे। ए मामला म पुलिस ह ओडिशा के रहइया दू झिन आरोपी ल गिरप्तार करीन हे। गाड़ी के चेंकिंग के बेरा म पुलिस ह सिंघोड़ा के तीर एक गाड़ी ले ए गांजा ल बरामद करीस हे।
अइसने बेमेतरा जिला म बोरसी गांव ले घलो एक लाख रूपिया ले जादा कीमत के शराब अउ गांजा ल जब्त करे गीस हे। ए मामला म एक झिन माइलोगिन समेत दू लोगन मनके गिरप्तारी होइस हे।
पुलिस के अनुसार मुखबिर ले मिले सूचना के आधार म बेरला थाना क्षेत्र के कंडरका चैकी के तीर एक गोदाम ले देशी अउ अंग्रेजी शराब के अलावा गांजा घलो बरामद करीन हे।
भालू मौत/हाथी हमला
महासमुंद जिला म शिकार करे बर जंगल म बिछाये गे बिजली के तार म करंट लगे ले दू भालू के मउत होगे। ए मामला म वन विभाग के टीम ह तीन झिन आरोपी मन ल गिरप्तार करे हे। जबकि एक आने आरोपी के खोज करे जात हे।
एति सूरजपुर जिला के प्रतापपुर के सिंघोड़ा गांव म हाथी के हमला ले एक झिन माइलोगिन के मउत होगे।
हाथी मित्र दल
प्रदेश के हाथी प्रभावित जगा म हाथी मित्र दल के डहार ले सरलग निगरानी करे जात हे। ए हाथी मित्र दल ह सिरिफ जंगली हाथी के हमला ले ग्रामीण मनके रक्षा करे म मदद करथे। संगेसंग ग्रामीण मन ल हाथी ले बचे बर जागरूक घलो करत हे।
कोरबा जिला के कटघोरा वनमंडल अधिकारी शमा फारूकी ह बताइन हे कि पाछू पांच बछर ले एतमा नगर, केंदई, जटंगा अउ पसान जइसे वन परिक्षेत्र म हाथी मन घूमत रहिथे। फिलहाल ए क्षेत्र म हाथी मनके दू दल मौजूद हे ।