आज दिनभर के खबर ल अपन गुरतुर छत्तीसगढ़ी भाखा म पढ़व

नीति आयोग – बैठक
 
नई दिल्ली म आज नीति आयोग के गवर्निंग कांउसिल के होय बैठका म मुख्यमंत्री भूपेश बघेल ह जीएसटी ले राज्य मन ल होय राजस्व नुकसान के भरपाई बर स्थायी व्यवस्था करे के मांग करीन हे। ओमन केंद्रीय टेक्स मन म राज्य के हिस्सा वाले दू हजार छै सौ उन्सठ करोड़ रूपया के रासि तुरते देवाए के अनुरोध करीन। संगे कोयला अउ आने प्रमुख खनिज मन के रायल्टी रेट मन म संसोधन करे के बात घलो किहीन। ए दौरान मुख्यमंत्री ह बैठका ले जुड़े एजेंडा प्वाइंट के संगेसंग राज्य हित ले जुड़े कई ठन योजना अउ विषय उपर अपन बात राखीन।
श्री बघेल ह बैठका म किहीन की केन्द्र सरकार ह राज्य मन के अधिकार के सम्मान करय अउ ओखर हिस्सा के संसाधन मन के ट्रांसफर करे के सिस्टम ल अउ मजबूत बनावय। मुख्यमंत्री ह एम.एस.एम.ई. उपर जोर देवत किहिन की राज्य म ग्रामीण अउ कुटीर क्षेत्र म उद्यमिता ल बढ़ावा देके संगे क्षेत्र के संसाधन ल लोकल लेवल म बउरे के उद्देस्य ले ग्रामीणो कुटीर औधोगिक नीति के घोषणा करे गेहे।
बइठका म नवा पेंसन योजना म जमा उन्नीस हजार करोड़ रूपया के वापसी के मुद्दा ल घलो उठाय गीस।

प्रधानमंत्री संसद भवन

प्रधानमंत्री नरेन्द्र मोदी नवा बने संसद भवन ल काली राष्ट्र ल समर्पित करही ए भवन ह वास्तुकला के एक ठिन सुघ्घर उदाहरण अउ राष्ट्र के चिन्हारी बनही ए बिल्डिंग के भीतरी सजावट ह देस के बाड़हे पहुरे याने समृध्द सांस्कृतिक विरासत ल देखाही । मार्डन तकनीक वाले ए भवन म संसद सदस्य मन ल सरलग कनेक्टीविटी मिलही जेखर ले उंखर काम कुसलता ह बाड़ही।
प्रधानमंत्री ह किहिन हे की नवा संसद भवन ह हरेक भारतीय ल गौरव देवाही ओमन अपन ट्वीट आरो म एक ठिन वीडियो सेयर करे हे जेमा संसद भवन के झलक देखाए गेहे। श्री मोदी ह लोगन मन ले ए वीडियो ल खुद के आवाज संग ‘‘हैसटैग माई पार्लियामेंट माई प्राइड‘‘ म सेयर करे के अनुरोध करे हे।

मन की बात

प्रधानमंत्री नरेन्द्र मोदी काली बिहनिया ग्यारह बजे आकाशवाणी ले ‘‘मन की बात‘‘ कार्यक्रम म देस-विदेस के सुनइया मन संग अपन विचार साझा करही। ए ह मासिक रेडियो कार्यक्रम के एक सौ एकवां कड़ी होही।
ए कार्यक्रम ल आकाशवाणी अउ दूरदर्शन के जम्मों नेटवर्क, आकाशवाणी समाचार के वेबसाइट अउ न्यूज ऑन एआईआर मोबाइल ऐप म सुने जा सकही। एखर सोझ्झे प्रसारण आकाशवाणी समाचार, दूरदर्शन समाचार, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल म घलो होही। हिन्दी म प्रसारण के तुरते बाद एला क्षेत्रीय भाखा म घलो प्रसारित करे जाही।

रामायण मंडली प्रतियोगिता

राजधानी रायपुर के पंडित दीनदयाल ऑडिटोरियम म आज ले तीन दिन तक चलइया राज्य स्तरीय रामायण मंडली प्रतियोगिता सुरू होगे हे। प्रदेस के संस्कृति मंत्री अमरजीत भगत ह ए प्रतियोगिता के सुभारंभ करीन। ए मउका म ओमन कीहिन कि छत्तीसगढ़ ह अपन सांस्कृतिक विरासत म बाढ़े-पहुरे हे। राज्य म एक ठिन बहुते सुघ्घर अउ जीवंत संस्कृति हे । ए क्षेत्र म पैंतीस ठिन ले जादा बड़का अउ नान्हे जनजाती बगरे हवय। जिखर लयबद्ध लोकसंगीत, नृत्य अउ नाटक ल देखना एक ठिन सुघ्घर अनुभव हरय। श्री भगत ह कीहिन कि सरकार के प्रयास हे कि राज्य स्तरीय रामायण प्रतियोगिता ह पंचायत अउ जिला ल लेके हर जगह पहुंचय।

नेता प्रतिपक्ष आरोप  

विधानसभा म नेता प्रतिपक्ष नारायण चंदेल ह राज्य सरकार उपर पन्द्रहवा वित्त अउ मनरेगा के पैसाकौड़ी के गौठान योजना म लगा के अंते तंते करे के आरोप लगाय हे। जांजगीर चांपा जिला के भाजपा कार्यालय म पत्रकार मन ले गोठबात करत ओमन किहिन की राज्य सरकार ह गौठान योजना के चलत बाउण्ड्री वॉल भर बना के मढ़ा दे। कोनो भी गौठान म न तो गाय गरू हे अउ न ही चारा अउ छइहा के व्यवस्था हे। उंहे वर्मी खाद म माटी समो के बेचे जात हे। श्री चंदेल ह आरोप लगाइन की बिहार के चारा घोटाला असन छत्तीसगढ़ म घलो गौठान घोटाला होवत हे। नेता प्रतिपक्ष ह शराब घोटाल मामला म आरोपी मन के नार्को टेस्ट कराय के मांग करिस।

जिले की चिट्ठी

आकाशवाणी रायपुर के प्रादेशिक समाचार एकांश डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक ले होही। ए कार्यक्रम ल छत्तीसगढ़ के जम्मों आकाशवाणी केंद्र मन ह एके संग रिले करही। ए बखत के अंक म ‘‘कांकेर‘‘ जिला के गतिविधि बारे म जानकारी दे जाही।

माओवादी मुठभेड़  

कांकेर जिला म सुरक्षाबल अउ माओवादी मन के बीच होय मुठभेड़ मे एक झिन माई लोगिन माओवादी के गंभीर रूप ले घायल होय के खबर हे। पुलिस ले मिले जानकारी मुताबिक जिला पुलिस बल अउ सीमा सुरक्षाबल के संघरा टीम ह परतापुर थाना जगा म सर्चिंग बर निकले रिहीस तभे उपांजूर गांव तीर घात लगाए बैठे माओवादी मन हुरहा हमला कर दिस फेर सुरक्षाबल मन डाहर ले घलो  जवाबी कार्रवाही करे गिस जेमा एक झिन मायलोगिन माओवादी घायल होगिस जेखर चिन्हारी फगनी पोड़ियामी के रूप म होय हे। ए माओवादी उपर एक लाख रूपया के ईनाम घोषित रिहिस उंहे ए मुठभेड़ म बीएसएफ के दू झिन जवान घलो घायल होय हावय।
ओति सुकमा जिला के चिंतागुफा थाना क्षेत्र म एक झिन सक्रिय माओवादी ह पुलिस के सामने आत्म समर्पण करे हे।

रमन सिंह-बयान

प्रदेस के पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह ढाई सौ करोड़ रूपया के चाउंर घोटाला ल लेके किहिन हे कि मुख्यमंत्री भूपेश बघेल ह ए मामला म खाद्यमंत्री के इस्तिफा लेही या फेर उन ल बचाय म सहयोग करही।
इंहा ए बता देन की बीते दिन डॉक्टर सिंह डाहर ले विधानसभा म पीडीएस ल लेके राज्य सरकार उपर करोड़ो रूपया के भ्रष्टाचार के आरोप लगाए गे रिहीस।

मनरेगा – रोजगार

महात्मा गांधी राष्ट्रीय ग्रामीण रोजगार गारण्टी योजना – मनरेगा के चलत कमइया मन ल काम देके मामला म दुरूग जिला ह प्रदेस म पहला स्थान म हे। जिला म करीबन नौ सौ सत्ताईस ठिन निर्माण काम चलत हे जेमा इंक्यावन हजार तीन सौ बैंसठ झिन कमइया मन ल रोजिना काम देगे हे। मनरेगा के चलत अमृत सरोवर, नया तरिया के बनई, तरिया के गहरी करण, डबरी बनई, नरवा बंधान, सेड निर्माण समेत कतकोन अकन काम म कमइया मन काम करत हे । उंहे मनरेगा के काम म नारी परानी मन के भागीदारी सबले जादा बहत्तर प्रतिसत रेहे हे । एखर संगे प्रदेस म सबले जादा कमइया याने श्रमिक दुरूगे जिला म काम करत हे।

हल्बी-सप्ताहिक समाचार बुलेटिन

काली इतवार के हल्बी म सप्ताहिक समाचार बुलेटिन प्रसारित करे जाही। करिबन पन्द्रह मिनट के बेरा वाले ए सप्ताहिक समाचार बुलेटिन ल बिहनिया साढ़े सात बजे ले आकासवाणी केन्द्र जगदलपुर ले प्रसारति करे जाही। जेला बस्तर संभाग म सुने जा सकही।

जनजातीय वाचिकोत्सव

छत्तीसगढ़ के राजधानी रायपुर म होवत जनजातीय वाचिकोत्सव के आज आखरी दिन हरय। नवा रायपुर स्थित आदिम जाति अनुसंधान अउ प्रसिक्षण संस्थान डहार ले राखे गे ए जनजातीय वाचिकोत्सव म जनजातीय वाचिक परंपरा के इतिहास अउ आने पहलू मन उपर गोठबात करे जावत हे।
एखर तहत काली दूसर दिन पच्चीस जनजातीय वाचक मन ह जनजातीय तीज-तिहार ले जुड़े वाचिक ज्ञान उपर अपन विचार साझा करीन। ए तीन दिन के आयोजन के बाद संस्थान डहार ले वाचिक परंपरा के संरक्षण अउ अभिलेखीकरण के तहत एक ठिन पुस्तक के प्रकासन करे जाही।

अब सुनव मौसम के हाल –
मौसम विभाग ह बताय हे कि अवइया बेरा के दउरान प्रदेस के सूरजपुर, सरगुजा, जसपुर, बिलासपुर, कोरबा अउ रायगढ़ समेत कोनो-कोनो जिला म गरजई चमकई के संगे तेज आंधी अउ गाज गिर सकत हे। मौसम विभाग के मुताबिक एक ठिन द्रोणिका बने हवय। उंहे पश्चिमी विक्षोभ अउ अरब सागर ले नमी वाले हवा आय के सेती छत्तीसगढ़ के कुछएक जगा म सिटीर साटर पानी गिर सकत हे।