राज्य सरकार ह बारह जिला मनके पुलिस अधीक्षक अउ तीन झिन अतिरिक्त पुलिस अधीक्षक मनके प्रभार म फेरबदल करे हे।
जानबा के मुताबिक लाल उमेंद सिहं ल बलरामपुर जिला के पुलिस अधीक्षक बनाय गेहे। त उंहे आई.कल्याण एलेसेला ल सूरजपुर, अभिषेक पल्लव ल कबीरधाम, त भावना गुप्ता ल बेमेतरा के संगेसंग शलभ कुमार सिन्हा ल दुर्ग, दिव्यांग कुमार लालजी भाई पटेल ल कांकेर, त सिद्धार्थ तिवारी ल मनेंन्द्रगढ़ चिरमिरी भरतपुर के नवा पुलिस अधीक्षक बनाय गेहे। अइसने सुनील शर्मा ल सरगुजा, चव्हान किरण गंगाराम ल सुकमा अउ येदुवेल्ली अक्षय कुमार ल कोंडागांव के संगेसंग गौरव रामप्रवेश राय दंतेवाड़ा अउ रत्ना सिंह ल मोहला- मानपुर-अंबागढ़ चौकी के नवा पुलिस अधीक्षक होही।
एखर अलावा मनेन्द्रगढ़-चिरमिरी-भरतपुर के पुलिस अधीक्षक टी.आर. कोसिमा ल छत्तीसगढ़ सशस्त्र बल बिलासपुर म पदस्थ करे गेहे। अइसने सूरजपुर पुलिस अधीक्षक रामकृष्ण साहू के पदस्थापना छत्तीसगढ़ सशस्त्र बल कोरबा म करे गेहे। संगेसंग बलरामपुर के पुलिस अधीक्षक मोहित गर्ग ल छत्तीसगढ़ सशस्त्र बल जगदलपुर के उन्नीसवीं वाहिनी म पदस्थ करे गेहे।
राशन कार्ड मितान योजना
प्रदेस म राशन कार्ड बनवाय बर लोगन मन ल अब नगरीय निकाय कोति जाय बर नई पड़य। पात्र हितग्राही मन ल अब घर बैइठे राशन कार्ड मिलही। आज मुख्यमंत्री के निर्देस म राशन कार्ड ल मितान योजना म सामिल करे गिस मुख्यमंत्री ह खुदे ट्वीट करके एखर जानकारी दिन। मुख्यमंत्री ह अपन ट्वीट म लिखे हे कि राज्य सरकार ह राशन कार्ड ल मितान योजना म सामिल करे के फैसला ले हे। अब राशन कार्ड बनवाय बर ‘‘एक चार पांच चार पांच‘‘ फोन करे के बाद मितान मन घर पहुंचही अउ कागजात मन ल लेके राशन कार्ड बनाए के काम ल पूरा करही।
खेलों इंडिया सेंटर-मंजूरी
भारतीय खेल प्राधिकरण ह प्रदेस के चोबीस ठन जिला मन म आने – आने खेल बर चोबीस खेलों इंडिया सेंटर के मंजूरी दे हे। ऐमा राज्य के चोबीस खेलों इंडिया सेंटर बर खेल संचालनालय अउ साई के संग एम.ओ.यू. होइस। खेल संचालक श्वेता श्रीवास्तव सिन्हा अउ भारतीय खेल प्राधिकरण के क्षेत्रीय निदेसक विष्णु सुधाकर ह आज ऐखर उपर दस्तखत करीन।
संचालनालय खेल अउ युवा कल्याण विभाग के प्रस्ताव उपर पहली चरण म नारायणपुर म मलखंभ, बीजापुर अउ बिलासपुर म तीरंदाजी, गरियाबंद म बॉलीबाल, संरगुजा म फुटबॉल के संगेसंग जसपुर अउ राजनांदगांव म हॉकी सेंटर के मंजूरी दे गेहे।
त उंहे दूसर पारी म सात जिला रायपुर और बालोद म वेटलिफ्टिंग, बलौदाबाजार अउ सुकमा म फुटबॉल, पाटन दुर्ग म कबड्डी, रायगढ़ म बैडमेंटन, अउ कांकेर म खो-खो के सेंटर के मंजूरी दे गेहे। अइसने तीसर चरण म दस ठीन जिला मन ल खेलों इंडिया सेंटर के मंजूरी मिलें हे। ऐ जम्मों जिला मन म खिलाड़ी मन के ऑन लाइन पंजीयन अउ प्रसिक्षक मन के नियुक्ति खेलों इंडिया के गाइड लाइन के मुताबिक पूरा कर ले गेहे।
नेशनल गेम्स – चयन
उडीसा के राजधानी भुवनेश्वर म नौ ले बारह जून तक होवईया खेलों इंडिया रूरल एंड इंडिजनस नेसनल गेम्स के चयन ट्रायल राज्य खेल प्रसिक्षण केन्द्र बिलासपुर म होइस। ऐ चयन ट्रायल म एक सौ बाइस पुरूष के संगे -संग एक सौ बीस महिला खिलाड़ी मन ल चुने गिस। तीरंदाजी, फुटबॉल , एथलेटिक, हॉकी, कबड्डी, खो-खो,रग्बी, स्वीमिंग, बॉलीबॉल के संगे -संग योगासन बर राखे ट्रायल म छत्तीसगढ़ के आने – आने जिला ले करीबन पांच सौ जनजातीय वर्ग के खिलाड़ी मन सामिल होइन।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ ए बखत प्रदेश म कतकोन जगा पड़त जोरदरहा गर्मी अउ लू के स्थिति जइसन मौसम के आने-आने पहलू उपर केंद्रित रीही। ए बारे म अउ जादा जानकारी लेबर आकाशवाणी समाचार ह बात करीन मौसम विज्ञानी डॅाक्टर एच. पी. चंद्रा ले। एखर प्रसारण आकाशवाणी के रायपुर केन्द्र डहार ले काली सत्ताईस मई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
‘जनजातीय वाचिकोत्सव’
छत्तीसगढ़ के राजधानी रइपुर म पच्चीस ले सत्ताईस मई तक जनजातीय वाचिकोत्सव के आयोजन करे जात हे। नवा रइपुर के आदिम जाति अनुसंधान अउ प्रसिक्षण संस्थान डहर ले राखे गे जनजातीय वाचिकोत्सव के दूसर दिन आज घलों जनजातीय वाचिक परंपरा के इतिहास अउ आने पहलु मन उपर गोठ-बात होइस। कार्यसाला म जनजातीय देवी-देवता अउ मड़ई – मेला के बारे म वाचिक ज्ञान, लोक कहानी, कहावत, लोकोक्ती अउ लोकसंगीत मन म वाचिकता के संगे-संग मौखिक परंपरा के बारे म गोठ बात करे गिस।
ऐ दौरान विसेषज्ञ अउ आदिवासी समुदाय के सदस्य मन ह किहिन की आदिवासी पुरखा अउ प्रकृति ल देवी-देवता के रूप म पुजा- पाठ करथे।
रांची झारखण्ड ले आए विसय विसेषज्ञ अश्वनी पंकज ह किहिन की आदिवासी तौर तरीका मन ल सहजे के काम ल सहभागिता कहिथे। नेसनल बुक ट्रस्ट नई दिल्ली के पंकज चतुर्वेदी ह किहिन की छत्तीसगढ़ ह भाषा अउ बोली के मामला म आगु हवय।
माओवादी-गिरफ्तार
बीजापुर जिला म सुरक्षा बल मन ह आज दू झिन माओवादी सहयोगी मन ल गिरफ्तार करे हे। पुलिस अधीक्षक आंजनेय वार्ष्णेय ह बताइन कि मूलवासी बचाव मंच के नेता संगे संग दू झिन माओवादी सहयोगी मन ह दो हजार रूपया के नोट ले के कुल छै लाख रूपया जमा करे बर बैंक गे रिहिन इहि दौरान थाना बीजापुर पुलिस अउ डीआरजी के टीम ह ओ मन ल गिरफ्तार कर लिन उंखर मन तीर ले ग्यारह ठीन बैंक पास बुक अउ पांपलेट जब्त करे गे हे।
खाद्य निरीक्षक निलंबित
कांकेर जिला के पंखाजूर तहसील के परलकोट जलासय म गिरे मोबाइल ल खोजे बर बांधा ले पानी निकाले के मामला म कलेक्टर ह खाद्य निरीक्षक ल निलंबित कर दे हे, उंहे ऐ मामला म पंखाजूर म पदस्थ जल संसाधन विभाग के अनुविभागीय अधिकारी ल कारण बताओ नोटिस जारी करे हे। कलेक्टर डाहर ले जारी निलंबन आदेस म केहे गे हे, कि पखांजूर के खाद्य निरीक्षक ह परलकोट जलासय ले करीबन इक्कीस लाख लीटर पानी डीजल पंप ले फालतू के बाहिर बोहा दिन ऐ बारे म छब्बीस मई के अनुविभागीय अधिकारी पखांजूर ले प्रतिवेदन मिलें के बाद कलेक्टर ह खाद्य निरीक्षक ल तुरते प्रभाव ले निलंबित कर दिन।
पर्यावरण संरक्षण – शपथ
छत्तीसगढ़ म एक जून के एके दिन म पांच लाख लोगन मन ह पर्यावरण ल बचाए बर सपथ लिहि। प्रदेस म मिसन लाईफ कार्यक्रम कोति ले लाईफ स्टाइल फॉर इनवॉयरमेंट के कार्यक्रम चलाए जात हे। जेमा छत्तीसगढ़ पर्यावरण संरक्षण मण्डल डहर ले एक जून के पर्यावरण संरक्षण बर सपथ के कार्यक्रम राखे गे हे, जेखर ले ज्यादा ले ज्यादा लोगन मन ल जागरूक करें जा सकें सपथ हिन्दी या अंग्रेजी म समूह या व्यक्तिगत रूप ले लेके या फेर वीडियों के संगेसंग फोटो वाट्सऐप नंबर सात चार एक पांच सात साठ एक सात सात छै म एक जून के बिहनिया आठ बजे ले संझा चार बजे तक भेज सकथे। छत्तीसगढ़ पर्यावरण संरक्षण मण्डल ह पर्यावरण ल बचाए बर सपथ ले के अभियान म जम्मों लोगन मन ल जुड़े के अपील करे हे।
अंतर्राष्ट्रीय योग वेबिनार
केंद्र सरकार के सूचना अउ प्रसारण मंत्रालय के केंद्रीय संचार ब्यूरो प्रादेशिक कार्यालय रायपुर अउ पत्र सूचना कार्यालय रायपुर डहार ले अंतर्राष्ट्रीय योग दिवस के काउंटडाउन के तहत आज योग और हमारा दैनिक जीवन बिसय उपर वेबिनार राखे गीस।
वेबिनार के मुख्य वक्ता भारतीय योग संस्थान के रायपुर जिला प्रमुख मुकेश कुमार सोनी ह योग के माध्यम ले शरीर के कतकोन समस्या के बचाव बर प्राणायाम, सूर्य नमस्कार अउ आने आसन के महत्ता के बारे म जानबा दीन। ओमन कीहिन कि योग ह कोनो व्यायाम नइ हरय, फेर ये ह जिनगी जीये के एक ठिन तरीका हरय। ओमन योग के आने-आने आसन ल करके एखर बारे म विस्तार ले समझईन। मुकेश कुमार के मुताबिक रोजे योगाभ्यास करइया लोगन मन ह आम लोगन के तुलना म कमती बीमार होथे। ओमन बतइन कि कोनो मनखे दस मिनट रोजे प्राणायाम करथे, त ओमन ल बीमार नइ पड़य।
ए मउका म राज्य स्तरीय योग पुरस्कार पवइया दुर्ग जिला के युवा योग विशेषज्ञ मृदुल निर्मल ह योगासन के उपाय बताइन।