पंडित रविशंकर शुक्ल विश्वविद्यालय के छब्बीसवां दीक्षांत समारोह आज राजधानी रईपुर के पंडित दीनदयाल उपाध्याय आडिटोरियम म करे गीस। दीक्षांत समारोह म एक सौ सत्ताईस लइका मन ल गोल्ड मेडल अउ दू सौ चौरानबे शोधार्थी मन ल पीएचडी के उपाधि अउ एक शोधार्थी ल डी.लिट के उपाधी दे गीस।
कार्यक्रम म राज्यपाल विश्वभूषण हरिचंदन, मुख्यमंत्री भूपेश बघेल, सुप्रसिद्ध अंतरिक्ष वैज्ञानिक पद्मश्री प्रोफेसर वाई. एस. राजन अउ विश्वविद्यालय के कुलपति सच्चिदान शुक्ल शामिल होइन।
कार्यक्रम म राज्यपाल विश्वभूषण हरिचंदन ह कहिन कि विद्यार्थी मन हमर राष्ट्र के प्रमुख तकनीकी, सामाजिक अउ दूसर चुनौती उपर काम करे के बारे म विचार करयं। संगेसंग राष्ट्र के सेवा म आगू रहय।
ए मौका म मुख्यमंत्री ह किहीन कि पंडित रविशंकर शुक्ल विश्वविद्यालय ह छै दशक म गौरवपूर्ण उपलब्धी हासिल करे हे। विश्वविद्यालय डहार ले नवाचार ल बढ़ावा दे जावत हे। ओमन किहीन कि बस्तर और सरगुजा के वनांचल में कॉलेन खोले जावत हे।
भाजपा अध्यक्ष प्रेसवार्ता
प्रदेश भाजपा अध्यक्ष अरूण साव ह आरोप लगाइन कि राज्य म गौठान घोटाला उंखर शंका ले घलो बड़े हे। आज रायपुर म पत्रकार मनले गोठबात करत ओमन कीहिन कि शुरूआती आकलन म करीबन एक हजार तीन सौ करोड़ रूपिया के गड़बड़ी पकड़े हे। फेर ए घोटाला एखर ले घलो जादा बड़े हो सकत हे।
पीएससी मामला म श्री साव ह कीहिन कि ए घोटाला ह प्रदेश के लाखों युवा मनके भविष्य के संग उंखर आत्मविश्वास ल घलो तोड़ दे हवय।
आरबीआई-नोट-वापसी
भारतीय रिजर्व बैंक के गवर्नर शक्तिकांत दास ह ए बात म जोर दे हे कि दो हजार रूपया के नोट वापसी के पूरा प्रक्रिया म कोनो बाधा नई आय। श्री दास किहीन की रिजर्व बैंक स्थिति के निगरानी करथ हे। नई दिल्ली के एक ठन कार्य क्रम म श्री दास ह किहीन कि पाछु बछर के सकल घरेलु उत्पाद सात प्रतिशत ले जादा होना आश्चर्य जनक नई हे ओमन किहीन कि रिजर्व बैंक ल ए तथ्य ले विश्वास होथे कि कृषि क्षेत्र ह सुघ्घर प्रदर्शन करे हे अउ सामान्य मानसून के अनुमान के आधार म सेवा क्षेत्र के प्रदर्शन जारी रईही।
पीएससी- छत्तीसगढ़
संघ लोक सेवा आयोग-यूपीएससी ह सिविल सेवा परीक्षा दो हजार बाईस के परिणाम ल काली घोषित करीन। ए परीक्षा म छत्तीसगढ़ के तीन झन लइका मन के चयन करे गे हे। एमा बिलासपुर के अभिषेक चतुर्वेदी, कवर्धा के आकाश श्री श्रीमाल अउ दिव्या पंत शामिल हे। अभिषेक ल एक सौ उन्यासी रैंक मिले हे। आकाश दो हजार बीस म आईपीएस बर चुने गे रिहीन। ए बखत ओ मन ल दो सौ सड़सठवां रैंक मिले हे। उहे, दिव्या पंत के रैंक दो सौ बहत्तर हे।
झीरम श्रद्धांजलि दिवस
झीरम श्रद्धांजलि दिवस के मउका म काली पच्चीस मई के प्रदेश के सबो शासकीय अउ अर्धशासकीय कार्यालय म झीरम घाटी म शहीद होय जनप्रतिनिधि, सुरक्षा बलके जवान मनके संगेच नक्सली हिंसा म पाछू बछर म शहीद होय सबो लोगन ल श्रद्धांजलि दे जाही। ए दउरान दू मिनट के मौन राखे जाही। राज्य सरकार डहार ले हर बछर पच्चीस मई ल झीरम श्रद्धांजलि दिवस के रूप म मनाय के फैसला लेगे हवय।
मुख्यमंत्री भूपेश बघेल ह झीरम घाटी म होय माओवादी हमला म शहीद नेता अउ जवान मन ल नमन करत अपन विनम्र श्रद्धांजलि दीन।
खबर के मुताबिक पच्चीस मई दू हजार तेरा के झीरम घाटी के माओवादी हमला म छत्तीसगढ़ के वरिष्ठ नेता विद्याचरण शुक्ल, नंदकुमार पटेल, महेंद्र कर्मा संघरा कतकोन नेता अउ सुरक्षा बलके जवान मन शहीद होगे रीहिन।
राष्ट्रीय रामायण महोत्सव
रायगढ़ म अवइया एक ले तीन जून तक राष्ट्रीय रामायण महोत्सव कराय जाही। ऐमा आने-आने राज्य मन ले रामायण ‘‘झांकी प्रदर्शन’’ समूह के प्रतिनिधि मंडल ल नेवता दे गे हे। इहा होवइया नृत्यनाटिका के विषय महाकाब्य रामायण के अरण्यकांड उपर अधारित रईही। माने जाथे कि भगवान श्रीराम ह अपन वनवास के बेरा जादा ले जादा समय छत्तीसगढ़ के दण्डाकारण्य म बिताए रिहीन। संस्कृति विभाग के अधिकारी मन ह बतइन कि रामलीला मैदान म होवइया ए महोत्सव म मध्यप्रदेश, उत्तर प्रदेश, महाराष्ट्र, केरल गोवा संघरा दस ठन राज्य के रामायण दल के शामिल होय के उम्मीद हे। उहें, विदेशी कलाकार मन डहार ले विशेष रूप ले रामायण कथा के मंचन करे जाही।
हज प्रशिक्षण
छत्तीसगढ़ राज्य हज कमेटी डहार ले आज रईपुर म हज यात्री मन बर प्रशिक्षण कार्यक्रम कराय गीस जेमा रईपुर, महासमुंद, बलौदाबाजार संघरा दूसर जिला के करीबन ढाई सौ हज यात्री मन ह भाग लीन। हज कमेटी के सचिव साजिद मेमन ह बतइन कि ए बखत छत्तीसगढ़ ले छह सौ ब्यानवें हज यात्री मन ह यात्रा बर जाही। आज ओमन ल हज के दौरान होइवया रसम के बारे में जानकारी दे गीस ओमन किहीन कि हज यात्री मन बर टीकाकरण शिविर घलो जल्दीच लगाय जाही। हज यात्री मन मुंबई इंबारकेशन प्वाइंट ले हज बर रवाना होही।
ग्राम पटेल-सम्मान
कोंडागांव म ग्राम पटेल मन के एक दिन के प्रशिक्षण कार्यशाला अउ सम्मान समारोह कराय गीस। ऐमा आस-पास के गांव के दू सौ ले जादा ग्राम पटेल मन शामिल होइन। ए कार्यक्रम छत्तीसगढ़ विधानसभा के उपाध्यक्ष संतराम नेताम के निवास म करे गीस , जेमा श्री नेताम ह ग्राम पटेल मन ल सम्मानित करीन। ये मौका म पारंपरिक मांदरी नृत्य और सांस्कृतिक कार्यक्रम कराय गीस।
दुर्घटना
रायगढ़ जिला के घरघोड़ा म आज बीहनिया एक ठन बस ह अंते तंते होके पलट गीस। ए दुर्घटना म दू झनके मउकाच म मउत होगे। उंहे सात आने लोगन मन गंभीर रूप ले घायल होय हे। ये घटना चारभाटा के तीर होइस। घटना के सूचना मिलतेच एसडीएम घरघोड़ा के नेतृत्व म पुलिस अउ प्रशासन के टीम ह मउका म पहुंचीस अउ राहत के काम शुरू करे गीस। गंभीर रूप ले घायल सात झिन मनखे मन ल रायगढ़ मेडिकल कॉलेज रिफर करे गेहे। उंहे मामूली रूप ले घायल लोगन मनके प्राथमिक इलाज घरघोड़ा अस्प्ताल म करे गीस।
स्वर्ण-प्रासन्न
रोग प्रतिरोधक क्षमता ल बढ़ाय बर रईपुर के शासकीय आयुर्वेद महाविद्यालय अस्पताल म आज लइका मन ल स्वर्ण प्रासन्न कराय गिस। आयुर्वेद महाविद्यालय अस्पताल म हर पुष्य नक्षत्र तिथि म शुन्य ले सोलह बछर के लइका मन ल स्वर्ण प्रासन्न कराय जाथे। अस्पताल के बाल रोग विभाग म बिहनिया नौ बजे ले मंझनिया तीन बजे तक एकर सेवन कराय गीस। ऐ दवई ह लइका मन के रोग प्रतिरोधक क्षमता बढ़ाय म, सांस ले जुड़े अउ दूसर बीमारी मन ले बचाय म मदद करथे।
अउ अब थोरकुन समाचार सार म-
– बीजापुर जिला म आवापल्ली म सुरक्षा बल ह सर्चिंग के दउरान पचास िकलो वजनी आईडी बरामद करे हे, जेला मउकाच म निष्क्रिय कर दे गीस।
– महासमुंद पुलिस ह गांजा तस्करी के मामला म तीन झिन आरोपी मन ल गिरप्तार करे हे। एखर मन तीर ले दू ठन कार म राखे दू सौ बीस किलो गांजा जब्त करे हे। जब्त गांजा के कीमत पचपन लाख रूपिया बताय गे हवय।
– गरियाबंद के कुसुमपानी गांव म आकाशीय बिजली गिरे ले एक राशन दुकान म आगी लग गे। एखर ले उंहा राखे सबो सामान जर गे।
– दुर्ग म आज पुलिस ह करीबन तीन हजार नशीला गोली के संग एक झन आरोपी ल गिरप्तार करे हे।