देशभर के बैंक म आज ले दू हजार रूपिया के नोट बदले जात हे। भारतीय रिजर्व बैंक ह काली जारी निरदेस म सबो बैंक ले बदलइया दो हजार रूपिया के नोट के रोज के मुताबिक हिसाब-किताब राखे बर केहे हे। रिजर्व बैंक ह केहे हे कि देशभर म बैंक के काउंटर म दू हजार रूपिया के नोट बदले बर आम लोगन ल सुभीता दे जाही। एखर पहिली, पाछु उन्नीस मई के रिजर्व बैंक ह दू हजार रूपिया के नोट वापिस लेके घोसना करे रिहीस। दू हजार रूपिया के नोट ल बछर दू हजार सोलह म केन्द्र सरकार कोति ले नोटबंदी के घोसना के बाद जारी करे गे रिहीस।
लखमा-बैठक
उद्योग मंत्री कवासी लखमा ह केहे हे कि राज्य सरकार के फ्लैगशिप योजना ल बने ढंग ले चलाय जाय। ओमन सुकमा म राखे गे बस्तर विकास प्राधिकरण के बइठका म किहीन कि सरकारी योजना के जमीनी स्तर म बने ढंग ले चलाय ले जादा ले जादा लोगन ल योजना के फायदा मिलही। बइठका म बस्तर क्षेत्र विकास प्राधिकरण के अध्यक्ष लखेश्वर बघेल ह किहीन कि संभाग के जम्मों जिला म वनाधिकार मान्यता पत्र अउ देवगुड़ी ल सामुदायिक वनाधिकार मान्यता पत्र दे म बहुते बने काम करे गेहे।
खबर के मुताबिक जिला मुख्यालय म सुकमा म पहिली घांव बस्तर विकास प्राधिकरण के बइठका राखे गीस।
यूपीएससी-परिणाम
संघ लोक सेवा आयोग-यू.पी.एस.सी. ह सिविल सेवा परीक्षा-दू हजार बाईस के नतीजा घोषित कर देहे। ए परीक्षा म इशिता किशोर अव्वल नंबर म हवय। गरिमा लोहिया ल दूसर अउ उमा हरति एन ल तीसर स्थान मिले हे। ए परीक्षा म नौ सौ तैंतीस उम्मीदवार पास होय हे। एमा ले सामान्य वरग के तीन सौ पैंतालीस, आर्थिक रूप ले पिछड़े वर्ग के निन्यानवे, अन्य पिछड़ा वर्ग के दू सौ तिरसठ, अनुसूचित जाति के एक सौ चौव्वन अउ अनुसूचित जनजाति के बहत्तर छात्र-छात्रा सामिल हवय।
स्वास्थ्य विभाग-ऑस्ट्रेलिया
प्रदेस के स्वास्थ्य मंत्री टी.एस. सिंहदेव के अगुवई म स्वास्थ्य विभाग के टीम अध्ययन भ्रमण म ऑस्ट्रेलिया गेहे। ओमन आज गोल्ड कोस्ट यूनिवर्सिर्टी हॉस्पिटल के अधिकारी मन संग अस्पताल के व्यवस्था म गोठबात करीन। टीम ह अधिकारी अउ बिसेसज्ञ मन संग बइठका करके ए अस्पताल म लागू करे गे इलेक्ट्रॉनिक मेडिकल रिकार्ड-ई.एम.आर. प्रणाली के संबंध म जानकारी लीन। अस्पताल प्रबंधन कोति ले राज्य ले गे ए अध्ययन दल ल वर्चुअल अस्पताल देखाय गीस, जिहां मरीज अपन घर ले ही जम्मों स्वास्थ्य सेवा ले सकत हे। वर्चुअल अस्पताल कोति ले डॉक्टर ले परामर्श, निदान अउ दवई देवाय के बात जिहां जरूरी होथे, उहां स्टाफ नर्स या स्वास्थ्य कर्मचारी कोति ले घर पहुंच सेवा दे जाथे। एखर ले बीमार मनखे के समय बाचथे अउ अस्पताल म मरीज मनके दबाव कमती होथे। गोल्ड कोस्ट अस्पताल कोति ले राज्य के टीम ल बिना चिरा के न्यूरोसर्जरी के संबंध म जानकारी दे गीस। स्वास्थ्य विभाग के टीम ह उहां के बिसेसज्ञ मन ले गोठबात के बाद एला छत्तीसगढ़ म लागू करे बर पहल करे के फइसला लेहे।
ईडी-रिमांड
प्रवर्तन निदेशालय-ईडी ह प्रदेस म कथित सराब घोटाला मामला म गिरफ्तार आबकारी विभाग के बिसेस सचिव अरूण पति त्रिपाठी अउ कारोबारी त्रिलोक सिंह ढिल्लन के रिमांड अवधि बढ़ा देहे। दूनों आरोपी के रिमांड के बेरा खतम होय के बाद ईडी ह आज एमन ल रईपुर म बिसेस न्यायाधीश अजय सिंह राजपुत के कोर्ट म पेस करीन। ईडी ह ए दूनों आरोपी के रिमांड अवधि बढ़ाय के मांग करे रिहीन, जेला अदालत ह मंजूर करत अरूण पति त्रिपाठी के तीन दिन अउ त्रिलोक सिंह ढिल्लन के रिमांड अवधि ल दू दिन बर बढ़ा देहे।
कफ सिरप-निर्यातक
कफ सिरप निर्यातक मन ल कफ सिरफ निर्यात करे के मंजूरी ले के पहिली अवइया एक जून ले तय करे गे सरकारी प्रयोगसाला ले अपन उत्पाद के जांच करवाय के जरूरत होही। ए मामला म काली वाणिज्य अउ उद्योग मंत्रालय के विदेस व्यापार महानिदेशालय ह एक अधिसूचना जारी करे हे। कफ सिरफ के निर्यात नीति के संसोधन म केहे गेहे कि एक जून ले कफ सिरफ के निर्यात बर कोनों भी प्रयोगसाला ले जारी उत्पादन के विश्लेषण प्रमाण पत्र अउ नमूना के जांच जरूरी होही।
राशन कार्डधारी-आधार नंबर
प्रदेस म पंजीयन होय रासन कार्डधारी सदस्य आधार सीडिंग बर तीस जून तक अपन आधार नंबर दे सकत हे। खाद्य विभाग कोति ले ए संबंध म सबो जिला कलेक्टर ल पत्र जारी करके जरूरी दिसा-निरदेस दे गेहे। चिट्ठी म केहे गेहे कि केन्द्रीय उपभोक्ता मामला खाद्य अउ सार्वजनिक वितरण मंत्रालय के अधिसूचना कोति ले सार्वजनिक वितरण प्रणाली म रासन लेवइया हितग्राही मन बर आधार नंबर प्रस्तुत करे के तीस जून तक के समय-सीमा तय करे गेहे।
जांजगीर-ट्रेन स्टापेज
रेलवे के मंडल वाणिज्य प्रबंधक गोपी किशन निखारे ह टाटा-बिलासपुर ट्रेन के स्टापेज जांजगीर-चांपा जिला के अकलतरा स्टेसन म देके के मंजूरी दे देहे। ओमन मुंबई-हावड़ा एक्सप्रेस के स्टापेज बर जल्दी प्रस्ताव भेजे के भरोसा देवईन हे। संगेसंग रेलवे प्रबंधक ह प्लेटफार्म के लंबाई बढ़ाय, कोच इंडिकेट लगाय अउ बंद सौचालय ल सुरू करे के बात किहीन हे।
एखर पहिली, आज रेल संघर्ष समिति के अगुवई म अकलतरा रेलवे स्टेसन के कतकोन समस्या अउ ट्रेन के स्टापेज के मांग ल लेके स्थानीय लोगन मन नगर बंद करके धरना-प्रदर्शन करीन। बाद म प्रदर्सन करइया मन नाराबाजी करत रेल रोके बर निकले रिहीन, जउन ल पुलिस ह रद्दा म रोक लीस। लोगन के कहना हे कि अकलतरा म पाछु कतकोन बेरा ले ट्रेन के स्टापेज अउ स्टेसन के समस्या ल सुलझाय के मांग करे जात रिहीस, फेर रेलवे प्रसासन कोति ले कोनों किसम के पहल नइ होवत रिहीस हे, जेखर ले आज नगर बंद करके आंदोलन करे गीस।
नवा रईपुर म पच्चीस ले सत्ताईस मई तक जनजातीय वाचिकोत्सव के आयोजन करे जाही। आदिम जाति अनुसंधान अउ प्रसिक्षण संस्थान कोति ले केन्द्रीय जनजातीय कार्य मंत्रालय अउ राज्य सासन के मदद ले आदिवासी जीवन ले जुड़े वाचिक परंपरा के संरक्षण, संवर्धन अउ ओखर अभिलेखी करण के उद्देश्य ल लेके ए आयोजन करे जात हे। जनजातीय वाचिकोत्सव म राज्य के आने-आने क्षेत्र के जनजातीय वाचक मन कोति ले जनजाति वाचिक परंपरा के कतकोन विधा म प्रस्तुति दे जाही। एमा दू सौ चालीस जनजातीय वाचक मनके सहभागिता होही।
जनजातीय वाचिकोत्सव नौ ठिन विधा के वाचन करे जाही। एमा जनजातीय देवी-देवता अउ मड़ई मेला, जनजातीय तीज-तिहार, लोक कहानी, लोक संगीत, कहावत अउ लोकोक्ति समेत आने विधा ल सामिल करे गेहे। कार्यक्रम म जनजाति वाचिक परंपरा के संरक्षण अउ अभिलेखीकरण ले जुड़े पुस्तक के प्रकासन करे जाही।
दुर्घटना
राजनांदगांव जिला के गातापार थाना क्षेत्र म एक ट्रक के अनते-तनते होके खाई म गिरे ले तीन झन के मउत होगे। उहें, दू झन गंभीर रूप ले घायल होय हे। जउन मन ल राजनांदगांव मेडिकल कॉलेज अस्पताल म भर्ती कराय गेहे।
खबर के मुताबिक ए ट्रक मलैदा ले खैरागढ़ कोति आत रिहीस हे। इही बेरा बाबा डेरा मोड़ तीर ट्रक के ब्रेक फेल होगे अउ टरक अनते-तनते होके खाई म गिर गे। ए हादसा म तीन झन के मउकाच म मउत होगे हे।
उहें, महासमुंद जिला के छिंदौली गांव म पाछु रतिहा एक ट्रक ह रद्दा रेंगया तीन झन युवक मन ल अपन चपेट म ले लीस। तीनों युवक के मउकाच म मउत होगे। उहें, गंभीर रूप ले घायल दू झन ल इलाज बर रईपुर लाय गेहे।
ट्रेन-आग
रईपुर रेलवे स्टेसन म खड़े रईपुर-लखनऊ गरीब रथ एक्सप्रेस के कोच नंबर-चार म अचानक आगी लग गे। आगी लगे के खबर मिलतेच रेलवे कर्मचारी मउका म पहुंच गे अउ बोगी ल अलग कर दीन। ए घटना म कोनों किसम के जनहानि नइ होय हे। खबर के मुताबिक प्लेट फार्म नंबर-छह म ए ट्रेन खड़े रिहीस अउ बारह बजे रवाना होवइया रिहीस। इही बीच, ट्रेन के एक डिब्बा ले धुंआ उठत देखके स्टेसन म अफरा-तफरी मच गे। यात्री मन ट्रेन ले नीचे उतर गे। रेलवे कर्मचारी मन कोति ले करीबन दू घंटा म आगी म काबू पा ले गीस।