आज दिनभर के खबर ल अपन गुरतुर छत्तीसगढ़ी भाखा म पढ़व

मुख्यमंत्री राशि अंतरण

मुख्यमंत्री भूपेश बघेल ह आज पूर्व प्रधानमंत्री स्वर्गीय राजीव गांधी के पुण्यतिथि म हितग्राही मन ल करोड़ों रूपया के सौगात दीन। मुख्यमंत्री ह दुरूग जिला के पाटन म आयोजित ’’भरोसे का सम्मेलन’’ म राजीव गांधी किसान न्याय योजना, भूमिहीन कृषि मजदूर न्याय योजना अउ गोधन न्याय योजना के हितग्राही मन ल ऑनलाइन राशि अंतरण करीन। ये मौका म मुख्यमंत्री ह राजीव गांधी न्याय योजना के हितगा्रही मन ल पहिली किस्त के रूप म एक हजार आठ सौ पंचानबे करोड़ रूपया के राशि अंतरण करीन।
उहे, मुख्यमंत्री ह राजीव गांधी भूमिहीन कृषि मजदूर न्याय योजना के हितग्राही मन ल चालू वित्तीय बछर के पहली किस्त के राशि एक सौ बारह करोड़ इक्हत्तर लाख रूपया जारी करीन। योजना म हर हितग्राही के बैंक खाता म दो हजार रूपया के मान ले राशि डारे गिस।
एकर संगे-संग मुख्यमंत्री ह गोधन न्याय योजना के हितग्राही मन ल गोबर खरीदी के बदला म तेरह करोड़ संतावन लाख रूपया के राशि ऑनलाइन अंतरण करीन।
अइसने ढंग ले मुख्यमंत्री ह तेरह जिला के राजीव युवा मितान क्लब मन ल सात करोड़ इक्हत्तर लाख रूपया के राशि जारी करीन।

सीएम सारथी ऐप शुभारंभ

उंहे मुख्यमंत्री भूपेश बघेल ह कार्यक्रम म सारथी ऐप के शुभारंभ घलो करीन। दुर्ग जिला प्रशासन के डहार ले तैयार करे गे ये मोबाइल एप के जरिया ले नागरिक मन अपन समस्या के सिकायत ल दर्ज कर सकही। ए ऐप ले मिलइया सिकायत के समाधान विभाग ह तुरते करही। प्रदेश म मोबाइल एप के माध्यम ले नागरिक अब घर बैठे अपन सिकायत ल सरकारी विभाग तक पहुंचा सकही।
एखर अलावा कार्यक्रम म मुख्यमंत्री ह महात्मा गांधी उद्यानिकी अउ वानिकी विश्वविद्यालय के प्रशासनिक अउ एकेडमिक भवन समेत कतकोन निर्माण काम के शिलान्यास करीन। संगेसंग ग्राम कुर्मीगुंडरा म बने महात्मा गांधी रूरल  इंडस्ट्रियल पार्क के लोकार्पण करीन।
इही बीच मुख्यमंत्री ह कार्यक्रम म चार सौ तिरालिस करोड़ ले जादा के लागत ले बने अठयासी विकास काम के घलो लोकार्पण अउ भूमिपूजन करीन।

गोण्डी बुलेटिन-शुभारंभ

राज्यपाल विश्वभूषण हरिचंदन ह अब ले थोरकिन देर बाद गोण्डी बोली म आकाशवाणी के साप्ताहिक समाचार बुलेटिन के वर्चुअल सुभारंभ करही। राजभवन म आयोजित ए कार्यक्रम म प्रसार भारती के मुख्य कार्यकारी अधिकारी गौरव द्विवेदी वीडियो कॉन्फ्रेंसिंग ले जुड़ही। ए मउका म आकाशवाणी के महानिदेशक डॉक्टर वसुधा गुप्ता मौजूद रइही। कार्यक्रम म दूरदर्शन के संग सूचना अउ प्रसारण मंत्रालय के मीडिया इकाई के वरिष्ठ अधिकारी घलो सामिल होही।
सुनइया मन ल बतादन कि गोण्डी बोली म ए साप्ताहिक समाचार बुलेटिन जगदलपुर आकाशवाणी केन्द्र ले हर इतवार संझा साढ़े 6 बजे मीडियम वेव 756 किलोहर्ट्ज फ्रिक्वेंसी म प्रसारित होही, जेला बस्तर संभाग के सबो जिला म सुने जा सकही। एखर ले पहिली, आकाशवाणी समाचार विभाग ह बस्तर संभाग बर हल्बी बोली म साप्ताहिक समाचार बुलेटिन के सुरूवात कर चुके हे।

राजभवन स्थापना दिवस

केंद्र सरकार के -एक भारत श्रेष्ठ भारत- कार्यक्रम के तहत आज छत्तीसगढ़ राजभवन म आज ओडिशा, हिमाचल प्रदेश अउ सिक्किम राज्य के स्थापना दिवस उछाह के संग मनाये गीस।
ए मउका म राज्यपाल विश्वभूषण हरिचंदन ह सबो झन ल स्थापना दिवस के बधाई देत कीहिन कि एकता अउ भाइचारा के बंधन भौगोलिक सीमा ल पार करके सद्भाव के वातावरण ल बढ़ावा देथे। ओमन कीहिन कि कतकोन राज्य के लोगन के उपस्थिति ह छत्तीसगढ़ के आर्थिक अउ सामाजिक दृष्टि म नवा विचार अउ कौशल संचार करे हे। राज्यपाल ह कीहिन कि छत्तीसगढ़ ल अपन घर कहइया ओडिशा अउ सिक्किम के लोगन मन छत्तीसगढ़ के विकास बर योगदान देवत हें।
सुनइया मन ल बतादन कि केंद्र सरकार के -एक भारत श्रेष्ठ भारत- कार्यक्रम के तहत देश म एकता के भावना ल बढ़ाय बर सबो राज्य एक दूसर राज्य के स्थापना दिवस मनावत हे। इही कड़ी म राजभवन म कार्यक्रम आयोजित  करे गे रीहिस।

व्यापमं-नई वेबसाइट

छत्तीसगढ़ व्यावसायिक परीक्षा मंडल-व्यापमं डहार ले आयोजित कतकोन परीक्षा के आवेदन भरे बर ‘‘चिप्स‘‘ ह एक अलग वेबसाइट बनाय हे, जेखर यूआरएल हे – व्यापमं ऑनलाइन डॉट सीजी स्टेट डॉट जीओवी डॉट इन, स्लैस ऑनलाइन स्लैस यूजर लॉगिन डॉट ए.एस.पी.एक्स। ए वेबसाइट बिना कोनों समस्या के चलही। आवेदक व्यापमं के वेबसाइट म जाय बिना, सोझे यूआरएल ल क्लिक करके व्यापमं के परीक्षा बर आवेदन कर सकही।

महासमुंद डिजिटल जिला

महासमुंद प्रदेश के पहिली डिजिटल जिला बन गेहे। छत्तीसगढ़ राज्य स्तरीय बैंकर्स समिति, रायपुर डहार ले हालेच म आयोजित डिजिटल सब कमेटी के बैठक म पात्र बैंक खाता मनके शत प्रतिशत डिजिटलीकरण के उपलब्धि हासिल  करे के सेती, महासमुंद जिला ल राज्य के पहिली डिजिटल जिला घोषित करे गीस हे।  कलेक्टर नीलेश कुमार क्षीरसागर ह ए उपलब्धि बर जिला के सबो बैंक कर्मी मन ल बधाई देहे।

मुंगेली युवा-उत्सव

नेहरू युवा केन्द्र बिलासपुर डहार ले काली मुंगेली म जिला स्तरीय युवा उत्सव के आयोजन करे जाही। ए कार्यक्रम प्रधानमंत्री के अमृतकाल के पंच-प्रण उपर केन्द्रित रइही। कार्यक्रम म सांसद अरूण साव मुख्य अतिथि के रूप म सामिल होही। नेहरू युवा केन्द्र के जिला युवा अधिकारी सौरभ कुमार निषाद ह बतईन कि ए कार्यक्रम म पांच ठन प्रतियोगिता आयोजित होही, जेमा चित्रकला, कविता, मोबाइल फोटोग्राफी, भासन अउ सामूहिक सांस्कृतिक प्रतियोगिता सामिल हे। प्रतियोगिता म जिला के तीन ब्लॉक – मुंगेली, पथरिया अउ लोरमी के युवा हिस्सा ले सकही।

सीयूईटी परीक्षा

स्नातक पाठ्यक्रम म दाखिला बर संयुक्त विश्वविद्यालय प्रवेश परीक्षा सीयूइटी आज ले देशभर म शुरू होगे। कम्प्यूटर आधारित प्रवेश परीक्षा के आयोजन राष्ट्रीय परीक्षा एजेंसी करत हे। आज ले चौबीस मई तक होवइया सीयूईटी बर प्रवेश पत्र राष्ट्रीय परीक्षा एजेंसी के आधिकारिक वेबसाइट म      पहिलीच जारी करे गेहे।

माओवादी-गिरफ्तार

कांकेर जिला म सुरक्षा बल के टीम ह तीन झन माओवादी ल गिरफ्तार करे हे, जेमा दू माओवादी उपर 8-8 लाख रूपिया के इनाम घोसित रिहीस। जिला के एसपी शलभ सिन्हा ह बताइस कि डीआरजी अउ बीएसएफ के संयुक्त टीम ह तलाशी अभियान म निकले रिहीस। इही बेरा कोयलीबेड़ा थाना क्षेत्र के केसोकोड़ी के जंगल ले ए माओवादी मन ल गिरफ्तार करे गीस।

अउ अब थोरकुन समाचार सार म-

– काली अंतर्राष्ट्रीय जैव विविधता दिवस हे। ए मउका म मुख्यमंत्री भूपेश बघेल ह प्रदेशवासी मन ल बधाई अउ शुभकामना देहे।

– बिलासपुर जिला म मस्तूरी के पराघाट स्थित एक पावर कंपनी म अचानके आगी लगे ले छै झिन मजदूर झुलस गे। ए मजूदर मन ल अस्पताल म भर्ती कराय गेहे। घटना के सूचना मिलतेच पुलिस मउका म पहुंचके जांच म जुट गेहे।

अउ

– बिलासपुर पुलिस ह नकली सामान बेचइया एक व्यापारी ल गिरप्तार करे हे। ओखर तीर ले भारी मात्रा म नकली सामान बरामद करे गीस।