भारतीय रिजर्व बैंक ह दू हजार रूपिया के नोट वापस लेहे के निर्णय ले हवय। आर.बी.आई ह किहीस हे कि लोगन मन दू हजार के नोट अपन बैंक खाता म जमा कर सकथे या ओला कोनों भी बैंक साखा म दूसर नोट ले बदली घलो कर सकथे। फेर, दू हजार रूपिया के नोट वैध मुद्रा के रूप म बने रइही। केन्द्रीय बैंक के अनुसार भारतीय रिजर्व बैंक के क्लीन नोट नीति के अनुसरण म दू हजार रूपिया मूल्यवर्ग के बैंक नोट ल प्रचलन ले वापस लेहे के निर्णय ले गेहे।
सुनइया मन ल बतादन कि तेईस मई ले ए नोट कोनों भी बैंक म एक पइत म बीस हजार रूपिया सीमा तक बदले जा सकथे। ए प्रक्रिया ल निश्चित समय म पूरा करे बर अउ लोगन मन ल पर्याप्त समय देहे बर सब्बो बैंक मन म दू हजार रूपिया के नोट जमा करे या बदल के सुविधा तीस सितंबर तक उपलब्ध रइही।
अरूण साव-नोटबंदी
भारतीय जनता पार्टी के प्रदेस अध्यक्ष अरूण साव ह भारतीय रिजर्व बैंक डहार ले दू हजार रूपिया के नोट वापसी के फैसला के स्वागत करे हे। श्री साव ह किहीन कि तीस सितंबर तक दू हजार रूपिया के नोट जमा करे बर आम जनता के पास पर्याप्त समय हे। अइसना म जनता बर कोनों प्रकार के असुविधा वाले स्थिति नइ होवय। ओमन किहीन कि ए फइसला आम जनता अउ देस बर लाभकारी साबित होही।
गोण्डी बुलेटिन-शुभारंभ
आकाशवाणी समाचार ह छत्तीसगढ़ म जनजातीय समुदाय के एक प्रमुख बोली ‘‘गोण्डी‘‘ म काली इक्कीस मई ले समाचार बुलेटिन सुरू करही। छत्तीसगढ़ के राज्यपाल विश्वभूषण हरिचंदन ह काली संझा साढ़े छह बजे रायपुर ले ए समाचार बुलेटिन के वर्चुअल सुभारंभ करही। ए अवसर म प्रसार भारती के मुख्य कार्यकारी अधिकारी गौरव द्विवेदी ह वीडियो कॉन्फ्रेंसिंग के माध्यम ले जुड़ही। उहें, आकाशवाणी के महानिदेशक डॉक्टर वसुधा गुप्ता घलो उपस्थित रइही।
गोण्डी बोली म ए साप्ताहिक समाचार बुलेटिन जगदलपुर स्थित आकाशवाणी केन्द्र ले हर इतवार संझा साढ़े छह बजे ले मीडियम वेव म 756 किलोहर्ट्ज फ्रिक्वेंसी उपर प्रसारित करे जाही, जेला बस्तर संभाग के सबो सात जिला म सुने जा सकथे।
सुनइया मन ल बतादन कि आकाशवाणी समाचार ह एखर ले पहिली छत्तीसगढ़ के बस्तर संभाग म पाछु मार्च महीना ले जनजातीय बोली हल्बी म घलो साप्ताहिक समाचार बुलेटिन सुरू कर चुके हे, जेखर सुभारंभ केन्द्रीय गृह मंत्री अमित शाह ह 25 मार्च के जगलदपुर ले करे रिहीन।
मुख्यमंत्री राशि अंतरण
मुख्यमंत्री भूपेश बघेल काली इक्कीस मई के पूर्व प्रधानमंत्री स्वर्गीय राजीव गांधी के पुण्यतिथि म दुर्ग जिला के पाटन म आयोजित कार्यक्रम म राजीव गांधी किसान न्याय योजना, भूमिहीन कृषि मजदूर न्याय योजना अउ गोधन न्याय योजना ले लाभान्वित होवइया हितग्राही मनके बैंक खाता म ऑनलाइन धनराशि डालही। ए अवसर म श्री बघेल राजीव गांधी किसान न्याय योजना के तहत राज्य के चौबीस लाख बावन हजार ले जादा किसान मन ल ये योजना के पहिली किस्त जारी करहीं। एखर तहत एक हजार आठ सौ चौरानबे करोड़ तिरानबे लाख रूपिया के राशि के ऑनलाईन अंतरण बैंक खाता म करहीं।
उंहे, मुख्यमंत्री श्री बघेल राजीव गांधी भूमिहीन कृषि मजदूर न्याय योजना के हितग्राही मन ल चालू वित्तीय बछर के पहिली किस्त के राशि जारी करही। एखर तहत पांच लाख तिरसठ हजार ले जादा हितग्राही मन ल पहिली किस्त के रूप म एक सौ बारा करोड़ इकहत्तर लाख रूपिया ले जादा के राशि जारी करे जाही। ए योजना के अंतर्गत प्रत्येक हितग्राही के बैंक खाता म दू हजार रूपिया के मान ले राशि अंतरित करे जाही।
एखरे संग मुख्यमंत्री ह गोधन न्याय योजना के हितग्राही मन ल गोबर खरीदी के एवज म तेरा करोड़ संतावन लाख रूपिया के राशि के ऑनलाईन अंतरण करही।
सीएम-सारथी ऐप शुभारंभ
प्रदेस म मोबाइल ऐप के माध्यम ले आम नागरिक मन अब घर बइठे अपन सिकायत सासकीय विभाग तक पहुंचा सकही। मुख्यमंत्री भूपेश बघेल काली 21 मई के दुर्ग जिला के सांकरा पाटन म राखे गे कार्यक्रम म सारथी ऐप के सुभारंभ करही। दुर्ग जिला प्रशासन कोति ले तैयार कराय गे ए मोबाइल ऐप म नागरिक मन आसानी ले अपन सिकायत दर्ज कर सकही अउ ओला ट्रैक घलो कर सकही, जेखर निराकरण विभाग ल त्वरित रूप ले करना होही।
उहें, ए कार्यक्रम म महात्मा गांधी उद्यानिकी अउ वानिकी विश्वविद्यालय के प्रशासनिक अउ एकेडमिक भवन समेत छात्रावास, अनुसंधान केन्द्र, इंडोर स्टेडियम सहित आने-आने निर्माण काम के सिलान्यास करे जाही। संगेसंग ग्राम कुर्मीगुंडरा म दू करोड़ रूपिया के लागत ले बने महात्मा गांधी रूरल इंडस्ट्रियल पार्क-रीपा के लोकार्पण घलो करे जाही। लगभग तीन एकड़ म विकसित करे गे ए ग्रामीण औद्योगिक पार्क म हेल्दी स्नैक्स मनुफेक्चरिंग यूनिट, छेरी पालन यूनिट अउ नर्सरी यूनिट के स्थापना करे गेहे।
अग्निवीर-परीक्षा परिणाम
अग्निवीर समेत आने-आने श्रेणी मन म सेना भर्ती के ऑनलाइन प्रवेस परीक्षा के परिणाम घोषित कर दे गेहे। सेना भर्ती कार्यालय रईपुर ले मिले जानकारी अनुसार पुरूष अग्निवीर, महिला अग्निवीर, सेना पुलिस, नर्सिंग असिस्टेंट वैट, सिपाही फार्मा अउ हवलदार के आने-आने पद मन बर ऑनलाइन सामान्य प्रवेस परीक्षा के आयोजन पाछु सत्रह ले छब्बीस अप्रैल तक करे गे रिहीस। जेमा चयनित अभ्यर्थी मन अपन परीक्षा परिणाम इंडियन आर्मी के वेबसाइट म देख सकथे। संगेसंग सेना भर्ती कार्यालय रईपुर के नोटिस बोर्ड म ए परीक्षा परिणाम ल घलो प्रदर्सित करे गेहे। सेना भर्ती प्रक्रिया के दूसरइया चरण के जानकारी अभ्यर्थी मन ल जल्दीच दे जाही।
संस्कृत विद्यामंडलम्-परिणाम
छत्तीसगढ़ संस्कृत विद्यामंडलम् डहार ले आयोजित वार्षिक परीक्षा बछर दू हजार बाईस-तेईस के परिणाम जारी कर दे गेहे। स्कूल सिक्षा मंत्री डॉक्टर प्रेमसाय सिंह टेकाम ह आज रायपुर म परीक्षा परिणाम घोसित करीन। पूर्व मध्यमा अउ उत्तर मध्यमा के पहिली अउ दूसइया बछर हाईस्कूल अउ हायर सेकेंडरी के मुख्य परीक्षा म विद्यार्थी मनके परीक्षा परिणाम अंठानवे दशमलव तीन-चार प्रतिसत रिहीस।
बेलतरा-एसडीएम लिंक कोर्ट
बिलासपुर जिला के बेलतरा क्षेत्र म बिलासपुर एसडीएम के साप्ताहिक लिंक कोर्ट के सुविधा सुरू होगे हे। एसडीएम श्रीकांत वर्मा ह काली तहसील कार्यालय बेलतरा म एखर कामकाज सुरू करीन, जेमा ओमन लगभग सोलह मामला के सुनवाई करीन। बिलासपुर एसडीएम के लिंक कोर्ट ह अब हर सप्ताह के सुक्रवार के तहसील कार्यालय म लगही, जेखर आदेश कलेक्टर सौरभ कुमार ह जारी कर देहे।
हल्बी-साप्ताहिक समाचार बुलेटिन
काली इतवार के ‘‘हल्बी‘‘ म साप्ताहिक समाचार बुलेटिन प्रसारित करे जाही। करीब 15 मिनट अवधि के ए साप्ताहिक समाचार बुलेटिन बिहनिया साढ़े 7 बजे ले आकाशवाणी केन्द्र, जगदलपुर ले प्रसारित करे जाही। एला बस्तर संभाग म सुने जा सकही।
जिले की चिट्ठी
आकाशवाणी रायपुर के प्रादेशिक समाचार एकांश डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह एके संग रिले करही। ए बखत के अंक म ‘‘नारायणपुर‘‘ जिला के गतिविधि बारे म जानकारी दे जाही।
अउ अब थोरकुन समाचार सार म-
– उत्तरप्रदेश म अवइया तेईस मई ले तीन जून तक आयोजित तीसरइया खेलो इंडिया यूनिवर्सिटी खेल म छत्तीसगढ़ के दुर्ग स्थित हेमचंद यादव विश्वविद्यालय के तेईस खिलाड़ी भाग लीहीं। ए खिलाड़ी मनके चयन अखिल भारतीय ऑल इंडिया यूनिवर्सिटी खेल म सबले बढ़िया प्रदर्सन के आधार म होय हे।
– राजनांदगांव जिला के स्कूल अउ आंगनबाड़ी केन्द्र मन बर जनभागीदारी ले स्मार्ट टीवी दान म दे जावत हे। पाछु दिन टेडे़सरा क्षेत्र के सरपंच मन ह आने-आने आंगनबाड़ी केन्द्र बर बाईस नग स्मार्ट टीवी दान करीन।
अउ
– जांजगीर-चांपा जिला के ग्राम हथनेवरा के तीर दू ठिन गाड़ी म होय टक्कर ले तीन झिन मनखे के मउत होगे अउ एक झन घायल होगे हे।