मुख्यमंत्री राशि अंतरण
मुख्यमंत्री भूपेश बघेल इक्कीस मई के पूर्व प्रधानमंत्री स्वर्गीय राजीव गांधी के पुण्यतिथि म दुर्ग जिला के पाटन म आयोजित भरोसे के सम्मेलन म सामिल होही। ए मउका म श्री बघेल राजीव गांधी किसान न्याय योजना भूमिहीन कृषि, मजदूर न्याय योजना अउ गोधन न्याय योजना ले लाभान्वित होवइया हितग्राही मनके बैंक खाता म राशि के ऑनलाईन अंतरण करही।
कार्यक्रम म श्री बघेल राजीव गांधी किसान न्याय योजना के तहत राज्य के चौबीस लाख बावन हजार ले जादा किसान मन ल ये योजना के पहिला किस्त जारी करहीं। एखर तहत एक हजार आठ सौ चौरानबे करोड़ तिरानबे लाख रूपिया के राशि के ऑनलाईन अंतरण ओमन के बैंक खाता म करही। एखर बाद किसान मन ल अवइया अगस्त, अक्टूबर अउ मार्च महीना म क्रमशः तीन अउ किस्त म राशि दे जाही।
उंहे मुख्यमंत्री श्री बघेल राजीव गांधी भूमिहीन कृषि मजदूर न्याय योजना के हितग्राही मन ल चालू वित्तीय बछर के पहिली किस्त के राशि जारी करही। एखर तहत पांच लाख तिरसठ हजार ले जादा हितग्राही मन ल पहिली किस्त के रूप म एक सौ बारा करोड़ इकहत्तर लाख रूपिया ले जादा के राशि जारी करे जाही। ए योजना के अंतर्गत प्रत्येक हितग्राही के बैंक खाता म दू हजार रूपिया के मान ले राशि अंतरित करे जाही।
एखरे संग मुख्यमंत्री गोधन न्याय योजना के हितग्राही मन ल गोबर खरीदी के एवज म तेरा करोड़ संतावन लाख रूपिया के राशि के ऑनलाईन अंतरण करही।
ईडी जेल
प्रदेश म करीबन दू हजार करोड़ रूपिया के कथित शराब घोटाला के मामला म गिरप्तार कारोबारी अनवर ढेबर अउ नीतेश पुरोहित ल विशेष अदालत ह चौदा दिन के न्यायिक रिमांड म जेल भेज दे गेहे। उंहे आबकारी विभाग के विशेष सचिव अरूण पति त्रिपाठी अउ त्रिलोक सिंह ढिल्लन ल चार दिन के अउ ईडी के रिमांड म देके आदेश देहे। ईडी ह आज चार अभियुक्त ल विशेष न्यायाधीश अजय सिंह राजपूत के अदालत म पेस करे गीस।
राष्ट्रीय रामायण महोत्सव
रायगढ़ के रामलीला मैदान म अवइया एक ले तीन जून तक राष्ट्रीय रामायण महोत्सव के आयोजन करे जाही। संस्कृति विभाग डहार ले एखर तियारी करे जात हे। राष्ट्रीय रामायण महोत्सव म छत्तीसगढ़ के लोगन मन ल थ्रीडी एनिमेशन समेत हाईटेक तकनीक के माध्यम ले देश विदेश म प्रचलित रामायण के आने आने रूप अउ भगवान श्रीराम के आदर्श के झलक देखे बर मिलही। महोत्सव म रामायण प्रसंग के मंचन के संगेसंग हनुमान चालीसा के सामूहिक पाठ, केलो महाआरती अउ दीपदान के कार्यकम घलो होही।
बतादन कि मुख्यमंत्री भूपेश बघेल के बिसेस पहल म आदिवासी नृत्य महोत्सव के जइसने राष्ट्रीय स्तर म रामायण महोत्सव के आयोजन करे जात हे। ए आयोजन म देश के अलग अलग राज्य के मुख्यमंत्री मन ल पत्र लिखके श्री बघेल ओमन के राज्य ले मानस मंडली भेजे के आग्रह करीन हे। महोत्सव म देश के आने आने राज्य के रामायण मंडली समेत विदेशी मानस मंडली के कलाकार घलो सामिल होही।
संस्कृत विद्यामंडलम परिणाम
स्कूल शिक्षा मंत्री डॉक्टर प्रेमसाय सिंह टेकाम इक्कीस मई के बीहनिया ग्यारा बजे रायपुर स्थित अपन निवास कार्यालय म छत्तीसगढ़ संस्कृत विद्यामंडलम बोर्ड डहार ले आयोजित मुख्य परीक्षा वर्ष दू हजार तेईस के परिणाम घोषित करहीं। डॅाक्टर टेकाम कोति ले कक्षा नवमीं ले बारहवीं तक के परीक्षा परिणाम घोषित करे जाही। संस्कृत विद्या मंडलम के सहायक संचालक ह बताइन कि ए साल परीक्षा म तीन हजार एक सौ छै परीक्षार्थी सामिल होय रीहिन।
विधायक दुर्घटना
धमतरी विधायक रंजना साहू के वाहन आज दुर्घटनग्रस्त होगे । ए हादसा म विधायक श्रीमती साहू ल मामूली चोट आय हे। मिले जानकारी के अनुसार विधायक श्रीमती साहू आज एक पारिवारिक कार्यक्रम म सामिल होय बर बिंद्रानवागढ़ विधायक डमरूधर पुजारी के घर जात रीहिन। ए दउरान झरियाबाहरा के मैनपुर रद्दा म कोदोमाली करा ओखर कार अनियंत्रित होके पलट गीस। ए दुर्घटना म विधायक श्रीमती साहू ल मामूली चोट आय हे, जउन ल इलाज बर मैनपुर अस्पताल ले जाय गीस।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत साइबर ठगी अउ अपराध ले बचाव के उपाय उपर केंद्रित रीही। ए संबंध म अतिरिक्त पुलिस अधीक्षक अउ छत्तीसगढ़ पुलिस सायबर सेल के प्रभारी कवि गुप्ता ले लेगे भेंटवार्ता के दूसरा कड़ी प्रसारित करे जाही। एखर प्रसारण आकाशवाणी के रायपुर केन्द्र डहार ले काली बीस मई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
माओवादी समाचार
सुकमा जिला म सुरक्षा बल मन एक माओवादी ल गिरप्तार करे हे। पुलिस अधीक्षक सुनील शर्मा ह बताइन कि जिला पुलिस बल अउ डिस्ट्रिक्ट रिजर्व गॉर्ड डीआरजी के संयुक्त टीम सर्चिंग बर निकले रीहिस। ए दउरान फुलबगड़ी इलाका ले ए माओवादी ल गिरप्तार करे गीस।
एति राजनांदगांव जिला के मानपुर एरिया म माओवादी मन छै समिति के तेरा ठिन फड़ म आगी लगा दीन। घटना स्थल म माओवादी मन बैनर लगाये जाय के संगेसंग पर्चा घलो फेकीन हे, जेमा तेंदूपत्ता के कीमत बढ़ाके छै सौ रूपिया प्रति मानक बोरा करे जाय के मांग करे गेहे।
एसएससी-जागरूकता कार्यक्रम
कबीरधाम म कर्मचारी चयन आयोग, कार्मिक लोक शिकायत अउ पेंशन मंत्रालय के रायपुर कार्यालय डहार ले आजादी का अमृत महोत्सव के तहत आचार्य पंथ श्री गृन्ध मुनी साहेब शासकीय स्नातकोत्तर महाविद्यालय म कैरियर जागरूकता कार्यक्रम के आयोजन करे गीस। कार्यक्रम म एसएससी के अनुभाग प्रभारी अशोक कुमार वर्मा ह आयोग कोति ले ले जाने वाला परीक्षा के विविध चरण, योग्यता, परीक्षा म होवइया गलती अउ परीक्षा केंद्र के संबंध म विस्तार ले जानकारी दीन। ए दउरान ओमन विद्यार्थी मनके जिज्ञासा के घलो समाधान करीन।
ए मउका म केंद्रीय संचार ब्यूरो सीबीसी, सूचना अउ प्रसारण मंत्रालय डहार ले केंद्र सरकार कोति ले मिशन मोड म चलाये जावत दस लाख भर्ती अउ ओमा एसएससी के योगदान के बारे म जानकारी दे गीस। संगेसंग प्रश्नोत्तरी प्रतियोगिता के आयोजन करे गीस।
झीरम श्रद्धांजलि दिवस
झीरम श्रद्धांजलि दिवस के मउका म पच्चीस मई के प्रदेश के जम्मों शासकीय अउ अर्धशासकीय कार्यालय म झीरम घाटी म शहीद होय जन प्रतिनिधि, सुरक्षा बल के जवान मनके संगेसंग नक्सली हिंसा म वर्तमान अउ पाछू साल म शहीद होय जम्मों लोगन मन ल श्रद्धांजलि अर्पित करे जाही। ए दउरान दू मिनट के मौन राखे जाही। राज्य शासन डहार ले हर साल पच्चीस मई ल झीरम श्रद्धांजलि दिवस के रूप म मनाये के निर्णय ले गेहे।
प्रशिक्षण अधिकारी परीक्षा
राज्य के शासकीय औद्योगिक प्रशिक्षण संस्था मन म प्रशिक्षण अधिकारी के नौ सौ बीस पद म सीधी भर्ती बर परीक्षा तिथि निर्धारित कर दे गेहे। प्रशिक्षण अधिकारी मनके भर्ती परीक्षा प्रदेश के पांच संभागीय मुख्यालय म सात ले बाईस जून तक आयोजित करे जाही।
अउ अब थोरकुन समाचार सार म-
– राज्य महिला आयोग के अध्यक्ष डॅाक्टर किरणमयी नायक ह आज बिलासपुर म महिला उत्पीड़न ले जुड़े प्रस्तुत प्रकरण मन उपर जनसुनवाई करीन। ए दउरान पैंतीस प्रकरण सुनवाई बर राखे गे रीहिस।
– भारतीय जनता युवा मोर्चा ह आज छत्तीसगढ़ लोक सेवा आयोग के कार्यालय के आगू धरना-प्रदर्शन करीन। ए दउरान प्रदर्शनकारी मन पीएससी कोति ले हालेच म जारी परीक्षा परिणा म गड़बड़ी के आरोप लगावत विरोध प्रदर्शन करीन।
अउ
– सक्ती जिला के हसौद थाना पुलिस ह नौकरी लगाय के नाम म चार लाख रूपिया के ठगी के मामला म दू झिन आरोपी के विरूद्ध अपराध दरज करे हे । ए संबंध म बोईरडीह निवासी एक महिला ह रिपोर्ट दरज कराय हे।