मुख्यमंत्री भूपेश बघेल ह किहीन हे कि पूर्व प्रधानमंत्री राजीव गांधी के सहादत दिवस इक्कीस मई के दिन गोधन न्याय योजना अउ राजीव गांधी भूमिहीन कृषि मजदूर न्याय योजना के पइसा दे जाही। उहें, किसान मन ल राजीव गांधी किसान न्याय योजना के चौथा किश्त के भुगतान घलो करे जाही। ए बात मुख्यमंत्री ह आज भेंट-मुलाकात कार्यक्रम के दउरान धमतरी विधानसभा क्षेत्र के गांव भटगांव म किहीन। ओमन किहीन कि इक्कीस मई के ही पाटन म महात्मा गांधी हर्टिकल्चर विश्वविद्यालय के सुरूवात होही। ए मउका म मुख्यमंत्री ह करीबन एक सौ सैंतीस करोड़ रूपिया के आने-आने विकास काम के लोकार्पण अउ सिलान्यास करीन। मुख्यमंत्री ह दोनर अउ सोरिद म नवा विद्युत उप केन्द्र अउ अर्जुनी म अति उच्चदाब विद्युत उप केन्द्र के भूमिपूजन करीन। त उहें, भंवरमरा, देमार, खम्हरिया, डाही ले डांडेसरा अउ मड़वापथरा ले बरपानी रद्दा उपर पुलिया बनाय बर भूमिपूजन करीन।
ए मउका म मुख्यमंत्री ह भटगांव के औद्योगिक प्रशिक्षण केन्द्र के नाव ल स्वतंत्रता संग्राम सेनानी स्वर्गीय मनराखन देवांगन के नाव म करे के घोसना करीन। संगेसंग आमदी म स्वामी आत्मानंद अंग्रेजी माध्यम स्कूल खोले, तुमराबहार अउ देवपुर म उप स्वास्थ्य केन्द खोले, मोंगरागहन म जिला सहकारी बैंक के साखा सुरू करे संगेसंग अउ कतकोन घोसना करीन।
अपन धमतरी दउरा के मउका म मुख्यमंत्री ह ग्राम अछोटा म नवा गढ़कलेवा के लोकार्पण करीन अउ संगेसंग महात्मा गांधी ग्रामीण औद्योगिक पार्क म जिला के पहिली वाई-फाई जोन के सुरूवात घलो करीन।
मुख्यमंत्री-पत्र
मुख्यमंत्री ह छत्तीसगढ़ म पहिली घांव होवइया राष्ट्रीय रामायण महोत्सव म जम्मों राज्य के मुख्यमंत्री अउ केन्द्रसासित प्रदेस मनके प्रशासनिक प्रमुख मन ल चिट्ठी भेज के ओमन ल प्रदेस के रामायण महोत्सव म आय के बिनती करे हे। रामायण महोत्सव म नृत्य वाटिका के बिसय महाकाव्य रामायण के अरण्य कांड उपर आधारित रइही।
जानबा के मुताबिक रायगढ़ जिला के रामलीला मैदान म एक ले तीन जून तक राष्ट्रीय रामायण महोत्सव राखे गेहे। संगेसंग सामूहिक हनुमान चालीसा अउ केलो-आरती के आयोजन घलो करे जाही।
जल जीवन मिशन
जल जीवन मिशन ह देश के बारह करोड़ गांव-गतौरी के परिवार मन ल नल के माध्यम ले पानी देके नवा कीर्तिमान बनाय हे। ए मिसन के घोसना प्रधानमंत्री नरेन्द्र मोदी बछर दू हजार उन्नीस म करे रिहीन। एखर लक्ष्य बछर दू हजार चौबीस तक गांव के हर घर म नल के माध्यम ले पानी के व्यवस्था करना हे। जल शक्ति मंत्रालय के मुताबिक केन्द्र अउ राज्य सरकार के प्रयास ले नौ लाख ले जादा स्कूल अउ नौ लाख उनचालीस हजार ले जादा आंगनबाड़ी केन्द्र मन म नल के माध्यम ले पीये के पानी दे जात हे।
याशी जैन-माउंट एवरेस्ट
रायगढ़ के पर्वतारोही याशी जैन ह विश्व के सबले ऊंचा चोटी माउंट एवरेस्ट म चढ़े म सफलता पाय हे। याशी जैन ह भारतीय समय के मुताबिक आज बिहनिया पांच बजके पैंतालीस मिनट म माउंट एवरेस्ट म भारतीय झंडा फहरईन अउ छत्तीसगढ़ के संगेसंग पूरा देस म रायगढ़ जिला के नाम ल रोसन करीन। याशी जैन ह माउंट एवरेस्ट के चढ़ाई बर जवइया पन्द्रह सदस्यीय टीम म छत्तीसगढ़ के एकलौता सदस्य रिहीन। माउंट एवरेस्ट चढ़े के अभियान एक अप्रैल ले सुरू होय रिहीस, जउन ह पैंतालीस दिन तक चलीस।
माउंट एवरेस्ट जाय के पहिली मुख्यमंत्री ह याशी जैन ल प्रोत्साहन राशि के रूप म पांच लाख रूपिया देके घोसना करे रिहीन।
प्रवेश-परीक्षा
छत्तीसगढ़ व्यावसायिक परीक्षा मंडल डहार ले होवइया पी.ई.टी. अउ पी.पी.एच.टी. के प्रवेस परीक्षा पच्चीस जून के होही। प्रवेस परीक्षा बर ऑनलाइन अरजी आज ले सुरू होगे हे, जउन ह आठ जून तक चलही। उहें, नौ ले ग्यारह जून तक गलती ल सुधारे के काम करे जाही। प्रवेस पत्र उन्नीस जून के जारी करे जाही। ए दूनों प्रवेस परीक्षा बर छत्तीसगढ़ के रहइया छात्र मन ले कोनों प्रकार के परीक्षा सुल्क नइ ले जाय।
त उहें, छत्तीसगढ़ माध्यमिक सिक्षा मंडल डहार ले डी.एल.एड. प्रथम अउ द्वितीय वर्ष के मुख्य अउ अवसर परीक्षा के समय-सारिणी घोषित कर दे गेहे। डी.एल.एड. पहिली साल के परीक्षा छह ले चौदह जून तक अउ डी.एल.एड. दूसर साल के परीक्षा छह ले बारह जून तक होही।
कृषि उत्पादन आयुक्त-समीक्षा
प्रदेस के कृषि उत्पादन आयुक्त डॉक्टर कमलप्रीत सिंह ह किहीन हे कि अब किसान मन ल उद्यानिकी फसल के खेती उपर घलो सून्य प्रतिसत ब्याज म करजा मिलही। डॉक्टर सिंह ह रईपुर म बिलासपुर अउ सरगुजा संभाग के अधिकारी मनके बइठका लेके खरीफ फसल निर्धारण अउ रबी फसल कार्यक्रम के समीक्षा करीन। ओमन अधिकारी मन ले किहीन कि प्रदेस के किसान मन ल ए योजना के पूरा जानकारी दे जाय। डॉक्टर सिंह ह बिलासपुर अउ सरगुजा संभाग के जिला मन म मिलेट मिशन के सफलता उपर खुसी जाहिर करीन। ए संभाग म पहिली घांव पचास हजार हेक्टेयर क्षेत्र म मिलेट के फसल लगाय जात हे।
शराब मौत-जांच टीम
जांजगीर-चांपा जिला म पाछु दिन कथित रूप ले देशी सराब पीये ले तीन झन लोगन के होय मउत के मामला के जांच बर एस.डी.ओ.पी. चंद्रशेखर परमा के अगवुई म एक ठिन टीम बनाय गेहे। टीम म नवागढ़ टीआई रविन्द्र अनंत, शिवरीनारायण टीआई विवेक पांडेय अउ पामगढ़ थाना प्रभारी सनत मांत्रे ल सामिल करे गेहे।
जानबा के मुताबिक पाछु सम्मार के जिला के रोगदा गांव म देसी सराब पीये ले तीन झिन लोगन के मउत होगे रिहीस। मृतक म सेना के एक झिन जवान घलो सामिल रिहीस।
मानसून
मौसम विभाग के मुताबिक केरल पहुंचइया दक्षिण-पश्चिम मानसून एसो थोरिक देर से पहुंचही। दक्षिण-पश्चिम मानसून ह वइसे तो एक जून के केरल पहुंचथे। फेर, एसो चार जून तक मानसून के केरल म पहुंचे के संभावना हे। छत्तीसगढ़ म पन्द्रह, सोलह जून के मानसून ह सक्रिय हो सकथे।
ऐति, राजधानी रईपुर म आज बिहनिया ले हल्का बादल छाय रिहीस, फेर एखर ले गर्मी ले कोनों प्रकार के राहत नइ मिलीस।
जैव विविधता-प्रतियोगिता
जैव विविधता कोति लोगन मन ल जागरूक करे बर छत्तीसगढ़ जैव-विविधता बोर्ड डहार ले ऑनलाइन प्रतियोगिता राखे जात हे। एखर बर काली प्रतिभागी मन ले ऑनलाइन अरजी मंगाय गेहे। प्रतियोगिता म पारिस्थितिकी तंत्र म स्थायित्व, संतुलन अउ निरंतरता के बारे म जैव विविधता के अनिवार्यता उपर प्रतिभागी मन ह स्लोगन लिखके भेज सकथे। उहें, ‘‘जैव विविधता, हमारी सांस्कृतिक विरासत‘‘ बिसय उपर पोस्टर प्रतियोगिता होही।
छाया-चित्र प्रदर्शनी
प्रदेस के लोगन मन ल राज्य के जुन्ना कलाकारी ले जानबा कराय बर रईपुर के घासीदास संग्रहालय के कला-विथिका म काली ले दू दिन के छाया-चित्र प्रदर्सनी राखे गेहे। ए प्रदर्सनी म पुरातात्विक बिसय ले जुड़े एकदम जुन्ना फोटू प्रदर्सित करे जाही। ए फोटू मन करीबन चालीस से एक सौ पचास साल जुन्ना हवय। प्रदर्सनी म छत्तीसगढ़ के मूर्त सांस्कृतिक धरोहर के एकदम जुन्ना अउ ए बेरा के चित्र ल घलो सामिल करे जाही। प्रदर्सनी के पहिली दिन काली संग्रहालय अवइया पढ़इ्रया लइका मन बर प्रश्नोत्तरी प्रतियोगिता घलो राखे गेहे।
अउ अब थोरकुन समाचार सार म-
– प्रधानमंत्री नरेन्द्र मोदी ह काली नई दिल्ली के प्रगति मैदान म अंतर्राष्ट्रीय संग्रहालय एक्सपो के उद्घाटन करही। आजादी के अमृत महोत्सव के मउका म ए आयोजन करे जात हे। एसो के बिसय- संग्रहालय, स्थिरता अउ आरोग्य हवय।
– अखिल भारतीय कांग्रेस कमेटी के संयुक्त सचिव अउ सह-प्रभारी विजय जांगिड़ ह काली रईपुर आही, जेखर बाद ओमन जांजगीर-चांपा बर रवाना होही, जिहां ओमन जिला कांग्रेस कार्यकारिणी के बइठका म भाग लीहीं।
अउ
– राजनांदगांव जिला के सर्वेश्वरदास शासकीय उत्कृष्ट अंग्रेजी माध्यम विद्यालय म भारतीय रिजर्व बैंक डहार ले जिला स्तरीय वित्तीय साक्षरता प्रश्नोत्तरी प्रतियोगिता के आयोजन करे गीस। प्रतियोगिता म शासकीय उच्चतर माध्यमिक विद्यालय घुमका के टीम ह पहिली स्थान म रिहीस।