प्रधानमंत्री-रोजगार मेला
प्रधानमंत्री नरेन्द्र मोदी ह आज इकहत्तर हजार ले जादा नवा कर्मचारी मन ल वीडियो कान्फ्रेंसिंग ले नियुक्ति पत्र सौंपीन। ए नियुक्ति पत्र देसभर म पैंतालीस जघा म लगे रोजगार मेला म दे गीस। ए मउका म प्रधानमंत्री ह किहीन कि रोजगार मेला युवा मनके सशक्तिकरण अउ राष्ट्रीय विकास म उंखर भागीदारी ल मजबूत करे के सरकार के प्रयास हे। ओमन किहीन कि अइसन किसम के रोजगार मेला युवा मन बर सरकार के प्रतिबद्धता देखाथे। प्रधानमंत्री ह किहीन कि सरकार ह पाछु नौ बछर म नियुक्ति के काम ल जादा साफगोई बनाय हे। श्री मोदी ह बतईन कि अभी खाली पद बर अरजी करे अउ नतीजा मिले के काम ऑनलाइन होय हे। ओमन यहू किहीन कि पाछु नौ बछर म देस म रोजगार के मउका बढ़ाय बर जादा ध्यान दे गेहे। संगेसंग ग्रामीण विकास सरकार के हर योजना अउ नीति युवा मन बर रोजगार पैदा करे के काम करत हे। ए मउका केन्द्रीय कार्मिक लोक शिकायत अउ पेंसन कार्यमंत्री डॉक्टर जितेन्द्र सिंह ह किहीन कि ए नियुक्ति केन्द्र सरकार के आने-आने मंत्रालय अउ विभाग म दे गेहे।
ऐति, रईपुर म ए रोजगार मेला भारतीय डाक विभाग कोति ले डब्ल्यू,आर.एस. कॉलोनी के कम्युनिटी हाल म राखे गीस। ए कार्यक्रम म केन्द्रीय जनजातीय कार्य राज्यमंत्री रेणुका सिंह सरूता माईपहुना के रूप म संघरीन। कार्यक्रम म केन्द्र सरकार के कतकोन विभाग म चुने गे दू सौ चौदह अभ्यर्थी मन ल संबंधित विभाग के बड़का अधिकारी मन कोति ले नियुक्ति पत्र सौंपे गीस। कार्यक्रम म बोलत केन्द्रीय राज्यमंत्री ह किहीन कि प्रधानमंत्री के नवाचार ह सरकारी नौकरी म नियुक्ति ल घलो उत्सव म बदल देहे। कार्यक्रम म रईपुर लोकसभा सांसद सुनील सोनी, विधायक बृजमोहन अग्रवाल अउ छत्तीसगढ़ डाक परिमंडल के मुख्य पोस्ट मास्टर मौजूद रिहीन।
भाजपा-बैठक
भारतीय जनता पार्टी के प्रदेस कार्यसमिति के बइठका आज रईपुर म राखे गीस। एमा पार्टी के प्रदेश प्रभारी ओम माथुर, सह-प्रभारी नितिन नबीन, प्रदेश अध्यक्ष अरूण साव, पार्टी के राष्ट्रीय उपाध्यक्ष डॉक्टर रमन सिंह, केन्द्रीय राज्यमंत्री रेणुका सिंह अउ नेता प्रतिपक्ष नारायण चंदेल समेत कतकोन पदाधिकारी सामिल होईन।
बइठका म तय करे गीस कि केन्द्र के मोदी सरकार के नौ बछर पूरा होय म प्रदेस म कतकोन कारीकरम होही। ए बेरा म महासंपर्क अभियान चलाय जाही। ए अभियान के दउरान पार्टी के नेता, पदाधिकारी अउ कार्यकर्ता मन मोदी सरकार डहार ले लोगन के हित बर करे गे काम के जानकारी जनता ल दीहीं।
बइठका के बेरा प्रदेस म कथित रूप ले होय करीबन दू हजार करोड़ रूपिया के सराब घोटाला ल लेके निंदा प्रस्ताव घलो राखे गीस। बइठका म बोलत प्रदेस अध्यक्ष अरूण साव ह किहीन कि राज्य के जनता कांग्रेस सरकार ले त्रस्त होगे हे।
इही बीच, कांग्रेस के छत्तीसगढ़ प्रभारी कुमारी सैलजा ह घलो आज रईपुर म पार्टी के उच्च स्तरीय बइठका लीन। ए बइठका म मुख्यमंत्री भूपेश बघेल, विधानसभा अध्यक्ष डॉक्टर चरणदास महंत, स्वास्थ्य टी.एस. सिंहदेव, गृहमंत्री ताम्रध्वज साहू अउ प्रदेश अध्यक्ष मोहन मरकाम सामिल होईन।
बइठका के बाद श्री मरकाम म बतईन कि अवइया विधानसभा चुनाव के रणनीति ल लेके एमा गोठबात करे गीस। इक्कीस मई के पाटन म भरोसा के सम्मेलन राखे जाही। उहें, छब्बीस मई ले प्रदेस कांग्रेस कोति ले संभाग स्तरीय कार्यकर्ता सम्मेलन के सुरूवात करे जाही।
मुख्य निर्वाचन पदाधिकारी-कोरिया
प्रदेस म अवइया विधानसभा चुनाव ल लेके प्रशासनिक तैयारी सुरू होगे। एमा मुख्य निर्वाचन पदाधिकारी रीना बाबा साहेब कंगाले ह आज कोरिया जिला के दउरा करीन। ए बेरा ओमन कलेक्ट्रेट सभा कक्ष म कोरिया अउ मनेन्द्रगढ़-चिरमिरी-भरतपुर जिला के अधिकारी मनके बइठका लेके निर्वाचन संबंधी तैयारी के समीक्षा करीन। बइठका म ओमन जिला म कुल मतदान केन्द्र समेत संवेदनशील मतदान केन्द्र के जानकारी लीन अउ जम्मों तैयारी करे के निरदेस दीन। ओमन मतदाता सूची म मतदाता मनके नाव जोड़े समेत आने जम्मों काम तय बेरा म पूरा करे बर किहीन। बइठका म यहू बताय गीस कि मतदाता मन ल जागरूक करे बर जागरूकता कार्यक्रम चलाय जात हे। उहें, नवा मतदाता मनके सूची म नाव जोड़े के काम होवत हे।
राष्ट्रीय रामायण महोत्सव
छत्तीसगढ़ म पहिली घांव राष्ट्रीय रामायण महोत्सव रायगढ़ के रामलीला मैदान म एक ले तीन जून तक होही। संस्कृति विभाग के अधिकारी मन बतईन कि ए महोत्सव म देस के आने-आने राज्य ले अवइया कलाकार अउ विदेशी कलाकार मन कोति ले रामायण के प्रसंग के प्रस्तुति दे जाही। उहें, आरती अउ हनुमान चालीस के पाठ होही। रामायण महोत्सव ले भगवान श्रीराम के चरित्र के सुघ्घर रूप लोगन ल देखे बर मिलही। संस्कृति विभाग कोति ले ए महोत्सव के तियारी जोरदरहा होवत हे। एमा सामिल होवइया मानस मंडली मन ल इनाम दे जाही। पहिली इनाम पांच लाख रूपिया, दूसर तीन लाख अउ तीसर इनाम दू लाख रूपिया तय करे गेहे।
हाईकोर्ट-चंदूलाल चंद्राकर
दुरूग जिला म भिलाई के चंदूलाल चंद्राकर मेमोरियल मेडिकल कालेज के बछर दू हजार सोलह-सत्रह के बेच ल मान्यता नइ मिले के मामला ल लेके छत्तीसगढ़ उच्च न्यायालय ह नेशनल मेडिकल कमीशन, केन्द्रीय स्वास्थ्य सचिव अउ राज्य के स्वास्थ्य सचिव ले जुवाब मांगे हे। मुख्य न्यायाधीश रमेश सिन्हा अउ न्यायाधीश राकेश मोहन पांडेय के डिवीजन बेंच ह आज ए मामला म सुनवाई करीन। अदालत ह केहे हे कि अब ए मामला के अवइया सुनवाई गर्मी छुट्टी के बाद चौदह जून के होही।
खबर के मुताबिक चंदूलाल चंद्राकर मेमोरियल मेडिकल कालेज के बछर दू हजार सोलह-सत्रह बैच के एम.बी.बी.एस. के छात्र मनके डिग्री ल नेशनल मेडिकल कमीशन ह अभी तक मान्यता नइ देहे। ए मुद्दा ल लेके छात्र मन ह हाईकोर्ट याचिका दायर करे रिहीन।
उहें, हाईकोर्ट ह कांकेर मेडिकल कालेज म स्टाफ नर्स अउ लैब टैक्निशियन समेत तीन सौ पद म भर्ती बर लगे रोक हटा देहे। खबर के मुताबिक सासकीय चिकित्सा महाविद्यालय कांकेर म तृतीय अउ चतुर्थ श्रेणी के आने-आने पद म नियम के विरूद्ध भर्ती करे जाय ल लेके कुछेक लोगन मन कोर्ट म याचिका दायर करके भर्ती के काम म रोक लगाय के मांग करे रिहीन।
तेजस-ट्रेन
बिलासपुर-नागपुर के बीच वंदे भारत एक्सप्रेस के जगह म अभी कुछ दिन बर तेजस ट्रेन चलाय जात हे। वंदे भारत एक्सप्रेस के रैक रेलवे बोर्ड ह सिकंदराबाद-तिरूपति वंदेभारत बर भेजे हे। एखर सेती बिलासपुर-नागपुर के बीच तेजस ट्रेन चलाय जात हे। रेल अधिकारी मनके मुताबिक ए व्यवस्था थोरिक दिन बर करे गेहे। अधिकारी मन बतईन कि बिलासपुर-नागपुर के बीच वंदे भारत एक्सप्रेस म यात्री मनके संख्या कम रिहीस। रेलवे बोर्ड ह लगीस कि कहूं ए रैक ल सिकंदराबाद तिरूपति के बीच करे जाही, त रेलवे ल जादा फायदा होही।
गांजा-बरामद
कबीरधाम जिला के पिपरिया पुलिस ह एक गाड़ी ले करीबन डेढ़ कुंटल गांजा बरामद करे हे। ए मामला म एक झिन आरोपी ल गिरफ्तार करे गेहे। जिला के पुलिस अधीक्षक डॉक्टर लाल उमेंद सिंह ह बतईन कि मुखबिर ले सूचना मिले रिहीस कि रईपुर ले कवर्धा कोति एक कार म गांजा के तस्करी होवत हे। इही आधार म पिपरिया पुलिस ह धरमपुरा गांव तीर नाकाबंदी करके गाड़ी के जांच सुरू करीन। ए दउरान एक गाड़ी ले करीबन डेढ़ कुंटल गांजा बरामद करे गीस, जेखर कीमत करीबन पन्द्रह लाख रूपिया बताय गेहे। पुलिस ह गाड़ी ल जब्त कर लेहे।
आरटीई-चयन
निःशुल्क अउ अनिवार्य बाल सिक्षा अधिकार अधिनियम-आरटीई म चालू सैक्षणिक सत्र म प्रदेस के प्राईवेट स्कूल मन म भर्ती बर पहिली पारी म ऑनलाइन अरजी देके कार्रवाई पूरा होगे हे। संचालक लोक शिक्षण सुनील कुमार जैन ह बतईन कि पहिली पारी म सुकमा, दंतेवाड़ा अउ कोंडागांव जिला के लॉटरी निकाले गीस, जेमा पांच सौ बावन पढ़ईया लइका मन ल चुने गेहे। एमा दंतेवाड़ा जिला ले चौहत्तर, सुकमा जिला ले बयासी अउ कोंडागांव जिला ले तीन सौ छियानवे विद्यार्थी सामिल हे। ओमन बतईन कि बाकी जिला के लॉटरी पच्चीस मई तक पूरा कर ले जाही।
खबर के मुताबिक आरटीई म प्रदेस म चलाय जात प्राईवेट स्कूल मन म आरटीई पोर्टल ले ऑनलाइन अरजी मंगाय गे रिहीस।