स्कूल-गणवेश
राज्य सरकार ह चालू सिक्षा सत्र म कक्षा पहली ले आठवीं तक जम्मों पढ़ईया मन ल गणवेश निःसुल्क प्रदान करही। ए संबंध म जारी आदेस के अनुसार जम्मों पढ़ईया मन ल अवइया चैदह अगस्त तक स्कूल ड्रेस प्रदान करे के निरदेस दे गेहे। उहें, कोरोना संक्रमण ल देखत ड्रेस के वितरण घरो-घर जाके करे जाही। ए योजना म जम्मों पढ़ईया लइका मन ल दू जोड़ी ड्रेस निःसुल्क दे जाही।
रक्षाबंधन
भाई-बहिनी के पवित्र मया के प्रतीक राखी के तिहार आज देसभर म उछाह अउ उमंग के संग मनाय जावत हे। राखी ह बहन के प्रति भाई के प्रेम अउ कर्तव्य के प्रतीक हरय। आज के दिन बहिनी ह अपन भाई के हाथ म राखी बांध के मिठाई खवाथे। भाई घलो अपन बहिनी के रक्षा के संकल्प लेके उपहार देथे। राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह रक्षाबंधन के बेरा म लोगन ल बधाई देहे।
राखी के ए तिहार छत्तीसगढ़ म घलो सुघ्घर ढंग ले मनाय जात हे। ए बेरा म रईपुर कलेक्टर एस. भारतीदासन, वरिष्ठ पुलिस अधीक्षक अजय यादव अउ जिला पंचायत के मुख्य कार्यपालन अधिकारी डाॅक्टर गौरव कुमार सिंह ह खम्हारडीह अनाथआलय के नोनी अउ नारी निकेतन के दीदी मन ले राखी बंधवा के रक्षाबंधन के तिहार मनाईन। ए बेरा म एक ठिन एनजीओ डहार ले नोनी मन ल आॅनलाईन पढ़ई करे बर स्मार्ट फोन दे गीस। उहें, प्रसासन डहार ले जम्मों नोनी मन ल मास्क, फेस शील्ड, सैनिटाईजर अउ साबुन घलो दे गीस।
ओति, दुरूग जिला म पुलिस ह कोरोना योद्धा, शहीद अउ स्वंतत्रता सेनानी परिवार के संग राखी तिहार मनाईन।
उहें, राजनांदगांव जिला म भाजपा महिला मोर्चा के कार्यकर्ता मन कोतवाली थाना म पुलिसकर्मी मन ल राखी बांधीन। एखर अलावा, पूर्व महापौर शोभा सोनी ह कोरोना संक्रमण बचाव अभियान ले जुड़े करमचारी मन ल घलो सम्मानित करीन।
रक्षाबंधन-दंतेश्वरी
ऐति, दंतेवाड़ा जिला म मां दंतेश्वरी ल रूई के धागा ले बने राखी बांधे गीस। पाछु कई बछर ले चले आवत ए प्रथा के पालन करत आज राखी के सुघ्घर बेरा म रूई के धागा बनाके प्रकृति के रंग ले रंग के मां दंतेश्वरी ल राखी बांधे गीस। ए बेरा म राज्य अउ देस के सुरक्षा के संघरा कोरोना वायरस ले मुक्ति के प्रार्थना घलो करे गीस।
रायगढ़-फेस मास्क अभियान
रायगढ़ जिला म एकेच दिन म करीब पन्द्रह लाख फेस मास्क बांटे के अभियान ल गोल्डन बुक आॅफ वल्र्ड रिकार्ड म दर्ज करे गेहे। खबर मिले हे कि आज रायगढ़ जिला म एके संघरा करीबन चैदह लाख सत्यासी हजार मास्क बांटे गीस अउ ए काम रायगढ़ पुलिस के मुहिम ‘‘एक रक्षा सूत्र मास्क का‘‘ म करे गीस। ए अभियान म जिला पुलिस ह बारह लाख सैंतीस हजार मास्क बाटीस। उहें, कतकोन संस्था अउ लोगन ह घलो ढाई लाख ले जादा फेस मास्क वितरित करीन।
ए जागरूकता अभियान बर मास्क ले भरे पुलिस वाहन ल काली रायगढ़ जिला के आने-आने इलाका बर रवाना करे गे रिहीस, जिहां आज बिहनिया नौ बजे ले मंझनिया तीन बजे तक चउक-चउराहा अउ घरों-घर म लोगन ल मास्क बांटे गीस। ए अभियान बर एक सौ चैदह गाड़ी अउ तीन सौ बैसठ स्वयंसेवी संस्था के माध्यम ले साढ़े सात हजार ले जादा वाॅलिंटियर्स मन भागीदारी निभाईन।
विश्व संस्कृत दिवस
आज विश्व संस्कृत दिवस मनाय जात हे। प्रधानमंत्री नरेन्द्र मोदी ह संस्कृत भासा के संवर्धन अउ अध्ययन, अध्यापन म लगे जम्मों लोगन ल बधाई देहे। श्री मोदी ह कहिन कि संस्कृत सुंदर भाखा हे, जे ह कतकोन बछर तक भारत वर्ष के ज्ञान भंडार बनाय राखे हे। ओमन जम्मों झन ले अनुरोध करे हे कि संस्कृत ल अउ जादा लोकप्रिय बनाय बर बने रिकिम ले काम करय।
ए बेरा म केन्द्रीय सूचना अउ प्रसारण मंत्री प्रकाश जावड़ेकर ह देसवासी मन ल बधाई देहे। श्री जावड़ेकर ह कहिन कि भारत के वेद अउ कतकोन प्राचीन ग्रंथ के रचना संस्कृत म ही होय हे। संस्कृत भाखा ह अउ कतकोन बोली-भाखा के जननी हरय।
पर्यटन-तुरतुरिया
राज्य सरकार ह तुरतुरिया ल ईको पर्यटन स्थल के रूप म विकसित करे के फइसला लेहे। संगेसंग शिवरीनारायण के महत्वपूर्ण स्थल के विकास बर घलो कार्ययोजना तैयार करे गेहे। बलौदाबाजार-भाटापारा जिला के तुरतुरिया वाल्मिकी आश्रम अउ उंखर आसपास जघा के सौंदर्यीकरण करे जाही अउ महानदी म वाटर फ्रंट के निर्माण घलो करे जाही। ए जघा म पर्यटक मन बर काॅटेज घलो बनाय जाही।
तुरतुरिया शिव मंदिर के जीर्णोद्धार करके पर्यटन केन्द्र के रूप म विकसित करे योजना तैयार करे गेहे। अइसने, महानदी, जोंक अउ शिवनाथ नदी के संग म स्थित जांजगीर-चांपा जिला के शिवरीनारायण ल घलो पर्यटन क्षेत्र के रूप म विकसित करे जाही। एखर बर कार्ययोजना तैयार कर ले गेहे।
जानबा के मुताबिक राज्य सरकार ह प्रदेस म कुल पचहत्तर अइसे स्थान के पहिचान करे हे, जिहां भगवान श्रीराम ह वनवास के बेरा रूके रिहीस अउ आय गेहे। ए स्थान मन ल विकसित करे बर राज्य सरकार ह ‘‘राम वनगमन पथ परियोजना‘‘ सुरू करे हे।
राजभवन-कोरोना
कोरोना वायरस संक्रमण के रोकथाम अउ बचाव बर राजभवन ल अवइया नौ अगस्त ले सात दिन बर बंद राखे जाही। ए बेरा राजभवन सचिवालय के संचालन नइ होय अउ ए बेरा म राजभवन म जम्मों भेंट अउ मुलाकात म प्रतिबंध रइही। संगेसंग बाहिरी व्यक्ति के प्रवेस म घलो प्रतिबंध लगाय गेहे।
आकाशवाणी समाचार-महानिदेशक
भारतीय सूचना सेवा के उन्नीस सौ छियासी बैच के अधिकारी जयदीप भटनागर ह आकाशवाणी समाचार सेवा प्रभाग के महानिदेशक के रूप म कार्यभार ग्रहण करीन। एखर पहिली, ओमन प्रसार-भारती म पश्चिम एशिया संवाददाता अउ पत्र सूचना कार्यालय म कतकोन पद म कार्य कर चुके हे। श्री भटनागर ह पूर्व प्रधान महानिदेशक ईरा जोशी के जगह लीन। जउन ह पाछु इकतीस जुलाई के सेवानिवृत्त होय रिहीन।
मौसम
प्रदेस म अवइया चोबीस घंटा म कतकोन जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। मौसम विभाग ले मिले खबर के अनुसार उत्तर-पूर्व बंगाल के खाड़ी अउ उंखर आसपास म बने कम दबाव क्षेत्र के सेती अवइया चोबीस घंटा म प्रदेस के एक-दू स्थान म भारी ले अतिभारी वर्षा होय के संभावना हे। उहें, एक-दू स्थान म गरज-चमक के संघरा गाज गिरे के चेतावनी दे गेहे। ऐति, प्रदेस म एक जून ले लेके अब तक कुल पांच सौ पैंसठ मिलीमीटर औसत बरसा दरज करे जा चुके हे। प्रदेस म सबले जादा बारिस कोंडागांव जिला म आठ सौ संतावन दशमलव नौ मिलीमीटर अउ सबले कम कबीरधाम जिला म तीन सौ आठ मिलीमीटर औसत बारिस रिकाॅर्ड करे गेहे।
अंतर्राष्ट्रीय यात्री-दिशा/निर्देश
केन्द्रीय स्वास्थ्य मंत्रालय ह देस म अवइया अंतर्राष्ट्रीय यात्री मन बर नवा दिसा-निरदेस जारी करे हे। ए आठ अगस्त ले लागू होही। एमा यात्री मन ल यात्रा के कम से कम बहत्तर घंटा पहिली स्व-घोषणा आॅनलाइन पोर्टल म दे बर पड़ही। ओमन ल ए पोर्टल म ए सपथ पत्र घलो दे बर पड़ही कि अनिवार्य रूप ले चैदह दिन क्वारेंटाइन म रइही। एमा ले सात दिन के इंस्टीट्यूशनल क्वारंटीन के ओमन ल भुगतान करे बर पड़ही अउ सात दिन घर म आइसोलेशन म रइही। गर्भवती महिला, गंभीर बीमार अउ परिवार म मउत के स्थिति म घर म चैदह दिन तक क्वारेंटाइन के अनुमति होही। यात्री मन ल गंतव्य तक पहुंचे म नेगेटिव आरटी-पीसीआर जांच रिपोर्ट प्रस्तुत करे म इंस्टीट्यूशनल क्वारंटीन ले छूट मिल सकही।
