राष्ट्रीय विधिक सेवा प्राधिकरण के निरदेस म आज प्रदेश के आने-आने न्यायालय म राष्ट्रीय लोक अदालत के आयोजन करे गीस। ए दउरान पक्षकार मनके भौतिक अउ वचुअर्ल उपस्थिति म राजीनामा योग्य मामला के निराकरण करे गीस। एमा बैंक, बीमा, फाइनेंस, बीएसएनएल, बिजली विभाग के संगेसंग नगर पालिका अउ आने-आने प्रकरण सामिल रिहीन।
हज यात्रा-प्रशिक्षण
केन्द्रीय अल्पसंख्यक कार्यमंत्री स्मृति ईरानी ह आज हज यात्री मनके सहायता बर चुने गे चार सौ अड़सठ कर्मी मनके दू दिन के प्रसिक्षण कार्यक्रम के उद्घाटन करीन। ए कर्मी मन ल ए बछर हज म जाने वाला पौने दू लाख यात्री मन ल चिकित्सा अउ प्रशासनिक सुविधा दे जाय के बारे म प्रसिक्षण दे जाही। श्रीमती ईरानी ह कहिन कि ए बछर चार हजार तीन सौ ले जादा माईलोगिन मन ह महरम के बिना हज यात्रा म जाही, जउन ह अभी तक के सबले बड़े संख्या हे। ओमन किहीन कि केन्द्र सरकार ह भारतीय नागरिक मनके हज यात्रा के लागत ल कम करे के बारे म ध्यान देवत हे। श्रीमती ईरानी ह किहीन कि पहिली घांव हज यात्री मन ल भारतीय स्टेट बैंक के माध्यम ले फॉरेक्स कार्ड दे जावत हे। ए मउका म श्रीमती ईरानी ह हज यात्री मन ल अउ उंखर मदद बर चुने गे कर्मी मन बर हज गाइड घलो जारी करीन।
भेंट-मुलाकात
मुख्यमंत्री भूपेश बघेल ह भेंट-मुलाकात कार्यक्रम म आज बिलासपुर अउ बिल्हा विधानसभा क्षेत्र म करीबन तीन सौ तेईस करोड़ रूपिया के आने-आने विकास काम के लोकार्पण अउ भूमिपूजन करीन। उहें, मुख्यमंत्री ह दयालबंद के स्वामी आत्मानंद शासकीय बहुउद्देश्यी उच्चतर माध्यमिक उत्कृष्ट अंग्रेजी अउ हिन्दी माध्यम स्कूल अउ बिलासपुर कलेक्ट्रेट परिसर म करीबन पच्चीस हजार वर्गफीट म बने मल्टीलेवर कार पार्किंग के लोकार्पण करीन। मुख्यमंत्री ह बिलासपुर के तारबहार म करीबन तिहत्तर लाख रूपिया के लागत ले बने इंटीग्रेटेड कमान एंड कंट्रोल सेंटर के उद्घाटन करीन। एमा सहर के तिरालीस ठन जघा म पांच सौ तेईस आधुनिक कैमरा के माध्यम ले सहर के ट्रैफिक अउ सुरक्षा व्यवस्था के निगरानी करे जाही।
एखर पहिली, मुख्यमंत्री ह काली बेलतरा म महाविद्यालय अउ स्वामी आत्मानंद स्कूल खोले जाय के घोसना करीन। ए मउका म मुख्यमंत्री ह कई इन समाज के प्रतिनिधि मनके मांग म सामाजिक भवन बनाय बर रासि मंजूर करे के संगेच उंखर समस्या के निपटारा बर स्थानीय प्रसासन ल निरदेस घलो दीन।
मुख्यमंत्री-प्राधिकरण बैठक
मुख्यमंत्री भूपेश बघेल ह अरपा बेसिन म चलत जम्मों सिंचाई परियोजना मन ल समय-सीमा म पूरा करे के निरदेस दीन हे। बिलासपुर म आज अरपा बेसिन विकास प्राधिकरण के बइठका म मुख्यमंत्री ह किहीन कि अरपा नदी क्षेत्र के विकास बर रासि के कोनों कमी नइ हे। एला पुनर्जीवित करे बर एखर ले जुड़े जम्मों विभाग मन आपसी तालमेल के संग काम करय, जेखर ले जल्दी ले जल्दी अरपा नदी ल पहिली जइसन बारहमासी नदी म तब्दील करे जा सकय। बइठका म श्री बघेल ह किहीन कि अरपा नदी ल पुनर्जीवित करे बर सासकीय प्रयास के संग जनसहभागिता जरूरी हवय।
नारायणपुर-ज्ञापन
नारायणपुर जिला म अबूझमाड़ क्षेत्र के ग्रामीण मन ह जल-जंगल, जमीन के सुरक्षा, मूल पेसा कानून लागू करे बर अउ वन अधिकार अधिनियम म होय बदलाव ल निरस्त करे के मांग ल लेके जिला कलेक्टर ल ज्ञापन सौंपीन। पाछु कई दिन ले आंदोलनरत् ए ग्रामीण मन ह अलग-अलग जगह ले जिला मुख्यालय पहुंचीन, जिहां कलेक्टर अजीत बसंत ह उंखर मन ले गोठबात करीन। ए दउरान ग्रामीण मन ह कलेक्टर ल ज्ञापन सौंपीन अउ पुलिस उपर प्रताड़ना के आरोप घलो लगईन। कलेक्टर डहार ले उंखर मांग उपर विचार करे के आश्वासन मिले के बाद ग्रामीण मन ह अपन गांव लहुट गीन।
एम्स-वॉकाथान
अखिल भारतीय आयुर्विज्ञान संस्थान-एम्स रईपुर म विश्व नर्सिंग दिवस के मउका म वॉकाथान अउ जागरूकता कार्यक्रम कराय गीस। ए दउरान एम्स के नर्सिंग अधिकारी मन ह स्वास्थ्य सेवा म स्वयं के जिम्मेदारी ल गंभीरता के संग निभाय के संकल्प लीन।
कार्यक्रम म एम्स के निदेशक प्रोफेसर डॉक्टर एम. नागरकर ह नर्सिंग अधिकारी मनके भूमिका अउ एम्स के आने-आने विभाग म उंखर डहार ले निभाय जावत दायित्व के तारीफ करीन। संगेसंग ओमन ह नर्सिंग अधिकारी मन ल अवइया बेरा म घलो जिम्मेदारी के साथ मरीज मन ल सेवा दे जाय बर प्रोत्साहित करीन।
खबर के मुताबिक नर्सिंग एसोसिएसन डहार ले एम्स रईपुर म बीते छह मई ले चलत आने-आने कार्यक्रम म मरीज अउ उंखर परिवार वाला मन ल भोजन बांटे के संगेच खेल प्रतियोगिता, पोस्टर प्रदर्शनी अउ ड्रग फ्री इंडिया अभियान म नसा के विरोध म वॉकाथान के आयोजन कराय गीस।
हेमचंद यादव विवि-परीक्षा
दुर्ग के हेमचंद यादव विश्वविद्यालय म स्नातकोत्तर अउ सेमेस्टर परीक्षा अवइया बाईस जून ले सुरू होना प्रस्तावित हे। विश्वविद्यालय के परीक्षा उप कुलसचिव डॉक्टर राजमणि पटेल अउ अधिष्ठाता छात्र कल्याण डॉक्टर प्रशांत श्रीवास्तव ह बतईन कि विश्वविद्यालय म विद्यार्थी अउ पालक मनके प्रतिनिधिमंडल ह कुलपति ले भेंट करके सेमेस्टर परीक्षा करा के परिणाम ल जल्दी ले जल्दी घोषित कराय के अनुरोध करे रिहीन।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक ले होही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘जशपुर‘‘ जिला के गतिविधि बारे म जानकारी दे जाही।
हल्बी-साप्ताहिक समाचार बुलेटिन
काली इतवार के ‘‘हल्बी‘‘ म साप्ताहिक समाचार बुलेटिन प्रसारित होही। करीबन पन्द्रह मिनट बेरा वाले ए साप्ताहिक समाचार बुलेटिन ल बिहनिया साढ़े सात बजे ले आकाशवाणी केन्द्र, जगदलपुर ले प्रसारित करे जाही। एला बस्तर संभाग म सुने जा सकही।
कोंडागांव-चलित थाना
कोंडगांव पुलिस ह जिला के अंदरूनी गांव इसलनार म चलित थाना लगाके ग्रामीण मनके समस्या सुनीन। पुलिस अधीक्षक दिव्यांग पटेल ह ए चलित थाना म ग्रामीण मन ले मिलके उंखर समस्या के निराकरण करे के आदेस दीन। ओमन ग्रामीण मन ल ऑनलाइन ठगी अउ आने-आने अपराध के सिकार होय ले बाचे बर घलो जरूरी जानकारी दीन।
अउ अब थोरकुन समाचार सार म-
– प्रधानमंत्री के अल्पसंख्यक के हितार्थ नवा पन्द्रह सूत्रीय कार्यक्रम के क्रियान्वयन अउ राज्य सासन डहार ले अल्पसंख्यक मनके विकास अउ कल्याणकारी योजना के क्रियान्वयन के समीक्षा सत्रह मई के रायपुर कलेक्ट्रेट परिसर के रेडक्रॉस सोसायटी सभा कक्ष म कराय जाही।
– रईपुर जिला अंत्याव्सायी सहकारी विकास समिति मर्यादित डहार ले अंत्योदय स्व-रोजगार योजना म अनुसूचित जाति अउ अनुसूचित जनजाति वर्ग के सिक्षित बेरोजगार मन ल बैंक के माध्यम ले ऋण दे बर इकतीस मई तक आवेदन मंगाय गे हवय।
– राजधानी रईपुर के डीडी नगर थाना पुलिस ह तांबा के बिस्किट ल सोना के बताके एक झन महिला ले पन्द्रह लाख रूपिया के ठगी करइया एक झिन आरोपी ल राजस्थान के अलवर ले गिरफ्तार करे गेहे।
अउ
– जशपुर पुलिस ह देशी कट्टा के नोक म करीब दू लाख रूपिया के लूट के दो अलग-अलग मामला म चार झन आरोपी मन ल गिरफ्तार करे हे। ए आरोपी मन जशपुर थाना क्षेत्र के भुडकेला अउ पीड़ी पुलिया गांव के तीर लूट के घटना ल अंजाम दे रिहीन।