पीएससी परिणाम
छत्तीसगढ़ लोक सेवा आयोग पीएससी ह राज्य सेवा परीक्षा दू हजार इक्कीस के परिणाम घोषित कर देहे। मुख्य परीक्षा अउ साक्षात्कार म मिले अंक के आधार म कुल एक सौ सत्तर पद के चयन सूची जारी करे गेहे। जेमा रायपुर के प्रज्ञा नायक ह पहिली स्थान पाय हे, त उंहे अनन्या अग्रवाल दूसर अउ शशांक गोयल ह तीसर स्थान म हवय।
उंहे पीएससी ह राज्य सेवा परीक्षा दू हजार बाईस के प्रारंभिक परीक्षा के परिणाम घोषित कर देहे। प्रारंभिक परीक्षा म कुल तीन हजार पंच्यानबे अभ्यर्थी मन पास होय हे। मुख्य परीक्षा पंद्रह सोलह सतरह अउ अठारा जून के होही। एखर बर प्रारंभिक परीक्षा म चुने गे अभ्यर्थी मन अठारा ले पच्चीस मई तक ऑनलाइन अर्जी कर सकथे।
सीबीएसई परिणाम
केंद्रीय माध्यमिक शिक्षा बोर्ड-सीबीएसई ह बारहवीं परीक्षा के परिणाम घोषित कर देहे। छात्र मन अपन परिणाम ल बोर्ड के आधिकारिक वेबसाइट सीबीएसई डॅाट जी ओ व्ही डॅाट इन अउ रिजल्ट्स डॅाट एनआईसी डॅाट इन म घलो देख सकथे।
सीबीसएसई परिणाम के मुताबिक कुल सत्यासी दशमलव तीन-तीन प्रतिशत छात्र मन ह पास होय हे। पास होय परीक्षार्थी मन म नब्बे दशमलव छै आठ प्रतिशत छात्रा अउ चौरासी दशमलव छै प्रतिशत छात्र मन शामिल होय रीहिन। पास होय परीक्षार्थी मन म छात्रा मनके संख्या छै प्रतिशत जादा हवय। त्रिवेन्द्रम रीजन के पास होय परीक्षार्थी मनके प्रतिशत सबले जादा निन्यानबे दशमलव नौ-एक प्रतिशत हे।
ईडी कार्रवाई
प्रदेश म दू हजार करोड़ रूपिया के कथित शराब घोटाला के जांच करत प्रवर्तन निदेशालय ईडी के टीम ह आज राजधानी रायपुर के होटल कारोबारी गुरूचरण सिंह होरा अउ मंदीप सिंह चावला के ठिकाना म छापामार कार्रवाई करीन। त उंहे दुर्ग म चार्टड एकाउंटेंट सुरेश कोठारी के ठिकाना म सीबीआई के टीम ह छापा मारीन।
एति ईडी ह भिलाई के शराब कारोबारी त्रिलोक सिंह ढिल्लन के बैंक खाता म जमा सत्ताईस करोड़ पचास लाख रूपिया के फिक्स डिपॉजिट ल सीज कर देहे अउ संगेसंग जांच के दउरान नकद बावन लाख रूपिया ल घलो सीज कर देहे। जानबा के मुताबिक ढिल्लन ल ईडी ह गिरप्तार करके पाछू गुरूवार के विशेष अदालत म पेश करे रीहिन जिहां ले ओमन ल चार दिन के रिमांड म भेज दे गेहे।
राष्ट्रीय लोक अदालत
राष्ट्रीय विधिक लोक सेवा प्राधिकरण नई दिल्ली के निर्देश म प्रदेश म काली राष्ट्रीय लोक अदालत राखे गेहे। जेमा पक्षकार मनके आपस म रजामंदी ले बैंक, बीमा, फाइनेंस, बीएसएनएल, बिजली विभाग के संगेसंग नगर पालिका अउ आने राजीनामा जइसन प्रकरण के निपटारा करे जाही। एमा पक्षकार मनके भौतिक अउ वचुअर्ल उपस्थिति म मामला के निराकरण करे जाही।
भेंट-मुलाकात
मुख्यमंत्री भूपेश बघेल ह आज भेंट-मुलाकात कार्यक्रम के तहत बिलासपुर जिला के बेलतरा विधानसभा गीन। इंहा ओमन एक सौ सतहत्तर करोड़ रूपिया ले जादा के छियांलीस ठिन विकास काम के लोकार्पण अउ भूमिपूजन करीन। उंहे मुख्यमंत्री ह गांव अकलतरी म शासकीय नवीन महाविद्यालय भवन बनाय बर भूमिपूजन करीन। ए मउका म मुख्यमंत्री ह आने आने योजना मनके हितग्राही मन ल जीनिस अउ चेक बांटीन।
विस चुनाव तैयारी
प्रदेश म अवइया विधानसभा चुनई ल लेके प्रशासनिक तैयारी शुरू होगे हे। इही कड़ी म अपर आयुक्त राजस्व के.एल. चौहान ह सारंगढ़ बिलाईगढ़ जिला म चुनाव ले जुड़े अधिकारी मनले बइठका लीन। बइठका म श्री चौहान ह मतदाता सूची, प्रशिक्षण, प्रचार प्रसार, ईपिक वितरण, संवेदनशील अउ अतिसंवेदनशील मतदान केंद्र अउ बीएलए नियुक्ति ले जुड़े अधिकारी मनले गोठबात करीन।
व्यावसायिक प्रवेश परीक्षा
छत्तीसगढ़ व्यावसायिक परीक्षा मंडल डहार ले शैक्षणिक सत्र दू हजार तेईस चौबीस म राज्य के व्यावसायिक पाठ्यक्रम मन म प्रवेश बर परीक्षा के तिथि घोषित कर दे गेहे। जारी कार्यक्रम के मुताबिक प्री-बीएड, प्री-डीएलएड, बीएससी नर्सिंग, एमएससी नर्सिंग अउ पोस्ट बेसिक नर्सिंग म प्रवेश परीक्षा बर ऑनलाइन अर्जी तेरा ले अठाईस मई तक करे जा सकथे। प्री-बीएड, प्री-डीएलएड बर परीक्षा सतरा जून के अउ बीएससी नर्सिंग अउ एमएससी नर्सिंग अउ पोस्ट बेसिक नर्सिंग बर परीक्षा चौबीस जून के होही।
जानबा के मुताबिक लिखित परीक्षा बर राज्य म रहइया प्रतिभागी मन ले कोनो प्रकार के परीक्षा शुल्क नइ ले जाय।
भर्ती परीक्षा
प्रदेश म वन विभाग डहार ले एक हजार नौ सौ बीस खाली पद बर भर्ती प्रक्रिया शुरू कर दे गेहे। एमा वन रक्षक के एक हजार पांच सौ पच्चीस पद के संगेसंग सहायक ग्रेड-तीन के एक सौ सत्यासी, डॅाटा एंट्री ऑपरेटर के तीस, स्टेनोग्राफर के चौंतीस, वाहन चालक के एक सौ चौवांलिस पद के संगेसंग कुल तीन सौ पंचानबे पद शामिल करे गेहे।
अइसने सहायक पशु चिकित्सा क्षेत्र अधिकारी के एक सौ पचास पद म सीधी भर्ती करे जाही। पशु चिकित्सा सेवा संचालनालय डहार ले भर्ती बर विज्ञापन जारी कर दे गेहे। प्रदेश के अभ्यर्थी मन छत्तीसगढ़ व्यावसायिक परीक्षा मंडल के वेबसाइट म ऑनलाइन अर्जी कर सकथे।
एति प्रदेश के सरकारी अस्पताल मन म एक सौ छै नवा चिकित्सा अधिकारी अउ अठाईस झिन विशेषज्ञ डॅाक्टर के नियुक्ति करे गेहे। राष्ट्रीय स्वास्थ्य मिशन, छत्तीसगढ़ डहार ले आज नवा चिकित्सा अधिकारी अउ विशेषज्ञ डॅाक्टर मनके पदस्थापना के आदेश जारी करे गेहे। ए डॅाक्टर मन ल आने आने ग्रामीण अउ शहरी प्राथमिक स्वास्थ्य केंद्र, सामुदायिक स्वास्थ्य केंद्र के संगेसंग जिला चिकित्सालय मन म पदस्थ करे गेहे।
रेलवे भर्ती छूट
सेना म चार बछर के सेवा पूरा करइया अग्निवीर मन ल रेलवे विभाग म भर्ती बर कतकोन प्रकार के छूट दे जाही। अग्निवीर मन ल लेवल-वन के नौकरी म दस प्रतिशत अउ लेवल-टू अउ ओखर ले उपर के नौकरी मन म पांच प्रतिशत के आरक्षण दे जाही। ए सुविधा आने-आने अराजपतित्रत पद मनके सीधी भर्ती के कोटा कोति ले दे जाही। अग्निवीर मनके पहिली बैच ल आयुसीमा म पांच साल अउ ओखर बाद के बैच मन ल तीन साल के छूट मिलही।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत साइबर ठगी अउ अपराध ले बचाव के उपाय उपर अतिरिक्त पुलिस अधीक्षक अउ छत्तीसगढ़ पुलिस साइबर सेल के प्रभारी श्री कवि गुप्ता, ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली तेरा मई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र मन एके संगरा रिले करही।
नर्स दिवस
आज अंतर्राष्ट्रीय नर्स दिवस हरय। हरएक साल बारा मई के आधुनिक नर्सिंग के संस्थापक फ्लोरेंस नाइटिंगेल के जयंती के मउका म ए दिवस ल मनाये जाथे। एखर ले रोगी मनके कल्याण, सुरक्षा अउ स्वास्थ्य लाभ बर हमर जम्मों अस्पताल मनके डॅाक्टर के संगेसंग नर्स मन डहार ले निभाय गे भूमिका के सुरता दिलाथे। एसो के अंतर्राष्ट्रीय नर्स दिवस के थीम हवय- हमारी नर्सें हमारा भविष्य
अउ अब थोरकुन समाचार सार म-
– प्रधानमंत्री नरेंद्र मोदी ह आकाशवाणी म मन की बात कार्यक्रम म ए महीना के अठाईस तारीख के बीहनिया ग्यारा बजे देश विदेश के लोगन मन संग अपन विचार साझा करही।
– निशुल्क अउ अनिवार्य बाल शिक्षा अधिकार अधिनियम आरटीई के अंतर्गत प्रदेश के प्रायवेट विद्यालय मन म चालू शिक्षा सत्र म प्रवेश बर दस्तावेज जांचे के राखे गे तारीख तक चौदा मई तक बढ़ा दे गेहे।
अउ
– छत्तीसगढ़ माध्यमिक शिक्षा मंडल डहार ले होय दसवीं अउ बारहवीं परीक्षा के परिणा म ले असंतुष्ट विद्यार्थी मन ह पुर्नगणना पुर्नमूल्यांकन अउ उत्तर पुस्तिका के छायाप्रति ल देखे बर अर्जी कर सकथे। एखर बर विद्यार्थी मन परिणाम जारी होय के तारीख ले पंद्रह दिन के भीतर मंडल के वेबसाईट म अर्जी कर सकथे।