भेंट-मुलाकात
मुख्यमंत्री भूपेश बघेल ह अपन भेंट-मुलाकात कार्यक्रम के दउरान आज बिलासपुर जिला म मस्तूरी विधानसभा क्षेत्र के सीपत म स्थानीय लोगन ले भेंट करीन। ए दउरान मुख्यमंत्री ह सीपत अउ मस्तूरी ल नगर पंचायत बनाए के घोषणा करीन। श्री बघेल ह बेलटुकरी म मिनी स्टेडियम अउ देवरी म नवा पंचायत भवन के निर्माण ल घलो मंजूरी दीन। मुख्यमंत्री ह कुटेलाधाम ल पर्यटन केंद्र के रूप म विकसित करे जाय के एलान करीन।
उंहे सीपत अउ दर्राभाठा म सामुदायिक स्वास्थ्य केंद्र बनाय के संग पचपेड़ी म नवा शासकीय महाविद्याल य खोले के संगेसंग खम्हरिया म पुलिस चौकी बनाय के मंजूरी घलो दीन। मुख्यमंत्री ह मस्तुरी के अनुसूचित जाति कन्या छात्रावास म सौ सीट ल बढ़ाय समेत जयरामनगर म स्वामी आत्मानंद इंग्लिश मीडियम स्कूल खोले के घोषणा घलो करीन। ओमन ह कुकदा, पेंड्री अउ समेताभाठा म आने आने निर्माण काम के मंजूरी दीन।
अपन प्रवास के दउरान मुख्यमंत्री ह बेलटुकरी के ग्रामीण औद्योगिक परिसर म महात्मा गांधी के मूर्ति के अनावरण के संग वृक्षारोपण घलो करीन।
ईडी-कार्रवाई
प्रवर्तन निदेशालय-ईडी के टीम ह करीबन दू हजार करोड़ रूपिया के कथित शराब घोटाला ल लेके भिलाई के एक होटल कारोबारी त्रिलोक सिंह ढिल्लन ल गिरप्तार करे हे। ए मामला म ये तीसर गिरप्तारी हे। एखर पहिली ईडी डहार ले अनवर ढेबर अउ नितेश पुरोहित ल घलो गिरप्तार करे गे रीहिस हे।
बताय जात हे कि त्रिलोक ढिल्लन ल शराब कारोबार छत्तीसगढ़ के संग झारखंड म घलो हे। उखर खिलाफ भिलाई थाना म पहिली घलो कुछएक मामला दरज होय हे। त्रिलोक ढिल्लन ल गिरप्तार करे के बाद प्रवर्तन निदेशालय के टीम ह आज अदालत म पेस करे गीस, जिहां सुनवाई के बाद विशेष न्यायाधीश अजय सिंह राजपूत ह ओला चार दिन के रिमांड म ईडी ल सौंप दीन। बताय गेहे कि त्रिलोक ढिल्लन उपर हवाला के आरोप हे।
भाजपा प्रदर्शन
राज्य म करीबन दू हजार करोड़ रूपिया के कथित शराब घोटाला के विरोध म प्रदेश भाजपा ह आज सबो जिला म प्रदर्शन करीन। भाजपा के प्रदेश अध्यक्ष अरूण साव अउ रायपुर दक्षिण क्षेत्र के विधायक बृजमोहन अग्रवाल के अगवई म पार्टी कार्यकर्ता मन ह बूढ़ा तालाब के आगू धरनास्थल म प्रदर्शन करीन। प्रदर्शनकारी मन ल संबोधित करत श्री साव ह आरोप लगाइन कि ए घोटाला म राज्य सरकार के कुछ नेता अउ अधिकारी मनके भूमिका संदेह के घेरा म हे।
ओति भिलाई के कोहका स्थित अंवति बाई चौक म भारतीय जनता युवा मोर्चा के कार्यकर्ता मन ह घलो आज धरना-प्रदर्शन करीन। प्रदर्शनकारी मन ह राज्य सरकार के खिलाफ नाराबाजी घलो करीन। ए मउका म युवा मोर्चा के जिला अध्यक्ष अमित मिश्रा ह कहिन कि ईडी के जांच ले राज्य म होवत कथित भ्रष्टाचार के परत खुलत जावत हे।
उंहे राजनांदगांव जिला के डोंगरगढ़ म घलो भाजपा कार्यकता मन ह विरोध प्रदर्शन करीन। पार्टी के मंडल अध्यक्ष अमित जैन के नेतृत्व म होय ए प्रदर्शन म डोंगरगढ़ के संगेसंग तीर तखार के आने आने जगा के भाजपा कार्यकर्ता मन घलो सामिल होइन। कार्यकर्ता मन ल संबोधित करत अमित जैन ह आरोल लगाइन कि प्रदेश म अवैध शराब के बड़ मात्रा म बिक्री होवत हे। ओमन ए कथित घोटाला म सामिल लोगन मनके खिलाफ कड़ा कार्रवाई करे के मांग घलो करीन।
प्रदेश भाजपा डहार ले घोषित कार्यक्रम के तहत आज राज्य क आने जिला मन म घलो ए मुद्दा ल लेके पार्टी कार्यकर्ता मन ह विरोध प्रदर्शन करीन अउ कथित शराब घोटाला म सामिल लोगन मनके खिलाफ कानूनी कार्रवाई करे जाय के मांग ल दोहराइन।
चावल घोटाला समिति
प्रदेश म करीबन छै हजार करोड़ रूपिया के कथित चाउंर घोटाला के जांच बर केंद्रीय खाद्य अउ नागरिक आपूर्ति मंत्रालय ह एक ठिन समिति गठित करके ओला कालिच छत्तीसगढ़ भेजे हे। ये टीम बारा मई तक प्रदेश के आने आने जगा म जाके कथित चाउंर घोटाला ले जुड़े तथ्य के जानकारी इकट्ठा करही अउ अपन रिपोर्ट केंद्र सरकार ल सौंपही।
हाईकोर्ट अवकाश
छत्तीसगढ़ उच्च न्यायालय म ग्रीष्मकालीन अवकाश घोषित कर दे गेहे। ये अवकाश पंद्रह मई ले नौ जून तक रीही। अदालत के सामान्य कार्यवाही बारह जून ले दुबारा शुरू होही। फेर ए बेरा अवकाशकालीन न्यायाधीश पुराना अउ जरूरी मामला के सुनवाई जारी रखही। ग्रीष्मकालीन अवकाश के दउरान दीवानी अउ फौजदारी प्रकरण के संगेसंग रिट याचिका दाखिल करे जा सकही।
सिंहदेव समीक्षा
स्वास्थ्य मंत्री टी.एस. सिंहदेव ह स्वास्थ्य अउ चिकित्सा शिक्षा विभाग म खाली पद म भर्ती के प्रक्रिया जल्दी ले जल्दी शुरू करे के निर्देश देहे। अपन विभाग के समीक्षा बइठका म श्री सिंहदेव ह कहिन कि अस्पताल अउ स्वास्थ्य केंद्र म मानव संसाधन के कमी ल दूरिहा करे बर खाली पद म भर्ती जल्दी करे जाय। ओमन अस्पताल म मरीज मन बर निर्बाध सेवा उपलब्ध कराय बर बजट के पूरा उपयोग करे बर कीहिन।
श्री सिंहदेव ह कांकेर, महासमुंद अउ कोरबा म मेडिकल कॉलेज अउ एखर ले जुड़े अस्पताल बर बनइया भवन के निर्माण जल्दी पूरा करे के निर्देश दीन। ओमन प्रदेश के जम्मों जिला अस्पताल मन म उपलब्ध सेवा के संगेसंग दवा अउ उपकरण खरीदे के समीक्षा घलो करीन।
वन विभाग भर्ती
वन विभाग डहार ले प्रदेश के आने आने वनमंडल के दू सौ इंक्यानबे खाली पद मन बर भर्ती प्रक्रिया शुरू होगे हे। पहिली चरण म राजनांदगांव, खैरागढ़, कवर्धा, महासमुंद, धमतरी, गरियाबंद, मुंगेली, रायगढ़, धरमजयगढ़, जांजगीर-चांपा अउ लोरमी म एक सौ इंक्यावन खाली पद मनके भर्ती बर शारीरिक अउ दक्षता परीक्षा बाईस मई ले शुरू होही। एमा पात्र अभ्यर्थी मनके रोल नंबर विभाग के वेबसाइट म जल्दीच उपलब्ध कराय जाही। अभ्यर्थी ए वेबसाइट के जरिया ले अपन प्रवेश पत्र तेरा मई ले डाउनलोड कर सकही।
शहीद जवान कीर्ति चक्र
सक्ती जिला के पिहरीद गांव के शहीद उप निरीक्षक दीपक भारद्वाज ल मरणोपरांत सर्वोच्च सम्मान कीर्ति चक्र ले सम्मानित करे गीस। नई दिल्ली के राष्ट्रपति भवन म राखे गे समारोह म राष्ट्रपति द्रौपदी मुर्मू ह शहीद दीपक भारद्वाज के पत्नी प्रांतिका भरद्वाज अउ मां परमेश्वरी भारद्वाज ल कीर्ति चक्र प्रदान करीन। शहीद दीपक भारद्वाज ल कीर्ति चक्र सम्मान मिले म उंखर क्षेत्र के लोगन मन खुसी जतावत कीहिन कि माओवादी मनले संघर्ष करत शहीद होवइया दीपक भारद्वाज ल ये सम्मान मिलना उंखर बर सच्ची श्रद्धांललि हवय।
खबर के मुताबिक बछर दू हजार इक्कीस म तीन अप्रैल के बस्तर क्षेत्र म माओवादी मन संग मुठभेड़ के बेरा उप निरीक्षक दीपक भारद्वाज शहीद होगे रीहिस।
भाजपा बैठक
प्रदेश भाजपा के आईटी अउ सोशल मीडिया प्रकोष्ठ के एक दिवसीय कार्यशाला आज देवपुरी स्थित प्रदेश कार्यालय म राखे गीस। कार्यशाला ल संबोधित करत भाजपा आईटी अउ सोशल मीडिया प्रकोष्ठ के राष्ट्रीय संयोजक अमित मालवीय ह कहिन कि वर्तमान बेरा म सोशल मीडिया म अवइया सूचना के वास्तविकता ल परखे के बादेच ओेखर उपर कार्रवाई करना चाही। नही त आधारहीन अउ तथ्यहीन खबर के सेती आम लोगन म भ्रम के स्थिति पैदा हो जाथे।
बइठका म प्रदेश भाजपा अध्यक्ष अरूण साव अउ प्रदेश के संगठन महामंत्री पवन साय सहित आने आने पदाधिकारी मन सामिल होइन।
तेंदूपत्ता संग्रहण
प्रदेस म चालू वित्त बछर के दउरान अब तक तीन लाख उन्नीस हजार मानक बोरा तेंदूपत्ता के संग्रहण हो चुके हे, जउन ह निर्धारित लक्ष्य के एक चौथाई हिस्सा के करीब हे। खबर के मुताबिक राज्य म चालू वित्त बछर के दउरान सोला लाख बहत्तर हजार मानक बोरा तेंदूपत्ता संग्रहण के लक्ष्य राखे गेहे। वन विभाग के प्रधान मुख्य वन संरक्षक व्ही. श्रीनिवास राव ह बताईन कि दतेवाड़ा अउ जगदलपुर वनमंडल म सबले जादा करीबन अस्सी प्रतिशत तेंदूपŸा के संग्रहण होय हे।
राजस्व प्रकरण शिविर
रायपुर के कलेक्टर डॅाक्टर सर्वेश्वर नरेंद्र भुरे ह जिला म राजस्व प्रकरण के निराकरण बर तहसील कार्यालय म शिविर लगाये के निर्देश दीन हे। एखर तहत पहिली शिविर रायपुर के तहसील कार्यालय म तेरा मई के अउ दूसर शिविर धरसींवा म अठारह मई के लगाये जाही। ए शिविर म जमीन के नामांतरण अउ सीमांकन के संगेसंग जाति अउ आय प्रमाण पत्र समेत आने दस्तावेज ले जुड़े प्रकरण के निराकरण करे जाही।