राज्यपाल विश्वभूषण हरिचंदन आज महासमुंद जिला के आदिवासी बहुल बांसकुड़ा गांव पहुंचीन अउ उहां गांव वाले मन ले मिलके ओमन ल मिलत मूलभूत सुविधा अउ आर्थिक स्थिति के बारे म चर्चा करीन। ओमन बतईन कि केन्द्र अउ राज्य सरकार डहार ले समाज के गरीब अउ वंचित वर्ग के लोगन बर कतकोन योजना संचालित करे जात हे। ग्रामीन मन एखर लाभ लेना चाही। राज्यपाल ह यहू कहिन कि जिला कलेक्टर अउ आने अधिकारी ए सुनिश्चित करय कि योजना के लाभ आम लोगन तक पहुंचे।
राज्यपाल ह बांसकुड़ा गांव म कमार जनजाति परिवार अउ स्व-सहायता समूह के माईलोगिन मन ले घलो भेंट करीन। ओमन बिहान महिला स्व-सहायता समूह डहार ले लगाय गे स्टॉल मनके अवलोकन करीन। राज्यपाल ले चर्चा करत माईलोगिन मन ह बांस, माटी अउ टेराकोटा शिल्प ले बनाय गे जिनीस के बारे म जानकारी दीन। ए मउका म राज्यपाल ह कमार जनजाति के किसान, माईलोगिन अउ दिव्यांगजन ल जरूरत के सामान बांटीन।
ईडी-कार्रवाई
प्रवर्तन निदेशालय-ईडी ह प्रदेस म सराब घोटाला म दू हजार करोड़ रूपिया के भ्रष्टाचार अउ मनी लॉन्ड्रिंग के मामला म आज राजधानी रईपुर संग भिलाई म करीब छह ले जादा जघा मन म छापामार कार्रवाई करीन। बताय जात हे कि आज हवाला कारोबार ले जुड़े लोगन के इहां ईडी के टीम जांच बर पहुंचीन। रईपुर के सदर बाजार अउ शैलेन्द्र नगर म एक झिन कारोबारी के इहां छापा मारे गीस।
खबर के मुताबिक ईडी ह धन शोधन निवारण अधिनियम-पी.एम.एल.ए. के प्रावधान के तहत घोटाला के कथित मास्टर माइंड कारोबारी अनवर ढेबर ल पहिली ले ही गिरफ्तार कर ले गेहे। अनवर ढेबर ले पूछताछ म जउन जानकारी सामने आय हे, ओखर आधार म आज ईडी ह जांच ल आगू बढ़ात ए मामला ले जुड़े आने लोगन के इहां छापा मारीस।
इही बीच, ईडी ह कोल परिवहन म कथित लेवी अउ सराब म मनी लॉन्ड्रिंग के मामला म इंक्यावन करोड़ रूपिया ले जादा के संपत्ति अटैच कर लेहे। एमा अचल संपत्ति, महंगा कार, सोना-चांदी अउ नगद रासि सामिल हे। जउन लोगन के संपत्ति अटैच करे गेहे, ओमा कांग्रेस के दू विधायक देवेन्द्र यादव अउ चंद्रदेव राय, आईएएस अधिकारी रानू साहू, अउ कारोबारी सूर्यकांत तिवारी सामिल हे। ईडी ह सोशल मीडिया के माध्यम ले ए जानकारी देहे।
दुर्घटना
बस्तर जिला के किलेपाल म आज होय सड़क हादसा म तीन झिन माईलोगिन के मउत होगे। उहें, चार आने लोगन घायल होगे हे।
बताय जात हे कि बीजापुर ले एक परिवार बिहाव समारोह म सामिल होय बर जगदलपुर जात रिहीन। ए दउरान किलेपाल के तीर चालक ह अचानक ही अपन नियंत्रण खो दीस अउ ओखर वाहन अनियंत्रित होके पेड़ ले टकरा गे। इही बीच, वाहन के टायर घलो फट गे अउ हादसा इतना जबरदस्त रिहीस कि गाड़ी दू से तीन बार पलट गे। घटना के सूचना मिलते ही स्थानीय लोगन ह मउका म पहुंच के वाहन म सवार सात लोगन ल कोनों तरह गाड़ी के बाहिर निकालीन। एमा ले तीन माईलोगिन के मउका म ही मउत होगे। उहें, गंभीर रूप ले घायल वाहन चालक ल रईपुर रिफर करे गेहे।
मुंगेली-हत्या
मुंगेली जिला के चिल्फी थाना क्षेत्र म स्थित इलचपुर गांव म आज तीन झिन बहिनी मन उपर एक झिन युवक ह धारदार हथियार ले हमला कर दीस, एमा ले एक झिन माईलोगिन के मउत होगे। उहें, दू झन आने युवती मन गंभीर रूप ले घायल हे। ए मामला म पुलिस ह तीन झिन माईलोगिन संग सात संदिग्ध लोगन ल हिरासत म लेहे।
पंचायत सचिव-हड़ताल खत्म
प्रदेस पंचायत सचिव संघ ह आज ले अपन अनिश्चितकालीन हड़ताल स्थगित करे के ऐलान करे हे। ए पंचायत सचिव बीते करीबन दू महीना ले अपन एक सूत्रीय मांग ल लेके आंदोलन करत रिहीन। आज मंझनिया बाद पंचायत संघ डहार ले जारी एक ठिन बयान म राज्य सरकार उपर भरोसा जतावत हड़ताल खतम करे के घोसना करे गीस। संघ के प्रदेस अध्यक्ष तुलसी साहू ह बतईन कि परिवीक्षा के अवधि के बाद सासकीयकरण के मांग ल लेके पाछु सोलह मार्च ले राज्य के एक सौ छियालीस ब्लॉक मन म हड़ताल करे जात रिहीस। ओमन बतईन कि स्थानीय विधायक के पहले ले मिले आश्वासन के आधार म हड़ताल खतम करे के निर्णय ले गेहे।
स्कॉच सिल्वर अवॉर्ड
राज्य के उच्च सिक्षा विभाग ल ‘‘प्रोजेक्ट असेसमेंट एंड एक्रे-डिटेशन‘‘ बर ‘‘स्कॉच सिल्वर अवॉर्ड‘‘ दे गेहे। विभाग ल ए अवॉर्ड देस के कतकोन बड़का अउ महत्वपूर्ण प्रोजेक्ट के संग प्रतियोगिता करत कतकोन चरण के प्रस्तुतिकरण, वोटिंग अउ उपलब्धि के आधार म दे गेहे। एखर बर मुख्यमंत्री भूपेश बघेल अउ उच्च सिक्षा मंत्री उमेश पटेल ह विभाग के अधिकारी अउ कर्मचारी मन ल बधाई अउ सुभकामना देहे। श्री पटेल ह कहिन कि उच्च सिक्षा के स्तर ल सुधारे बर करे गे प्रयास के सेती राष्ट्रीय स्तर म ए अवॉर्ड दे गेहे। ओमन बतईन कि छत्तीसगढ़ के सबो महाविद्यालय ल नैक एक्रे-डिटेशन म लाय बर मिशन मोड म काम करे जात हे।
राष्ट्रीय विधिक सेवा प्राधिकरण नई दिल्ली के निरदेस म प्रदेस म अवइया तेरह मई के राष्ट्रीय लोक अदालत के आयोजन करे जाही। एमा बैंक, बीमा, फाइनेंस, बीएसएनएल, विद्युत विभाग समेत नगर पालिका अउ आने-आने राजीनामा योग्य प्रकरण म पक्षकार मनके आपसी सहमति ले जुड़े मामला के निराकरण करे जाही। ए राष्ट्रीय लोक अदालत पक्षकार मनके भौतिक अउ वर्चुअल दूनों ही माध्यम ले उंखर उपस्थिति म निराकृत करे जाही।
वन मंत्री-सड़क भूमिपूजन
वन मंत्री मोहम्मद अकबर ह कवर्धा विधानसभा क्षेत्र बर तीन करोड़ अटहत्तर लाख रूपिया के लागत ले पांच सड़क के नवीनीकरण काम के भूमिपूजन करीन। ए मउका म वन मंत्री ह उम्मीद जताय हे कि ए रद्दा मनके नवीनीकरण ले वनांचल क्षेत्र मन म यातायात सुगम अउ सरल होही। ओमन बतईन कि एक गांव ले दूसर गांव ल जोड़े बर पुल-पुलिया अउ सीसी रोड के निर्माण घलो करे जात हे।
बोर्ड परीक्षा-परिणाम
छत्तीसगढ़ माध्यमिक शिक्षा मंडल डहार ले आयोजित दसवीं अउ बारहवीं बोर्ड परीक्षा के परिणाम काली घोषित करे जाही। मंडल डहार ले जारी एक ठिन विज्ञप्ति म बताय गेहे कि स्कूल सिक्षा मंत्री डॉक्टर प्रेमसाय सिंह टेकाम डहार ले काली मंझनिया बारह बजे मंडल कार्यालय ले नतीजा घोषित करे जाही। मंडल के वेबसाइट म दसवीं अउ बारहवीं कक्षा के परिणाम देखे जा सकत हे।
खबर के मुताबिक ए बखत राज्य के करीबन सात लाख विद्यार्थी ए परीक्षा मन म सामिल होय हे।
प्रधानमंत्री आवास योजना-बैठक
प्रधानमंत्री आवास योजना-शहरी म स्वयं आवास निर्माण के तहत प्रदेस म स्वीकृत दू लाख बाईस हजार ले जादा मकान म ले अब तक करीबन एक लाख आठ हजार मकान मनके निर्माण काम पूरा कर ले गेहे। ए जानकारी मुख्य सचिव अमिताभ जैन के अध्यक्षता म मंत्रालय म योजना के तहत गठित राज्य स्तरीय स्वीकृति अउ निगरानी समिति के बइठका म दे गीस। बइठका म यहू बताय गीस कि भागीदारी म किफायती आवास निर्माण के तहत चालीस हजार ले जादा मकान मनके निर्माण ल घलो मंजूरी दे गेहे।
कोरोना समाचार
प्रदेस म कोरोना संक्रमण के मामला म सरलग गिरावट दर्ज करे जात हे। राज्य म अब पॉजिटिविटी दर घटके दू दशमलव आठ-तीन प्रतिसत रहि गेहे। उहें, पाछु हफ्ता संक्रमण दर पांच प्रतिसत के पार होगे रिहीस। काली राज्य म तीन हजार चार सौ ले जादा सैंपल के जांच म अंठानवे मनखे कोरोना संक्रमित पाय गीस। ए बखत प्रदेस म सात सौ नब्बे सक्रिय मरीज हे। मुंगेली अउ कोंडागांव जिला म कोरोना संक्रमण के एको मामला नइ हे। स्वास्थ्य विभाग के संक्रमण के लक्षण वाले लोगन ल तत्काल कोरोना जांच कराय के अपील करे हे।