मुख्यमंत्री भूपेश बघेल ह आज भेंट-मुलाकात कार्यक्रम के तहत मुंगेली जिला के लोरमी विधानसभा क्षेत्र के ग्राम खुड़िया म तेरह करोड़ इकहत्तर लाख रूपिया ले जादा के अलग-अलग विकास कार्य मनके लोकार्पण अउ भूमिपूजन करीन। ए मउका म मुख्यमंत्री ह क्षेत्र के विकास बर कई महत्वपूर्ण घोषणा करीन। एमा नगर पंचायत लोरमी ल नगर पालिका, ग्राम गोडखाम्ही ल नगर पंचायत, डिंडोरी ल उप-तहसील अउ खुड़िया ल राजस्व ग्राम बनाय के संगेसंग खुड़िया ल पर्यटन स्थल के रूप म विकसित करे, लोरमी म इंडोर स्टेडियम बर एक करोड़ रूपिया दे अउ नौरंगपुर म विद्युत सब-स्टेसन के स्थापना सामिल हे।
भाजयुमो-आंदोलन
भारतीय जनता युवा मोर्चा-भाजयुमो के कार्यकर्ता मन आज राजधानी रायपुर समेत प्रदेस के अलग-अलग जिला म रोजगार अउ बेरोजगारी भत्ता ल लेके रोजगार कार्यालय के आगू म प्रदर्सन करीन। रायपुर म अंबेडकर चौक करा भाजयुमो के कार्यकर्ता एकत्रित होइन अउ पुराना पुलिस मुख्यालय स्थित जिला रोजगार कार्यालय के घेराव करे के कोसिस करीन।
उहें, सक्ती जिला म घलो भाजयुमो कार्यकर्ता मन बेरोजगारी भत्ता ल लेके प्रदर्सन करीन। इही दौरान मालखरौदा एसडीएम कार्यालय के घेराव करे बर निकले कार्यकर्ता मन ल पुलिस ह रास्ता म ही रोक दीन। ए दौरान कार्यकर्ता अउ पुलिस के बीच झूमाझटकी घलो होइस। बाद म भाजयुमो डहार ले एसडीएम ल ज्ञापन सौंपे गीस। प्रदर्सन म भाजयुमो के राष्ट्रीय उपाध्यक्ष अनूप शाह, प्रदेस सह-प्रभारी दीप ज्योति मुंड अउ भाजपा के जिला अध्यक्ष कृष्णकांत चंद्रा घलो सामिल होइन।
विश्व रेडक्रॉस दिवस
आज विश्व रेडक्रॉस दिवस आय। ए अवसर म राजभवन म राज्यपाल विश्वभूषण हरिचंदन के अध्यक्षता म कार्यक्रम के आयोजन करे गीस। कार्यक्रम म प्रधानमंत्री टीबी मुक्त भारत अभियान के तहत सक्रिय रूप ले काम करइया नि-क्षय मित्र अउ जिलाधीश मन ल सम्मानित करे गीस। ए दौरान रक्तदान शिविर के आयोजन के संगेसंग रेडक्रॉस सोसायटी छत्तीसगढ़ के वेबसाइड के लोकार्पण घलो करे गीस। कार्यक्रम ल संबोधित करत हुए राज्यपाल ह किहीन कि रेडक्रॉस सोसायटी द्वारा मानवता के सेवा बर महत्वपूर्ण काम करे जात हे।
उहें, मुख्यमंत्री भूपेश बघेल ह विश्व रेडक्रॉस दिवस म सबो रेडक्रॉस वॉलेंटियर्स ल बधाई अउ सुभकामना दीन।
श्रमिक-वेतन दर
छत्तीसगढ़ म श्रम आयुक्त ह लेबर ब्यूरो शिमला डहार ले जारी उपभोक्ता मूल्य सूचकांक के आधार म अलग-अलग अनुसूचित नियोजन म कार्यरत् श्रमिक मन बर ये बछर एक अप्रैल ले तीस सितंबर तक बर न्यूनतम वेतन दर निर्धारित करे हे। एमा पैंतालीस अनुसूचित, सामान्य नियोजन बर प्रतिदिन बीस रूपिया अउ प्रतिमाह दू सौ साठ रूपिया के वृद्धि करे गेहे। कृषि नियोजन म कार्य करइया श्रमिक मन बर दू सौ पच्चीस रूपिया प्रतिमाह अउ अगरबत्ती उद्योग म नियोजित श्रमिक मन बर प्रति एक हजार अगरबत्ती बर पांच रूपिया पच्चीस पइसा के बढ़ोतरी करे गेहे। श्रम आयुक्त ह बतईन कि एक अप्रैल ले प्रभावसील ए न्यूनतम वेतनदर श्रम विभाग के वेबसाइट म घलो उपलब्ध हे।
भाजपा-आरोप
छत्तीसगढ़ म करीब दू हजार करोड़ रूपिया के कथित सराब घोटाला ल लेके भारतीय जनता पार्टी के प्रदेस अध्यक्ष अरूण साव ह किहीन कि ए घोटाला ले छत्तीसगढ़ शर्मसार होय हे। ओमन आरोप लगईन कि राज्य के कांग्रेस सरकार ह सराब बंदी के वादा कर जनादेश हासिल करे रिहीस। आज उही सराब ल लेके घोटाला सामने आय हे। प्रदेस अध्यक्ष ह मांग करे हे कि घोटाला ले जुड़े सबो मामला एम.पी.-एम.एल.ए. कोर्ट म चलय अउ एखर सुनवाई फास्ट ट्रैक म होवय। ओमन किहीन कि अगर प्रदेस के मुख्यमंत्री इस्तीफा नइ दीही, त ए सबो मामला के सुनवाई प्रदेस ले बाहिर करत हुए एखर उपर जल्द फइसला ले जाय। श्री साव ह यहू किहीन कि राज्य के कांग्रेस सरकार ल सत्ता म बने रेहे के कोई अधिकार नइ हे।
उहें, भाजपा महिला मोर्चा डहार ले आज संभाग मुख्यालय मन म प्रदर्सन कर मुख्यमंत्री अउ आबकारी मंत्री ले इस्तीफा के मांग करे गीस। ए मामला ल लेके काली जिला स्तर म घलो कार्यक्रम आयोजित करे जाही।
दूसरइया डहार मुख्यमंत्री भूपेश बघेल ह ईडी डहार ले प्रदेस म करीब दू हजार करोड़ रूपिया के सराब घोटाला के आरोप लगाय जाय उपर किहीन कि सराब घोटाला के बात मिथ्या हे। श्री बघेल ह आरोप लगईन कि ईडी के जरिया छत्तीसगढ़ सरकार ल बदनाम करे के कोसिस करे जात हे।
माओवादी-मुठभेड़
सुकमा जिला के भेज्जी थाना क्षेत्र म आज बिहनिया सुरक्षा बल के संग होय मुठभेड़ म एक झन महिला सहित दू झिन माओवादी मारे गेहे, जेखर सव ल बरामद कर ले गेहे। एमा ले एक झन माओवादी उपर आठ लाख रूपिया के इनाम घोसित रिहीस।
हमर संवाददाता ह बतईन कि दंतेशपुरम के जंगल म माओवादी मनके मौजूद होय के सूचना मिले म डीआरजी, कोबरा बटालियन अउ सीआरपीएफ के संयुक्त टीम अलग-अलग जगह ले रवाना होय रिहीन। सर्चिंग ऑपरेसन के बाद जब ए जवान वापस लहुटत रिहीन। इही दउरान आज बिहनिया माओवादी मन ह डीआरजी के जवान मन उपर फायरिंग सुरू कर दीन। जवान मन डहार ले एखर जवाबी कार्रवाई के दौरान माओवादी मन जंगल के फायदा उठा के भाग गीन। घटनास्थल के तलाशी के दौरान दू झिन माओवादी मनके सव के अलावा बड़ मात्रा म हथियार अउ माओवादी सामग्री बरामद होय हे।
विधानसभा चुनाव-तैयारी
छत्तीसगढ़ म आगामी विधानसभा चुनाव ल लेके तैयारी तेज होगे हे। इही कड़ी म जिला स्तर म निर्वाचन ले जुड़े काम मनके लगातार समीक्षा करे जात हे। कोरिया जिला म कलेक्टर अउ जिला निर्वाचन अधिकारी विनय कुमार लंगेह के अध्यक्षता म जिला स्वीप कोर समिति के बइठका होइस। बइठका म कलेक्टर ह आगामी विधानसभा चुनाव बर मतदान जागरूकता, मतदाता सूची म नाम जुड़वाय अउ विलोपित करे के संबंध म आवश्यक दिसा-निर्देश दीन। संगेसंग ओमन अधिकारी मन ल स्वीप कैलेंडर अनुसार मतदाता जागरूकता कार्यक्रम आयोजित करे बर घलो किहीन।
गौरतलब हे कि प्रदेस म ए बछर विधानसभा चुनाव अक्टूबर ले दिसंबर महीना के बीच होना संभावित हे।
मलखंभ
नारायणपुर जिला के तीन झिन खिलाड़ी- संतोष सोरी, जयंती कचलम अउ संताय पोटाई के चयन राष्ट्रीय मलखंभ टीम म होय हे। ए खिलाड़ी मन भूटान म आगामी नौ ले बारह मई तक होवइया विश्व मलखंभ चैंपियनशिप म हिस्सा लीहीं। ए चैंपियनशिप म तीस ठन देस के दू सौ ले जादा खिलाड़ी मन सामिल होही। मलखंभ कोच मनोज प्रसाद ह बतईन कि छत्तीसगढ़ के मलखंभ खिलाड़ी मन पहिली बार अंतर्राष्ट्रीय स्तर म विश्व चैंपियनशिप जइसे प्रतियोगिता म सामिल होवत हें।
अउ अब थोरकुन समाचार सार म-
– बीजापुर जिला के उसूर ब्लॉक के अंतर्गत ग्राम पोलमपल्ली म आकाशीय बिजली गिरे ले एक झिन के मौत होगे। उहें, इक्कीस झन झुलस गे, जेमा ले पांच झिन के हालत गंभीर बने हुए हे।
– बेमेतरा जिला म नवागढ़ जनपद पंचायत के अध्यक्ष अंजली मारकंडे के खिलाफ लाय गे अविश्वास प्रस्ताव ध्वस्त होगे हे। प्रस्ताव के विपक्ष म पन्द्रह अउ पक्ष म नौ ठन वोट पड़े हे।
– महासमुंद जिला म सांकरा थाना क्षेत्र के ग्राम भगतदेवरी करा सड़क तीर पंचर बनाय बर ट्रक के टायर निकालत चालक अउ परिचालक ल एक ठन दूसर ट्रक ह अपन चपेट म ले लीस, जेखर ले दूनो झन के मउका म ही मउत होगे।
– दुरूग जिला म जेवरा-सिरसा चौकी अंतर्गत एक ठन फैक्ट्री म आग लगे ले कबाड़ समेत दूसर सामग्री मन जलके राख होगे। ए आगजनी म लगभग पच्यासी लाख रूपिया के क्षति होय के अनुमान हे।
अउ
– रायगढ़ जिला म साइबर सेल, कोतवाली थाना अउ जूट मिल पुलिस ह गांजा तस्करी के दू अलग-अलग मामला म एक झन महिला समेत तीन झिन आरोपी मन ल गिरफ्तार कर उंखर करा ले पैंतालीस किलो गांजा जब्त करे हे। जब्त गांजा के कीमत करीब साढ़े चार लाख रूपिया बताय गेहे।