प्रदेस म स्कूल सिक्षा विभाग डहार ले सिक्षक मनके बारह हजार चार सौ नवासी पद म भर्ती करे जाही। एमा सहायक सिक्षक के छह हजार दू सौ पच्यासी, सिक्षक के पांच हजार सात सौ बहत्तर अउ व्याख्याता के चार सौ बत्तीस पद सामिल हरय। एखर बर विभाग ह विज्ञापन जारी कर देहे। आवेदन पत्र छत्तीसगढ़ व्यावसायिक परीक्षा मंडल के वेबसाइट म काली छह मई ले ऑनलाइन भरे जा सकही। ए पद म भर्ती बर परीक्षा व्यापमं कोति ले ले जाही। जेखर तारीख अलग ले जारी करे जाही। सिक्षक के भर्ती बस्तर अउ सरगुजा संभाग म करे जाही। एखर बर प्रदेस के जम्मों जिला के उम्मीदवार आवेदन कर सकत हे। फेर, नियुक्ति इही दू संभाग म करे जाही।
बतादन कि उच्चतम न्यायालय डहार ले अंठावन प्रतिसत आरक्षण के बारे म फइसला देके बाद छत्तीसगढ़ म आने-आने विभाग म नियुक्ति अउ चयन संबंधी प्रक्रिया सुरू कर दे गेहे।
रावघाट-जगदलपुर रेललाइन
एक सौ चालीस किलोमीटर लंबा रावघाट-जगदलपुर रेललाइन के निर्माण काम जल्दी सुरू करे जाही। ए बात रेल मंत्री अश्वनी वैष्णव ह काली नई दिल्ली म भाजपा के प्रदेस प्रभारी ओम माथुर, सांसद संतोष पांडेय अउ प्रदेस महामंत्री केदार कश्यप ले मुलाकात के दउरान किहीन। श्री वैष्णव ह एखर विस्तृत परियोजना प्रतिवेदन-डीपीआर अवइया जुलाई महीना तक करे के आश्वासन दीन।
नेता प्रतिपक्ष-पत्र
नेता प्रतिपक्ष नारायण चंदेल ह प्रदेस म बेमौसम बारिस के सेती किसान मनके फसल ल होय नुकसान बर राज्य सरकार ले मुआवजा देके मांग करीन हे। ए संबंध म श्री चंदेल ह मुख्यमंत्री भूपेश बघेल अउ कृषि मंत्री रविन्द्र चौबे ल पत्र लिखे हे। ओमन किहीन कि हाले म होय बे-मौसम बारिस अउ ओलावृष्टि के सेती कई किसान मनके रबी फसल के संघरा साग-भाजी मन ल घलो काफी नुकसान पहुंचे हे। ओमन राज्य सरकार ले किसान मन होय नुकसान के आंकलन करके तुरते मुआवजा रासि प्रदान करे के मांग करीन हे।
बातों-बातों में
आकाशवाणी केंद्र रायपुर ले हर शनिचर के प्रसारित होवइया समसामयिक विषय म आधारित साप्ताहिक कार्यक्रम ‘‘बातों-बातों-में‘‘ के तहत ए बखत आई.आर.सी.टी.सी. डहार ले 25 मई ले चलाय जाने वाला ‘‘दक्षिण दर्शन शुभ यात्रा‘‘ रेल सेवा म विशेष भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र ले काली छह मई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
माओवादी-घटना-गिरफ्तार
दंतेवाड़ा जिला के अरनपुर थाना क्षेत्र म पाछु दिन होय माओवादी घटना के बाद पुलिस ह चार संदिग्ध लोगन मन ल गिरफ्तार करे हे। पुलिस अधीक्षक सिद्धार्थ तिवारी ह बतईन कि अरनपुर घटना के बाद आसपास के इलाका म सर्चिंग करे जात हे। एखर तहत आज एक नाबालिग समेत चार संदिग्ध लोगन मन ल गिरफ्तार करे गेहे। ए लोगन मन ले पूछताछ करे जात हे।
बतादन कि दंतेवाड़ा जिला म पाछु छब्बीस अप्रैल के माओवादी मन डहार ले करे गे आईईडी विस्फोट म डीआरजी के दस जवान अउ एक वाहन चालक सहीद होगे रिहीन।
युवा वैज्ञानिक सम्मेलन
छत्तीसगढ़ विज्ञान अउ प्रौद्योगिकी परिषद अउ पंडित रविशंकर शुक्ल विश्वविद्यालय के संयुक्त तत्वावधान म रईपुर के पंडित दीनदयाल उपाध्याय सभागार म दू दिन के अटठारहवां युवा वैज्ञानिक सम्मेलन के आयोजन करे गीस। सम्मेलन के समापन अवसर म उन्नीस चिन्हित बिसय म युवा वैज्ञानिक मन ल यंग साइंटिस्ट अवॉर्ड प्रदान करे गीस। साइंटिस्ट अवॉर्ड ले सम्मानित ए युवा वैज्ञानिक मन ल कोनों राष्ट्रीय प्रयोगशाला, राष्ट्रीय अनुसंधान केन्द्र अउ विश्वविद्यालय म सोध कार्य बर अवसर प्रदान करे जाही।
राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली के निरदेस म प्रदेस म अवइया तेरह मई के राष्ट्रीय लोक अदालत के आयोजन करे जाही। एमा बैंक, बीमा, फाइनेंस, बीएसएनएल, विद्युत विभाग समेत नगर पालिका अउ दूसर राजीनामा योग्य प्रकरण म पक्षकार मनके आपसी सहमति ले जुड़े मामला मनके निराकरण करे जाही। ए राष्ट्रीय लोक अदालत पक्षकार के भौतिक अउ वर्चुअल दूनों माध्म ले उंखर उपस्थिति म निराकृत करे जाही। ए संबंध म जिला अउ सत्र न्यायाधीश संतोष शर्मा ह न्यायाधीश, जिला के न्यायिक अधिकारी, कलेक्टर, पुलिस अधीक्षक, बैंक अउ बीमा समेत आने-आने विभाग के अधिकारी मनके बइठका लीन।
बुद्ध पूर्णिमा
आज बुद्ध पूर्णिमा मनाय जात हे। आजे के दिन गौतम बुद्ध के जनम होय रिहीस, ओमन ज्ञान पाय रिहीन अउ आजे के दिन उंखर परिनिर्वाण होय रिहीस। संयुक्त राष्ट्र बछर उन्नीस सौ निन्यानवे ले आजे के दिन ल संयुक्त राष्ट्र बैसाख दिवस के रूप म मनाथे। ए मउका म देस के आने-आने जघा म कई ठिन कारीकरम राखे जात हे।
राष्ट्रपति द्रौपदी मुर्मु, उपराष्ट्रपति जगदीप धनखड़, प्रधानमंत्री नरेन्द्र मोदी अउ लोकसभा अध्यक्ष ओम बिरला ह देसवासी मन ल बुद्ध पूर्णिमा के बधाई दीन हे। उहें, छत्तीसगढ़ के राज्यपाल विश्वभूषण हरिचंदन अउ मुख्यमंत्री भूपेश बघेल ह घलो प्रदेसवासी मन ल बुद्ध पूर्णिमा के सुभकामना दीन हे।
बिलासपुर जेल-प्रोजेक्ट खुशी
जेल म निरूद्ध महिला बंदी अउ ओमन के लइका मन बर छत्तीसगढ़ राज्य विधिक सेवा प्राधिकरण अउ रोटरी क्लब बिलासपुर डहार ले जेल म ‘‘प्रोजेक्ट खुशी‘‘ कार्यक्रम चलाय जाही। एखर अंतर्गत छह अउ सात मई के जेल म निरूद्ध महिला मन बर योगा, मेडिटेशन, मेहंदी प्रशिक्षण, ड्राईंग, गायन, फैंसी ड्रेस, नृत्य अउ नुक्कड़ नाटक समेत आने-आने कार्यक्रम अउ प्रतियोगिता आयोजित करे जाही। उहें, बंदी महिला मनके लइका मन बर घलो आने-आने खेलकूद स्पर्धा के आयोजन करे जाही। कार्यक्रम के दउरान महिला मन ल सिलाई मसीन के संघरा लइका मन ल खेल के सामान बांटे जाही।
एम्स-आईआईटी भिलाई
अखिल भारतीय आयुर्विज्ञान संस्थान-एम्स रईपुर अउ आई.आई.टी. भिलाई म कैंसर बर बायोसेंसर विकसित करे, आने-आने अस्थि रोग म बउरे जाने वाला इंप्लांट्स, एंटी बायोटिक कैरियर अउ टेलीमेडिसिन समेत आने-आने चिकित्सा विभाग के दैनिक काम म मदद के सेती सॉफ्टवेयर तैयार करे जाही। एखरे संग ए दूनों संस्थान मिलके एम.टेक. (बायो इंजीनियरिंग) अउ पीएचडी (बायो साईंस एंड बायो मेडिकल इंजीनियरिंग) बर पाठ्यक्रम घलो सुरू करही। राष्ट्रीय महत्व के दूनों संस्थान ह कुछ समय पहिली सोध अउ अनुसंधान बर एमओयू म हस्ताक्षर करे रिहीन। एमा एम्स के चिकित्सक शैक्षणिक सहायता के संगेसंग आने-आने लैब म प्रयोग के सुविधा आईआईटी भिलाई के छात्र मन ल प्रदान करही।
एम्स रईपुर के निदेशक प्रोफेसर डॉक्टर नितिन एम. नागरकर अउ आईआईटी भिलाई के निदेशक प्रोफेसर राजीव प्रकाश ह दूनों संस्थान के सिक्षक अउ छात्र मन ले आह्वान करीन हे कि ओमन मिलके छत्तीसगढ़ ल नवोन्मेष के केन्द्र बनावय, जेखर लाभ रोगी मन ल मिल सकय।
मुख्य सचिव-उद्यानिकी फसल
प्रदेस म उद्यानिकी फसल ल प्रोत्साहित करे बर किसान मन ल सहकारी बैंक के माध्यम ले ऋण वितरित करे जाही। ए संबंध म मुख्य सचिव अमिताभ जैन ह अधिकारी मन ल प्रदेस के किसान मन ल जादा ले जादा ऋण उपलब्ध कराय के निरदेस दीन हे। श्री जैन काली मंत्रालय म सहकारिता, वाणिज्यिक कर, योजना, आर्थिक अउ सांख्यिकी विभाग मनके समीक्षा करीन। बइठका म सहकारी बैंक म एटीएम सेवा के विस्तार, प्राथमिक सहकारी समिति म कम्प्यूटरीकरण अउ गोदाम निर्माण के जानकारी ले गीस। उहें, बस्तर अउ सरगुजा म सहकारी बैंकिंग सुविधा, वनाधिकार पट्टाधारी किसान मन ल ऋण वितरण समेत उद्यानिकी फसल मनके खेती बर सून्य प्रतिसत ब्याज दर म अल्पकालीन ऋण वितरण समेत आकांक्षी जिला अउ आकांक्षी विकासखंड कार्यक्रम के स्थिति के घलो समीक्षा करे गीस।
जल संरक्षण अभियान
जल संरक्षण अउ संवर्धन ल लेके ए दिन म रायगढ़ जिला म बिसेस अभियान चलाय जात हे। एखर तहत केलो नदी के तट ले लगे गांव मन म तालाब मन ल गहरा करे जात हे। संघरा पंचायत म जागरूकता अभियान चलाके लोगन मन ल पानी बचाय अउ उंखर विवेकपूर्ण उपयोग के सपथ दिलाय जात हे।