धमतरी अउ बालोद के सीमा म जगतरा गांव के तीर पाछू रतिहा होय दुर्घटना म ग्यारा झिन मनखे मनके मउत होगे।
बालोद जिला के पुलिस अधीक्षक डॅाक्टर जितेंद्र यादव ह बताइन कि राष्ट्रीय राजमार्ग क्रमांक-तीस म ट्रक अउ एक आने गाड़ी के संग टक्कर होगे । ए हादसा म गाड़ी म बइठे एके परिवार के दस झिन लोगन मन संग एक झिन ड्रायवार के मउत होगे। उंहे गंभीर रूप ले घायल एक झिन लईका ल काली देर रतिहा रायपुर के एक निजी अस्पताल म भर्ती कराय गे रीहिस। आज बीहनिया ए लईका के घलो मउत होगे। पुलिस अधीक्षक ह बताइन कि धमतरी जिला के सोरम गांव के निवासी साहू परिवार के ये जम्मों सदस्य बिहाव म सामिल होय बर मारकाटोला गे रीहिस हे। उंहा ले लहुटत बेरा रात के ये दुर्घटना होइस। ओमन बताइन कि घटना के बाद फरार होय ट्रक ड्रायवर के खिलाफ दर्ज मामला के जांच करे जात हे।
मुख्यमंत्री भूपेश बघेल ह ए दुर्घटना उपर गहरा दुख जतात मृतक के परिवार वाले मन ल चार-चार लाख रूपिया के आर्थिक मदद देके घोषणा करीन हे।
कोरबा जिला के देवरमाल गांव म हंसदेव नदिया म डूबे ले दू झिन सगे भाई-बहिनी के मउत होगे। बहिन के उमर छै अउ भाई के उमर तीन बर बताये जात हे। ये लईका मन अपन माता-पिता के संग बिहाव समारोह म सामिल होय बर गांव आये रीहिन। पुलिस के मुताबिक ए लईका मनके बड़े पिताजी बीहनिया नदी के घाट म पहुंचीस त उंहा ओमन ल ए लईका मनके कपड़ा मिलिस। पूछे म पता चलीस कि लइका मन घर म नइ हे अउ ओमन ल खोजे जात हे। जल्दीच पुलिस अउ गोताखोर मनके मदद ले ए लईका मनके शव बरामद कर ले गीस।
गृह मंत्रालय ह केंद्रीय सशस्त्र पुलिस बल अउ राष्ट्रीय आपदा राहत बल के कर्मियों के खाना म मोटा अनाज यानि श्री अन्न ल सामिल करे के फैसला लेहे। केंद्रीय गृहमंत्री अमित शाह के आह्वान म सबो बल मनके संग विस्तार ले गोठबात के बाद खाना म तीस प्रतिशत मोटा अनाज ल सामिल करे के फैसला ले गीस। मंत्रालय के अधिकारी मन ह बताइन कि केंद्रीय पुलिस कल्याण भंडार, परिसर के किराना दुकान अउ अनाज भंडार म मोटा अनाज जल्दीच उपलब्ध कराय जाही।
छत्तीसगढ़ राज्य विद्युत वितरण कंपनी म खाली पद मन म भर्ती के प्रक्रिया जल्दीच पूरा करे जाही। राज्य सरकार के निर्देश के बाद कपंनी ह ए संबंध म आदेश जारी जारी कर देहे।
खबर के मुताबिक आरक्षण संबंधी मामला ल लेके छत्तीसगढ़ उच्च न्यायालय के आदेश के बाद भर्ती के प्रक्रिया रूके रीहिस हे। फेर ए संबंध म सर्वोच्च न्यायालय के आदेश के बाद भर्ती प्रक्रिया ल पूरा करे जात हे। भर्ती प्रक्रिया के प्रभारी अभियंता अशोक कुमार वर्मा ह बताइन कि डाटा एंट्री ऑपरेटर के विभागीय आवेदक मन ले चालीस अभयर्थी के नियुक्ति आदेश जारी कर दे गेहे। अइसने जूनियर इंजीनियर के सीधा भर्ती के इकतीस पद मन म भर्ती के आदेश घलो जारी कर दे गेहे। संगेसंग डाटा एंट्री ऑपरेटर के चार सौ पद मन म भर्ती के प्रक्रिया जल्दीच पूरा करे जाही। एखर बर अभ्यर्थी मनके दस्तावेज के जांच शुरू कर दे गेहे।
दुर्ग जिला पंचायत के अध्यक्ष पद के चुनाव म कांग्रेस समर्थित पुष्पा चादव ह भाजपा समर्थित प्रत्याशी हर्षा चंद्राकर ल हराके जीत हासिल करे हे। ए चुनाव म पुष्पा यादव ल सात अउ हर्षा चंद्राकर ल चार वोट मिलिस।
खबर के मुताबिक जिला पंचायत के अध्यक्ष रेहे शालिनी यादव के मउत के बाद ए पद बर दुसरइया चुनाव कराये गीस।
प्रदेश म चलत सामाजिक-आर्थिक सर्वेक्षण के संबंध म दावा-आपत्ति के निराकरण बर काली पांच मई ले पंद्रह मई तक ग्राम सभा के अयोजन करे जाही। ग्रामसभा ले अनुमोदन के बाद सर्वेक्षण काम के पर्यवेक्षक दावा-आपत्ति के निराकरण करहीं । प्रदेश के आने आने जिला मनके जइसन कोंडागांव म घलो ग्रामसभा के तैयारी पूरा कर ले गेहे।
खबर के मुताबिक पंचायत अउ ग्रामीण विकास विभाग ह सर्वेक्षण के जानकारी ल ग्रामसभा ले अनुमोदन कराय अउ स्थानीय लोगन मनके मौजूदगी म दावा आपत्ति के निराकरण के निर्देश देहे। जम्मो दावा आपत्ति के निराकरण के बाद सर्वेक्षण के जानकारी विभागीय पोर्टल म उपलोड करे जाही।
भारत गौरव टूरिस्ट ट्रेन
एक भारत श्रेष्ठ भारत योजना के तहत भारतीय रेलवे ह खाये-पीये अउ पर्यटन निगम-आई.आर.सी.टी.सी. डहार ले भारत गौरव टूरिस्ट ट्रेन चलाये जाही। ए योजना म पहिली ट्रेन दक्षिण दर्शन शुभ यात्रा के नाम ले अवइया पच्चीस मई ले बिलासपुर ले रवाना होही। ये ट्रेन छत्तीसगढ़ के बिलासपुर, भाटापारा, तिल्दा-नेवरा, रायपुर, दुर्ग, राजनांदगांव अउ महाराष्ट्र के गोंदिया, तिरोड़ा, भंडारा रोड, नागपुर, सेवाग्राम अउ बल्लारशाह स्टेशन ले होवत जाही, जिहां ले यात्री मन ए ट्रेन म बइठ सकही। सात रात अउ आठ दिन के ए यात्रा म रामेश्वरम, मदुरई, तिरूपति अउ श्रीसैलम-मल्लिकार्जुन ज्योर्तिलिंग के मंदिर अउ दर्शनीय स्थल म घुमाय जाही। एखर बर हरएक यात्री पाछू पंद्रह हजार पांच सौ रूपिया के खर्चा आही।
रेल मंत्रालय ह भारत सरकार डहार ले परिकल्पित देखो अपना देश अउ एक भारत श्रेष्ठ भारत के अवधारणा ल बढ़ावा देके संग लोगन मन ल देश के समृद्ध, सांस्कृतिक अउ धार्मिक विरासत ले परिचित कराय के उद्देश्य ले भारत गौरव पर्यटक ट्रेन मनके संचालन शुरू करे हे।
इच्छुक पर्यटन आई.आर.सी.टी.सी. के वेबसाईट म ऑनलाईन अउ अधिकृत एजेंट ले बुकिंग करा सकथे। संगेसंग बिलासपुर रेलवे स्टेशन के मोबाइल नंबर- आठ दू आठ सात नौ तीन दू दू चार दू अउ रायपुर रेलवे स्टेशन के मोबाइल नंबर- नौ तीन नौ शून्य एक एक दू सात पांच नौ म संपर्क करे जा सकथे।
काली बुद्ध पूर्णिमा हे। ए मउका म राज्यपाल विश्वभूषण हरिचंदन अउ मुख्यमंत्री भूपेश बघेल ह प्रदेशवासी मन ल शुभकामना दीन हे। राज्यपाल ह अपन संदेश म कीहिन कि भगवान बुद्ध ह प्रेम, करूणा अउ अहिंसा के भावना ल सबले बड़के मानत हुए पूरा विश्व ल नवा रद्दा दिखाय हे।
मुख्यमंत्री ह अपन शुभकामना संदेश म कीहिन हे कि भगवान बुद्ध ह लोगन मन ल अहिंसा, समानता अउ विश्व बंधुत्व के संदेश दीन। उंखर शिक्षा ल विदेश म घलो लोगन मन ल अपनाय हे अउ लाखों अनुयायी मन उंखर देखाय रद्दा म चलके देश-दुनिया ल शांति के संदेश देवत हे ।
– केंद्रीय युवा कार्य अउ खेल मंत्री अनुराग सिंह ठाकुर काली लखनउ म गोमती नगर के इंदिरा गांधी प्रतिष्ठान म खेलो इंडिया विश्वविद्यालय खेल के लोगो, जर्सी, शुभंकर अउ गीत के शुभारंभ करही। तीसरा खेलो इंडिया विश्वविद्यालय खेल तेईस मई ले तीन जून तक आयोजित करे जाही।
– रायगढ़ जिला के बोईरदादर स्टेडियम म काली ले ग्रीष्मकालिन शिविर लगाये जाही। एमा लईका मन ल मुफत म कतकोन खेल के प्रशिक्षण दे जाही।
– रायपुर के सड्डू आईटीआई म नौ मई के रोजगार शिविर लगाये जाही।
– उंहे राजनांदगांव के जिला रोजगार कार्यालय म घलो आठ अउ नौ मई के घलो रोजगार शिविर लगाये जाही।
अउ
– राजनांदगांव के कलेक्टर डोमन सिंह ह जिला म होय सड़क हादसा म मृतक व्यक्ति के परिजन अउ घायल मनके सहायता बर दस लाख रूपिया मंजूर करे हे। एखर तहत सड़क दुर्घटना म मृतक व्यक्ति ल पच्चीस हजार रूपिया अउ दुर्घटना म गंभीर रूप ले घायल मनखे ल दस हजार रूपिया के आर्थिक मदद दे जाही।