मुख्यमंत्री भूपेश बघेल ह प्रदेश म पांच हजार आंगनबाड़ी भवन बनाय के घोषणा करे हे। उंहे चौदा नवंबर के आंगनबाड़ी कार्यकर्ता अउ सहायिका मनके सम्मान करे जाही। ए बात मुख्यमंत्री ह आज रायपुर के साइंस कॉलेज मैदान म महिला अउ बाल विकास विभाग डहार ले आयोजित आभार सम्मेलन ल संबोधित करत कहिन। श्री बघेल ह कहिन कि सक्षम योजना के तहत एक लाख रूपिया वार्षिक आय के सीमा ल बढ़ाके दू लाख करे जाय। संगेसंग महिला स्व सहायता समूह ल दे जाने वाला ऋण सीमा बढ़ाके छै लाख रूपिया करे जाही।
कार्यक्रम के दउरान मुख्यमंत्री ह महिला स्व सहायता समूह डहार ले बनाय सामान के प्रदर्शनी अउ स्वास्थ्य विभाग के योजना मनले संबंधित स्टॉल मनके अवलोकन करीन।
मुख्यमंत्री भूपेश बघेल ह उच्चतम न्यायालय डहार ले आरक्षण के मामला म देगे निर्णय के बाद आने-आने विभाग के प्रक्रिया म तेजी ले काम करे के निर्देश देहे। काली संझा रायपुर स्थित अपन निवास कार्यालय म मुख्यमंत्री ह उच्च अधिकारी मनके बइठका लीन अउ शासकीय पद मन म भर्ती के संबंध म चर्चा करीन। बइठका म श्री बघेल ह कहिन कि सबो विभाग गंभीरता ले मिशन मोड म भर्ती प्रक्रिया पूरा करना सुनिश्चित करयं।
खबर के मुताबिक छत्तीसगढ़ म अंठावन प्रतिशत आरक्षण के मामला उपर उच्चतम न्यायालय ह काली हाईकोर्ट के फैसला म स्टे दीन। जेखर ले राज्य म अंठावन प्रतिशत आरक्षण म लगे रोक हट गेहे अउ एखर बाद शासकीय पद बर भर्ती के रद्दा खुल गेहे।
छत्तीसगढ़ राजभवन म काली महाराष्ट्र अउ गुजरात राज्य के स्थापना दिवस धूमधाम ले मनाये गीस। ए मउका म राज्यपाल विश्वभूषण हरिचंदन ह कहिन कि मतभेद के बावजूद हमन एक राष्ट्र के रूप म एकजुट हबन। ओमन कहिन कि छत्तीसगढ़ के विकास म महाराष्ट्रीयन अउ गुजराती समुदाय के लोगन के घलो विशेष योगदान रहे हे। ये समाज शिक्षा, चिकित्सा, व्यवसाय, उद्योग अउ सेवा क्षेत्र म अग्रणी रहे हे। ए समाज मनके काम ले आने समाज के लोगन ल घलो प्रेरणा मिले हे।
खबर के मुताबिक केंद्र सरकार के एक भारत श्रेष्ठ भारत कार्यक्रम के तहत विविधता म एकता के भावना ल बढ़ावा दे खातिर सबो राज्य एक दूसर के स्थापना दिवस मनावत हे।
पद्म पुरस्कार दू हजार चौबीस बर ऑनलाइन नामांकन काली ले शुरू होगे हे। ए साल पद्म पुरस्कार बर नामांकन अवइया पंद्रह सितंबर तक करे जा सकही। केंद्रीय गृह मंत्रालय ह कहिन कि पद्म पुरस्कार मनके नामांकन या सिफारिश राष्ट्रीय पुरस्कार पोर्टल म ऑनलाईन प्राप्त करे जाही। पुरस्कार के घोषणा अवइया बछर गणतंत्र दिवस के मउका म करे जाही।
राजधानी रायपुर म काली अठारवां छत्तीसगढ़ यंग साइंटिस्ट कांग्रेस के आयोजन करे जाही। मुख्यमंत्री भूपेश बघेल एखर शुभारंभ करही। कार्यक्रम के माइपहुना उच्च शिक्षा मंत्री उमेश पटेल अउ मुख्यमंत्री के सलाहकार प्रदीप शर्मा होही। दीनदयाल उपाध्याय ऑडिटोरियम म राखे गे ए कार्यक्रम म सोसायटी फॅार प्रमोशन ऑफ प्लांट सांइस रिसर्च नई दिल्ली के अध्यक्ष प्रोफेसर प्रवीन चंद्र त्रिवेदी अउ छत्तीसगढ़ काउंसिल ऑफ साइंस ऑफ टेक्नॉलाजी के डायरेक्टर जनरल डॅाक्टर एस. कर्माकर अतिथि के रूप म सामिल होही।
गरियाबंद जिला म सुरक्षा बलके संग होय मुठभेड़ म एक झिन वर्दीधारी माओवादी मारे गेहे। घटनास्थल ले थ्री नॉट थ्री के बंदूक के संग कतकोन आने माओवादी सामग्री बरामद करे गेहे। खबर के मुताबिक सुरक्षा बल ल जिला के जुगाड़ थाना क्षेत्र म करलाझर अउ नागेश के तीर पहाड़ी क्षेत्र म इंदागांव एरिया कमेटी के करीबन बारह के संख्या म हथियारबंद माओवादी मनके जुरियाय के खबर मिले रीहिस। एखर बाद कोबरा बटालियन अउ केंद्रीय रिजर्व पुलिस बल सीआरपीएफ के संयुक्त टीम जब मउका म पहुंचीन तब माओवादी मन संग मुठभेड़ होइस।
ओति नारायणपुर जिला के ओरछा थाना क्षेत्र म सुरक्षा बल ह एक झिन माओवादी ल गिरप्तार करे म सफलता पाय हे। गिरप्तार माओवादी नेलनार एरिया कमेटी के सक्रिय सदस्य बताय जात हे। एमा आईईडी विस्फोट करे के संग कतकोन आने माओवादी घटना मन म सामिल रहे के आरोप हे।
उंहे बीजापुर जिला के तर्रेम थाना क्षेत्र म माओवादी मन ह एक झिन ग्रामीण ल अगवा करके उंखर हत्या कर देहे।
कोंडागांव जिला के बेनूर क्षेत्र म करीबन पैंतालिस मनखे ह फूड पॉइजनिंग ले बीमार होगे हे। बताय जात हे कि कुल्हाड़गांव म आयोजित एक ठिन सगाई कार्यक्रम म कुसुम तेल ले तले पकौड़ा खाये के बाद ग्रामीण मनके तबियत बिगड़ना शुरू होगे। जेखर ले करीबन पैंतालिस लोगन मन ल उल्टी होइस अउ एमा ले कुछएक लोगन ल अस्पताल म भरती करना पड़ीस । आठ मरीज के हालत गंभीर बताय जात हे। स्वास्थ्य विभाग के अमला गांव म कैम्प लगाके मरीज मनके इलाज करत हे।
प्रदेश म दिव्यांग परीक्षार्थी लईका मन बर प्रतियोगी परीक्षा के तैयारी कराय खातिर काली ले राजधानी रायपुर म निशुल्क कोचिंग कक्षा चलाये जात हे। समाज कल्याण विभाग डहार ले आयोजित साठ दिन के ए कोचिंग म विषय विशेषज्ञ परीक्षार्थी मन ल रेलवे, बैंकिंग अउ राज्य सिविल सेवा जइसन परीक्षा के तैयारी कराही। ए कोचिंग रायपुर के मठपुरैना स्थित शासकीय दृष्टि अउ श्रवण बाधित उच्चतर माध्यमिक विद्यालय म संचालित करे जात हे। बाहर से अवइया परीक्षार्थी मन बर निशुल्क आवास अउ खान-पान के सुविधा घलो राखे गेहे।
उंहे जांजगीर के लिंक रोड स्थित ज्ञानदीप स्कूल म पांच मई के कैरियर मार्गदर्शन के आयोजन करे जाही। वरिष्ठ पत्रकार कुंज बिहारी साहू के स्मृति म आयोजित ए कार्यक्रम म भारतीय प्रशासनिक सेवा के पूर्व अधिकारी ओ.पी. चौधरी विद्यार्थी मनके मार्गदर्शन करही।
अउ अब पेस हे मौसम के हाल-
मौसम विभाग ह अवइया चौबीस घंटा के दउरान बस्तर संभाग के जिला मन बर ऑरेंज अलर्ट जारी करे हे। ए दउरान एक दू स्थान मन म गरज-चमक के संग तेज हवा चले, आकाशीय बिजली गिरे अउ ओलावृष्टि होय के चेतावनी घलो देहे।
उंहे रायपुर, दुर्ग, बिलासपुर,कोरिया, सरगुजा अउ बलरामपुर जिला मन म घलो आकाशीय बिजली गिरे के संग हल्का ले मध्यम बरसा होय के संभावना हे। मौसम विभाग के मुताबिक उपरी हवा के एक ठिन चक्रवाती घेरा राज्य के दक्षिणी हिस्सा म बने हुए हे। उंहे दक्षिण पश्चिम मध्य प्रदेश ले तमिलनाडु तक एक ठिन द्रोणिका सक्रिय हे। इंहा ले आवत नमीयुक्त हवा के सेती तापमान म कमी आय हे। फेर अवइया दिन म प्रदेश के अधिकतम तापमान म बढ़ोत्तरी होय के संभावना हे।
– प्रदेस के शासकीय अउ अशासकीय शिक्षण संस्थान मन म पढ़ईया लईका मनले अनुसूचित जाति जनजाति अउ अन्य पिछड़ा वर्ग के पोस्ट मैट्रिक छात्रवृत्ति बर काली तीन मई तक ऑनलाईन आवेदन मंगाय गेहे।
– रायगढ़ जिला के घरघोड़ा नगर पंचायत म अविश्वास प्रस्ताव पारित होगे हे। प्रस्ताव के समर्थन म ग्यारा वोट पड़े हे, जबकि भाजपा के नगर पंचायत अध्यक्ष शिशु सिन्हा के पक्ष म सिरिफ तीन मत पड़े हे।
– रायपुर विकास प्राधिकरण अप्रैल महीना के सरचार्ज म छूट के राशि जमा करे के तिथि पंद्रह मई बर बढ़ा दे गेहे।
अउ
– बेमेतरा सिमगा रद्दा म गुनरबोर के तीर बाराती ले भरे एक ठिन वाहन के पलटे ले दस लोगन मन गंभीर रूप ले घायल होगे हे।