उच्चतम न्यायालय ह छत्तीसगढ़ म आरक्षण के मामला उपर सुनवाई करत अंठावन प्रतिसत आरक्षण के फइसला उपर लगे रोक ल हटा देहे। छत्तीसगढ़ हाईकोर्ट के फइसला ल बदलत सुप्रीम कोर्ट ह तुरते ही भर्ती अउ प्रमोसन करे के निरदेस देहे। पाछु बछर नवंबर महीना म हाईकोर्ट म सुनवाई करत छत्तीसगढ़ सरकार डहार ले अंठावन प्रतिसत आरक्षण देके मामला म रोक लगा दे गे रिहीस, तब राज्य सरकार ह ए मामला सुप्रीम कोर्ट के समक्ष रखे रिहीन। ए मामला म फैसला सुरक्षित राखे के बाद उच्चतम न्यायालय ह आज एमा सुनवाई करीस।
खबर के मुताबिक छत्तीसगढ़ सरकार ह बछर दू हजार बारह म अंठावन प्रतिसत आरक्षण के अधिसूचना जारी करे रिहीस। एमा हाईकोर्ट ह आरक्षण ल पचास ले बढ़ाके अंठावन प्रतिसत करे ल गलत माने रिहीस। हाईकोर्ट ह आरक्षण ल लेके बछर दू हजार बारह म लगाय गे याचिका के सुनवाई करत ए फइसला ले रिहीन। एखर बाद बछर दू हजार बाईस म तत्कालीन राज्य सरकार ह आरक्षण उनसठ प्रतिसत करे के अधिसूचना जारी करे रिहीन। याचिकाकर्ता मन ह हाईकोर्ट म याचिका दायर करके ए अधिसूचना ल घलो चुनौती दे गे रिहीन।
नंदकुमार साय-कांग्रेस सदस्यता
भारतीय जनता पार्टी के वरिष्ठ नेता नंदकुमार साय ह कांग्रेस के सदस्यता ले लेहे। रईपुर स्थित प्रदेस कांग्रेस मुख्यालय राजीव भवन म मुख्यमंत्री भूपेश बघेल अउ प्रदेस कांग्रेस अध्यक्ष मोहन मरकाम संग कतकोन मंत्री अउ जनप्रतिनिधिम मनके आगू म श्री साय ह कांग्रेस के सदस्यता ग्रहण करीन।
कांग्रेस के सदस्यता लेके बाद श्री साय ह अपन भासन म कहिन कि राज्य के कांग्रेस सरकार किसान मनके हित म काम करत हे। ओमन कहिन कि छत्तीसगढ़ आदर्श प्रदेस बनय, एखर बर ओमन काम करही। ए मउका म मुख्यमंत्री ह श्री साय के पार्टी म स्वागत करीन।
एखर पहिली, श्री साय ह काली संझा भाजपा के प्रदेस अध्यक्ष अरूण साव ल अपन इस्तीफा भेज दे रिहीस। ओमन भाजपा के प्राथमिक सदस्यता के संग आने सबो पद ले इस्तीफा दे देहे।
एखर बाद काली संझा भाजपा के पूर्व प्रदेस अध्यक्ष विष्णुदेव साय अउ प्रदेस संगठन महामंत्री पवन साय ह उंखर ले मुलाकात करे बर रईपुर स्थित निवास पहुंचे रिहीन। फेर, उहां ओमन नइ मिलीन अउ उंखर कोति ले कोन्हों तरह के जवाब घलो नइ दे गीस।
उहें, भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह ए बिसय म प्रतिक्रिया देवत कहिन कि श्री साय ल पार्टी के तरफ ले हमेसा सम्मान अउ महत्वपूर्ण पद के दायित्व दे गीस।
खबर के मुताबिक श्री साय भजपा के पूर्व प्रदेस अध्यक्ष होय के संग पूर्व नेता प्रतिपक्ष घलो रहिन। ओमन राष्ट्रीय अनुसूचित जनजाति आयोग के अध्यक्ष घलो रहि चुके हे। श्री साय तीन बार लोकसभा सांसद निर्वाचित होय के संग दू बार राज्यसभा ले घलो चुने गेहे।
अंतर्राष्ट्रीय श्रम दिवस
अंतर्राष्ट्रीय श्रम दिवस के मउका म आज मुख्यमंत्री भूपेश बघेल ह श्रमिक मनके हित म कई ठिन महत्वपूर्ण घोसना करीन। रईपुर के साईंस कालेज मैदान म आयोजित प्रदेस स्तरीय श्रमिक सम्मेलन ल संबोधित करत मुख्यमंत्री ह कहिन कि पंजीकृत मजदूर मन ल ट्रेन अउ बस म रोजे अवई-जवई बर मासिक टिकिट के सुविधा दे जाही। ए टिकिट के माध्यम ले मजदूर अधिकतम पचास किलोमीटर दूरी तक अपन काम के जगह म जा सकही। मुख्यमंत्री निर्माण मजदूर मंथली सीजन टिकट कार्ड योजना म होवइया पूरा खर्च छत्तीसगढ़ भवन अउ अन्य सन्निर्माण कर्मकार कल्याण मंडल डहार ले वहन करे जाही।
उहें, मुख्यमंत्री निर्माण श्रमिक मृत्यु अउ दिव्यांग सहायता योजना के तहत पंजीकृत निर्माण मजदूर मनके काम के जघा म दुर्घटना म मृत्यु होय म दे जाने वाला सहायता राशि एक लाख रूपिया ले बढ़ाके पांच लाख रूपिया अउ स्थायी दिव्यांगता म दे जाने वाला सहायता पचास हजार बढ़ाके ढाई लाख रूपिया करे के घोसना करे गीस। उहें, अपंजीकृत मजदूर मन ल घलो काम के जघा म दुर्घटना ले मृत्यु होय म उंखर परिवार वाले मन ल एक लाख रूपिया के सहायता राशि दे जाही।
श्री बघेल ह बतईन कि मुख्यमंत्री निर्माण श्रमिक आवास सहायता योजना के तहत नवा मकान खरीदे या बनाय बर एकमुश्त पचास हजार रूपिया के राशि दे जाही। उहें, दुर्घटना चिकित्सा सहायता योजना अब ‘मुख्यमंत्री निर्माण श्रमिक दीर्घायु सहायता योजना‘ के नाव ले जाने जाही अउ एमा ऑपरेशन के संगेसंग गंभीर बीमारी के इलाज बर बीस हजार रूपिया के अनुदान राशि दे जाही।
श्रमिक दिवस के मउका म प्रदेसभर ले आय मजदूर मनके संग मुख्यमंत्री ह बोरे-बासी के आनंद लीन। बोरे-बासी तिहार के सामूहिक भोज म मुख्यमंत्री ह भूईंया म बइठ के बोरे-बासी खईन।
आज के दिन ल राज्य म बोरे-बासी तिहार के रूप म मनाय जाथे। ए मउका म प्रदेस के कतकोन जिला कलेक्टर, पुलिस अधीक्षक, वरिष्ठ अधिकारी मन ह बोरे-बासी खइन।
माओवादी-समाचार
सुकमा जिला म पुलिस ह माओवादी मनके साजिस ल विफल करके तीन मजदूर मनके जान बचाय हे। ए मामला म मिलिशिया कैडर के चार लोगन ल गिरफ्तार घलो करे गेहे।
जिला के पुलिस अधीक्षक सुनील शर्मा ह बतईन कि एक झिन ठेकेदार डहार ले पुलिस ल जानकारी दे बिना फुलबगड़ी थाना क्षेत्र म सड़क निर्माण के काम कराय जात रिहीस। एखर फायदा उठावत माओवादी मन ह मजदूर मन ल मारे अउ काम म लगे मसीन मन ल नुकसान पहुंचाय के कोसिस करीन। ए दउरान माओवादी मन ह दू भारी वाहन म आगी घलो लगा दीन। फेर, बेरा रहिथे मउका म पहुंच के पुलिस ह माओवादी मनके हमला के साजिस ल विफल करके चार संदिग्ध लोगन ल गिरफ्तार करीन, जेखर ले पूछताछ करे जात हे।
आईएफएस-पदस्थापना
राज्य सरकार ह भारतीय वन सेवा के चार अधिकारी मनके नवा पदस्थापना करे हे। सुधीर अग्रवाल ल वन्यप्राणी अउ जैव विविधता संरक्षण विभाग के प्रधान मुख्य वन संरक्षक, तपेश कुमार झा ल छत्तीसगढ़ राज्य वन विकास निगम लिमिटेड के प्रबंध संचालक, संजय कुमार ओझा ल कार्य आयोजना के प्रधान मुख्य वन संरक्षक अउ अनिल कुमार राय ल छत्तीसगढ़ राज्य लघु वनोपज व्यापार अउ विकास के प्रबंध संचालक के पद म पदस्थ करे गेहे।
उहें, पूर्व आईएफएस अधिकारी संजय शुक्ला ह आज रईपुर स्थित छत्तीसगढ़ रियल एस्टेट रेग्युलेटरी अथॉरिटी-रेरा के अध्यक्ष के पदभार संभाल लेहे।
ट्रेन परिचालन
बिलासपुर के तीर स्थित उसलापुर रेलवे स्टेसन ल नवा उपनगरीय स्टेसन के रूप म विकसित करे के काम चरणबद्ध तरीका ले करे जात हे। इही कड़ी म दुरूग स्टेसन ले चलइया कुछेक ट्रेन के परिचालन अब बिलासपुर स्टेसन के जघा म दाधापारा ले सीधा उसलापुर होवत करे जावत हे। यात्री मनके सुविधा ल देखत रेलवे बोर्ड डहार ले कुछेक एक्सप्रेस ट्रेन मनके ठहराव पाछु चौबीस अप्रैल ले उसलापुर स्टेसन म दे जात हे। उहें, आज घलो कुछेक ट्रेन उसलापुर होवत रवाना करे गीस। एमा सारनाथ, अमरकंटक, संपर्क क्रांति अउ दुर्ग-जम्मूतवी एक्सप्रेस ट्रेन सामिल हे।
अउ अब पेस हे मौसम के हाल…
मौसम विभाग ह अवइया चौबीस घंटा के दउरान रईपुर, दुरूग, बिलासपुर, राजनांदगांव, महासमुंद संग कुछेक आने जिला मन म तेज हवा संग आकाशीय बिजली गिरे अउ एक-दू जघा मन म ओलावृष्टि होय के चेतावनी देहे। ए दउरान बस्तर अउ सरगुजा संभाग के जिला म घलो आकाशीय बिजली गिरे अउ हल्का ले मध्यम बरसा होय के संभावना जताय गेहे। विभाग डहार ले अलर्ट जारी करके लोगन ले केहे गेहे कि ओमन आकाशीय बिजली चमके म पेड़ के नीचे झन रूकय अउ बिजली के तार ले दुरिहा राहय अउ सुरक्षित जघा नइ मिले म तुरते उखरू बइठ जाय।