प्रधानमंत्री नरेन्द्र मोदी ह किहीन हे कि ‘मन की बात‘ कार्यक्रम आने लोगन के गुण ले सीखे के बढ़िया माध्यम बन गेहे। आज आकाशवाणी ले मन की बात कार्यक्रम के सौवां कड़ी म राष्ट्र ल संबोधित करत प्रधानमंत्री ह श्रोता मन ल बधाई दीन अउ किहीन कि मन की बात कारीकरम उन सब ले जुड़े हे अउ उंखर ही भावना के अभिव्यक्ति हे। श्री मोदी ह श्रोता मन ल उंखर पाती अउ संदेस बर आभार जतईन हे।
मन की बात कार्यक्रम के यात्रा तीन अक्टूबर बछर दू हजार चौदह के सुरू होय रिहीस हे। प्रधानमंत्री ह ए बात उपर खुसी जतईन कि मन की बात म उठाय गे हर बिसय जन आंदेलन बन गेहे। ओमन बेटी बचाओ-बेटी पढ़ाओ, स्वच्छ भारत अभियान, खादी बर प्रेम, आजादी के अमृत महोत्सव अउ अमृत सरोवर जइसन बिसय के उल्लेख करीन हे। प्रधानमंत्री ह किहीन कि मन की बात कार्यक्रम उंखर बर सिरिफ एक कारीकरम नहीं बल्कि पूजा अउ आस्था हे।
प्रधानमंत्री ह ए गोठ बर गरब महसूस करीन कि देस के नारी शक्ति के सैकड़ो प्रेरकगाथा के उल्लेख मन की बात म होईस। श्री मोदी ह छत्तीसगढ़ के बेमेतरा जिला के देउरगांव महिला स्व-सहायता समूह के स्वच्छता अभियान के उल्लेखन करीन हे। ओमन किहीन कि देउरगांव के महिला मन स्व-सहायता समूह के माध्यम ले गांव, सड़क अउ मंदिर के सफाई अभियान चलावत हे।
प्रधानमंत्री ह चौंतीस भासा अउ उनतीस बोली म मन की बात कार्यक्रम के सफल प्रसार ले जुड़े आकाशवाणी के कर्मचारी मन ल घलो धन्यवादा दीन हे।
प्रधानमंत्री ह देस-विदेस के सबो लोगन ल घलो मन की बात के सौवां क़ी ल सुने बर धन्यवाद दीन हे। ट्वीट संदेस म ओमन किहीन कि कार्यक्रम सुनइया लोगन मन नमो ऐप या लिंक के माध्यम ले बिसेस क्षण के तस्वीर साझा करय।
मन की बात-राजभवन
प्रधानमंत्री नरेन्द्र मोदी के ‘मन की बात‘ के सौवां कड़ी के प्रसारण के मउका म आज राजभवन म घलो बिसेस स्क्रीनिंग के आयोजन करे गीस। ए मउका म राज्यपाल विश्वभूषण हरिचंदन ह किहीन कि मन की बात सिरिफ एक कार्यक्रम नहीं, बल्कि लोगन ल प्रेरणा देके संग नवा भारत निर्माण बर जरूरी विचार मन ल जन-आंदोलन देके बढ़िया मंच बन गेहे। ओमन किहीन कि प्रधानमंत्री ह ए कारीकरम के जरिया ले लोगन के संग सोझे संवाद करके विकास के ए यात्रा म लोगन के भागीदारी ल बढ़ाय हे।
ए बिसेस मउका ल सुरता राखे बर केन्द्रीय संचार ब्यूरो, आजादी के अमृत महोत्सव अउ केन्द्र सरकार के योजना अउ कारीकरम उपर आधारित फोटो प्रदर्शन के सुभारंभ राज्यपाल ह करीन। राज्यपाल ह प्रदर्सनी के अवलोकन करत मन की बात बर केन्द्रीय संचार ब्यूरो के पहल के सराहना करीन। ए मउका म राज्यपाल ल सूचना अउ प्रसारण मंत्रालय डहार ले प्रकासित अउ जनहित म निःशुल्क प्रसारित न्यू इंडिया समाचार के प्रति भेंट करे गीस।
कारीकरम म पद्मश्री ले सम्मानित विभूति, फिल्म, खेल, चिकित्सा क्षेत्र के वरिष्ठजन अउ मन की बात म छत्तीसगढ़ के जउन मनखे मनके उल्लेख होय हे, उंखर संगेसंग गणमान्य नागरिक मौजूद रिहीन।
मन की बात-राजभवन-02
महिला स्व-सहायता समूह ले जुड़े देउरगांव के सांति नेताम ह किहीन कि प्रधानमंत्री ह मन की बात कार्यक्रम म उंखर समूह के कारज के बिसेस रूप ले उल्लेख करे हे, जेखर ले ओमन ल अउ उंखर गांव ल गरब हे।
उहें, पद्मश्री अजय मंडावी ह किहीन कि मन की बात कार्यक्रम लोगन के अंतस तक पहुंचइया कार्यक्रम हे।
पद्मश्री मदन सिंह ह किहीन कि प्रधानमंत्री ह मन की बात कार्यक्रम म देशहित अउ जनहित के गोठ करथे।
उहें, पूर्व अंतर्राष्ट्रीय क्रिकेटर राजेश चौहान ह किहीन कि प्रधानमंत्री मन की बात कारीकरम के जरिया ले लोगन ल जागरूक करत हे।
मन की बात-भाजपा
ऐति, ‘मन की बात‘ कार्यक्रम के सौवां कड़ी ल सुने बर भाजपा प्रदेस प्रभारी ओम माथुर अउ प्रदेस अध्यक्ष अरूण साव ह आरंग विधानसभा के भानसोज गांव म सामिल होइन। ए मउका म ओमन किहीन कि प्रधानमंत्री अउ छत्तीसगढ़ सहित भारत के जनता के बीच ए बातचीत ह एक नवा इतिहास रचे हे।
उहें, भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह राजनांदगांव जिला के फरहाद गांव म, नेता प्रतिपक्ष नारायण चंदेल ह जांजगीर-चांपा के नवागढ़ मंडल के सेमरा गांव म अउ पूर्व विधानसभा अध्यक्ष धरमलाल कौशिक ह बिल्हा म ‘मन की बात‘ कार्यक्रम ल सुनीन।
उहें, प्रदेस अध्यक्ष अरूण साव ह कहिन कि लोगन मनके उपस्थिति बतावत हे कि प्रधान सेवादार के प्रति जनता के अपार संतुष्टि हे अउ ए संतुष्टि अवइया बेरा म छत्तीसगढ़ म एक नवा इतिहास रचही।
बेरोजगारी भत्ता-राशि अंतरित
मुख्यमंत्री भूपेश बघेल ह आज रईपुर म आयोजित वर्चुअल कार्यक्रम म बेरोजगारी भत्ता बर पात्र हितग्राही मनके खाता म सोलह करोड़ रूपिया के रासि अंतरित करीन। ए रासि 66 हजार 256 हितग्राही मनके खाता म अंतरित करे गीस। ए मउका म मुख्यमंत्री ह युवा मन ल संबोधित करत किहीन कि भत्ता के रासि आपके उच्च सिक्षा, प्रतियोगी परीक्षा के तैयारी अउ प्रसिक्षण के बेरा उपयोगी होही। ओमन किहीन कि युवा मन बर रोजगार के उचित व्यवस्था हो सकय एखर बर राज्य सरकार ह कार्ययोजना बनाय हे।
बतादन कि बेरोजगारी भत्ता योजना म पात्र हितग्राही मन ल हर महीना पच्चीस सौ रूपिया के हिसाब ले रासि दे गेहे।
भेंट-मुलाकात
मुख्यमंत्री भूपेश बघेल ह आज भेंट-मुलाकत कार्यक्रम के तहत मुंगेली जिला के जरहागांव विधानसभा क्षेत्र के दउरा करीन। ए मउका म ओमन तैंतीस करोड़ बारह लाख रूपिया ले जादा के विकास कारज के सिलान्यास अउ लोकार्पण करीन। ए मउका म मुख्यमंत्री ह जरहागांव ल नगर पंचायत के दर्जा, नवा कॉलेज, जिला अस्पताल म सिटी स्कैन के व्यवस्था अउ आमोरा गांव म जिला सहकारी बैंक के साखा खोले के घोसना करीन। संगेसंग मुंगेली नगर पालिका के नवा भवन अउ बाईपास म बिजली व्यवस्था बर डेढ़ करोड़ रूपिया देके घोसना करीन।
महानदी जल विवाद
छत्तीसगढ़ अउ ओड़िशा के बीच महानदी जल बंटवारा ल लेके चलत कोर्ट प्रकरण के तहत गठित महानदी जल विवाद अभिकरण के टीम ह आज जांजगीर-चांपा जिला के दउरा करीस। टीम ह शिवरीनारायण म महानदी म बने बैराज के निरीक्षण करीस। ए बेरा अभिकरण के न्यायाधीश के मौजूद रिहीन।
अंतर्राष्ट्रीय श्रमिक दिवस
काली अंतर्राष्ट्रीय श्रमिक दिवस हे। ए मउका म मुख्यमंत्री भूपेश बघेल ह श्रमवीर मन ल बधाई अउ सुभकामना दीन हे। ओमन किहीन कि प्रदेस म पाछु बछर ले बोरे-बासी खाके अपन परंपरा, संस्कृति अउ श्रमिक मनके प्रति सम्मान प्रकट करे के सुरूवात करे रिहीन। ओमन अपील करीन हे कि सबो लोगन एक मई के घर म बोरे-बासी खाके अपन संस्कृति अउ विरासत संजोय राखंय।
जेईई मेन्स
संयुक्त प्रवेश परीक्षा-जेईई मेन्स म प्रयास विद्यालय के लइका मन बढ़िया प्रदर्सन करे हे। छत्तीसगढ़ म आदिम जाति डहार ले संचालित प्रयास आवासीय विद्यालय के 312 म 150 लइका मन ह जेईई एडवांस बर पास होगे हे। ए उपलब्धि बर मुख्यमंत्री भूपेश बघेल अउ आदिम जाति विकास मंत्री डॉक्टर प्रेमसाय सिंट टेकाम ह लइका मन ल बधाई अउ सुभकामना दीन हे।