मुख्यमंत्री-डाॅक्टर बातचीत
मुख्यमंत्री भूपेश बघेल ह एम्स रईपुर समेत प्रदेस के मेडिकल कालेज अउ जिला अस्पताल के डाॅक्टर मन ले गोठबात करीन। कोरोना संक्रमण के इलाज के बेवस्था अउ अस्पताल म मौजूद संसाधन बारे म घलो जानकारी लीन। मुख्यमंत्री ह अपन रईपुर स्थित निवास कार्यालय ले वीडियो कान्फ्रेंसिंग के जरिया डाॅक्टर मन ले चरचा करत कोरोना संक्रमण ले निपटे बर उंखर मनके सुझाव घलो लीन।
मुख्यमंत्री ह डाॅक्टर मनके अनुभव अउ उंखर सरलग मेहनत ल सहरावत किहीन कि प्रदेस म कोरोना के मुकाबला करे म डाॅक्टर अउ उंखर सहयोगी टीम के बड़का योगदान हे। श्री बघेल ह किहीन कि डाॅक्टर मनके बिसेसज्ञता अउ समर्पण के सेतीच हमन ए संक्रमण के मुकाबला सुघ्घर ढंग ले कर पावत हन। ओमन यहू किहीन कि ए दउरान छत्तीसगढ़ के मेडिकल टीम ह ए संकट बर जउन काम करत हे, ओ ह पूरा देस बर उदाहरण हे।
उहें, श्री बघेल ह बिना लक्षण वाले कोरोना मरीज मन बर राज्य सरकार डहार ले जारी होम आइसोलेशन यानि घरे भीतरी अलगहे रेहे के दिसा-निरदेस बारे म घलो डाॅक्टर मन ले सुझाव मांगीन। चरचा बेरा मुख्यमंत्री ह किहीन कि होम आइसोलेशन वाले मरीज मनके मोबाईल फोन के लोकेशन ले ओखर मनके निगरानी करे ल पड़ही, जेखर ले ओखर मनके सेती कोनो अउ ल संक्रमण झन होवय। संगे श्री बघेल ह यहू किहीन कि होम आइसोलेशन वाले मरीज मन तीर थर्मामीटर बुखार नापे बर अउ आॅक्सीमीटर ह आॅक्सीजन के मात्रा जाने बर होना जरूरी हे।
लाकडाउन-दुकान
राखी तिहार के मउका म राज्य के कुछु जिला म मिठाई अउ राखी दुकान थोरिक बेरा बर खोले के अनुमति दे दे गेहे। एमा रईपुर, दुरूग, बिलासपुर अउ अंबिकापुर जिला सामिल हे। रईपुर म बिहनिया छह बजे ले दस बजे तक ए दुकान मन खुलही।
कोरोजा जांच-सुविधा
प्रदेस म कोरोना संक्रमण के बाढ़त मामला ल देखत अस्पताल अउ कोविड केयर सेंटर मन म दसना यानि बिस्तर के संख्या बढ़ाय जात हे। स्वास्थ्य विभाग ह लक्षय राख के सबो जिला मन म पर्याप्त दसना के इंतजाम बर निरदेस देहे। उहें, कोरोना पीड़ित मनके चिन्हारी बर सैंपल जांच के संख्या ल बढ़ाय जात हे। एखर बर आरटी-पीसीआर अउ टूª नाॅट ले जांच खातिर सबो जिला मन म रैपिड एंटीजन किट ले घलो जांच करे जात हे। उहें, प्रदेस के राजनांदगांव, बिलासपुर अउ अंबिकापुर मेडिकल कालेज मन म घलो आरटी-पीसीआर जांच के परमिसन दे दे गेहे।
कोरोना-मरीज
प्रदेस म आज घला कई ठिन जिला ले कोरोना संक्रमित बहुत झिन नवा मरीज मिले के पुष्टि होय हे।
दुरूग जिला म बीते रतिहा ले आज संझा तक कोरोना संक्रमित बयालीस झिन मरीज के चिन्हारी होय हे, जेमा भिलाई के महापौर अउ विधायक देवेन्द्र यादव अउ बीएसएफ के तीन झिन जवान कोरोना पाॅजिटिव मिले हे।
उहें, राजनांदगांव जिला के आज कोरोना संक्रमित एक झिन पुलिस कर्मी के मउत होगे, जेखर इलाज रईपुर के एक ठिन निजी अस्पताल म चलत रिहीस। इही जिला म काली रतिहा आईटीबीपी के अट्ठारह झिन अउ बीएसएफ एक झिन जवान समेत पच्चीस झिन कोरोना संक्रमित मरीज के पुष्टि होय रिहीस।
कीमोथैरेपी-सुविधा
प्रदेस के कैंसर पीड़ित मन ल अब लोकल स्तर म कीमोथैरेपी के सहुलियत मिलत हे। एखर बर प्रदेस के नौ ठिन जिला म दीर्घायु वार्ड बनाय गेहे, जिहां मरीज मन ल कीमोथैरेपी के सहुलियत दे जात हे। एखर ले जिला मन म करीबन अस्सी झिन मरीज ए सहुलियत के फायदा ले हवय।
इहां ए बतादन कि राष्ट्रीय स्वास्थ्य मिशन के चलत ए बछर बीते मार्च महीना ले राजधानी रईपुर समेत, दुरूग, जशपुर, जगदलपुर, सूरजपुर, नारायणपुर, कांकेर, कोंडागांव अउ कोरिया जिला अस्पताल म कीमोथैरेपी के सुविधा दे जात हे अउ बहुत जल्दी आने जिला मन म घलो ए सहुलियत सुरू करे जाही।
राज्यपाल-वन मंत्री धन्यवाद
राज्यपाल अनुसुईया उइके ह तेंदूपत्ता सकलइया परिवार मन बर वन मंत्री मोहम्मद अकबर डहार लाय गे कई ठिन निणर्य बर उनला धन्यवाद दीन। राज्यपाल ह किहीन कि परिवार वाले ल अनुदान सहायता देवई अउ उंखर लइका मन ल माढ़े सिकालरसिप के संगे प्रोत्साहन रासि दे बर होय कार्यवाही ह सहराय के लइक हे।
रक्षाबंधन
भाई-बहिनी के सुघ्घर नता अउ मया के चिन्हारी तिहार राखी काली मनाय जाही। कोरोना संक्रमण अउ लाॅकडाउन के सेती ए बखत राखी ल रखे म रहि के सब झन मनाही।
राज्यपाल अनुसुईया उइके अउ मुख्यमंत्री भूपेश बघेल ह रक्षाबंधन के मउका म प्रदेस के रहवइया मन ल बधाई अउ सुभकामना दीन। राज्यपाल ह अपन संदेस म किहीन हे कि रक्षाबंधन ह भाई-बहिनी के पवित्र मया के परब हरय।
एखर पहिली, राज्यपाल काली राजधानी रईपुर म एक ठिन संस्था डहार ले ‘‘स्नेह बंधन त्यौहार और संस्कृति स्वास्थ्य स्वरक्षा‘‘ बिसय उपर राखे गे वेबिनार यानि आॅनलाइन चरचा म सामिल होइन। कारीकरम म राज्यपाल ह किहीन कि ए बेरा रक्षाबंधन के तिहार म हमन कोरोना वायरस ले बाचे के संकल्प लेवन। उहें, कोरोना वारियर्स मनके जिकर करत ओमन किहीन कि ए सबो झिन मन सरलग सुरक्षा काम ल लगे हवय। ए मउका म राज्यपाल ह आदिवासी अउ ग्रामीण नारी-परानी मन डहार ले गोबर अउ बांस ले बनाय राखी ल राष्ट्रपति रामनाथ कोविंद, उप राष्ट्रपति वेंकैया नायडू अउ प्रधानमंत्री नरेन्द्र मोदी ल पठोईन।
राज्यपाल अनुसुईया उइके ह मुख्यमंत्री भूपेश बघेल अउ पूर्व मुख्यमंत्री डाॅक्टर रमन सिंह ह राखी पठो के रक्षाबंधन के सुभकामना दीन। ए मउका म राज्यपाल ह विश्वास जतावत किहीन कि श्री बघेल के अगुवई म छत्तीसगढ़ ह सरलग प्रगति के रद्दा म आगू रइही। मुख्यमंत्री श्री बघेल ह राज्यपाल डहार ले पठोय गे राखी ल झोकत किहीन कि राखी अउ भोजली परब के मउका म आप मन राखी पठो के मोर उपर जउन विश्वास देखाय हे, ए हर मोर बर खुसयारी अउ सम्मान हरय। ए मउका म मुख्यमंत्री ह राज्यपाल ल राखी के रीत मुताबिक उपहार म नगदी पइसा अउ लुगरा पठोईन।
रविशंकर शुक्ल-जयंती
स्वाधीनता सेनानी अउ अविभाजित मध्यप्रदेश के पहलइया मुख्यमंत्री पंडित रविशंकर शुक्ल के आज जयंती हरय। ए मउका म राज्यपाल अनुसुईया उइके अउ मुख्यमंत्री भूपेश बघेल ह पंडित शुक्ल ल श्रद्धांजलि देवत उंखर योगदान के सुरता करीन।
राज्यपाल ह किहीन कि पंडित शुक्ल विद्वान चिंतक अउ विचारक रिहीन। उंखर दूरदर्सिता के लाभ मध्यप्रदेश समेत छत्तीसगढ़ ल घलो मिले हे।
मनरेगा-पौधरोपण
प्रदेस म महात्मा गांधी राष्ट्रीय ग्रामीण रोजगार गारंटी योजना-मनरेगा के तहत पर्यावरण संरक्षण ल बढ़ावा दे खातिर रद्दा तीर-तीर म नान्हें पेड़ लगाय जात हे। एखर संगे मुक्तिधाम मन म घलो नान्हें रूख-राई लगाय जावत हे।
ए कड़ी म बालोद जिला के राघोनवागांव ग्राम पंचईत म मनरेगा के चलत तीन साल पहिली करीबन नौ लाख रूपिया के लागत ले छह सौ ले जादा छईहां अउ फलदार नान्हें पेड़ लगाय गे रिहीस। ए नान्हें पेड़ ह सरलग देखभाल के सेती अब तेजी ले बाढ़त हे।
विस सत्र
छत्तीसगढ़ विधानसभा के मानसून सत्र अवइया पच्चीस अगस्त ले सुरू होही। अट्ठाईस अगस्त तक चलइया ए सत्र के दउरान कुल चार बइठका होही।
विधानसभा अध्यक्ष डाॅक्टर चरणदास महंत ह आज सदन के निरीक्षण करे के संगे अधिकारी मन ल जरूरी व्यवस्था तय राखे के निरदेस दीन। डाॅक्टर महंत ह किहीन कि सत्र के दउरान सोशल डिस्टेंसिंग के संगे केन्द्र अउ राज्य सरकार डहार ले जारी दिसा-निरदेस के पूरा पालन करे जाही। डाॅक्टर महंत ह यहू किहीन कि ए बेरा कोरोना संक्रमण ल रोके बर जउन भी जरूरी उपाय हे, ओखर पूरा पालन करे जाय, जेखर चलत सत्र बेरा सदन अउ परिसर जघा ल हर दिन सैनिटाईज करे के घलो निरदेस डाॅक्टर महंत ह दीन।