प्रधानमंत्री नरेन्द्र मोदी काली बिहनिया ग्यारह बजे आकाशवाणी ले ‘‘मन की बात‘‘ कार्यक्रम म देस-विदेस के श्रोता मन संग अपन विचार साझा करही। ए कार्यक्रम के सौवां कड़ी होही। ए कार्यक्रम ल आकाशवाणी अउ दूरदर्शन के जम्मों नेटवर्क, आकाशवाणी समाचार के वेबसाइट अउ न्यूज ऑन एआईआर मोबाइल ऐप म सुने जा सकही। एखर सीधा प्रसारण आकाशवाणी समाचार, दूरदर्शन समाचार, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल म घलो होही। हिन्दी प्रसारण के तुरते बाद एला क्षेत्रीय भाखा म घलो प्रसारित करे जाही।
प्रधानमंत्री नरेन्द्र मोदी ह तीन अक्टूबर दू हजार चौदह ले ‘मन की बात‘ कारीकरम के माध्यम ले आने-आने मुद्दा उपर लोगन ले अपन विचार साझा करत आवत हे। कारीकरम बर श्रोता मन ले राष्ट्रीय महत्व के मुद्दा उपर सुझाव अउ विचार अउ घलो मांगे जाथे।
प्रसार भारती के मुख्य कार्यकारी अधिकारी गौरव द्विवेदी ह किहीन कि सार्वजनिक प्रसारक बर ए गर्व के बात हे कि मन की बात कार्यक्रम ह अपन यात्रा के सौवां अंक म पहुंच गे हवय। आकाशवाणी समाचार ले बिसेस बातचीत म श्री द्विवेदी ह किहीन कि मन की बात ह सरकार अउ जनता के बीच संवाद के एक ठन मंच दे हवय। ओमन ह लोगन ले एखर सौवां एपिसोड ल सुने बर आग्रह करीन।
उहें, संस्कृति मंत्रालय प्रधानमंत्री के मन की बात कार्यक्रम म सामिल बिसय उपर कॉमिक बुक श्रृंखला जारी करे के फइसला ले हवय। अमर चित्रकथा डहार ले एखर प्रकासन करे जाही। पहिली ए श्रृंखला अंग्रेजी म अउ फेर बारह ठन भारतीय भासा म प्रकासित करे जाही।
मन की बात-राजभवन
प्रधानमंत्री नरेन्द्र मोदी के रेडियो कार्यक्रम ‘मन की बात‘ के सौवां एपिसोड के प्रसारण के मउका म काली राजभवन म बिहनिया साढ़े दस बजे बिसेस स्क्रीनिंग के आयोजन करे जाही। कारीकरम म राज्यपाल विश्वभूषण हरिचंदन ह मुख्य अतिथि होही। ए बिसेस कार्यक्रम म प्रदेस ले समाज सेवा, राजनीति, खेल, कला अउ संस्कृति के क्षेत्र म सुघ्घर काम करइया अउ पद्म पुरस्कार ले सम्मानित विभूति मन ल नेवता दे गे हवय।
ए मउका म केन्द्रीय संचार ब्यूरो, रईपुर डहार ले मन की बात, आजादी का अमृत महोत्सव अउ केन्द्र सरकार के जन कल्याणकारी योजना अउ कारीकरम उपर एक ठिन फोटो प्रदर्शनी के आयोजन घलो करे जाही। एखर सुभारंभ राज्यपाल करही। कारीकरम के आयोजन सूचना अउ प्रसारण मंत्रालय के मीडिया इकाई, पत्र सूचना कार्यालय-पीआईबी, केन्द्रीय संचार ब्यूरो, आकाशवाणी, दूरदर्शन अउ राजभवन रईपुर डहार ले संयुक्त रूप ले करे जाही।
मन की बात-सर्वेक्षण
भारतीय जनसंचार संस्थान-आई.आई.एम.सी. ह एक ठिन अध्ययन के आधार म निष्कर्ष निकाले हे कि देस म समाचार माध्यम ले जुड़े छिहत्तर प्रतिसत लोगन मानथे कि लोगन तक असली भारत के तस्वीर पहुंचाय म ‘मन की बात‘ कार्यक्रम के बड़े भूमिका रेहे हे। अध्ययन म सामिल पचहत्तर प्रतिसत लोगन के मानना हे कि ए कार्यक्रम अइसन मंच के उभरे हवय, जिहां जमीनी स्तर ले जुड़े अउ निःस्वार्थ भाव ले काम करइया ओ नवाचार के बारे म जानकारी मिलथे, जउन ह देस के दूर-दराज इलाका म रहइया लोगन के जीवन म बदलाव बर काम करत हे।
अरूण साव-मन की बात
भारतीय जनता पार्टी के प्रदेस अध्यक्ष अरूण साव ह किहीन कि प्रधानमंत्री नरेन्द्र मोदी के मन की बात कारीकरम ह देस के कोना-कोना के लोगन ल जोड़त हे। ओमन ह किहीन कि काली प्रसारित होवइया सौवां एपिसोड ल छत्तीसगढ़ म दस हजार जघा म दस लाख ले जादा लोगन सुनही। श्री साव ह किहीन कि मन की बात ह देस के लोगन बर प्रेरणा के एक ठन बड़े माध्यम बन गे हवय।
भाजपा कार्यसमिति-बैठक
भारतीय जनता पार्टी महिला मोर्चा के प्रदेस कार्यसमिति के बइठका के दूसर दिन काली राजीनीतिक प्रस्ताव पारित करे गीस। प्रस्ताव म अवइया विधानसभा चुनाव म प्रदेस म भाजपा के सरकार बनाय के संकल्प ले गीस।
बइठका म प्रदेस भाजपा अध्यक्ष अरूण साव ह किहीन कि कांकेर ले कतकोन राजनीतिक आंदोलन के सुरूवात होय हे। कांग्रेस के सरकार ह वादाखिलाफी म उतर गेहे। प्रदेस म कानून व्यवस्था चरमरा गेहे अउ विकास के काम ठप्प पड़े हे। कारीकरम म महिला मोर्चा के प्रदेस प्रभारी सरला कोसरिया अउ महिला मोर्चा के प्रदेस अध्यक्ष शालिनी राजपूत मौजूद रिहीन।
मुख्यमंत्री-डॉक्टरेट उपाधि
मुख्यमंत्री भूपेश बघेल ल फ्रांस के सोरबोन यूनिवर्सिटी ह छत्तीसगढ़ के ग्रामीण अर्थव्यवस्था ल सीमित अउ स्थानीय संसाधन के उपयोगिता के संग आगू बढ़ाय के बिसेस पहल पर डॉक्टरेट के उपाधि दे हवय। आज रईपुर म राखे गे ग्लोबल अवॉर्ड दू हजार तेईस कारीकरम म मुख्यमंत्री ल ए सम्मान दे गीस। ए मउका म इसरो के पूर्व वैज्ञानिक सुरेश कुमार अउ सोरबोन यूनिवर्सिटी के प्रोफेसर डॉक्टर विवेक मौजूद रिहीन।
मिलेट चिक्की-खरीदी
राज्य सरकार के आदेस के खिलाफ मिलेट चिक्की खरीदी के आदेस जारी करइया बारह ठिन जिला के सिक्षा अधिकारी मन ल कारण बताओ नोटिस जारी करे गेहे। शिक्षा विभाग के अवर सचिव आर.पी. वर्मा ह किहीन कि मिलेट के व्यंजन ल स्कूल स्तर म ही पकाना हे, ओखर खरीदी नइ करना हे। कुछेक जिला के अधिकारी मन डहार ले मिलेट चिक्की खरीदी जाय के सूचना मिले रिहीस। ओमन ह खरीदी के आदेस ल तुरंत निरस्त करे बर किहीन हे। ए योजना बर केन्द्र सरकार ले करीब अट्ठारह करोड़ रूपिया मिले हे। एला तीस अप्रैल तक उपयोग करना हे।
प्रधानमंत्री पोषण शक्ति निर्माण योजना म पूरक पोषण के रूप म सोया चिक्की के वितरण बर वार्षिक कार्ययोजना बने हे। प्रधानमंत्री नरेन्द्र मोदी ह मिलेट मिशन के ऐलान करीन हे। एमा सोया चिक्की के जघा छात्र-छात्रा मन ल मिलेट ले बने पकवान देना हे। केन्द्र सरकार ह एखर बर मंजूरी घलो दे देहे।
माओवादी-पूछताछ
दंतेवाड़ा जिला के अरनपुर म माओवादी मन डहार ले करे गे आईईडी विस्फोट मामला म पुलिस ह दू झन आरोपी मन ल गिरफ्तार करे हे। दूनों आरोपी मन ल काली न्यायालय म पेस करे गीस, जिहां ले ओमन ल तीन दिन के पुलिस रिमांड म भेज दे गेहे। पुलिस दूनों आरोपी मन ले पूछताछ करत हे।
खबर के मुताबिक अरनपुर क्षेत्र म पाछु छब्बीस अप्रैल के माओवादी मन डहार ले करे गे आईईडी विस्फोट म डीआरजी के दस जवान अउ एक झन वाहन चालक ह सहीद होगे रिहीस।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘बलौदाबाजार-भाटापारा‘‘ जिला के बारे म जानकारी दे जाही।
अउ अब थोरकुन समाचार सार म-
– प्रदेस के सासकीय अउ अशासकीय सिक्षण संस्था म पढ़ईया लइका मन ले अनुसूचित जाति, जनजाति अउ अन्य पिछड़ा वर्ग के पोस्ट मैट्रिक छात्रवृत्ति बर तीन मई तक ऑनलाइन आवेदन मंगाय गेहे।
– छत्तीसगढ़ विधानसभा के उपाध्यक्ष संतराम नेताम ह काली कोंडागांव जिला के बड़ेडोंगर म जिला सहकारी बैंक के एटीएम के उद्घाटन करीन।
– दंतेवाड़ा जिला के अरनपुर म माओवादी हमला म सहीद जवान मन ल मुंगेली जिला के भाजपा कार्यकर्ता मन ह श्रद्धांजलि दीन हे।
– कोंडागांव जिला रोजगार कार्यालय डहार ले लाईवलीहुड कालेज म अवइया तीन अउ चार मई के प्लेसमेंट कैम्प के आयोजन करे जाही।
– जवाहर नवोदय विद्यालय चयन परीक्षा आज कोंडागांव जिला के सोलह ठिन परीक्षा केन्द्र म आयोजित करे गीस। ए परीक्षा म करीब साढ़े चार हजार लइका मन सामिल होइन।
– धमतरी म आज एक ट्रक के पलटे ले फटफटी म बइठे पिता-पुत्र ओखर चपेट म आगीन। ए घटना म बेटा के मउकाच म मउत होगे अउ पिता ह गंभीर रूप ले घायल होगे हवय।