प्रधानमंत्री-एफ.एम. ट्रांसमीटर 01
प्रधानमंत्री नरेंद्र मोदी ह देशभर म रेडियो प्रसारण ल बढ़ावा देबर आज सौ वॉट के इंक्यानबे एफ.एम. ट्रांसमीटर के वीडियो कॉन्फ्रेंस के माध्यम ले लोकार्पण करीन। ये ट्रांसमीटर अठारा राज्य अउ दू केंद्रशासित प्रदेश मनके चौरासी ठिन जिला मन म स्थापित करे गेहे। जेमा छत्तीसगढ़ के दंतेवाड़ा जिला के बैलाडीला अउ बालोद जिला के दल्लीराजहरा म एफ.एम. ट्रांसमीटर शामिल हे।
ए मउका म प्रधानमंत्री ह कहिन कि सरकार ह लोगन मन तक प्रौद्योगिकी पहुंचाय के दिशा म सरलग काम करत हे। एफ.एम.के माध्यम ले सूचना अउ मनोरंजन के महत्व के जिकर करत ओमन कीहिन कि बेरा म सूचना के जानबा देत या फेर खेती किसानी बर मौसम के पहिलीच ले जानबा के संगेसंग महिला स्व सहायता समूह मन ल नवा बजार ले जोड़े म ये एफ.एम. ट्रांसमीटर ह बड़का भूमिका निभाही।
एति छत्तीसगढ़ के दल्लीराजहरा म होय कार्यक्रम म कांकेर लोकसभा क्षेत्र के सांसद मोहन मंडावी ह मुख्य अतिथि के रूप म सामिल होइन। त उंहे बैलाडीला म राखे गे वर्चुअल कार्यक्रम म पद्मश्री अजय मंडावी ह मुख्य अतिथि के रूप म सामिल होइन।
प्रधानमंत्री नरेंद्र मोदी ह तीस अप्रैल के बीहनिया ग्यारा बजे मन की बात कार्यक्रम म देश-विदेश के लोगन मनले अपन विचार साझा करही। ये ह कार्यक्रम के सौवां कड़ी होही। मन की बात कार्यक्रम ल देश के जम्मों राजभवन मन म विशेष रूप ले प्रसारित करे जाही। छत्तीसगढ़ राजभवन म घलो राज्यपाल विश्वभूषण हरिचंदन के अध्यक्षता म ये कार्यक्रम होही।
ए दउरान केंद्रीय संचार ब्यूरो डहार ले मन की बात के पाछू कार्यक्रम मनले जुड़े एक ठिन विशेष फोटो प्रदर्शनी घलो लगाय जाही।
अब सुनथन आकाशवाणी के सुघ्घर कार्यक्रम प्रधानमंत्री के ‘मन की बात‘ उपर आधारित विशेष श्रृंखला। आज की कड़ी के विसय हे- सौर उर्जा की उपयागिता।
ग्रीन हाउस गैसों के लगातार जारी उत्सर्जन की वजह से धरती का तापमान लगातार बढ़ रहा है। इसकी वजह से जलवायु में बदलाव हो रहा है। गर्मी बढ़ रही है, बारिश में भी गिरावट हो रही है। जिसकी वजह से संसाधन घट रहे हैं, ऐसे में दुनिया का ध्यान अक्षय ऊर्जा की ओर बढ़ रहा है। अक्षय ऊर्जा का प्रमुख स्रोत है, सौर ऊर्जा जिसकी भारत में असीमित संभावनाएं हैं। भारत में इस दिशा में प्रधानमंत्री के प्रयासों से गति आई है। सौर ऊर्जा से लोगों की जिंदगी भी बदल रही है। प्रधानमंत्री ने 30 अक्टूबर 2022 को प्रसारित मन की बात में इसका यूं जिक्र किया है-
भारत, आज अपने पारंपरिक अनुभवों को आधुनिक विज्ञान से जोड़ रहा है, तभी, आज हम, सौर ऊर्जा से बिजली बनाने वाले, सबसे बड़े देशों में शामिल हो गए हैं। सौर ऊर्जा से कैसे हमारे देश के गरीब और मध्यम वर्ग के जीवन में बदलाव आ रहा है, वो भी अध्ययन का विषय है।
आकाशवाणी केंद्र रायपुर ले हर शनिचर के प्रसारित होवइया समसामयिक विषय म आधारित साप्ताहिक कार्यक्रम ‘‘बातों-बातों-में‘‘ के तहत ए बखत प्रधानमत्री नरेंद्र मोदी के मन की बात कार्यक्रम उपर रेडियो श्रोता संघ के अध्यक्ष अशोक बजाज ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र ले काली उनतीस अप्रैल के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
सुरक्षित गर्भपात सेवा म नवाचार बर छत्तीसगढ़ ल प्रथम पुरस्कार मिले हे। केंद्रीय स्वास्थ्य अउ परिवार कल्याण मंत्रालय डहार ले नई दिल्ली म राखे गे गे गर्भपात देखभाल उपर राष्ट्रीय परामर्श कार्यक्रम म राज्य ल ये पुरस्कार दे गीस। मातृत्व स्वास्थ्य के राज्य नोडल अधिकारी डॅाक्टर शैलेन्द्र अग्रवाल अउ राज्य सलाहकार अभिलाषा शर्मा रात्रे ह प्रदेश कोति ले ये पुरस्कार लीन।
मुख्यमंत्री भूपेश बघेल ह आज भेंट-मुलाकात के तहत कुरूद विधानसभा के गांव सेमरा-बी पहुंचीन। ए दउरान ओमन कुरूद विधानसभा म बियासी करोड़ उनचालीस लाख रूपिया के विकास काम के लोकार्पण अउ भूमिपूजन करीन। ए मउका म मुख्यमंत्री ह कुरूद नवागांव रद्दा, गाड़ाडीह-गुदगुदा नारी अउ कुरमातराई-अरकार रद्दा के चौड़ीकरण काम के घोषणा करीन। संगेसंग ग्राम पंचायत सेमरा-बी म पशु औषधालय अउ नगर पंचायत भखारा म स्वामी आत्मानंद विद्यालय बनाय के घोषणा करीन।
प्रदेश के जम्मों नगर निगम मन म घर बनाये के नक्शा पास कराये के काम अब ऑनलाईन होही। एमा राज्य सरकार ह तीन शहर – भिलाई-चरौदा, धमतरी अउ बिरगांव म ऑनलाईन भवन अनुज्ञा सिस्टम के शुरूआत करे हे। एखर शुभारंभ नगरीय प्रशासन मंत्री डॅाक्टर शिवकुमार डहरिया ह करीन।
ए परियोजना ह राज्य के जम्मों शहर मन म एक के बाद एक शुरू करे जात हे। जेखर माध्यम ले शहर मन म घर बनाये के काम ल सरल अउ सुविधाजनक बनाये जात हे। दस्तावेज के जांच परख घलो अब ऑनलाईन होही।
सुकमा पुलिस ह चिंतागुफा जगा ले एक झिन माओवादी ल गिरप्तार करे हे। ये इलाका म बारा साल ले सक्रिय ए माओवादी उपर दू लाख रूपिया के इनाम राखे गे रीहिस।
जानबा के मुताबिक सर्चिंग म निकले डीआरजी, एसटीएफ अउ सीआरपीएफ के संयुक्त टीम ह ए माओवादी ल गिरप्तार करे हे।
एति दंतेवाड़ा जिला म माओवादी मन ह मोबाइल टॉवर म आगी लगा दीन। अतिरिक्त पुलिस अधीक्षक आर.के. वर्मन ह घटना के पुष्टि करत बताइन कि माओवादी मन ह मालेवाही थाना क्षेत्र के गांव हर्राकोडेर म लगे मोबाइल टॉवर म आगी लगा दीन।
उंहे छत्तीसगढ़ के गरियाबंद जिला के सीमा ले लगे ओडिशा म सुरक्षा बल अउ माओवादी मनके बीच मुठभेड़ होय के समाचार मिले हे। गरियाबंद पुलिस अधीक्षक अमित कांबले ह बताइन हे कि ओडिशा पुलिस के संग होय मुठभेड़ के बाद माओवादी मन ह भाग गे। सर्चिंग म माओवादी जीनिस बरामद करे गेहे।
दंतेवाड़ा जिला के अरनपुर इलाका म होय माओवादी हमला के विरोध म सुकमा जिला के दोरनापाल म इंहा के लोगन मन ह कैण्डल मार्च निकालिन। ए दउरान दोरनापाल मुख्य चौराहा म मौन धारण करके शहीद जवान मन ल श्रद्धांजलि दे गीस।
,एति बीजापुर कलेक्टर राजेंद्र कुमार कटारा अउ पुलिस अधीक्षक आंजनेय वार्ष्णेय ह काली नेलसनार थाना के गांव मुण्डेर गीन अउ शहीद जवान मुन्नाराम कड़ती ल श्रद्धांजलि दीन।
जानबा के मुताबिक पाछू छब्बीस अप्रैल के दंतेवाड़ा जिला के अरनपुर म माओावादी मन डहार ले करे गे आईईडी विस्फोट म गांव मुंडेर निवासी प्रधान आरक्षक मुन्नाराम कड़ती के संगेसंग दस झिन जवान अउ एक झिन गाड़ी चलइया ह शहीद होगे रीहिन।
पूर्व मुख्यमंत्री अउ भाजपा के राष्ट्रीय उपाध्यक्ष डॅाक्टर रमनसिंह ह आज बेमेतरा जिला के गांव बिरनपुर पहुंचीन। इंहा ओमन गांव के लोगन मन ले मिलीन अउ मृतक के परिवार वाले मनले मिलके गोठबात करीन। ए मउका म नेता प्रतिपक्ष नारायण चंदेल, पूर्व मंत्री ननकीराम कंवर, धरमलाल कौशिक, के संगेसंग कतकोन बड़का नेता मन आय रीहिन।