लाॅकडाउन
राज्य सासन ह स्पष्ट करे हे कि प्रदेस म कोरोना वायरस संक्रमण के रोकथाम बर वर्तमान म कलेक्टर मन ल जिला के स्थानीय परिस्थिति ल देखत लाॅकडाउन लागू करे के अधिकार दे गेहे। अभी जिला कलेक्टर डहार ले छह अगस्त तक ही प्रभावित इलाका म लाॅकडाउन करे गेहे। सामान्य प्रसासन विभाग डहार ले तीस जुलाई के चिट्ठी जारी करके जम्मों कलेक्टर मन ल केन्द्र सरकार के अनलाॅक तीन के दिसा-निरदेस भेजे गेहे। सासन ह प्रदेस म इक्कतीस अगस्त लाॅकडाउन तक लाॅकडाउन ले जुड़े सोसल मीडिया म प्रसारित खबर ल पूरा तरीका ले गलत अउ भ्रामक बताय हे।
उहें, दूसर डहार कोंडागांव जिला म लाॅकडाउन के बेरा तीन अगस्त तक कपड़ा अउ फैंसी स्टोर खोले के अनुमति जिला प्रसासन ह देहे। दुकान मन ल मंझनिया दू बजे तक खोले जा सकही।
हज हाउस-भूमिपूजन
मुख्यमंत्री भूपेश बघेल ह ईद-उल-अजहा के मउका म आज वीडियो कान्फ्रेंसिंग के माध्यम ले छत्तीसगढ़ हज हाउस के सिलान्यास करीन। हज हाउस के निर्माण नवा रईपुर अटल नगर म स्वामी विवेकानंद विमानतल के तीर लगभग छब्बीस करोड़ रूपिया के लागत ले करे जाही। एखर बर तीन एकड़ भूईंया चिन्हित करे गेहे। पांच मंजिला ए भवन म हज यात्री मन बर जम्मों सुविधा उपलब्ध होही।
ए बेरा म मुख्यमंत्री ह मुस्लिम समाज के लोगन ल ईद-उल-अजहा के सुभकामना देवत किहीन कि हाजी मनके परेसानी कम करे बर हज हाउस के निर्माण के लंबा अरसा ले होवत मांग पूरा होईस हे। ओमन किहीन कि कोरोना संक्रमण के सेती ए बछर हज यात्रा घलो परभावित होय हे। ओमन यहू किहीन कि केन्द्र सरकार ले छत्तीसगढ़ के हज यात्री मन ल मउका दे जाय के मांग करे जाही।
केन्द्रीय मंत्री-बैठक
मुख्यमंत्री भूपेश बघेल ह केन्द्रीय कोयला मंत्री प्रहलाद जोशी के संग राखे गे बइठका म एलीफेंट काॅरीडोर अउ सघन वन क्षेत्र म स्थित कोयला खदान ल कोल ब्लाॅक्स के अवइया नीलामी ले अलग राखे के प्र्रस्ताव देहे। संगेसंग ए खदान के स्थान म राज्य के दूसर कोयला क्षेत्र ल चिन्हित करे के सुझाव घलो देहे। बइठका म मुख्यमंत्री ह सुप्रीम कोर्ट के निरदेसानुसार उद्योगपति डहार ले अतिरिक्त लेवी के रूप म केन्द्र सरकार के पास जमा चार हजार एक सौ चालीस करोड़ रूपिया ल घलो राज्य ल देके मांग करे हे। एमा केन्द्रीय मंत्री ह सहमति देवत बतईन कि केन्द्र सरकार डहार ले सुप्रीम कोर्ट म उक्त रासि बर निराकरण के आवेदन लगाय गेहे। एखर आधार म जल्दी निर्णय ले जाही। मुख्यमंत्री ह सुप्रीम कोर्ट के काॅमन काॅस प्रकरण म दे गे निर्णय के अनुसार जुर्माना के रासि दस हजार एक सौ उनतीस करोड़ रूपिया ल घलो राज्य ल देके मांग राखीन।
बइठका म कोल इंडिया के चेयरमैन ह छत्तीसगढ़ के स्थानीय लघु उद्योग ल कोयला उपलब्ध कराय के प्रस्ताव म सहमति देवत राज्य सरकार ल एजेंसी नियुक्त करे के आग्रह करे हे।
आॅपरेशन ग्रीन स्कीम
कोरोना संक्रमण के चलत उद्यानिकी खेती करइया किसान मन ल आर्थिक नुकसान ल बचाय बर केन्द्र सरकार ह ‘‘आॅपरेशन ग्रीन स्कीम‘‘ के दायरा बढ़ाय के घोसना करे हे। ए योजना म आलू, प्याज अउ टमाटर के संघरा अब कतकोन प्रकार के फल अउ सब्जी ल घलो सामिल करे गेहे। एमा जादा उत्पादन वाला स्थान ले कम उत्पादन वाला स्थान म परिवहन अउ भंडारण बर पचास प्रतिसत के अनुदान मिलही।
ए योजना फल म आम, केला, अमरूद, किवी, लीची, पपीता, संतरा, अनानास, अनार अउ सब्जी म कटहल, राजमा, करेला, बैंगन, शिमला मिर्च, गाजर, फूल गोभी अउ भिंडी ल सामिल करे गेहे। ए योजना अवइया ग्यारह दिसंबर तक प्रभावी रइही।
रक्षाबंधन-जेल
राखी तिहार के मउका म प्रदेस के जेल म बंद कैदी मन ल उंखर बहिनी मन ले वीडियो काॅलिंग अउ फोन म बात करे के छूट दे जाही। कोरोना संक्रमण के बाढ़त परभाव के सेती जेल म कैदी मन ले मुलाकात म लगे रोक ल देखत ए निरनय ले गेहे।
जेल मंत्री ताम्रध्वज साहू ह रक्षाबंधन के मउका म जेल म बंद कैदी मन ल अपन बहिनी ले वीडियो काॅलिंग अउ फोन म बात करे के वैकल्पिक बेवस्था करे बर एडीजी जेल ल निर्देसित करे हे। श्री साहू ह यहू घलो निरदेस देहे कि यदि जेल प्रबंधन के तीर पोस्टल डाक डहार ले भेजे गे राखी आही त ओला जेल म संबंधी कैदी तक पहुंचाय के बेवस्था करे जाही।
मलेरिया-मरीज
मलेरिया मुक्त बस्तर अभियान म स्वास्थ्य विभाग डहार ले होवत जांच के बेरा कोंडागांव जिला म एकेच गांव के छैसठ लोगन मलेरिया पाॅजिटिव मिले हे। केशकाल के बीएमओ डाॅक्टर डी.के. बिसेन ह बतईन कि केशकाल विकासखंड म सरलग सिविर लगाके लोगन के मलेरिया जांच करे जावत हे। दूसरइया चरण के जांच के बेरा गांव कोटोड़ी म छैसठ झिन लोगन के रिपार्ट मलेरिया पाॅजिटिव आय हे। विकासखंड म एक लाख ले जादा लोगन के जांच करे जा चुके हे, जेमा ले तीन सौ छियालीस लोगन म मलेरिया के लक्षण पाय गेहे। स्वास्थ्य विभाग डहार ले ग्रामीण मन ले मलेरिया के बचाव बर गांव म साफ-सफाई राखे अउ दूसर जरूरी सावधानी बरते बर केहे हे।
बिलासपुर-रक्षा संकल्प
बिलासपुर पुलिस डहार ले राखी तिहार ल देखत ‘‘रक्षा संकल्प सेल्फी‘‘ के माध्यम ले कोरोना संक्रमण ल लेके जन-जागरूकता अभियान चलाय जात हे। पुलिस ह अपन जम्मों सोशल साइट्स म लोगन ल ए रक्षा संकल्प म जुड़े के अपील करे हे। पुलिस ह लोगन डहारे ले घरे म बनाय गे राखी ल कोरोना वारियर्स मन ल उपहार के रूप म भेंट करही। लोगन मन तीन अगस्त रतिहा तक ‘‘रक्षा संकल्प सेल्फी‘‘ मोबाइल नंबर 9 4 7 9 2 6 4 1 0 0 म वाट्सऐप कर सकत हे। संगेसंग नजदीकी थाना के माध्यम ले घलो राखी भेज सकत हे।
ईद-उल-अजहा
ईद-उज-अजहा के तिहार आज छत्तीसगढ़ के संघरा देसभर म धार्मिक श्रद्धा अउ उछाह के संग मनाय जावत हे। कोरोना संक्रमण के सेती ए बछर ईदगाह अउ बड़े मस्जिद म सामूहिक नमाज नइ होवत हे। राजधानी रईपुर के संघरा प्रदेश के दूसर जिला म मुस्लिम समाज के लोगन ह लाॅकडाउन के नियम के पालन करत घरे म रइही के ईद के नमाज अदा करीन।
राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह देसवासी मन ल ईद-उल-अजहा के सुभकामना देहे। उहें, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह घलो ए तिहार के बेरा म मुस्लिम समुदाय के लोगन ल मुबारकबाद देहे।
मौसम
प्रदेस म अवइया चैबीस घंटा के दउरान कतकोन जघा म हल्का ले मध्यम बरसा होय के संभावना हे। उहें, एक दू-जघा म गाज गिरे अउ भारी बरसा होय के चेतावनी घलो दे गेहे।
इही बीच, प्रदेस के कुछेक जघा म आज हल्का ले मध्यम बरसा दर्ज करे गीस। जगदलपुर समेत बस्तर जिला के कई ठिन जघा म तेज बरसा होय के समाचार मिले हे।
