छत्तीसगढ़ ह प्रधानमंत्री आवास योजना शहरी क्षेत्र म बड़े उपलब्धि पाय हे। नई दिल्ली म राखे गे कार्यक्रम म केंद्रीय आवास अउ शहरी कार्य मंत्रालय के सचिव मनोज जोशी ह छत्तीसगढ़ ल आवास निर्माण के क्षेत्र म बने काम करे बर इनाम दीन। हाउसिंग एंड अरबन डेवलपमेंट कार्पोरेशन लिमिटेड नई दिल्ली के तिरपनवां स्थापना दिवस के मउका म राखे गे समारोह म ये इनाम दे गीस। जउन ल राज्य शहरी विकास अभिकरण के सीईओ रंजन चौबे ह लीन।
मुख्यमंत्री भूपेश बघेल ह ये उपलब्धि खातिर उछाह जतात कीहिन कि राज्य सरकार जम्मों हितग्राही मन ल आवास योजना के फायदा देवाय बर तियार हवय।
मुख्यमंत्री भूपेश बघेल ह आज भेंट-मुलाकात कार्यक्रम के दउरान रायपुर ग्रामीण विधानसभा क्षेत्र के बोरियाखुर्द म एक सौ सड़सठ करोड़ रूपिया के आने आने विकास काम के लोकार्पण अउ भूमिपूजन करीन। ए मउका म मुख्यमंत्री ह कमल विहार के नाम कौशल्या विहार अउ अमलीडीह स्थित महाविद्यालय के नाव कौशल्या माता के नाव म करे के घोषणा करीन। उंहे मुख्यमंत्री ह बीरगांव म आईटीआई खोले, शासकीय मीडिल स्कूल रावांभाठा अउ सोनडोंगरी के हाइस्कूल म बढ़वार के संगेसंग रायपुर नगर निगम के वार्ड-चार म नवा बने सरकारी स्कूल गंगानगर, भनपुरी के स्वामी आत्मानंद अंग्रेजी माध्यम स्कूल म बढ़वार करे समेत कतकोन आने घोषणा करीन।
भेंट-मुलाकात कार्यक्रम म मुख्यमंत्री ह नगर पंचायत माना कैम्प म जल आवर्धन योजना के भूमिपूजन करीन। ये योजना ले माना कैम्प के तीन हजार ले जादा घर म पीये के साफ पानी पहुंचही। ये मउका म मुख्यमंत्री ह माना कैम्प म खुलइया नवा महाविद्यालय के नाव प्रियदर्शिनी इंदिर गांधी महाविद्यालय करे के घोषणा करीन।
गर्मी के मौसम ल देखत मुख्य सचिव अमिताभ जैन ह हैण्ड पंप संधारण अउ पेयजल स्रोत ल शुद्ध करे बर अभियान चलाये के निर्देश दीन हे। ओमन कीहिन कि पीये के पानी के समस्या वाले गांव म नलकूप खोदे, राइजर पाईप बढ़ाय अउ नलकूप के मरम्मत के काम प्राथमिकता ले करे जाय। मुख्य सचिव ह आज मंत्रालय म लोक स्वास्थ्य यांत्रिकी विभाग के अधिकारी मनके बइठका लीन। ओमन कीहिन कि पीये के पानी के आपूर्ति के संबंध म जल्दी कार्ययोजना तियार करे के संगेसंग मौसमी बीमारी ले रोकथाम बर व्यवस्था करे जाय। ओमन कीहिन कि ये काम म पंचायत अउ ग्रामीण विकास विभाग के मदद ले जाये।
मुख्य सचिव ह पीये के पानी के स्रोत म क्लोरिन अउ तीर तखार साफ सफई राखे बर विशेष अभियान चलाये के निर्देश दीन। संगेसंग स्वास्थ्य विभाग के अधिकारी मन ल पानी ले होवइया बीमारी के बचाव बर दवई के भंडारण अउ जागरूकता अभियान चलाये बर कीहिन हे। श्री जैन ह अधिकारी मन ल जलाशय के मॉनिटरिंग करे अउ जरूरत पड़े म क्षेत्र के तलाब म पानी छोड़े के व्यवस्था करे के निर्देश दीन।
रायपुर जिला के चंदखुरी म चलत तीन दिन ले माता कौशल्या महोत्सव के काली समापन होइस। ए महोत्सव महिला सशक्तिकरण के थीम आधारित रीहिस। समापन कार्यक्रम म मुख्यमंत्री भूपेश बघेल संघरीन । ये बेरा म ओमन माता कौशल्या धाम म पर्यटक मनके सुविधा खातिर टूरिज्म कैफे के लाकार्पण करीन। इंहा छत्तीसगढ़ी व्यंजन समेत मिलेट्स ले तियार करे गे खाय पीये के जीनिस मिलही।
महोत्सव म मुख्यमंत्री ह राम वनगमन पर्यटन परिपथ म चंदखुरी के कौशल्या धाम परिसर म नौ करोड़ अठ्यासी लाख रूपिया के लागत ले तियार वाटर, लेजर, लाईट अउ साउंड शो के शुरूआत करीनं । एखर ले श्रद्धालु भगवान श्रीराम के वनवास अउ वनगमन के कहिनी सुन अउ देख सकही। तीन दिन तक चले माता कौशल्या महोत्सव म छत्तीसगढ़ समेत देशभर के कलाकार मन ह सांस्कृतिक कार्यक्रम प्रस्तुत करीन।
आज विश्व मलेरिया दिवस हरय। एसो के विसय हरय- मलेरिया का पूर्ण उन्मूलन, निवेश, नवाचार, कार्यान्वयन। छत्तीसढ़ म घलो प्रदेश ल मलेरिया, एनीमिया अउ कुपोषण ले मुक्त कराय बर अउ शिशु महतारी मृत्यु दर म कमी लाय खातिर मलेरिया मुक्त छत्तीसगढ़ अभियान शुरू करे गेहे। ये अभियान म अभी तक करीबन एक सौ इंकावन लाख लोगन के मलेरिया जांच होगे हे।
छत्तीसगढ़ योग आयोग के छठवां स्थापना दिवस के मउका म आज रायपुर के सुभाष स्टेडियम म बीहनिया छै ले सात बजे एक दिवसीय सामूहिक विशेष योगाभ्यास कार्यक्रम राखे गीस। एमा करीबन पंद्रह सौ लोगन संघरीन अउ सामूहिक योगाभ्यास करीन। एमा लोगन ल स्वस्थ जीवन शैली अउ योग कोति जागरूक करे बर जागरूकता रैली निकाले गीस, जउन शहर के आने आने रद्दा ले होत सुभाष स्टेडियम पहुंचीस।
कार्यक्रम म योग आयोग के अध्यक्ष ज्ञानेश शर्मा, विधायक सत्यनारायण शर्मा अउ महापौर एजाज ढेबर समेत आने जन प्रतिनिधि मौजूद रीहिन।
राष्ट्रीय पंचायतीराज दिवस म छत्तीसगढ़ म पंचायती राज संस्था- समुदाय आधारित संगठन अभिसरण-पीआरआई-सीबीओ कन्वर्जेंन्स परियोजना के शुरूआत करे गीस। एमा गांव म आजीविका के मउका बढ़ाय बर राज्य ग्रामीण आजीविका मिशन के सामुदायिक संगठन अउ ग्राम पंचायत के मिशन म बनाये गे स्व सहायता समूह ल उद्यमशील बनाय जाही।
ये परियोजना बस्तर अउ रायपुर जिला के चार-चार विकासखंड के कुल दू सौ ग्राम पंचायत म चलाये जाही। ये परियोजना बस्तर जिला के बकावंड, बास्तानार, लोहंडीगुड़ा अउ तोकापाल विकासखंड अउ रायपुर जिला के अभनपुर, आरंग, धरसींवा अउ तिल्दा विकासखंड म चलाये जाही।
परियोजना के शुभारंभ करत ठाकुर प्यारेलाल राज्य पंचायत अउ गा्रमीण विकास संस्थान के संचालक पी.सी. मिश्रा ह कहिन कि ये परियोजना स्व सहायता समूह के माइलोगन ल अपन तय लक्ष्य ले म मदद करही।