राष्ट्रपति द्रौपदी मुर्मू काली राष्ट्रीय पंचायत पुरस्कार सप्ताह के उद्घाटन करही अउ पंचायत मनके प्रोत्साहन बर राष्ट्रीय सम्मेलन म सुघ्घर काम करइया पंचायत मन ल पुरस्कार देहीं। ए मउका म राष्ट्रपति ह देशभर ले आये पंद्रह सौ ले जादा प्रतिनिधि मंडल ल संबोधित घलो करही। पंचायती राज मंत्रालय काली ले इक्कीस अप्रैल तक राष्ट्रीय पंचायत पुरस्कार सप्ताह के आयोजन करत हे। ए कार्यक्रम म केंद्रीय ग्रामीण विकास अउ पंचायती राज मंत्री गिरिराज सिंह, केंद्रीय पंचायती राज राज्यमंत्री कपिल मोरेश्वर पाटिल अउ केंद्रीय ग्रामीण विकास राज्यमंत्री फग्गन सिंह कुलस्ते घलो शामिल होही।
केंद्र पत्रकार सुरक्षा
केंद्र सरकार ह पत्रकार मनके सुरक्षा खातिर एक ठिन मानक संचालन प्रक्रिया तैयार करे के निर्णय लेहे। सूत्र मन बताइन कि केंद्रीय गृह मंत्रालय, प्रधानमंत्री नरेंद्र मोदी के अगवई अउ गृह मंत्री अमित शाह के मार्गदर्शन म ए मानक संचालन प्रकिया ल तैयार करही। अतीक अहमद अउ ओखर भाई अशरफ के पत्रकार के रूप म आय हमलावर मन डहार ले हत्या करे के बाद ये निर्णय ले गीस हे।
केंद्रीय सचिव बस्तर दौरा
केंद्रीय जनजाती मंत्रालय के सचिव अनिल कुमार झा ह दू दिन के बस्तर दौरा बेरा जिला म चलत काम मनके निरीक्षण करीन। ओमन बस्तर कोसा के जीनिस के सुघ्घर प्रचार-प्रसार के संगे देश के राजधानी नई दिल्ली समेत आने बड़का शहर मन म आउटलेट खोले के निर्देश दीन। ए मउका म अनुसूचित जाति अउ जनजाति कल्याण आयुक्त शम्मी आबिदी ह बताइन कि कोसा ले बने जीनिस मन ल बेचे खातिर अमेजन अउ फ्लिपकार्ट ले चर्चा करे गेहे।
बस्तर फाईटर परेड
बस्तर के संभाग मुख्यालय जगदलपुर के लालबाग परेड मैदान म आज बस्तर फाईटर अउ नवा आरक्षक मनके परेड समारोह आयोजित करे गीस। एमा बीजापुर बस्तर अउ नारायणपुर जिला के नवा बने आरक्षक शामिल हे। ए मउका म बस्तर रेंज के पुलिस महानिरीक्षक सुंदरराज पी. ह परेड के निरीक्षण करीन अउ प्रशिक्षण लेवइया मन ल बधाई अउ शुभकामना दीन।
उंहे काली सतरह अप्रैल के नारायणपुर स्थित सोलहवां वाहिनी छत्तीसगढ़ सशस्त्र बल म बस्तर फाईटर अउ नव आरक्षक मनके संघरा दीक्षांत परेड राखे जाही।
इंहा ए बतादन कि बस्तर संभाग के अंदरूनी जगा मन म विकास, सुरक्षा अउ उंहे के जवान नोनी अउ बाबू मन ल मउका देके उद्देश्य ले राज्य सरकार ह बस्तर फाईटर्स नाव ले विशेष बलके गठन करे हे।
पावर इंजीनियर्स-कॉनक्लेव
मुख्यमंत्री भूपेश बघेल ह छत्तीसगढ़ पॉवर कंपनी मनके अधिकारी अउ कर्मचारी मन बर कैशलेस मेडिकल सहूलियत लागू करे अउ कंपनी के इंजीनियर संवर्ग ल तीन प्रतिशत तकनीकी भत्ता देके घोषणा करीन हे।
श्री बघेल ह काली राजधानी रायपुर म राखे गे प्रदेश स्तरीय पॉवर इंजीनियर्स कॉनक्लेव दू हजार तेईस म बोलत ए बात कीहिन। ये मउका म ओमन कीहिन कि छत्तीसगढ़ ह जीरो पॉवर कट प्रदेश हरय अउ बिजली बिल हाफ योजना ले लोगन मन ल अबड़ राहत मिले हे।
राज्य सरकार डहार ले बिजली बिल हाफ योजना के माध्यम ले अब तक बयालिस लाख बउरइया मन ल करीबन तीन हजार दू सौ छत्तीस करोड़ रूपिया के छूट दे गेहे। ओमन बताइन कि कोरबा म तेरह सौ बीस मेगावाट के सुपर क्रिटिकल यूनिट के मंजूरी दे गेहे, जउन ह प्रदेश ल जीरो पॉवर कट स्टेट बनाय राखे के सोच एक ठिन बड़का कदम साबित होही। श्री बघेल ह बताइन कि राज्य म ग्रीन एनर्जी के संभावना उपर घलो काम करे जात हे। उंहे प्रदेश म पांच ठिन हाइड्रल प्लांट लगाये जा सकत हे। जेखर ले विद्युत उत्पादन बर थर्मल पॉवर प्लांट उपर निर्भरता कम करे जा सकत हे।
ऑटो एक्सपो
रायपुर म राखे गे ऑटो एक्सपो ह अब अठारा अप्रैल तक चलही। छत्तीसगढ़ ह पहलइया अइसन राज्य हरय जिहां ऑटो मोबाइल सेक्टर के अगोरा वाले मांग ल पूरा करत ऑटो एक्सपो म हर तरह के गाड़ी मनके बिसई उपर रोड टैक्स म पचास प्रतिशत के छूट दे जावत हे।
इंहा ए बतादन कि पाछू बछर चौबीस मार्च ले चौदा अप्रैल के दउरान करीबन आठ सौ कार बेचाय रीहिस। फेर ए बछर इही बेरा म एक्सपो के सेती तीन हजार कार बेचाय हवय।
भेंट-मुलाकात
मुख्यमंत्री भूपेश बघेल के भेंट-मुलाकात कार्यक्रम काली रायपुर उत्तर विधानसभा क्षेत्र म राखे गेहे। ए दउरान मुख्यमंत्री ह एक सौ सतरा करोड़ इकसठ लाख रूपिया ले जादा के कतकोन विकास काम के लोकार्पण अउ भूमिपूजन करहीं। ए मउका म श्री बघेल ह दस करोड़ बारह लाख रूपिया के लागत वाले चौरासी ठिन सफाई गाड़ी के लोकार्पण करहीं।
उंहे मुख्यमंत्री ह पांच सौ सीटर बीपीओ सेंटर स्थापित करे बर भूमिपूजन घलो करहीं। एखर संगे श्री बघेल पंडरी स्थित ऑक्सीजोन म स्थापित शहीद नंदकुमार पटेल के आदमकद मूर्ति के अनावरण करही।
वल्लभाचार्य जयंती
आज पुष्टि मार्ग के संस्थापक महाप्रभु वल्लभाचार्य के जयंती हरय। ए मउका म मुख्यमंत्री भूपेश बघेल ह अपन निवास कार्यालय म उंखर फोटू उपर फूलमाला पहिनाके माथ नवई। श्री बघेल ह कहिन कि बैसाख महीना के अंधियारी पाख के अकादशी के दिन श्री वल्लभाचार्य के जनम छत्तीसगढ़ के चंपारण म होय रीहिस। जेखर ले उंखर इंहा ले गहरा नता बनीस।
अंगना म शिक्षा 3.0
प्रदेस म अवइया शिक्षा सत्र ले अब जादा ले जादा स्कूल मन म लईका मन सुघ्घर पढ़वईया कार्यक्रम म राखे गे स्तर तक पहुंच सकय। एखर बर अंगना म शिक्षा -3.0 के आयोजन करे जाही। स्कूल शिक्षा विभाग ह ए बारे म सबो जिला शिक्षा अधिकारी, जिला शिक्षा अउ प्रशिक्षण संस्थान-डाईट के प्राचार्य अउ समग्र शिक्षा के जिला मिशन समनव्यक मन ल निर्देशित करे हे कि ए कार्यक्रम ल बड़का स्तर म राखे जाय। उंहे एमा महतारी मन ल जोड़े खातिर एक्टिव मदर कम्यूनिटी के गठन घलो करे जाय। ए काम बर तीर के स्कूल मनके महिला शिक्षिका मनके देखरेख म स्थानीय माइलोगिन जिखर लइका मन प्रायमरी स्कूल म पढ़त हे ओमन ल हर हाल म सामिल करे जाय।
इही तरह महतारी मन ल लइका मनके पढ़ई लिखई ले जोड़े बर ए बछर पच्चीस अप्रैल के अंगना म शिक्षा मेला यानि पढ़ई तिहार के आयोजन घलो करे जाही अउ ए तिहार ल हर बछर पच्चीस अप्रैल के राखे जाही।
कृषि विवि-दीक्षांत समारोह
इंदिरा गांधी कृषि विश्वविद्यालय रायपुर के नौवां दीक्षांत समारोह अठारा अप्रैल के राखे जाही। समारोह के पगरैती राज्यपाल विश्वभूषण हरिचंदन करही। उंहे माइपहुना के रूप म मुख्यमंत्री भूपेश बघेल रइही। दीक्षांत समारोह के विशिष्ट पहुना कृषि मंत्री रविंद्र चौबे होही। समारोह म भारतीय कृषि अनुसंधान परिषद नई दिल्ली के पूर्व महानिदेशक डॅाक्टर त्रिलोकचंद महापात्रा दीक्षांत उद्बोधन दीहीं। समारोह म प्रतिभावान विद्यार्थी मन ल गोल्ड मैडल अउ डिग्री बांटे जाही।
कोरोना समाचार
प्रदेश म कोरोना संक्रमण के मामला ह सरलग बाढ़त हे। पॉजिटीवीटी रेट ह दस दशमलव चार-शून्य प्रतिशत होगे हे। काली प्रदेशभर म होय चार हजार तीन सौ अठाईस सैंपल मनके जांच म चार सौ पचास झिन मनखे कोरोना संक्रमित पाय गीन। रायपुर जिला म सबले जादा पचपन झिन मनखे म संक्रमण पाय गेहे। उंहे कोरोना संक्रमण ले काली रायपुर, राजनांदगांव अउ बिलासपुर जिला म एक-एक झिन मनखे के मउत होगे हे। ए बेरा सतरा सौ ले जादा मरीज मनके इलाज प्रदेश के कई ठिन अस्पताल या फेर होम आइसोलेशन म चलत हे।
एति जांजगीर-चांपा जिला अस्पताल के चार झिन डॅाक्टर कोरोना के चपेट म आगे हे। ए सबो डॅाक्टर मन ल घरे म आइसोलेट कर दे गेहे। जिला स्वास्थ्य अधिकारी ह एखर पुष्टि करत बताइन कि जिला म फिलहाल कोरोना के छब्बीस झिन एक्टिव मरीज हवय।
शक्कर कारखाना शुभारंभ
सहकारिता मंत्री डॅाक्टर प्रेमसाय सिंह टेकाम ह काली सूरजपुर जिला के गांव केरता म मां महामाया शक्कर कारखाना म नवा बने को-जनरेशन पावर प्लांट के उद्घाटन करीन। ए प्लांट म दू मेगावाट बिजली उत्पादन होही, एखर ले शक्कर कारखाना ल हर महीना करीबन एक करोड़ रूपिया के उपराहा इंकम होही। ए मउका म डॅाक्टर टेकाम ह कहिन कि ए प्लांट के चालू होय ले कारखाना अउ किसान दूनो ल फायदा होही।