केन्द्रीय इलेक्ट्रॉनिक्स अउ सूचना प्रौद्योगिकी राज्यमंत्री राजीव चंद्रशेखर ह किहीन हे कि संसोधित आईटी नियम के तहत इंटरनेट म सट्टाबाजी अउ सट्टाबाजी जइसन नुकसानदायक सामान के मंजूरी नइ दे जाही। ओमन किहीन कि सरकार ह उपयोकर्ता के नुकसान ल कम करे अउ ए सुनिश्चित करे बर एक ठिन रूपरेखा तैयार करे हे, जेखर ले इंटरनेट ल सुरक्षित अउ भरोसामंद बनाय जा सकय। केन्द्रीय मंत्री काली ट्विटर स्पेस म संसोधित आईटी नियम दू हजार इक्कीस म सूचना अउ प्रसारण मंत्रालय के बड़का सलाहकार कंचन गुप्ता के संग गोठबात करत रिहीन।
केन्द्रीय सशस्त्र पुलिस बल-परीक्षा
केन्द्रीय सशस्त्र पुलिस बल म सामान्य ड्यूटी बर कांस्टेबल परीक्षा अब हिन्दी अउ अंग्रेजी के संगेसंग तेरह क्षेत्रीय भासा म घलो दे जा सकही। सशस्त्र पुलिस बल म स्थानीय युवा मनके भागीदारी बढ़ाय अउ क्षेत्रीय भासा ल प्रोत्साहन दे बर केन्द्रीय गृहमंत्री अमित शाह के पहल म ए फइसला ले गेहे। ए फइसला अवइया बछर एक जनवरी ले प्रभावी होही। गृह मंत्रालय ह किहीन हे कि ए फइसला ले लाखों उम्मीदवार मन ल अपन मातृभाषा अउ क्षेत्रीय भासा म परीक्षा देके मउका मिलही।
खबर के मुताबिक सामान्य ड्यूटी बर कांस्टेबल भर्ती परीक्षा के आयोजन कर्मचारी चयन आयोग करथे। राज्य सरकार ले अपील करे गेहे कि ओमन स्थानीय युवा मन ल ए परीक्षा अपन मातृभाषा म दे बर प्रेरित करे के एक बड़का अभियान सुरू करय।
रूद्रकुमार गुरू-तबीयत
प्रदेस के लोक स्वास्थ्य यांत्रिकी मंत्री रूद्रकुमार गुरू के तबीयत अचानके बिगड़े के बाद ओमन ल एयरलिफ्ट करके हैदराबाद ले जाय गेहे, जिहां उंखर इलाज करे जावत हे। एखर ले पहिली, रईपुर के एक प्राईवेट अस्पताल म पाछु छै दिन ले उंखर इलाज चलत रिहीस, जिहां विधानसभा अध्यक्ष डॉक्टर चरणदास महंत ह उंखर ले भेंट करके तबीयत के बारे म जानकारी ले रिहीन।
मुख्यमंत्री भूपेश बघेल ह आज मंत्री रूद्रकुमार ले टेलीफोन म गोठबात करीन अउ तबीयत के बारे म जानकारी लीन। श्री बघेल ह उंखर जल्दी ठीक होय के कामना करे हे।
प्रधानमंत्री फसल बीमा योजना
केन्द्र सरकार ह प्रधानमंत्री फसल बीमा योजना के सुघ्घर काम छत्तीसगढ़ ल उत्कृष्ट पुरस्कार ले सम्मानित करे हे। रईपुर म राखे गे नौवीं राष्ट्रीय समीक्षात्मक कार्यसाला म केन्द्रीय सचिव मनोज आहूजा ह राज्य के कृषि उत्पादन आयुक्त डॉक्टर कमलप्रीत सिंह ल पुरस्कार अउ प्रशस्ति पत्र सौंपीन। ए उपलब्धि बर मुख्यमंत्री भूपेश बघेल अउ कृषि मंत्री रविन्द्र चौबे ह कृषि विभाग के अधिकारी-कर्मचारी मन ल बधाई दीन हे।
खबर के मुताबिक प्रधानमंत्री फसल बीमा योजना के तहत छत्तीसगढ़ म चालू वित्तीय बछर म छह लाख ससत्तर हजार ले जादा पात्र किसान मन ल फसल बीमा के फायदा देवाय गेहे। किसान मन ल बीमा रासि के रूप म एक सौ बयानवे करोड़ रूपिया ले जादा के रासि दे गेहे।
अंबेडकर जयंती-कार्यक्रम
मुख्यमंत्री भूपेश बघेल ह किहीन हे कि बाबा साहेब डॉक्टर भीमराव अंबेडकर के दिखाये रद्दा म चलके हमन ल लोकतांत्रिक व्यवस्था के मजबूती बर काम करना हे। डॉक्टर अंबेडकर के जयंती म काली भिलाई म राखे गे समारोह म मुख्यमंत्री ह किहीन कि हमन ल संविधान के गरिमा ल सुघ्घर बनाय राखे बर काम करना होही। ए मउका म ओमन डॉक्टर अंबेडकर डहार ले स्थापित दि-बुद्धिस्ट सोसायटी ऑफ इंडिया के सेक्टर-छै भिलाई म बुद्ध बिहार म चलत निर्माण काम ल पूरा करे बर पच्चीस लाख रूपिया देके घोसना करीन।
उहें, पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह काली जगदलपुर के लालबाग मैदान म डॉक्टर अंबेडकर के मूर्ति म फूलमाला चढ़ईन। ए मउका म डॉक्टर सिंह ह किहीन कि डॉक्टर अंबेडकर ह समाज के हर तबका ल समानता के एक सूत्र म पिरोय के काम करीन। ए मउका म भाजपा के ‘स्थापना दिवस‘ म सुरू होय ‘दीवार लेखन‘ अभियान म जगदलपुर के वार्ड क्रमांक-पन्द्रह म दीवार म कमल के चिन्हा बनाके लोगन मन ले ए अभियान ले जुड़े के अपील करे गीस।
कारीकरम के बाद पत्रकार मन ले गोठबात करत डॉक्टर सिंह ह आरोप लगईन हे कि कांग्रेस सरकार डहार ले सत्ता म आय ले पहिली सराबबंदी के वादा करे रिहीस। फेर, सरकार बने के बाद गांव-गांव म सराब के दुकान खुल गेहे। ओमन किहीन कि प्रदेस म नसाखोरी अउ अपराध सरलग बाढ़त हे अउ सरकार एला रोक नइ पावत हे।
अमरनाथ यात्रा-पंजीकरण
जम्मू-कश्मीर म बैसठ दिन के अमरनाथ यात्रा ए बछर एक जुलाई ले सुरू होके इकतीस अगस्त तक चलही। ए यात्रा अनंतनाग जिला म पहलगाम अउ गंदरबल जिला म बालताल रद्दा ले एके संग सुरू होही। ए यात्रा बर पंजीयन सत्रह अप्रैल ले ऑनलाइन अउ ऑफलाइन, दूनो किसम ले करे जा सकही।
जनजाति सुरक्षा मंच-महारैली
धर्मांतरण करइया मनके आरक्षण खतम करे के मांग ल लेके जनजाति सुरक्षा मंच छत्तीसगढ़ के तत्वावधान म काली राजधानी रईपुर म महारैली निकाले जाही। ए रैली वीआईपी रोड श्रीराम मंदिर के तीर ले निकलही। ए रैली म प्रदेसभर ले प्रदर्सनकारी सामिल होही।
खबर के मुताबिक जनजाति सुरक्षा मंच ह धर्मांतरण मनखे मन ल अनुसूचित जनजाति के सूची ले बाहिर करे के मांग करे हे।
केन्द्रीय सचिव-बस्तर
केन्द्रीय जनजातीय मंत्रालय के सचिव अनिल कुमार झा ह अपन बस्तर प्रवास के दउरान आज तुरेनार के रीपा सेंटर के गतिविधि अउ दरभा के पर्यटन स्थल ल देखीन। एखर पहिली, श्री झा ह काली एकलव्य विद्यालय, रेशम धागा प्रसंस्करण केन्द्र, कोसा विक्रय केन्द्र आदिशिल्प, आसना स्थित बादल, बाबूसेमरा स्थित ट्रायफूड पार्क, कचरा प्रबंधन केन्द्र अउ बकावंड स्थित काजू प्रसंस्करण केन्द्र ल घलो देखीन। ए दउरान ओमन एकलव्य विद्यालय के व्यवस्था ल अउ सुघ्घर करे के निरदेस दीन। श्री झा ह बस्तर कोसा के उत्पाद के सुघ्घर प्रचार-प्रसार के संग दिल्ली जइसन बड़े सहर म आउटलेट खोले बर किहीन। ओमन ट्रायफूड पार्क के निर्माण काम म होवत देरी ल लेके नाराजगी जतावत फूडपार्क के बचे काम ल जल्दी पूरा करे के घलो निरदेस दीन।
बस्तर फाईटर-दीक्षांत परेड
बीजापुर जिला म आज बस्तर फाईटर अउ नवा आरक्षक मनके सामलात दीक्षांत परेड समारोह आयोजित करे गीस। एमा पहिली बखत तृतीय लिंग समुदाय के नौ झिन अभ्यर्थी घलो पुलिस विभाग म सेवा दीहीं। ए मउका म बस्तर रेंज के पुलिस महानिरीक्षक सुंदरराज पी. ह परेड के निरीक्षण करीन अउ सुघ्घर काम करइया मन ल सम्मानित करीन।
उहें, काली सोलह अप्रैल के जगदलपुर स्थित पुलिस प्रशिक्षण केन्द्र म बस्तर फाईटर अउ नवा आरक्षक के संयुक्त दीक्षांत परेड आयोजित करे जाही।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘कोरिया‘‘ जिला के बारे म जानकारी दे जाही।
हड़ताल-ग्राम सभा-बहिष्कार
राजनांदगांव जिला म राष्ट्रीय आजीविका मिशन-बिहान के महिला मन ह तनखा बढ़ाय समेत चार सूत्रीय मांग ल लेके अनिश्चितकालीन हड़ताल म हवय। इही कड़ी म आज ओमन रैली निकालीन, जउन सहर के आने-आने रद्दा ले होके गुजरीस। ए दउरान प्रदर्सनकारी मन ह नाराबाजी घलो करीन। उहें, पंचायत सचिव मन ह काली ले पंचायत म राखे गे ग्राम सभा के बहिष्कार करीन।
खबर के मुताबिक पंचायत सचिव सासकीयकरण के मांग ल लेके पाछु सोलह मार्च ले अनिश्चितकालीन हड़ताल म हवय।
हल्बी-साप्ताहिक समाचार बुलेटिन
काली इतवार के ‘‘हल्बी‘‘ म साप्ताहिक समाचार बुलेटिन प्रसारित करे जाही। करीबन पन्द्रह मिनट बेरा के ए साप्ताहिक समाचार बुलेटिन बिहनिया साढ़े 7 बजे ले आकाशवाणी केन्द्र, जगदलपुर ले प्रसारित करे जाही। एला बस्तर संभाग म सुने जा सकही।