विस सत्र-अधिसूचना
छत्तीसगढ़ के पांचवां विधानसभा के सातवां सत्र पच्चीस अगस्त ले सुरू होही। ए सत्र म चार बइठका होही।
विधानसभा के प्रमुख सचिव चंद्रशेखर गंगराड़े ह एक ठिन प्रेस विज्ञप्ति म बतईन कि ए सत्र पच्चीस अगस्त ले सुरू होही, जउन अट्ठाईस अगस्त तक चलही। ए सत्र म वित्तीय कामकाज के संगेसंग आने सरकारी कामकाज निपटाय जाही।
त्यौहार-किराना दुकानें
राज्य सरकार ह ईद अउ रक्षाबंधन तिहार ल देखत अउ कोरोना संक्रमण के चलत लाॅकडाउन वाले जघा मन म काली बिहनिया छह बजे ले दस बजे तक किराना दुकान ल खुल्ला राखे के निरदेस जारी करे हे। ए दउरान लोगन मन ल मास्क अउ सोसल डिस्टेंसिंग के संगेसंग राज्य सरकार डहार ले जारी आने निरदेस के पालन करना जरूरी होही।
लाॅकडाउन
बस्तर जिला के नगरीय निकाय क्षेत्र मन म आज बिहनिया ग्यारह बजे ले लाॅकडाउन लागू होगे। ए लाॅकडाउन छह अगस्त रइही। ए दउरान जम्मों प्रकार के कामकाज उपर पूरा रोक लगा दे गेहे।
ऐति, महासमुंद जिला के नगरीय निकाय क्षेत्र मन म लाॅकडाउन के पालन नइ करइया मन उपर कड़ा कार्रवाई करे जाही। कलेक्टर ह लोगन मन ले अपील करे हवय कि लाॅकडाउन के पालन करय।
कोरोना-मरीज
प्रदेस म आज घलो आने-आने जिला ले कोरोना संक्रमित नवा मरीज मिले के पुष्टि होय हे।
राजधानी रईपुर म आज स्वास्थ्य मंत्री के बंगला के दस झिन करमचारी कोरोना पाॅजिटिव पाय गीस। स्वास्थ्य मंत्री अउ उंखर बिसेस सहायक के संगेसंग पीएसओ के रिपोर्ट निगेटिव आय हे।
ओति, नवा रईपुर स्थित मंत्रालय के पांच झिन करमचारी घलो कोरोना पाॅजिटिव मिले हे, जेखर सेती सामान्य प्रसासन विभाग ह तीन अगस्त तक मंत्रालय अउ इंद्रावती भवन ल बंद करे के आदेस जारी करे हे। अइसने, कोरोना कमांड सेंटर के दू झिन अलग-अलग विंग के अधिकारी घलो कोरोना संक्रमित होगे हे।
उहें, कोरिया जिला के मनेन्द्रगढ़ उप जेल म जेल प्रहरी के संगेसंग आठ झिन लोगन मन म कोरोना के संक्रमण पाय गेहे।
ऐति, दुरूग जिला म कोरोना संक्रमण के बाढ़त मामला ल देखत जिला प्रसासन ह कचांदूर स्थित चंदूलाल चंद्राकर मेडिकल कालेज अउ हाॅस्पिटल परिसर ल कोविड केयर सेंटर बनाय हे, जउन ह आज ले सुरू होगे हे।
अइसने, महासमुंद जिला म कोरोना संक्रमण के रोकथाम बर मुफत म कोरोना जांच सिविर लगाय जात हे।
ईद-अपील
काली ईद-उल-अजहा के तिहार मनाय जाही। एसो कोरोना संक्रमण ल देखत राज्य सरकार ह लोगन मन ले ईद ल घर म रहि के मनाय के अपील करे हे। ए बारे म छत्तीसगढ़ राज्य वक्फ बोर्ड ह घलो एक ठिन पत्र जारी करके ईद के तिहार ले सादगी ले मनाय के अपील करे हे। वक्फ बोर्ड के पत्र के मुताबिक ईद के मउका म ईदगाह मन म नमाज़ नइ पढ़े जाय। उहें, फजर के तुरते बाद ईद-उल-अजहा अदा कर ले जाही। ए बार ईद मिलन के कारीकरम घलो नइ होय। वक्फ बोर्ड डहार ले जारी अपील प्रदेस के जम्मों मस्जिद, ईदगाह अउ मदरसा मन बर हरय।
राज्यपाल अनुसुईया उइके अउ मुख्यमंत्री भूपेश बघेल ह ईद-उल-अजहा के मउका म मुस्लिम समुदाय के लोगन मन ल बधाई दे हवय। मुख्यमंत्री ह लोगन मन ले सोसल डिस्टेंसिंग के पालन करत परब ल मनाय के अपील करे हे।
आयुष काढ़ा
महिला अउ बाल विकास मंत्री अनिला भेड़िया अउ वन मंत्री मोहम्मद अकबर ह वीडियो कान्फ्रेंसिंग के माध्यम ले काली कबीरधाम जिला के जनपद पंचायत बोड़ला म आयुष काढ़ा चूर्ण बांटे के सुभारंभ करीन। ए मउका म श्रीमती भेड़िया ह किहीन कि कोरोना संक्रमण ले बचाव बर लोगन मन ल आयुष काढ़ा ले फायदा मिलही।
वन मंत्री ह किहीन कि रोग प्रतिरक्षा के विकास म आयुष काढ़ा चूर्ण ले मदद मिलही। एखर खाय ले कोरोना जइसन गंभीर बीमारी के संक्रमण ले घलो बचे जा सकथे। ओमन बतईन कि आयुष काढ़ा चूर्ण ल चार ठिन औषधि – तुलसी, दाल चीनी, सोंठ अउ काली मिर्च ले तियार करे गेहे।
मुख्यमंत्री/केन्द्रीय मंत्री-बातचीत
मुख्यमंत्री भूपेश बघेल अउ केन्द्रीय कोयला मंत्री प्रहलाद जोशी के उपस्थिति म आज प्रदेस म कोयला उत्पादन अउ कोल ब्लाॅक ले जुड़े आने-आने बिसय उपर गोठबात होईस। ए बइठका म कोयला मंत्रालय के सचिव अनिल कुमार जैन, कोल इंडिया लिमिटेड के चेयरमैन प्रमोद अग्रवाल अउ एसईसीएल के सीएमडी ए.पी. पंडा के संगेसंग राज्य सरकार के बड़का अधिकारी मन आय रिहीन।
केन्द्रीय मंत्री ह दक्षिण पूर्व मध्य रेलवे के बिलासपुर मंडल के बड़का अधिकारी मन संग घलो समीक्षा बइठका करीन।
एखर पहिली, काली रतिहा केन्द्रीय कोयला मंत्री ह कोरबा के सासंद ज्योत्सना महंत अउ राजस्व मंत्री के संग मिलीन। ए दउरान श्रीमती महंत ह कोरिया जिला के मनेन्द्रगढ़ म एसईसीएल डहार ले मेडिकल कालेज के स्थापना के प्रस्ताव ल मंजूरी देके बात किहीन। केन्द्रीय मंत्री ह जरूरी कार्रवाई करे के भरोसा देवाईन।
स्कूली शिक्षा-प्रवेश
राज्य सरकार ह एसो के स्कूली सैक्षणिक सत्र बर लइका मनके एडमिसन के काम तय कर हे। प्रवासी मजूर के लइका मन ल घलो स्कूल मन म प्रवेस दे जाही। कक्षा ग्यारहवीं ल छोड़ के आने जम्मों कक्षा मन बर प्रवेस के काम पन्द्रह अगस्त तक पूरा कर ले जाही। कक्षा ग्यारहवीं म प्रवेस बर फाॅर्म स्कूल के काउंटर मन म इकतीस अगस्त तक मुफत म मिलही।
विवि-आॅनलाइन परीक्षा
प्रदेस के विश्वविद्यालय अउ महाविद्यालय मन म अंतिम वर्ष अउ अंतिम सेमेस्टर के जम्मों बिसय के परीक्षा आनलाॅइन होही। ए बारे म उच्च सिक्षा विभाग ह आदेस जारी कर देहे। एखर बर यूजीसी डहार ले जारी निरदेस के पालन म छात्र मन म प्रश्न पत्र आॅनलाइन भेजे के फइसला ले गेहे। ए फइसला कोरोना संक्रमण ल देखत ले गेहे।
रेल इंजन
चार मालगाड़ी ल जोड़े के सुपर पायथन ट्रेन के ट्रायल के बाद दक्षिण पूर्व मध्य रेलवे जोन म मालवाहक रेल इंजन के पहिली बार वाणिज्यिक परिवहन सुरू होईस। रेल इंजन नागपुर मंडल के स्टेसन ले निकल के भिलाई रेलवे स्टेसन पहुंचीस। देस म ही बने अब तक सबले जादा पावर वाले बारह हजार एचपी क्षमता के मालवाहक रेल इंजन के प्रयोग मालगाड़ी मनके चलाय बर होही। एला बनाय के बाद भारत ह दस हजार हाॅर्स पावर वाले इंजन उत्पादन के तकनीक वाला दुनिया के छठवां देस बन गेहे।
