ऐति, छत्तीसगढ़ म घलो डॉक्टर अंबेडकर के जयंती म आने-आने कारीकरम राखे जात हे। मुख्यमंत्री भूपेश बघेल ह आज राजधानी रईपुर के अंबेडकर चउक स्थित बाबा साहेब के आदम कद प्रतिमा म फूलमाला चढ़ाके ओमन ल श्रद्धांजलि अर्पित करीन। उहें, मुख्यमंत्री ह रईपुर म आयोजित सार्वजनिक जयंती समारोह ल संबोधित करत किहीन कि देस के लोगन मनके सबले बड़का ताकत बाबा साहेब अंबेडकर के दे गे हमर संविधान हरय। हमर संविधान हमन ल अधिकार संपन्न बनाथे। बाबा साहेब ह सोषित अउ पीड़ित मनके आवाज बनके ओमन के अधिकार बर लड़ाई लड़ीन।
उहें, विधानसभा अध्यक्ष डॉक्टर चरणदास महंत ह आज विधानसभा परिसर स्थित सेंट्रल हॉल म डॉक्टर अंबेडकर के तैलचित्र म फुल अर्पित करीन। ए मउका म डॉक्टर महंत ह विधानसभा के नवा परिसर म डॉक्टर अंबेडकर के प्रतिमा लगाय के घोसना करीन।
ऐति, प्रदेस भाजपा अध्यक्ष अउ सांसद अरूण साव ह बिलासपुर स्थित गुरू घासीदास केन्द्रीय विश्वविद्यालय डहार ले आयोजित अंबेडकर जयंती समारोह म सामिल होइन। ए मउका म ओमन विश्वविद्यालय ल समाज ले जोड़े अउ सेवा अउ ज्ञान ल परस्पर आदान-प्रदान करे के सेती बने जी.जी.वी. श्रवण लाइन के सुभारंभ करीन। एखरे संग ओमन प्रतिभावान विद्यार्थी मन ल सम्मानित करीन।
अंबेडकर जयंती-02
उहें, दक्षिण पूर्व मध्य रेलवे के बिलासपुर, रईपुर अउ नागपुर रेलमंडल म डॉक्टर अंबेडकर के जयंती म कारीकरम आयोजित कर ओमन ल श्रद्धांजलि दे गीस। दक्षिण पूर्व मध्य रेलवे मुख्यालय म राखे गे कारीकरम म महाप्रबंधक आलोक कुमार अउ रईपुर रेलमंडल म राखे गे कारीकरम म मंडल रेल प्रबंधक संजीव कुमार ह डॉक्टर अंबेडकर के प्रतिमा म फूलमाला चढ़इन।
अइसने, एस.ई.सी.एल. मुख्यालय म घलो डॉक्टर अंबेडकर के जयंती मनाय गीस। ए मउका म तकनीकी निदेशक एस.के. पाल अउ निदेशक जी श्रीनिवासन समेत दूसर अधिकारी-कर्मचारी मौजूद रिहीन। उहें, लालबाग अंबेडकर चउक म घलो डॉक्टर अंबेडकर जयंती मनाय गीस।
केन्द्रीय मंत्री-समीक्षा
केन्द्रीय खाद्य प्रसंस्करण उद्योग अउ जल शक्ति राज्यमंत्री प्रहलाद सिंह पटेल ह काली रईपुर म राखे गे बइठक म राज्य म संचालित जल जीवन मिशन अउ स्वच्छ भारत अभियान समेत दूसर केन्द्रीय योजना मनके समीक्षा करीन। ए दउरान ओमन जल जीवन मिशन के काम ल मार्च-दू हजार चौबीस तक पूरा करे के निरदेस दीन। केन्द्रीय मंत्री ह जल जीवन मिशन योजना के काम के वर्तमान स्थिति के जानकारी लेवत मैदानी स्तर म योजना के क्रियान्वयन तेजी ले करे बर किहीन। ओमन किहीन कि जल परीक्षण जम्मों जिला म वाटर टेस्टिंग लैब अनिवार्य रूप ले स्थापित करे जाय। बइठका म केन्द्रीय मंत्री ह स्वच्छ भारत मिशन के तहत शौचालय निर्माण के लक्ष्य ल जल्दी पूरा करे के निरदेस दीन।
अपन रईपुर प्रवास के दउरान पत्रकार मन करा चर्चा करत केन्द्रीय राज्यमंत्री प्रहलाद सिंह पटेल ह किहीन कि केन्द्र अब छत्तीसगढ़ समेत ओ जम्मों राज्य मन ल चिन्हा करत हे, जिहां जल जीवन मिशन के तहत काम ल अपेक्षित गति नइ मिल पाय हे। ओमन बतईन कि राज्य सरकार ल तीन सौ अट्ठारह गांव म दस लाख नल कनेक्शन उपलब्ध कराना हे, फेर ए दिसा म अभी स्थिति निरासाजनक हरय।
ग्राम सभा
प्रदेस म आज ले ग्राम सभा मनके आयोजन के सिलसिला सुरू होगे हे। ग्राम सभा म प्रदेस म ए बेरा चलत सामाजिक आर्थिक सर्वेक्षण ल लेके चर्चा करे जात हे। ग्राम सभा म पाछु बइठक म पारित संकल्प अउ आने-आने कल्याणकारी योजना के संबंध म प्रतिवेदन प्रस्तुत करे गीस। संघरा पाछु तिमाही के आय-व्यय के समीक्षा घलो करे गीस। ग्राम सभा के गतिविधि मन ल वाइब्रेंट ग्रामसभा पोर्टल अउ पंचायत के विभाग के आधिकारिक पोर्टल म अपलोड करे बर केहे गेहे। ग्राम सभा म मौसमी बीमारी के निदान उपर चर्चा करे गीस।
फोर्टिफाइड चावल
महिला अउ लइका मन म कुपोषण अउ एनीमिया ल दूर करे बर प्रदेस के जम्मों सासकीय उचित मूल्य दुकान म ए दिन म सामान्य चाउर के जघा फोर्टिफाइड चाउर के वितरण करे जात हे। एक अप्रैल ले चालू करे गे ए योजना के तहत प्राथमिकता, अंत्योदय, एकल निराश्रित अउ निःशक्तजन श्रेणी के रासनकार्डधारी मन ल फोर्टिफाइड चाउर दे जात हे।
फोर्टिफाइड चाउर म मौजूद आयरन, फोलिक एसिड अउ विटामिन-बी टवेल जइसे पोषक तत्व ह लोगन मन म खून के कमी ल रोकथे। प्रदेस के कई जगह म फोर्टिफाइड चाउर ल लेके प्लास्टिक चाउर होय के भ्रम आगू आय हे। एला लेके खाद्य विभाग ह स्पष्ट करे हे कि फोर्टिफाइड चाउर सामान्य चाउर ले जादा चिकना अउ अलग दिखथे अउ एमा प्लास्टिक चाउर नइ मिले हे। विभाग कोति ले लोगन मन म भ्रम के स्थिति ल दूर करे बर रासनकार्डधारी मन ल आंगनबाड़ी कार्यकर्ता, मितानिन अउ उचित मूल्य दुकान म बैनर-पोस्टर के माध्यम ले फोर्टिफाइड चाउर ल पकाय के तरीका अउ बउरे के संबंध म जागरूक करे जात हे।
माओवादी-समर्पण
सुकमा जिला म आज चार झिन माओवादी मन पुलिस के आगू आत्मसमर्पण करीन हे। एमा एक झिन उपर एक लाख रूपिया के इनाम घोसित रिहीस। आत्मसमर्पण करइया ए माओवादी सुकमा अउ दंतेवाड़ा जिला म सक्रिय रिहीन अउ एमन उपर कई ठिन माओवादी गतिविधि म सामिल रेहे के आरोप हे। आत्मसमर्पण करइया जम्मों माओवादी मन ल राज्य सासन के पुनर्वास नीति के लाभ दे जाही।
बिरनपुर-घटना
बेमेतरा जिला के बिरनपुर गांव म पाछु दिन होय घटना के बाद सांति अउ सुरक्षा व्यवस्था बनाय राखे बर बिरनपुर समेत साजा अउ बेमेतरा सहरी क्षेत्र म धारा एक सौ चवालीस प्रभावसील हे। बिरनपुर गांव म कोनों भी बाहिर व्यक्ति के प्रवेस उपर प्रतिबंध लगा दे गेहे। जिला प्रसासन ह लोगन मन ले अपील करीन हे कि कोनों भी बाहिर व्यक्ति ग्राम बिरनपुर म प्रवेस झन करय। संघरा उल्लंघन करइया मनके विरूद्ध कड़ा कार्रवाई करे के चेतावनी दे गेहे।
इही बीच, बिरनपुर गांव के एक मकान म कुछ लोगन मन ल डहार ले आगी लगाय जाय के आरोप म पुलिस ह पांच मनखे ल गिरफ्तार करे हे।
कोरोना समाचार
प्रदेस म कोरोना संक्रमण के मामला सरलग बाढ़त हे। स्वास्थ्य विभाग डहार ले जारी आंकड़ा अनुसार काली प्रदेस म कोरोना संक्रमण के तीन सौ सत्तर नवा मामला आगू अइस। उहें, कोरोना संक्रमण ले काली दू मरीज के मउत होगे। वर्तमान म एक हजार दू सौ साठ मरीज मनके इलाज प्रदेस के आने-आने अस्पताल अउ होम आइसोलेशन म चलत हे। ए बेरा प्रदेस के पॉजिटीविटी बाढ़के सात दशमलव पांच-एक प्रतिसत होगे हे।
ऐति, गरियाबंद जिला म पाछु दू दिन म कोरोना संक्रमण के पचास नवा मामला आगू आय हे। एमा कस्तूरबा आदिवासी विद्यालय मैनपुर अउ देवभोग के उनचालीस छात्रा घलो सामिल हरय। जिला म संक्रमित मनके बाढ़त संख्या ल देखत अस्पताल प्रबंधन ह जम्मों मरीज मनके कोरोना जांच अनिवार्य कर देहे। उहें, प्रशासन ह लोगन मन ले कोरोना गाइडलाइन के पालन करे के अपील करे हे।
ओति, बीजापुर जिला अस्पताल म जांच के दउरान तेरह मनखे मन म कोरोना संक्रमण के पुष्टि होय हे।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत कोरोना संक्रमण ले बचाव अउ तैयारी उपर डॉक्टर भीमराव अंबेडकर अस्पताल के वरिष्ठ चिकित्सक डॉक्टर ओ.पी. सुंदरानी ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली पन्द्रह अप्रैल के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।