केंद्र सरकार ह देशभर म युवा मन ल रोजगार देवाय बर एक विशेष अभियान शुरू करे हे । एखर तहत प्रधानमंत्री नरेंद्र मोदी ह आज केंद्र सरकार के आने आने विभाग मन म हालेच म नियुक्त करे गे इकहत्तर हजार कर्मी मन ल नियुक्ति पत्र बांटीन।
ए मउका म प्रधानमंत्री ह कहिन कि आज के भारत अइसे नीति अउ कार्ययोजना मनके संग आगू बाढ़त हे, जेखर ले नवा मउका के द्वार खुलत हे। ओमन कहिन कि देश म इक्कीसवीं सदी के तीसरा दशक म रोजगार अउ स्वरोजगार के जउन मउका पैदा होवत हे, उखर पहिली कल्पना घलो नइ करे जा सकत रीहिस हे। प्रधानमंत्री ह कहिन कि भारत ए बेरा पूरा दुनिया म सबले तेजी ले बाढ़त अर्थव्यवस्था हे।
आत्मनिर्भर भारत अभियान के महत्व उपर चर्चा करत हुए प्रधानमंत्री ह कहिन कि ये ह उंखर कार्यकम म ले एक हे जउन गांव अउ शहर दूनो क्षेत्र मन म रोजगार के समान मउका देथे।
श्री मोदी ह कहिन कि बुनियादी ढांचा के क्षेत्र म रोजगार के बड़ संभावना हे। एला ध्यान म राखत केंद्र सरकार ह अपन मौजूदा कार्यकाल के दउरान बुनियादी ढांचा के विकास के पर्याप्त धनराशि उपलब्ध कराय हे।
केंद्र सरकार के विशेष अभियान के तहत रायपुर म घलो डब्ल्यू आर.एस. कॉलोनी स्थित सामुदायिक भवन म रोजगार मेला के आयोजन करे गीस। ए मउका म केन्द्रीय जल शक्ति राज्यमंत्री प्रहलाद पटेल, रायपुर सांसद सुनील सोनी अउ पूर्व विधानसभा अध्यक्ष प्रेमप्रकाश पांडेय समेत कार्यक्रम म मौजूद लोगन मन ह प्रधानमंत्री के वर्चुअल संबोधन ल सुनीन। ए मउका म केंद्रीय राज्य मंत्री ह पच्चीस युवा मन ल नियुक्ति पत्र दीन। कार्यक्रम ल संबोधित करत केंद्रीय राज्यमंत्री श्री पटेल ह कहिन कि रोजगार पाना जीवन के लक्ष्य नहीं हे, फेर ये एक नवा शुरूआत हरय। ओमन युवा मनके आह्वान करीन कि वोमन तकनीक के क्षेत्र म होवइया बदलाव के हमेशा जानकारी राखंय।
कार्यक्रम ल संबोधित करत हुए सांसद सुनील सोनी ह युवा मनके आह्वान करीन कि वोमन प्रधानमंत्री नरेंद्र मोदी के नवा भारत के निर्माण अउ एखर संकल्पना म सहभागी बनय।
ए मउका म दू सौ बारा युवा मन मौजूद रीहिन, जेमन ल रेलवे समेत आने आने सरकारी विभाग म नियुक्ति पत्र सौंपे गीस।
उंहे बिलासपुर स्थित दक्षिण पूर्व मध्य रेलवे के मुख्यालय म घलो रोजगार मेला के तहत दू सौ चौव्वन नवनियुक्त कर्मी मन ल नियुक्ति पत्र सौंपे गेहे। कार्यक्रम म बिलासपुर के सांसद अरूण साव, क्षेत्रीय विधायक अउ पूर्व विधानसभा अध्यक्ष धरमलाल कौशिक घलो मौजूद रीहिन।
मुख्यमंत्री भूपेश बघेल ह आज जगदलपुर म राखे गे भरोसे का सम्मेलन म मुख्यमंत्री आदिवासी परब सम्मान निधि योजना के शुभारंभ करीन। कांग्रेस के राष्ट्रीय महासचिव प्रियंका गांधी वाड्रा ये कार्यक्रम म माइपहुना के रूप म मौजूद रीहिन। ए मउका म मुख्यमंत्री अउ प्रियंका गांधी ह बस्तर संभाग के आने आने महिला समूह मन ल सहायता राशि के चेक बांटीन। उंहे मुख्यमंत्री ह एक हजार आठ सौ चालीस ठिन ग्राम पंचायत ल पहिली किस्त के रूप म पांच-पांच हजार रूपिया के राशि जारी करीन। ए योजना के चलत आदिवासी परब अउ तिहार के आयोजन बर राज्य शासन डहार ले ग्राम पंचायत मन ल अनुदान घलो दे जाही।
कार्यक्रम ल संबोधित करत हुए कांग्रेस के राष्ट्रीय महासचिव प्रियंका गांधी वाड्रा ह कहिन कि पाछू चार बछर के दउरान छत्तीसगढ़ म अउ खास करके बस्तर क्षेत्र म विकास के कतकोन काम करे गेहे। एखरे सेती इंहा माओवाद के समस्या घलो कम होगे हे। ओमन कहिन कि देश म सबले कम बेरोजगारी के दर छत्तीसगढ़ म हे। ओमन प्रदेश के वन क्षेत्र म पांच लाख ले जादा आदिवासी मन ल भुंइया के पट्टा दे जाय उपर घलो चर्चा करीन। कार्यक्रम म मुख्यमंत्री भूपेश बघेल ह राज्य सरकार के आने आने कल्याणकारी योजना के चर्चा करीन। ए मउका म राज्य मंत्रिमंड के कतकोन सदस्य मन घलो मौजूद रीहिन।
अपन बस्तर प्रवास के बेरा मुख्यमंत्री ह एक सौ उनतीस करोड़ रूपिया के आने आने विकास काम के लोकार्पण अउ भूमिपूजन घलो करीन। एमा चित्रकोट जलप्रपात म लाईट अउ साउण्ड शो अउ सात ठिन नलजल योजना समेत कतकोन काम शामिल हे।
प्रदेश म काली ले ग्राम सभा के आयोजन करे जाही। पंचायत विभाग ह ए संबंध म जम्मां कलेक्टर मन ल परिपत्र जारी कर देहे। परिपत्र के अनुसार ग्राम सभा म ए बेरा प्रदेश म चलत सामाजिक-आर्थिक सर्वेक्षण उपर गोठबात करे जाही। काली होवइया ग्राम सभा म पाछू बइठक म पारित संकल्प अउ आने आने कल्याणकारी योजना के संबंध म प्रतिवेदन प्रस्तुत करे के संग पाछू तिमाही के आय-व्यय के समीक्षा घलो करे जाही । संगेसंग पेसा नियम के अनुसार ग्रामसभा कोष के नाम ले बैंक खाता खुलवाय के निर्देश घलो दीन। ए बैंक खाता के संचालन सरपंच अउ सचिव के संयुक्त हस्ताक्षर ले करे जाही ।
बतादन कि छत्तीसगढ़ पंचायत राज अधिनियम के तहत हर तीन महीना म ग्रामसभा के कम ले कम एक सम्मेलन आयोजित करे के प्रावधान हे।
दंतेवाड़ा जिला के कटेकल्याण इलाका म सुरक्षा बल के जवान मन ह दू झिन माओवादी मन ल गिरप्तार करे हे। एमा ले एक माओवादी उपर एक लाख रूपिया के इनाम घोषित रीहिस हे।
ओति बीजापुर जिला के गंगालूर थाना क्षेत्र म पदेड़ा गांव के तीर माओवादी मन ह दू ठिन गाड़ी मन म आगी लगा दीन। ए घटना के बाद पुलिस ह तीरतखार के क्षेत्र म तलाशी अभियान शुरू कर देहे।
अंबिकापुर बायपास-स्वीकृति
केंद्रीय सड़क परिवहन अउ राष्ट्रीय राजमार्ग मंत्री नितिन गडकरी ह अंबिकापुर ले जवइया राष्ट्रीय राजमार्ग उपर दू लेन वाला बाईपास सड़क बनाय बर करीबन एक सौ चवालिस करोड़ रूपिया मंजूर करे हे। ये बायपास सड़क राष्ट्रीय राजमार्ग क्रमांक-तीन सौ तिरालिस म अंबिकापुर ले रामानुजगंज के बीच बनाय जाही । ये जानकारी केंद्रीय मंत्री श्री गडकरी अपन ट्वीट संदेश म दीन।
सुप्रीम कोर्ट के मुख्य न्यायाधीश जस्टिस डीवाई चंद्रचूड के अध्यक्षता वाले सुप्रीम कोर्ट के कॉलेजियम ह छत्तीसगढ़ हाईकोर्ट म जज नियुक्त करे बर न्यायिक अधिकारी संजय कुमार जायसवाल के नाव के सिफारिश करे हे। कॉलेजियम के प्रस्ताव म केहे गेहे कि पाछू बछर दू सितंबर के छत्तीसगढ़ हाईकोर्ट के मुख्य न्यायाधीश ह अपन दू झिन बड़का सहयोगी मनके परामर्श ले न्यायिक अधिकारी संजय कुमार जायसवाल ल उच्च न्यायालय म न्यायाधीश के रूप म पदोन्नत करे के सिफारिश करे रीहिन।
संविधान निर्माता डॅाक्टर भीमराव अंबेडकर के एक सौ बत्तीसवां जयंती म काली राजधानी रायपुर समेत प्रदेशभर म कतकोन कार्यक्रम करे जाही। ए मउका म डॅाक्टर अंबेडकर जयंती समारोह समिति समेत आने आने संस्था मन डहार ले रायपुर के कलेक्टर चौक म स्थित डॅाक्टर अंबेडकर के मूर्ति म बौद्ध समाज के पदाधिकारी अउ सदस्य मन डहार ले श्रद्धासुमन अर्पित करे जाही।
उंहे काली डॅाक्टर अंबेडकर के जयंती म भाजपा डहार ले घलो सेवा सप्ताह अउ सेवा पखवाड़ा के तहत समाज कल्याण के आने आने कार्यक्रम आयोजित करे जाही। ए सप्ताह के अंतर्गत भाजपा के स्थापना दिवस ले लेके अब तक स्वच्छता अउ जागरूकता उपर केंद्रित कतकोन कार्यक्रम पहिलीच करे जा चुके हे। एखर तहत भाजपा अनुसूचित जाति मोर्चा डहार ले सफाई मित्र मनके सम्मान घलो करे गेहे। एमा रायपुर शहर जिला भाजपा अध्यक्ष जयंती पटेल समेत आने आने पदाधिकारी मन शामिल होइन। काली भाजपा अनुसूचित जाति मोर्चा डहार ले डॅाक्टर अंबेडकर के योगदान के सुरता करे बर श्रद्धांजलि कार्यक्रम के आयोजन करे जाही।