प्रधानमंत्री नरेन्द्र मोदी ह काली तेरा अप्रैल के वीडियो कान्फ्रेंसिंग ले करीबन इकहत्तर हजार भर्ती होय नवा लोगन ल नियुक्ति पत्र बांटही। ए बेरा प्रधानमंत्री लोगन ल संबोधित घलो करही। देसभर ले चुने गे लोगन के नियुक्ति भारत सरकार के कई ठिन विभाग म आने-आने पद म होही।
उंहे छत्तीसगढ़ म घलो रायपुर अउ बिलासपुर जिला म कार्यक्रम के आयोजन करे जाही। रायपुर के डब्लू आर एस कालोनी के रेलवे सामुदायिक भवन म काली केंद्रीय सेवा बर चतुर्थ भर्ती अभियान रोजगार मेला होवइया हे। एमा चार सौ छब्बीस लोगन मन ल नियुक्ति पत्र दे जाही। ए बेरा म केंद्रीय राज्य मंत्री प्रहलाद सिंह पटेल मुख्य अतिथि के रूप म शामिल होही अउ लोकसभा सांसद सुनील सोनी के संगेसंग रेल प्रबंधक संजीव कुमार ह घलो मौजूद रीहिन।
एति बिलासपुर के बुधवारी बाजार के उत्तर पूर्व संस्थान म होवइया रोजगार मेला म केंद्रीय जनजाति विकास राज्यमंत्री रेणुका सिंह ह शामिल होही। ए बेरा म केंद्रीय राज्यमंत्री जवान लईका मन ल नियुक्ति पत्र सौंपही।
बिरनपुर घटना 01
बेमेतरा जिला के बिरनपुर गांव म दू समुदाय के बीच होय विवाद के बाद आज घलो ए जगा म तनाव के स्थिति बने हुए हे। सुरक्षा ल देखत हुए बिरनपुर गांव ले पंद्रह किलोमीटर दूरिहा म साजा म बड़का संख्या म पुलिस जवान मन ल तैनात करे गेहे। उंहे जिला भर म तेरा ठिन कंपनी के फोर्स घलो लगाय गेहे। जिला म धारा एक सौ चौवालिस लागू हे। उंहे गांव म कोनो भी अनजान मनखे के भीतरी प्रवेश म रोक लगा दे गेहे। जिला म धरना-प्रदर्शन अउ आने सार्वजनिक जगा म भीड़ इकट्ठा होवइया काम बुता उपर घलो रोक लगाय गेहे।
इही बीच एला देखत हुए कलेक्टर पी.एस. एल्मा अउ दुर्ग संभाग के प्रभारी आईजी आनंद छाबड़ा के अध्यक्षता म आज शांति समिति के बइठका होइस। ए बइठक म सर्व समाज के प्रमुख मन ह ए घटना के निंदा करत हुए गांव म शांति व्यवस्था बनाय राखे म सहमति जताय हे। कलेक्टर ह घलो एखर संबंध म लोगन मनले अपील करे हे। ओमन ह समाज प्रमुख मनले कीहिन हे कि बिरनपुर के घटना म शांति भंग करे म जउन भी मनखे शामिल हे, ओ सबो लोगन मनके खिलाफ कानूनी कार्रवाई करे जाही।
उंहे पुलिस अधीक्षक ह जिला म शांति व्यवस्था बनाये राखे अउ कोनो भी लोगन मनके बहकावा म झन आय बर केहे हे। ओमन ह अपवाद ले बचे फेक वीडियो, फेक फोटो या फेर कोनो भी तरीका के भड़काउ पोस्ट जेखर ले कोनो के भी धार्मिक आस्था या फेर मनखे के छवि ह खराब होवय अइसन बात ल सोशल मीडिया म पोस्ट करे ले बचे बर समझाइश दीन हे।
बिरनपुर घटना 02
इही बीच मुख्यमंत्री भूपेश बघेल ह बिरनपुर घटना ल लेके कहिन हे कि ए मामला म सोशल मीडिया म भ्रामक पोस्ट करइया मनखे मनके खिलाफ कड़ा कार्रवाई करे जाही। बिरनपुर घटना के बाद सोशल मीडिया म कुछु लोगन मनके गायब होय अउ मउत के अफवाह फैलाय गे रीहिस।
जानबा के अनुसार बेमेतरा जिला के बिरनपुर गांव म पाछू दिन दू पक्ष के बीच होय विवाद म एक झिन जवान लईका के मउत होगे रीहिस। उंहे काली गावं के तीर म दू झिन आने मनखे मनके शव बरामद करे गे रीहिस। अब पुलिस ह मामला के जांच करत हे।
इही बीच मुस्लिम समाज के लोगन मन ह रायपुर कलेक्टर ल ज्ञापन सांपके बिरनपुर गांव म होय दू झिन लोगन के हत्या के आरोपी मन ल गिरप्तार करे के मांग करे हे। एति बिरनपुर घटना ल देखत हुए महासमुंद जिला म घलो प्रशासन कोति ले धारा एक सौ चवालिस लागू कर दे गेहे। जेखर चलत जिला म सभा, धरना प्रदर्शन, रैली अउ जुलूस उपर रोक रीही।
हैंडबॉल/शतरंज चैंपियनशिप
उत्तरप्रदेश के वाराणसी म नेशनल सीनियर वूमन हैंडबॉल चैंपियनशिप के आयोजन होइस । ए प्रतियोगिता म भारतीय रेलवे के महिला हैंण्डबॉल टीम म सुघ्घर प्रदर्शन करत हुए रजत पदक पाय हे। ए टीम म दक्षिण पूर्व मध्य रेलवे के चार झिन महिला खिलाड़ी मन ह भाग ले रीहिन। एमा कुमारी काजल पंकज संगवान निक्की अउ मीनू शामिल हरय।
उंहे राज्य स्तरीय अंडर-सेवंटीन शतरंज प्रतियोगिता ह उन्नीस ले इक्कीस अप्रैल तक दुर्ग म होवइया हे। जेमा भाग ले खातिर प्रवेश के आखरी तारीख सोला अप्रैल हे।
कोरोना दिशा निर्देश
प्रदेश भर म कोरोना संक्रमण के सरलग बाढ़त मामला ल देखत हुए स्वास्थ्य विभाग ह सबो जिला ल एखर ले बचे अउ एला रोके बर जरूरी दिशा निर्देश जारी करे हे। विभाग ह कोरोना के संभावित मरीज मनके सैंपल के जांच म तेजी लाय बर कीहिन हे । संगेसंग कोविड ले बचे खातिर जरूरी प्रचार प्रसार के घलो निर्देश दीन हे।
स्वास्थ्य विभाग ह सर्दी ख्ांसी ले पीड़ित मनखे मनके सरलग देखरेख करे अउ अइसन मरीज मन ल कोरोना जांच के घलो निर्देश दीन हे। संगेसंग अइसन जिला जिहां कोरोना जांच के संख्या कमती हरय, उंहा जांच ल बढ़ाय बर केहे हे। उंहें हरएक जिला म हर रोज कम से कम सौ ठिन सैंपल के जांच करे बर कहे गेहे। विभाग ह सबो जिला ल कोरोना संक्रमण के इलाज बर अस्पताल मन म बिस्तर, ऑक्सीजन, आईसीयू, वेंटिलेटर अउ दवाई के उपलब्धता सुनिश्चित करे बर घलो निर्देश दीन। संगेसंग लोगन मन ल भीड़भाड़ वाले जाय ले बचे बर केहे हे।
इही बीच प्रदेश म काली कोरोना संक्रमण के दू सौ चौसठ ठिन नवा मामला आगू आय हे। रायपुर जिला म सबले जादा चौवन झिन मरीज मिले हे, त उंहे राजनांदगांव जिला म छब्बीस अउ सरगुजा जिला म इकतीस झिन लोगन मन संक्रमित पाय गेहे। अभी के बेरा म प्रदेश के औसत पॉजीटिवीटी दर छै दशमलव तीन पांच प्रतिशत होगे हे अउ सात सौ सत्ताईस झिन मरीज मनके इलाज प्रदेश के कतकोन अस्पताल अउ होम आइसोलेशन म चलत हे।
ओति बीजापुर जिला के बाल आश्रम हिंगुम अउ छोटेपल्ली म अठारा झिन लईका मन कोरोना ले संक्रमित पाय गेहे। भैरमगढ़ के बीएमओ संदीप कश्यप ह बताइन कि सबो लईका मन ल क्वारंटाइन कर दे गेहे।
स्वास्थ्य समीक्षा
राज्य सरकार ह आयुष्मान भारत प्रधानमंत्री जन आरोग्य योजना अउ डॅाक्टर खूबचंद बघेल स्वास्थ्य सहायता योजना के तहत अस्पताल ल क्लेम राशि के भुगतान के समीक्षा हर तीन महीना म करे के निर्देश दीन हे। स्वास्थ्य अउ परिवार कल्याण विभाग कोति ले तीन दिन के समीक्षा बइठका काली ले राजधानी रायपुर म शुरू होइस। बइठक म स्वास्थ्य विभाग डहार ले चलत कतकोन योजना अउ कार्यक्रम के समीक्षा करे गीस। संगेसंग चालू वित्तीय बछर के कार्ययोजना उपर घलो गोठबात होइस।
आदिवासी परब सम्मान निधि
मुख्यमंत्री भूपेश बघेल ह काली तेरा अप्रैल के जगदलपुर म होवइया भरोसे का सम्मेलन म मुख्यमंत्री आदिवासी परब सम्मान निधि योजना के शुभारंभ करइया हे। ए मउका म श्री बघेल ह बस्तर संभाग के एक हजार आठ सौ चालीस ठिन ग्राम पंचायत ल पहिली किस्त के रूप म पांच-पांच हजार रूपिया दीही। ए योजना के चलत आदिवासी परब अउ तिहार के आयोजन बर राज्य शासन डहार ले ग्राम पंचायत ल अनुदान दे जाही।
मुख्यमंत्री आदिवासी परब सम्मान निधि योजना के चलत अनुसूचित क्षेत्र के गांव म जनजाति के उत्सव मेला, मड़ई जात्रा परब, सरना पूजा, देवगुड़ी, नवाखाई, छेरछेरा, अख्ती, हरेली, जइसन तिहार अउ संस्कृति ल संरक्षित करे के उद्देश्य ले हरएक ग्राम पंचायत ल हर बछर दस हजार रूपिया के अनुदान राशि दू ठिन किस्त म दे जाही।
अपन बस्तर प्रवास के बेरा मुख्यमंत्री ह काली एक सौ उनतीस करोड़ रूपिया के आने आने विकास काम के लोकार्पण अउ भूमिपूजन घलो करइया हे। एमा चित्रकोट जलप्रपात म लाईट अउ साउण्ड शो अउ सात ठिन नलजल योजना समेत कतकोन काम शामिल हे।
मन की बात-भाजपा कार्यक्रम
मन की बात कार्यक्रम के सौ ठिक एपिसोड पूरा होय म भारतीय जनता पार्टी के प्रदेश इकाई डहार ले कार्यक्रम करे जाही। भाजपा ह सौ के संख्या म लोगन मनके संग ए एपिसोड ल सुने बर कार्यक्रम करही। एखर बारे म काली भाजपा प्रदेश कार्यालय कुशाभाउ ठाकरे परिसर म संगठन जिला प्रभारी अउ सह प्रभारी मनके बइठका होइस। जेमा पार्टी के प्रदेश अध्यक्ष सांसद अरूण साव क्षेत्रीय संगठन महामंत्री अजय जामवाल, प्रदेश संगठन महामंत्री पवन साय, प्रदेश महामंत्री केदार कश्यप अउ भाजपा प्रदेश उपाध्यक्ष शिवरतन शर्मा ह मौजूद रीहिन।