बेमेतरा जिला के बिरनपुर गांव म दू पक्ष के बीच होय विवाद म मउत होय युवक के परिवार के एक सदस्य ल राज्य सरकार कोति ले सरकारी नौकरी दे जाही। मुख्यमंत्री भूपेश बघेल ह छत्तीसगढ़ प्रदेश साहू संघ के पदाधिकारी मनके भेंट के बाद ए फइसला लीन। मुख्यमंत्री ह पीड़ित परिवार ल दस लाख रूपिया के सहायता रासि देके घलो घोसना करीन। श्री बघेल ह कमिश्नर के अगुवई म घटना के उच्च स्तरीय प्रशासकीय जांच कराय के निरदेस के संग हफ्ता भर के भीतरी जांच रिपोर्ट दे बर किहीन हे। मुख्यमंत्री ह प्रदेसवासी मन ले सांति अउ सद्भावना बनाय राखे के अपील करीन।
इही बीच, बिरनपुर गांव तीर दू झन के सव मिले हे। दूनों मृतक के सिर म चोट के निसान पाय गेहे। पुलिस अधीक्षक आई. कल्याण एलेसेला ह सव मिले के पुष्टि करत बतईन कि पुलिस मामला के जांच करत हे अउ सव ल पोर्स्टमार्टम बर जिला अस्पताल भेजे गेहे। बिरनपुर म सुरक्षा ल देखत बड़ संख्या म पुलिस बल तैनात हवय। कलेक्टर अउ जिला दंडाधिकारी कोति ले आदेस जारी करके सांति, कानून व्यवस्था अउ सुरक्षा बनाय राखे बर बेमेतरा जिला म धारा एक सौ चवालीस लागू करे गेहे। बिरनपुर घटना के बाद राज्य सरकार ह जम्मों कलेक्टर अउ पुलिस अधीक्षक मन ल अपन जिला म कानून व्यवस्था बनाय राखे के निरदेस दीन हे।
मुख्यमंत्री भूपेश बघेल ह घलो आज उच्च स्तरीय बइठका लेके प्रदेस म कानून व्यवस्था के समीक्षा करीन अउ अधिकारी मन ल ए संबंध म जरूरी निरदेस दीन। बिरनपुर घटना ल लेके काली प्रदेस बंद के संगेसंग भारतीय जनता पार्टी ह राज्य के कांग्रेस सरकार उपर तुष्टिकरण के राजनीति करे के आरोप लगावत किहीन कि छत्तीसगढ़ आपातकाल के स्थिति ले गुजरत हे। उहें, प्रदेस कांग्रेस ह भाजपा के तुष्टिकरण के आरोप ल हास्यास्पद बतईन।
प्रधानमंत्री-नियुक्ति पत्र
प्रधानमंत्री नरेन्द्र मोदी बिरस्पत के वीडियो कान्फ्रेंसिंग ले करीबन इकहत्तर हजार भर्ती होय नवा लोगन ल नियुक्ति पत्र बांटही। ए बेरा प्रधानमंत्री लोगन ल संबोधित करही। देसभर ले चुने गे लोगन के नियुक्ति भारत सरकार के कई ठिन विभाग म आने-आने पद म होही।
कोविड-बैठक
प्रदेस म कोरोना संक्रमण के बाढ़त मामला ल देखत स्वास्थ्य विभाग ह तियारी सुरू कर देहे। मुख्यमंत्री भूपेश बघेल ह आज उच्च स्तरीय बइठका लेके प्रदेस म कोरोना संक्रमण के स्थिति के समीक्षा करीन। बइठका म मुख्यमंत्री ह अधिकारी मन ल कोरोना के बाढ़त संक्रमण के बीच पूरा तियारी राखे अउ टेस्टिंग ल बढ़ाय के निरदेस दीन।
उहें, स्वास्थ्य सचिव ह जम्मों जिला कलेक्टर मन ल चिट्ठी लिखके कोरोना संक्रमण के रोकथाम के संबंध म जरूरी उपाय अपनाय बर किहीन हे। एमा प्रदेसभर के जम्मों सरकारी अस्पताल म मॉकड्रिल करके जरूरी उपाय अउ तियारी के संबंध म जानकारी ले गीस।
इही बीच, प्रदेस म काली दू हजार इक्यासी सैम्पल के जांच म तिरानवे मनखे कोरोना संक्रमित पाय गीन। ए मरीज चौदह ठिन जिला म मिले हे। प्रदेस के छह जिला म कोरोना के सक्रिय मरीज नइ हे। अभी प्रदेस म कोरोना के पांच सौ ग्यारह मरीज के इलाज आने-आने अस्पताल या होम आइसोलेशन म चलत हे। प्रदेस के पॉजिटिविटी दर अभी चार दशमलव दू प्रतिसत हवय।
उद्योग नीति
राज्य सरकार ह प्रदेस के बंद अउ बीमार उद्योग बर बिसेस निवेस प्रोत्साहन नीति दू हजार उन्नीस लागू करे हे। एमा बंद अउ बीमार उद्योग ल बने ढंग ले चलाय जा सकही। एखर संगेसंग निर्यात म बढ़वार अउ कृषि समेत आने उत्पाद के प्रसंस्करण अउ भंडारण ल प्रोत्साहित करे बर लॉजिस्टिक्स नीति-दू हजार बाईस घलो लागू करे गेहे। एमा उद्योग मन म पूंजी लगाय म ब्याज अनुदान समेत आने छूट दे जावत हे।
आप-राष्ट्रीय पार्टी
भारत निर्वाचन आयोग ह आम आदमी पार्टी ल राष्ट्रीय पार्टी के दर्जा देहे। उहें, तृणमूल कांग्रेस, भारतीय कम्युनिस्ट पार्टी अउ राष्ट्रवादी कांग्रेस पार्टी ले राष्ट्रीय पार्टी के दर्जा वापिस ले लेहे। निर्वाचन आयोग ह काली जारी अपन आदेस म किहीन कि गुजरात म राज्य स्तरीय पार्टी के रूप म मान्यता मिले के बाद आम आदमी पार्टी चार राज्य – दिल्ली, पंजाब, गोवा अउ गुजरात म मान्यता प्राप्त राज्य स्तरीय पार्टी बन गेहे। आम आदमी पार्टी ह राष्ट्रीय पार्टी के रूप म मान्यता के पात्रता सरत ल पूरा करे हे।
सेना भर्ती परीक्षा
भारतीय सेना म भर्ती बर ज्वाइन इंडियन आर्मी के वेबसाइट म रजिस्ट्रेशन करइया उम्मीदवार मन बर ऑनलाईन परीक्षा के तारीख के घोसना कर दे गेहे। आने-आने श्रेणी बर ऑनलाइन परीक्षा सत्रह ले छब्बीस अप्रैल के बीच होही। हरेक दिन ऑनलाइन परीक्षा तीन पाली म होही। उम्मीदवार मन अपन प्रवेश पत्र भारतीय सेना के वेबसाइट ले डाउनलोड कर सकथे। छत्तीसगढ़ म ऑनलाईन परीक्षा बर तीन ठिन केंद्र- रईपुर, भिलाई अउ बिलासपुर म बनाय गेहे।
सड़क सुरक्षा बैठक
प्रदेस म रद्दा दुर्घटना रोके बर सड़क सुरक्षा अउ जन-जागरूकता म बिसेस जोर दे जाही। मुख्य सचिव अमिताभ जैन ह सड़क सुरक्षा के राज्य स्तरीय समिति के बइठका म परिवहन अउ उंखर ले जुड़े विभाग ल ए संबंध म जरूरी कार्रवाई करे के निरदेस दीन। ओमन किहीन कि रद्दा दुर्घटना झन होवय एखर बर बने परयास जरूरी हे। मुख्य सचिव ह अधिकारी मन ल सड़क सुरक्षा बर कार्ययोजना बनाके कार्यवाही करे बर किहीन। अंतर विभागीय लीड एजेंसी सड़क सुरक्षा के अधिकारी संजय शर्मा ह बतईन कि एसो जनवरी ले मार्च तक सबले जादा दुर्घटना बलौदाबाजार, धमतरी, मुंगेली, बालोद, कबीरधाम अउ जशपुर जिला म होय हे। रद्दा दुर्घटना झन होवय एखर बर यातायात सुरक्षा अउ जागरूकता कारीकरम करे जात हे।
जल स्वच्छता मिशन
जल जीवन मिशन म बछर दू हजार बाईस-तेईस म राज्य के उन्नीस हजार दू सौ सत्रह गांव म ‘हर-घर जल‘ पहुंचाय के लक्ष्य राखे गेहे। मुख्य सचिव अमिताभ जैन के अगुवई म मंत्रालय म राज्य जल अउ स्वच्छता मिशन के शीर्ष कमेटी के बइठका म ए जानकारी दे गीस। बइठका म जल जीवन मिशन म नल जल योजना के काम अउ वाटर सप्लाई समूह जल प्रदाय योजना ल बने असन चलाय बर प्रारूप अउ ओमा थोरबहुत सुधार के संबंध म चर्चा करे गीस। बइठका म विभागीय अधिकारी मन ल जल जीवन मिशन के संबंध म जरूरी निरदेस दे गीस।
स्कूली बच्चे-क्वीज प्रतियोगिता
प्रदेस के स्कूल पढ़ईया लइका मन बर भारतीय रिजर्व बैंक कोति ले ‘‘वित्तीय साक्षरता‘‘ बिसय म अखिल भारतीय क्वीज प्रतियोगिता अप्रैल के तीसर सप्ताह म होही। एमा सरकारी अउ म्युनिसपल स्कूल के आठवीं, नौवीं अउ दसवीं कक्षा के लइका मन भाग लीहीं। क्वीज प्रतियोगिता के आयोजन विद्यालय, संकुल विकासखंड, जिला, राज्य अउ राष्ट्रीय स्तर म होही। पहिली चरण म विद्यालय, संकुल अउ विकासखंड स्तर म अउ दूसर चरण म जिला, राज्य अउ राष्ट्रीय स्तर म प्रतियोगिता राखे जाही।
होम्योपैथी दिवस
विश्व होम्योपैथी दिवस म आयुष विभाग कोति ले रईपुर म सासकीय होम्योपैथी चिकित्सा अधिकारी मन बर ‘‘वेलनेस में होम्योपैथी की भूमिका‘‘ बिसय म एक दिवसीय राज्य स्तरीय प्रसिक्षण राखे गीस। आयुष विभाग के संचालक पी. दयानंद ह प्रसिक्षण कारीकरम म बोलत किहीन कि अभी के समय म होम्योपैथी विश्व म दूसर सबले जादा उपयोग म अवइया पद्धति हरय। प्रदेस म सासकीय होम्योपैथी चिकित्सक मन कोति ले बने काम करे जात हे। कतकोन किसम के बीमारी के इलाज एमा होवत हे। कारीकरम म कोलकाता ले आय मुख्य प्रसिक्षक डॉक्टर आशीष कुमार घोष ह प्रतिभागी चिकित्सा अधिकारी मन ल हेल्थ एंड वेलनेस सेंटर म होम्योपैथी के उपयोग के संबंध म जानकारी दीन।
सुकमा-राज मेला
सुकमा जिला म राज मेला धूमधाम ले मनाय गीस। ए मेला बारह बछर म लगथे। एमा चार सौ ले जादा गांव ले देव विग्रह पहुंचीन, जिखर सुकमा राज परिवार के सदस्य अउ गांव के लोगन मन ह सुवागत करीन। आबकारी मंत्री कवासी मेला घलो ए मेला म संघरीन अउ जिलावासी मन ल मेला के बधाई दीन।