केन्द्रीय गृहमंत्री ट्रॉफी सम्मान बर पुलिस ट्रेनिंग स्कूल-पीटीएस माना के चयन करे गेहे। ए पुलिस ट्रेनिंग स्कूल के चयन बछर दू हजार इक्कीस-बाईस बर बेस्ट ट्रेनिंग संस्थान के रूप म करे गेहे। राज्य के पुलिस महानिदेशक अशोक जुनेजा ह पीटीएस माना के चयन म राज्य के पुलिस अधिकारी अउ कर्मचारी मन ल बधाई दीन।
बेमेतरा विवाद-छत्तीसगढ़ बंद
बेमेतरा जिला के बिरनपुर गांव म काली दू पक्ष के बीच होय विवाद के बाद एक युवक के मउत के मामला म विश्व हिन्दू परिषद ह काली दस अप्रैल के छत्तीसगढ़ बंद के आह्वान करे हे। आज रईपुर म परिषद के कार्यकारी अध्यक्ष चंद्रशेखर वर्मा ह पत्रकारवार्ता म किहीन कि एखर बर जम्मों व्यापारी अउ संगठन मन ले समर्थन मांगे गेहे। बंद के दउरान विश्व हिन्दू परिषद के कार्यकर्ता मन चक्काजाम घलो करही।
घटना के विरोध म आज सर्व हिन्दू समाज के लोगन मन ह पुलिस प्रसासन के खिलाफ नारेबाजी करीन अउ स्थानीय मंत्री मनके पुतला दहन करीन।
खबर के मुताबिक बेमेतरा जिला के बिरनपुर गांव म काली दू पक्ष के बीच होय विवाद म एक झिन युवक के मउत होगे रिहीस। उहें, चार झिन आने लोगन घायल होगे रिहीन। घटना के बाद मामला के जांच बर पहुंचे पुलिस बल उपर घलो पथराव करे गीस, जेमा उप निरीक्षक बी.आर.ठाकुर गंभीर रूप ले घायल होगीन। ए मामला म पुलिस ह ग्यारह झिन आरोपी मन ल गिरफ्तार करे हे। ए घटना के बाद ले बिरनपुर गांव समेत आसपास के इलाका म बैरीकेट्स लगाके निगरानी बढ़ा देहे। उहें, बाहर ले अवइया लोगन मनके प्रवेस बंद कर दे गेहे। जिला म तनाव के स्थिति ल देखत कलेक्टर पदुम सिंह एल्मा अउ पुलिस अधीक्षक आर. कल्याण समेत आने जिला के पुलिस अधिकारी मोर्चा संभाले हे।
इही बीच, दुरूग सांसद विजय बघेल अउ पूर्व विधायक लाभचंद बाफना समेत भाजपा के आने-आने पदाधिकारी मन ह आज मृत युवक के परिजन मन ले भेंट करीन।
माओवादी समाचार
सुकमा जिला म आज पुलिस अउ माओवादी मनके बीच मुठभेड़ होय के खबर आगू आय हे। ए मुठभेड़ म पुलिस ह तीन ले चार माओवादी मनके घायल होय के दावा करे हे। दोरनापाल थाना क्षेत्र ले करीबन बीस किलोमीटर दूर पालामड़गु इलाका म काली माओवादी मन ह तीन व्यापारी ले लूटपाट अउ मारपीट करे रिहीन। ए घटना म एक झिन व्यापारी के मउत होगे। उहें, दू झिन आने व्यापारी घायल होगे हे, जिखर इलाज दोरनापाल के अस्पताल म चलत हे। मारपीट के घटना के बाद माओवादी मन व्यापारी के मोटरसाइकिल म आगी लगा दीन। उहें, उंखर सामान अउ पइसा ल घलो लूट लीन।
घटना के सूचना मिले के बाद पुलिस बल ल रवाना करे गीस। ए दउरान माओवादी मन ह पुलिस बल उपर फायरिंग सुरू कर दीन। दूनों कोति ले होय फायरिंग के बाद माओवादी मन भाग गे। बाद म घटनास्थल के तलासी के दउरान पुलिस ह व्यापारी मन ले लूटे सामान, एक मोटरसाइकिल अउ माओवादी जिनीस बरामद करीस।
ईस्टर
देसभर म आज ईस्टर मनाय जावत हे। ए बेरा म राष्ट्रपति द्रौपदी मुर्मु, उप-राष्ट्रपति जगदीप धनखड़ अउ प्रधानमंत्री नरेन्द्र मोदी ह लोगन मन ल सुभकामना दीन। दुनियाभर म गुड फ्राइडे के बाद अवइया इतवार ल ईस्टर के रूप म मनाय जाथे।
ऐति, राजधानी रईपुर समेत प्रदेसभर म आज ईस्टर म लोगन मन ह गिरिजा घर म बिसेस प्रार्थना सभा करीन अउ कब्रिस्तान पहुंचके पुरखा मनके कब्र म पुष्पांजलि अर्पित करीन।
भेंट-मुलाकात
मुख्यमंत्री भूपेश बघेल ह भिलाई विधानसभा क्षेत्र के खुर्सीपार म राखे गे भेंट-मुलाकात कार्यक्रम म क्षेत्र के विकास बर कतकोन घोषणा करीन। ओमन किहीन कि टाउनशिप एरिया के रहवासी अउ जउन लोगन मनके बीएसपी के जमीन म घर बने हे, ओमन ल घलो बिजली बिल हाफ योजना के लाभ दे जाही। एखर बर कैबिनेट के अवइया बइठका म प्रस्ताव लाय जाही।
श्री बघेल ह किहीन कि एक हजार महिला मन ल रोजगार देवाय म भिलाई म गारमेंट फैक्ट्री सुरू करे जाही। उहें, बीपीओ कॉल सेंटर घलो सुरू करे जाही, जेखर ले पांच सौ युवा मन ल रोजगार मिलही। श्री बघेल ह हुडको म क्रिकेट स्टेडियम बनाय बर डेढ़ करोड़ अउ सर्व समाज नागरिक भवन निर्माण बर तीन करोड़ रूपिया के रासि मंजूर करीन। ए मउका म मुख्यमंत्री ह किहीन कि खुर्सीपार के सासकीय आई.टी.आई. ल स्वामी आत्मानंद उत्कृष्ट आई.टी.आई. के तहत संचालित करे जाही अउ इहां नवा ट्रेड सुरू करे जाही।
स्कूल शिक्षा मंत्री-लोकार्पण
स्कूल शिक्षा मंत्री डॉक्टर प्रेमसाय सिंह टेकाम ह मोहला-मानपुर-अंबागढ़ चौकी के करमतरा गांव म बने नवा हाईस्कूल भवन अउ आलकन्हार गांव म नवा सासकीय उच्चतर माध्यमिक विद्यालय भवन के लोकार्पण करीन। ए मउका म श्री टेकाम ह करमतरा गांव म हायर सेकेंडरी स्कूल के उन्नयन करे के संग उहां कन्या छात्रावास बनाय के घोसना करीन। ए मउका म स्कूल सिक्षा मंत्री ह नवोदय, प्रयास, एकलव्य अउ नीट के परीक्षा पास करइया विद्यार्थी अउ उत्कृष्ट कार्य करइया गुरूजी मन ल सम्मानित करीन।
उहें, श्री टेकाम ह बालोद जिला के प्राथमिक शाला चिटौद के सताब्दी समारोह म घलो सामिल होईन। ए मउका म ओमन प्राथमिक साला अउ पूर्व माध्यमिक साला म दू-दू उपरहा कमरा के निर्माण अउ प्राथमिक साला चिटौद म डिजिटल क्लास सुरू करे के घोसना करीन।
खेलो इंडिया-प्रशिक्षण
केन्द्र सरकार के खेलो इंडिया योजना म जांजगीर-चांपा जिला के हॉकी प्रशिक्षण केन्द्र म आज ट्रायल के माध्यम ले छत्तीस खिलाड़ी मनके चयन करे गीस। एमा अट्ठारह बालक अउ अट्ठारह बालिका सामिल हे। जउन मन ल चार बछर तक हॉकी के प्रसिक्षण दे जाही।
खबर के मुताबिक केन्द्र सरकार के खेलो इंडिया योजना के तहत जांजगीर-चांपा जिला के टी.सी.एल. महाविद्यालय म हॉकी प्रसिक्षण केन्द्र बनाय के मंजूरी दे गेहे।
रबी फसल-बोनी
प्रदेस म ए बछर रबी फसल के रकबा म पांच प्रतिसत के बढ़ोतरी होय हे। अब तक 19 लाख 36 हजार हेक्टेयर क्षेत्र म रबी फसल के बोनी करे जा चुके हे, जउन ए सीजन बर निर्धारित उन्नीस लाख पच्चीस हजार हेक्टेयर क्षेत्र के लक्ष्य के एक सौ एक प्रतिसत हवय। प्रदेस म पाछु साल रबी सीजन म अट्ठारह लाख तीस हजार हेक्टेयर क्षेत्र म खेती करे गे रिहीस।
कैदी-आत्महत्या
जांजगीर-चांपा जिला जेल म एक कैदी ह फांसी लगाके आत्महत्या कर लीस। चार दिन पहिली ही जिला अउ सत्र न्यायालय ह दुष्कर्म के मामला म ए कैदी ल बीस साल के सजा सुनाय रिहीस। बताय जात हे कि ए कैदी पन्द्रह मई दू हजार बाईस ले जेल म सजा काटत रिहीस। मृतक कैदी खैरा गांव के रहइया रिहीस।
मोहन साहू-निधन
भिलाई के वरिष्ठ पत्रकार मोहन साहू के आज निधन होगे। आज बिहनिया अचानक उंखर तबीयत बिगड़ के बाद ओमन ल भिलाई के एक निजी अस्पताल म भर्ती कराय गीस, जिहां इलाज के दउरान उंखर मउत होगे। ओमन पाछु तीन दसक ले आने-आने अखबार म अपन सेवा दीन। उंखर अंतिम संस्कार काली गुंडरदेही के तवेरा गांव म करे जाही।
मुख्यमंत्री भूपेश बघेल ह वरिष्ठ पत्रकार मोहन साहू के आकस्मिक निधन म गहरा दुख जताय हे।
कोरोना समाचार
प्रदेस म कोरोना संक्रमण के मामला बढ़त हे। काली प्रदेस म दू हजार एक सौ तिरपन सैंपल के जांच करे गीस, जेमा 81 मनखे कोरोना संक्रमित पाय गीस। सबले जादा 27 मरीज रईपुर जिला म मिलीस। उहें, दुरूग अउ राजनांदगांव जिला म आठ-आठ मरीज के पहिचान करे गेहे। ए बेरा चार सौ बयालीस मरीज मनके इलाज प्रदेस के आने-आने अस्पताल अउ होम आइसोलेशन म चलत हे।