भेंट-मुलाकात कार्यक्रम के तहत मुख्यमंत्री भूपेश बघेल ह आज दुरूग जिला के वैशाली नगर विधानसभा क्षेत्र म पैंतालीस करोड़ रूपिया ले जादा के आने-आने विकास कार्य के लोकार्पण अउ भूमिपूजन करीन। ए मउका म मुख्यमंत्री ह जवाहर नगर स्पोटर्स काम्पलेक्स म बॉक्सिंग, टेबल टेनिस अउ वॉलीबॉल अकादमी सुरू करे के संघरा सासकीय उच्चतर माध्यमिक साला कैम्प के स्वामी आत्मानंद अंग्रेजी माध्यम स्कूल के रूप म संचालन करे जाय के घोसना करीन।
उहें, श्री बघेल ह मुख्यमंत्री स्लम स्वास्थ्य योजना के तहत चार ठिन मोबाइल मेडिकल यूनिट के सुभारंभ करीन। मोबाइल मेडिकल यूनिट म पांच लैब टेस्ट जोड़े गेहे। एमा सिकलिंग, विडाल, ब्लड ग्रुप, यूपीटी प्रेग्नेंसी अउ मलेरिया टेस्ट सामिल हरय। एखर अलावा मुख्यमंत्री ह वैशाली नगर विधानसभा क्षेत्र म गुरूनानक जी सरोवर करा मिलेट्स कैफे के घलो लोकार्पण करीन।
पहाड़ी कोरवा आत्महत्या-भाजपा जांच
जशपुर जिला म बगीचा विकासखंड के ग्राम पंचायत सामरबार के अंतर्गत झुमरीडुमर गांव म विशेष पिछड़ी जनजाति पहाड़ी कोरवा परिवार के चार सदस्य मनके सामूहिक आत्महत्या करे जाय के घटना के जांच भारतीय जनता पार्टी तथ्योन्वेषण समिति ह पूरा कर लेहे। जांच समिति ह अपन रिपोर्ट म खुलासा करे हे कि ए सामूहिक आत्महत्या भूख अउ गरीबी के सेती होय हे।
नेता प्रतिपक्ष नारायण चंदेल, पूर्व राज्यसभा सांसद रामविचार नेताम अउ सरगुजा संभाग प्रभारी संजय श्रीवास्तव ह आज पत्रकारवार्ता म बतईन कि जांच दल ह गांव के दउरा करके कई ठिन महत्वपूर्ण तथ्य पाय हे, जेमा ए मिलीस कि ए परिवार भूख अउ गरीबी ले परेसान रिहीस। परिवार ल कोनो सासकीय योजना के लाभ लंबा समय ले नइ मिलत रिहीस। गांव म पैंतीस पहाड़ी कोरवा जनजाति अउ पांच भुईहार जाति के परिवार रहिथे। राज्य सासन डहार ले अब तक पीड़ित परिवार के हित संरक्षण बर कोनों घोसना नइ करे गेहे। भाजपा नेता मन मांग करीन कि मृतक परिवार बर तुरते राहत रासि देहे के संगेसंग आदिवासी क्षेत्र म पोषण अउ चिकित्सा के अभाव म मृत लइका मनके परिवार ल पर्याप्त मुआवजा, भोजन अउ इलाज के सुविधा सुनिश्चित करे जाय।
विवाद-मौत
बेमेतरा जिला म साजा थाना क्षेत्र के बिरनपुर म दू पक्ष के बीच होय एक विवाद म एक मनखे के मउत होगे। उहें, चार झिन दूसर मनखे मन घायल होगे। हमर सवांददाता ले मिले जानकारी के अनुसार दू लइका मनके बीच कोन्हों बात बर विवाद होगे। ए विवाद अतका बाढ़ गीस कि दू पक्ष आपस म भीड़ गीन। ए दउरान एक पक्ष ह दूसर पक्ष उपर धारदार हथियार ले हमला कर दीस। ए घटना म एक मनखे के मउत होगे। घटना के सूचना मिले के बाद मौका म पहुंचे पुलिस टीम उपर घलो पथराव करे गीस, जेमा एक झन पुलिसकर्मी घायल होगे।
दुर्ग रेंज के पुलिस महानिरीक्षक अउ बेमेतरा जिला के पुलिस अधीक्षक ह घलो मउका म पहुंच के स्थिति के जायजा लीन। सुरक्षा अउ सांति व्यवस्था बनाय रखे के सेती गांव म धारा-एक सौ चवालीस लागू कर दे गेहे। संघरा बड़का संख्या म सुरक्षा बल के जवान मन ल घलो तैनात करे गेहे।
कोरोना समाचार
देस म काली छह हजार एक सौ पचपन लोगन मन म कोविड संक्रमण के पुष्टि होइस। केन्द्रीय स्वास्थ्य मंत्रालय ह बतईन कि ए अवधि म दू हजार दू सौ मरीज संक्रमण मुक्त होईन। मंत्रालय ह केहे हे कि ए बेरा देस म इकतीस हजार ले जादा कोविड मरीज मनके इलाज चलत हे अउ स्वस्थ होय के दर अंठानवे दशमलव सात-चार प्रतिसत हरय।
ऐति, छत्तीसगढ़ म काली नौ सौ उनसठ सैंपल के जांच म तिहत्तर मनखे कोरोना संक्रमित पाय गीन। वर्तमान म राज्य के पॉजिटीविटी दर सात दशमलव छह एक प्रतिसत हरय। ए समय दू सौ अट्ठायासी मरीज मनके इलाज प्रदेस के आने-आने अस्पताल अउ होम आइसोलेशन म चलत हे।
स्टार्टअप पुरस्कार-आवेदन
प्रधानमंत्री नरेन्द्र मोदी ह नवाचारी मन ले राष्ट्रीय स्टार्ट-अप पुरस्कार दू हजार तेईस बर आवेदन करे के अपील करे हे। आज केन्द्रीय मंत्री पीयूष गोयल के ट्वीट के जवाब म प्रधानमंत्री ह किहीन कि नवाचारी उछाह बर स्टार्ट-अप अपन विचार के नवीनता ले लोगन मन ल प्रेरित करत हे। ओमन किहीन कि हमर स्टार्ट-अप देस के युवा शक्ति के भावना ल दर्साथे। ए पुरस्कार बर लोगन मन ‘‘स्टार्ट-अप इंडिया डॉट जीओवी डॉट इन‘‘ म आवेदन कर सकत हे।
कांग्रेस-कार्यकर्ता सम्मेलन
दंतेवाड़ा विधानसभा क्षेत्र के बचेली म काली नौ अप्रैल के कांग्रेस के विधानसभा स्तरीय कार्यकर्ता सम्मेलन आयोजित करे जाही। एमा सामिल होय बर अखिल भारतीय कांग्रेस कमेटी के सचिव अउ प्रदेस प्रभारी सप्तगिरी शंकर उल्का काली बस्तर पहुंचही। ओमन जगदलपुर होवत बचेली पहुंचही अउ दंतेवाड़ा विधानसभा स्तरीय कार्यकर्ता सम्मेलन म सामिल होय के बाद विधानसभा क्षेत्र के जोन, सेक्टर अउ बूथ कमेटी के अध्यक्ष अउ प्रभारी मन करा चर्चा करही।
माओवादी-आत्मसमर्पण
सुकमा जिला म दू झिन इनामी माओवादी मन आज पुलिस के आगू आत्मसमर्पण कर दीन। ए मन उपर आठ-आठ लाख रूपिया के इनाम घोसित रिहीस। आत्मसमर्पण करइया दूनों माओवादी के खिलाफ बस्तर कई ठिन हिंसक घटना म सामिल रेहे के आरोप हे। ए माओवादी मन ल राज्य सासन के पुनर्वास नीति के लाभ दे जाही।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘बलरामपुर-रामानुजगंज‘‘ जिला के बारे म जानकारी दे जाही।
अउ अब पेस हे मौसम के हाल..
मौसम विभाग ह अवइया दू दिन म छत्तीसगढ़ समेत मध्यप्रदेश, ओड़िशा, महाराष्ट्र अउ झारखंड म तेज हवा अउ गरज-चमक के संग छींटा पड़े के संभावना जताय हे। उहें, मौसम म अचानक आय बदलाव के सेती राजधानी रईपुर समेत प्रदेस के आने-आने जघा म पाछु चौबीस घंटा के दउरान तेज हवा के संग हल्का बरसात होईस। आजो घलो बिहनिया प्रदेस के कई ठिन इलाका मन म बादल छाय रिहीस। उहें, कुछेक जघा मन म हल्का बूंदाबांदी घलो होईस। एखर चलते तापमान म मामूली गिरावट दरज करे गेहे।
इही बीच, मौसम विभाग ह अवइया पांच दिन म प्रदेस के अधिकांश हिस्सा मन म अधिकतम तापमान म दू ले चार डिग्री सेल्सियस बढ़ोतरी के संभावना जताय हे।
अउ अब थोरकुन समाचार सार म-
– पहिली भारतीय स्वतंत्रता संग्राम अट्ठारह सौ संतावन के महानायक मंगल पांडेय के आज सहादत दिवस हरय। ए मउका म मुख्यमंत्री भूपेश बघेल ह ओमन ल नमन करीन हे।
– बीजापुर जिला के मिंगाचल स्थित सीआरपीएफ कैम्प म पदस्थ एक जवान के ह्दयाघात ले मउत होगे।
– सक्ती जिला के बाराद्वार थाना क्षेत्र के ठठारी गांव म ट्रैक्टर के टक्कर ले मोटर साइकिल सवार एक मनखे के मउत होगे। जबकि एक झिन दूसर मनखे गंभीर रूप ले घायल होगे।
– राष्ट्रीय व्यावसायिक प्रशिक्षण परिषद के अंतर्गत सत्र दू हजार तेईस ले आई.टी.आई. संबद्धता बर वर्तमान प्रचलित नियम के अंतर्गत ऑनलाइन आवेदन के सुविधा, नेशनल इंस्ट्रक्शनल मीडिया इंस्टीट्यूट पोर्टल म पच्चीस अप्रैल तक उपलब्ध रइही।
अउ
– महावीर जयंती के सेती जैन समाज डहार ले कोंडागांव जिला अस्पताल म रक्तदान सिविर के आयोजन करे गीस। ए दउरान लोगन मन कोति ले साठ यूनिट रक्तदान करे गीस।