भाजपा स्थापना दिवस
भारतीय जनता पार्टी आज अपन चौवांलिसवां स्थापना दिवस मनावत हे। ये मउका म प्रधानमंत्री नरेंद्र मोदी ह वीडियो कॉन्फ्रेंस के माध्यम ले पार्टी कार्यकर्ता मन ल संबोधित करीन। ओमन कीहिन कि सामाजिक न्याय केवल एक राजनीतिक नारा नो हय, बल्कि भारतीय जनता पार्टी बर ये ह आस्था के मूल मंत्र आय।
इही बीच छत्तीसगढ़ म घलो प्रदेश भाजपा डहार ले आज पार्टी के स्थापना दिवस म अलग अलग कार्यक्रम के आयोजन करे गीस। प्रदेश भाजपा कार्यालय कुशाभाउ ठाकरे परिसर म पूर्व मुख्यमंत्री अउ पार्टी के राष्ट्रीय उपाध्यक्ष डॅाक्टर रमन सिंह ह ध्वजारोहरण करीन।
मुख्यमंत्री भूपेश बघेल आज जशपुर जिला के बगीचा म आयोजित सरहुल पूजा महोत्सव म शामिल होइन। ए मउका म मुख्यमंत्री ह कहिन कि प्रकृति अउ धरती ल संरक्षित रखे बर राज्य सरकार लगातार प्रयास करत हे। ओमन कहिन कि राज्य सरकार डहार ले संचालित अलग अलग योजना मनले प्रदेश के गांव के तस्वीर बदलत हे। कार्यक्रम के दउरान मुख्यमंत्री ह विभिन्न विकास काम मन बर करीबन साठ लाख रूपिया देके घोषणा करीन। कार्यक्रम म जशपुर के स्थानीय प्रतिनिधि मन घलो शामिल होइन।
राष्ट्रपति द्रौपदी मुर्मू ह काली संझा राष्ट्रपति भवन म आयोजित दूसरइया नागरिक अलंकरण समारोह म ये बछर बर पचपन ठन पद्म पुरस्कार प्रदान करीन। एमा तीन ठन पद्म विभूषण, पांच ठन पद्म भूषण अउ सैंतालिस ठन पद्मश्री पुरस्कार शामिल हे। जीवन रक्षक ओआरएस घोल बनइया डॅाक्टर दिलीप महाल नॉबिस अउ उत्तर प्रदेश के पूर्व मुख्यमंत्री मुलायम सिंह यादव ल मरणोपरांत पद्मविभूषण ले अलंकृत करे गेहे। उंहे समाजसेवी सुधा मूर्ति, भौतिकविद् प्रोफेसर दीपक धर, कन्नड़ साहित्यकार डॅाक्टर एस.एल. भैरप्पा, अउ आध्यात्मिक गुरू त्रिदंड़ी चिन्ना जीयर स्वामीजी ल पद्मभूषण ले विभूषित करे गेहे। उन्नीस ठिन भाषा म गाना गवइया विख्यात गायिका वाणी जयराम ल मरणोपरांत पद्मभूषण सम्मान प्रदान करे गीस।
आज के समारोह म छत्तीसगढ़ के जाने माने नाचा कलाकार डोमार सिंह कुंअर अउ काष्ठ कला के माध्यम ले पूर्व माओवादी मनके पुनर्वास करइया शिल्पकार अजय कुमार मंडावी ल पद्मश्री ले सम्मानित करे गीस। एखर अलावा हाल ही म ऑस्कर पुरस्कार जितइया संगीतकार एम.एम. कीरावनी, सुपर थर्टी के संस्थापक शिक्षक आनंद कुमार अउ फिल्म अभिनेत्री रविना टंडन ल घलो पद्मश्री सम्मान ले विभूषित करे गेहे।
प्रदेश म संपत्ति कर जमा करे के अंतिम तिथि इकतीस मार्च ले बढ़ाके तीस अप्रैल कर देहे। राज्य सरकार ह नागरिक मनके हित म निर्णय लेवत हुए उनला एक महीना के अतिरिक्त अवसर देहे। ए संबंध म नगरीय प्रशासन अउ विकास विभाग ह सबो नगरीय निकाय मन ल परिपत्र जारी कर देहे। एमा केहे गेहे कि कोरोना संक्रमण ल देखत हुए नागरिक मन डहार ले कार्यालय म आके संपत्ति कर जमा करे के स्थिति म दू गज दूरी के पालन अनिवार्य रूप ले करे जाय।
प्रदेश के स्वामी आत्मानंद उत्कृष्ट विद्यालय म प्रवेश के प्रक्रिया आगामी दस अप्रैल ले शुरू करे जाही। एखर बर सेजेस पोर्टल म ऑनलाईन अउ ऑफलाईन दूनो माध्यम ले आवेदन स्वीकार करे जाही। ए बछर प्रदेश म एकसौ एक नवा स्वामी आत्मानंद अंग्रेजी माध्यम विद्यालय शुरू करे जात हे। प्रवेश बर आवेदन जमा करे के अंतिम तिथि पांच मई निर्धारित करे गेहे। जादा आवेदन प्राप्त होय के स्थिति म लॉटरी के माध्यम ले सीट के आबंटन पांच ले दस मई के बीच करे जाही।
लोक शिक्षण संचालनालय ह सबो जिला शिक्षा अधिकारी मन ल निर्देश जारी करत कीहिन हे कि ए बखत एक विद्यार्थी एक विद्यालय बर ही आवेदन कर सकही। एखरे संग ही ये विद्यालय म पहिली ले पढ़त विद्यार्थी मन ल छठवीं अउ नवमीं कक्षा म प्रवेश बर विशेष प्राथमिकता दे जाही। वोमन ल अलग ले आवेदन नइ करे बर लागय।
मुख्यमंत्री भूपेश बघेल के घोषणा के अनुसार अंग्रेजी अउ हिंदी माध्यम के विद्यालय मन म महतारी दुलार योजना के अंतर्गत कोरोना महामारी के कारण अनाथ होय लइका मन ल विशेष प्राथमिकता ले प्रवेश दे जाही। अइसना लईका मनके प्रवेश बर उंखर आवेदन के संग पालक के मृत्यु प्रमाण पत्र संलग्न करना अनिवार्य होही। अंग्रेजी माध्यम विद्यालय के हर कक्षा म खाली सीट मनके आधा सीट मन म छात्रा मन ल प्रवेश दे जाही। बालिका मनके प्रवेश कम होय ले बांचे सीट ल बालक मन ल दे जाही। उंहे आर्थिक रूप ले कमजोर पालक मनके लइका मन बर एक चौथाई सीट राखे गेहे। स्वामी आत्मानंद विद्यालय म पहिली कक्षा म प्रवेश बर विद्यार्थी के आयु आगामी इकतीस मई तक के स्थिति म पांच ले साढ़े छै बछर के बीच होना चाही।
प्रदेश म कोरोना संक्रमण के मामला एक घांव फेर बाढ़त हे। काली राज्य म सतरा सौ ले जादा सैंपल मनके जांच करे गीस। जेमा उनसठ झन मरीज कोरोना संक्रमित पाय गीस। सबले जादा सोला झिन मरीज रायपुर जिला म मिले हे। उंहे राजनांदगांव अउ बिलासपुर म दस-दस झन मरीज मनके पुष्टि होय हे। ए बखत दू सौ अड़तीस झन मरीज मनके इलाज प्रदेश के अलग-अलग अस्पताल अउ होम आइसोलेशन म चलत हे।
इही बीच कोंडागांव जिला म कोरोना के बाढ़त मामला ल देखत कलेक्टर ह जिला चिकित्सा अधिकारी के संग सामुदायिक स्वास्थ्य केंद्र के निरीक्षण करीन।
जांजगीर-चांपा जिला म गर्मी ल देखत हुए कलेक्टर ऋचा प्रकाश चौधरी ह जिला के सबो सरकारी स्कूल मन के समय म परिवर्तन करे के आदेश जारी करे हे। आदेश के अनुसार एक पाली के सबो शाला मन ह सोमवार ले शनिवार तक बीहनिया साढ़े सात ले साढ़े ग्यारा बजे तक संचालित होही। जेन स्कूल मन म दू पाली चलथे उंहा प्राथमिक अउ पूर्व माध्यमिक के कक्षा बीहनिया साढ़े सात ले साढ़े ग्यारा बजे तक लगही। उंहे हाइस्कूल अउ हायर सेकण्डरी के कक्षा साढ़े ग्यारा बजे ले संझा साढ़े चार बजे तक संचालित होही।
आज हनुमान जन्मोत्सव छत्तीसगढ़ समेत देशभर म पारंपरिक श्रद्धा अउ उल्लास के संग मनाये जात हे। हनुमान जयंती चैत्र महीना के पूर्णिमा म मनाये जाथे। ए अवसर म देशभर के हनुमान मंदिर म आज बीहनिया ले विशेष पूजा अर्चना के संग अनुष्ठान अउ भंडारा के आयोजन करे जात हे।
इही बीच केंद्रीय गृह मंत्रालय ह आज हनुमान जन्मोत्सव के तैयारी बर सबो राज्य म परामर्श जारी करे हे। मंत्रालय ह ये परामर्श रामनवमी समारोह के दउरान पश्चिम बंगाल अउ बिहार म होय झड़प के कुछ घटना के मद्देनजर एहतियात के तौर म जारी करे हे।
हज म जवइया आवेदक मन बर यात्रा के पहिली किस्त जमा करे के अंतिम तिथि बढ़ाके बारा अप्रैल कर दे गेहे। राज्य हज कमेटी के अध्यक्ष मोहम्मद असलम खान ह बताइन कि भारतीय हज कमेटी के प्राप्त निर्देश के अनुसार हज बर चुने गे आवेदक मन डहार ले यात्रा बर जमा करे गे राशि के पावती, चिकित्सा प्रमाण पत्र अउ पासपोर्ट जमा करे के अंतिम तिथि ल घलो चौदा अप्रैल तक बढ़ा दे गेहे।
बिलासपुर रेलवे बोर्ड के निर्देश म चलत ट्रेन मन म पत्थरबाजी के घटना के रोकथाम बर बिलासपुर रेल मंडल म जागरूकता अभियान चलाये जात हे। ये अभियान म युवा अउ लईका मन ल जागरूक करे बर विशेष ध्यान दे जात हे। एखर तहत मंडल के सबो रेल सुरक्षा बलके पोस्ट क्षेत्राधिकार म रेलवे लाइन के आसपात ग्राम पंचायत, नगर अउ कस्बा मन म जन प्रतिनिधि मनके माध्यम ले लोगन मन ल गाड़ी म पत्थर नइ फेके के अपील करे जात हे।
बंगाल के खाड़ी ले आवत नमी के सेती मौसम एक घांव फेर बदल गेहे। मौसम विभाग के अनुसार तमिलनाडु ले छत्तीसगढ़ तक एक द्रोणिका बने हुए हे।एखर असर ले आने वाला चौबीस घंटा के दउरान प्रदेश के कुछ जगा मन म हल्का बरसा होय अउ गरज चमक के संग छींटा पड़े के संभावना हे। ये दउरान अधिकतम तापमान म दू ले तीन डिग्री सेल्सियस कम हो सकत हे।
मौसम वैज्ञानिक ह बताइन कि अगले चार घंटा म प्रदेश के रायपुर, नारायणपुर, कोंडागांव, कांकेर, धमतरी, बालोद, राजनांदगांव, गरियाबंद, महासमुंद, बेमेतरा, जांजगीर, बलौदाबजार अउ रायगढ़ जिला के एक दू ठन जगा मन म गरज चमक के संग अंधड़ चले अउ वज्रपात होय के प्रबल संभावना हे।